Acts 16 - New Testament-et Akuzipigestun

Timothy‑m Maligtekangi Paul‑enkut

¹ Paul Derbe‑tkaq enkaam taagken nagneqaq Lystra‑mun, tamaani nallaqaa ugpeqaq yuuk aatqelghii Timothy‑meng. Naangallu ugpeqaalghii Jews‑a, naqam atanga Greek‑a.

² Ugpeqat qamaglluteng Lystra‑melnguutlu Iconium‑emelnguutlu akuzitkaqegkangat Timothy piniipiggniluku.

³ Paul‑em kelqesukaa Timothy kayutnguluku enkaam circumcise‑estekaa. Tawaten pistekaa tugukliisqelluku Jews‑enun, qayughllak tamaanlenguut Jews‑et liisimakegkangat atanga Greek‑ngulghii.

⁴ Taagken igleghanguluteng neghllagnun kaanneghmeggni ugpeqat qaatkutesqaqegkangit apostle‑etlu, Elder‑etlu liilightuusangllaqiitnun Jerusalem‑emi.

⁵ Enkaam ugpeqat wata ugpeqiighataghaqat, nulamanginaqatlu aghhutanga tamaghhaan.

Paul‑em Esghaghwaallgha Troas‑mi

⁶ Paul‑enkut igleghtekat akulegkenkun Phrygia‑mllu, Galatia‑mllu, qayughllak Agleghnalghiim Taghnegham ungipaghtesimangilkangi ungipameng Asia‑mi.

⁷ Tughwaaghluteng Mysia‑mun nagneghnaqegkaayalghiit Bithynia‑mun, iwernga Jesus‑em Taghneghagkenka pisneghitkii.

⁸ Enkaam Mysia naghughlluku tesamavek Troas‑mun pikat.

⁹ Unugmi tawani Paul‑em esghaghwaalleghqun esghaqaa yuuk Macedonia‑ghmii tagsighralghii. Yugem maniguutepiglluni pikaa, “Tagiluten Macedonia‑mun kayusiitaghtikut!”

¹⁰ Legan Paul‑em esghaghwaallghan kingunganeng yataaghqukut Macedonia‑mun pinaluta, qayughllak liigikegkefut Kiyaghneghem ungipaqisukanginkut Pinilghiineng Ungipaneng tamaani.

Lydia‑m Ugpellgha

¹¹ Enkaam telanangameng nangaqaghtukut Troas‑meng Samothrace‑mun. Unaamingani Neapolis‑mun piikut.

¹² Taagken quutkun kaatukut neghllagmun Philippi‑mun Macedonia‑melngughmun Rome‑eghmiit nelikiitnun. Qafsinat aghneghet tamaantukut.

¹³ Tamaansimaluta Sabbath‑ngughsagu mingllutem amigllagakun aanluta kiiwegnun piikut, Jews‑et tawani yughaataqnayukata. Aghnam ilangi tawantuteftut enkaam aqumuulluta aleghqughaput.

¹⁴ Ataasiq nagallghii Lydia‑nguftuq, Thyatira‑ghmii, akilpegaqayuk esnegrukegtameng qiipaghaghmeng, maniguutkayuk Kiyaghneghmun. Atanghem liigikestengngwaaqii Paul‑em akuzitangi Lydia‑mun enkaam ugpeqegkii.

¹⁵ Qamaglluteng nengllugutkullghiit paaptaayeyameng Lydia‑m aqelqangllaghiinkut, “Sumeghpesini ipapik ugpeghumakuma Ataneghqun, whangkunnitaghhnayanghitsii?” Enkaam sagiqusinkut ellngitnitukut.

Paul‑enkuk Silas‑enkuk Anusimingllaghvigmi

¹⁶ Ataasimi aghneghmi kiiwem esnenganilngughmun yughaatfigmun aglaamaluta, nallaghaghput qepghaghtelaaq aghnaghaq ilumikun tughneghalek. Taam tughneghaam uuknaliqutkestaqegkangi sangwaat sayaghqat sivutghulluki. Enkaam piliitestengita aklungighisiqngukangat.

¹⁷ Taam aghnaghaam maligsaaghiinkut Paul‑llu whangkuta akilghuumaghmi, “Ukut yuget qepghaghtekii Aangelleghpigaam Kiyaghneghem! Ungipaataqiisi naten yugulillengelleghqameng!”

¹⁸ Qafsinegllak aghneq tawaten piiq. Qenwatlu Paul‑em qinuyagulluku tughneghaq ilunganilnguq qiivluku pikaa, “Aatghakun Jesus Christ‑am qelghamken aanesqelluten ellnganeng!” Tawaninginaq tughneghaq ilunganeng aanegkaq.

¹⁹ Piliitestengita liigiksamegteggu allgeghututkesaghqaananiimatseng aghnaghaq, Paul‑enkuk Silas‑enkuk akuqaqagket. Qamughsiighmeng aglaatkagket igleghutistenun akilpegaghvigmelngughnun.

²⁰ Taagken igleghutistet aglaallukek Rome‑eghmiit nanqigtistengitnun pikiit, “Yugek ukuk Jew‑nguuk, seghleliighqiinguuk maani.

²¹ Apeghtughiiquk kiyaghtaalleghmeng whangkuta Rome‑eghmiini liilightuusamta iinghutkiitneng. Tamaaken apalluqluku apeghtuusiik atuqnaanghitaput.”

²² Enkaam yulghun ilatqaghtaalluni sughukagket Paul‑enkuk Silas‑enkuk. Nanqigtistet qelghutkagket aatkiik qesugumeng mataghqughluki anagulghesqellukek.

²³ Anaguleghtaaneghmeng taaqlukek anusimingllaghvigmun kanaghtekagket. Taagken anusimingllaghvigem umiilganun maghqatutngwaaghesqegkagket.

²⁴ Anusimingllaghvigem umiilgan tawaten kayagsatni iluklighpigaghmun qamavek kanaghtekakek. Taagken umughllagmeng unaghsimeng tukughusighlukek, maghqatkiit taakut tukughutet qapragyaghqaagpenakek.

²⁵ Nani tamaani unugem qukaani Paul‑enkuk Silas‑enkuk yughaamaagmek ilagaqak usuqilleghmeng Kiyaghneghmun, anusimingllaghat tawanlenguut nagatkagket.

²⁶ Nuuskagllagan nuna tuyepeghtaqaq, repall anusimingllaghvik tunemaghtuumaan aghulatkaa. Tawaninginaq amiget qelpeghaghtaatkat, anusimingllaghanengllu qiipraghutet ilefkaghaghtaatkat.

²⁷ Anusimingllaghvigem umiilga taghtughyalghiimi, amiget qelpatuteftut. Sumeghmini anusimingllaghat qimaguusimaniluki savigpani nusugluku ellmineng tuqunnaqegkaq.

²⁸ Iwernga Paul‑em iglagtupiglluni pikaa, “Tuqunnaqegpenang elpeneng qayughllak qamaglluta whaantutukut!”

²⁹ Anusimingllaghvigem umiilga keneghmeng tungsighluni iitqaghtekaq. Alingruughem ungelegsimaghmi Paul‑enkuk Silas‑enkuk manugkenkun segesqughtekaq.

³⁰ Taagken aanututkellukek aaptekakek, “Yugegni ukughtek, naten salunga yugulillengnayaghsinga?”

³¹ Pikaak, “Ugpeqigu Ataneq Jesus enkaam yugulillengellequten, nengllugutetenllu yugulillengellequt.”

³² Taagken Paul‑enkuk Silas‑enkuk ungipaqegkaak Ataneq ellnganunllu nengllugutanganunllu.

³³ Tawani unugmi anusimingllaghvigem umiilgan ughvughteqii taakuk yugek anagulellghegkenka kiingik. Taagken nengllugutkullghiit paaptaayenginaamaghmeng pikat.

³⁴ Paul‑enkuk Silas‑enkuk ellmeggnun aglaallukek neghestekagket. Nengllugutkullghiit quyateghllakat qayughllak ugpeqegkangat Kiyaghneq.

³⁵ Aghsagu Rome‑eghmiit nanqigtistengita kevgaqegkiit umiilwaateng ungipaasaghtiisqelluku anusimingllaghvigem umiilga whaten, “Paul‑enkuk Silas‑enkuk aanestikek.”

³⁶ Enkaam anusimingllaghvigem umiilgan Paul pikaa, “Nanqigtistet kayagutiistek aaneslamtegnguq enkaam aanelghaatek, aghulaqitek nekeggmellutek.”

³⁷ Iwernga Paul‑em umiilwaaghet pikii, “Rome‑eghmiingughngaamtung yugtuqami anaguleghtaakaqiinkung, talwa ipapighqutkegpenaan sameng anaggusimatfung. Taagken anusimingllaghiinkung. Enraghngam whaa maaten aksaqluku aanesnaqinkuung? Yeghlegillu! Ellmeggneng nanqigtistet tagiluteng aaneslinkung.”

³⁸ Paul‑em tawaten piyisteng umiilwaaghet ungipaasaghtuqiit nanqigtistet. Enkaam nanqigtistet alingegkat Paul‑enkuk Silas‑enkuk nagaqughlukek Rome‑eghmiingutkek.

³⁹ Taagken takulukek qivghuklukek aanestekagket anusimingllaghvigmeng, aghulaqesqegkagketlu.

⁴⁰ Enkaam Paul‑enkuk Silas‑enkuk anusimingllaghvigmeng aanyamek, Lydia‑nkunun pikak. Tawani laalighfikluki ugpeqat kayemluki aghulaqegkak.