Acts 15 - New Testament-et Akuzipigestun

Apostle‑et Agghillghat Jerusalem‑emi

¹ Taagken Judea‑meng ilangi yuget tagiluteng Antioch‑mun ugpeqanun apeghtughikat, “Yugulillengnaanghitusi wetkuqun circumcise‑ekufsi Moses‑em Liilightuusaan qelellghatun.”

² Iwernga Paul‑enkuk Barnabas‑enkuk elngaatall aaghtiiraaqiik taakut yuget apeghtuusiitneng. Enkaam ugpeqat nakmikegkiit Paul‑enkuk, Barnabas‑enkuk, ilangillu yuget Antioch‑meng pit, Jerusalem‑etesqelluki aapsaghtiisqelluki apostle‑etlu Elder‑etlu qerngaghmelnguut naliq apeghtuusaq elqughutngatanga.

³ Kayagsisteng Paul‑enkut igleghatkelluku Phoenicia‑kunllu, Samaria‑kunllu ugpeqat tamaanlenguut ungipaatkiit Gentile‑et Kiyaghneghmun qiivuusimaniluki, enkaam qamaglluteng ugpeqat quyateghllakat.

⁴ Kaasata Jerusalem‑emun apostle‑etlu, Elder‑etlu, ugpeqatlu upughatkiit. Taagken Paul‑enkut apeghlaataqaat Kiyaghneghem apeghiillgha ellmegteggun.

⁵ Ilangi ugpeqat Pharisees‑et nekevluteng pikat, “Tamaakut Gentile‑et yugulillengyaghqaanghitut wetkuqun circumcise‑elutengllu, qaatkullutengllu Moses‑em Liilightuusaanun.”

⁶ Taagken apostle‑etlu Elder‑etlu qerngughutkat agghitkennalukek taakuk.

⁷ Akuzitkenneghpagllakaat. Taagken Peter‑em nekevluni pikii, “Ugpeqaalgutemni, liisimakaghsi qavngaq Kiyaghneghem nakmikegkaqaanga Gentile‑enun ungipaqisqellunga Pinilghiineng Ungipaneng ugpeghesqelluki.

⁸ Kiyaghneghem liisimakilghiim yugem tamaghhaan sumeghtaghallghaneng, tugukliqaqii Gentile‑et. Kelgutkaqaa tuguklighilleni ellngitneng tuunelleghmikun Agleghnalghiik Taghneghak katam tawaten whangkunnun tuunelleghmitun.

⁹ Whangkutestungwaaq kiyaghutaqii; whangkutestungwaaq ukmangighaqii ilungit ugpenghata.

¹⁰ Enkaam sanganꞌngam Kiyaghneq sakraasnaqutkengngusteggu qelelleghpesigun Gentile‑et ugpeqiit qaatkelluki Liilightuusaput kiyaghtesqelluki? Talwa sivunemtallu whangkutallu qaatkepagningilkeput taakut Liilightuusat yugulillengnaluta.

¹¹ Iwernga ugpeqaghput Kiyaghneghem yugulikaqiinkut kayusillghakun Atanghem Jesus‑em tawateghpigaq Gentile‑enun pilleghmitun.”

¹² Taagken tawantullghiit qallegnanighwaaghulluteng nagatkagket Barnabas‑enkuk, Paul‑enkuk aapqangik ellmetegnegun Kiyaghneghem allaaghlluwhaghtillghi Gentile‑enun.

¹³ Akuzineghmeng taaqsayek James‑em pikii, “Ugpeqaalgutemni, nagataghtengnga!

¹⁴ Simon Peter‑em ungipaatiinkut naten Kiyaghneghem nakmikuqestallghi Gentile‑et ellminun katam yuguluki. Tawaten pilleghmikun liigikestekaqii ellngitlu piniqniluki.

¹⁵ Enkaam Kiyaghneghem sallgha Gentile‑enun elqughutuq uuknaliqistet igaqegkiitnun. Akuzitni Igaqegkani Ataneq pikaaguq:

¹⁶ ‘David‑em mangteghaa uulqaaguq iwernga uteghnighlunga nekefneqiglleqaqa. Naavumayaghngaan nallghusaghlleqaqa.

¹⁷ Taagken qamaglluteng ilangi yuget Gentile‑eneng nakmikegkama whangamnun katam pinguluki, ellngita liisuglleqaat Ataneq.

¹⁸ Atanghuuq tawaten akuzikaq, ima qavngarugllak ellngan liitestekaqii tamaakut.’”

¹⁹ James‑em nagneghutkii, “Enkaam whanga sumemni Gentile‑et qiivegkat Kiyaghneghmun qaatkutesqughaafqiita Liilightuusamnnun pilteki.

²⁰ Itupill latatgun neghesnaniilteki neqmeng aghqutkegkameng kiyaghnengllaqanun, qemitkameng teghikusameng, aawmeng; ineghteltekillu seghleghqusiqefqaan sex pisqelluku.

²¹ Tawaten piyaghqaanghitut qayughllak Moses‑em Liilightuusaan iinghutkaqii tamaakut. Ima qavngarugllaggaaneng Jews‑et nagataqiit Liilightuusat atightughluki ungipaqenghatki Sabbath‑a tamaghhaan, nani alngunak synagogue‑ni.”

Latat Gentile‑et Ugpeqiitnun

²² Taagken apostle‑et, Elder‑et, qamagllutengllu ugpeqat nakmiiqat yugmeggneng maligutesaghqameng Paul‑enkugnun Barnabas‑enkugnun Antioch‑mun pinaqelghiignun. Nakmikegkagket Silas‑enkuk Judas‑enkuk ateghaqelghii Barsabbas‑meng. Taakuk yugek Jerusalem‑eghmiit ugpeqiita siivakepigtekagket.

²³ Elkegnekun tuyuqiit latat whaten igaqegkat: “Whangkuta apostle‑enillu Elder‑enillu lataaqukut Gentile‑enun ugpeqaalgutemnnun Antioch‑melngughnun, Syria‑melngughnun, Cilicia‑melngughnunllu, quyakamsi!

²⁴ Nagaquumaakut yumtanguq ilangita takulusi sameng pilusi seghleghyugtekaqiisillu kukragyugtekaqiisillu. Naqamllu whangkuta tawaten pisqumangitaput.

²⁵ Enkaam qerngaamta agghilluta nakmikagput Judas‑enkuk Silas‑enkuk maligutesqellukek piniqegkamnnun ugpeqaalgutemnnun Barnabas‑enkugnun Paul‑enkugnun, elpesinun pinaqelghiignun.

²⁶ Taakuk Barnabas‑enkuk Paul‑enkuk tuqusaghngiistek pikaaguk apalluqluku Ataneghput Jesus Christ‑a.

²⁷ Judas‑enkuk Silas‑enkuk kayaggnaqagput aapghwaaghesqelluki taakut ataasit latatkegkaput elpesinun.

²⁸ Agleghnalghiimllu Taghnegham, whangkutallu itagnaqamsi allulluki Jews‑et Liilightuusiit atuqenghisaghngaaghpesiki pisqelluki. Iwernga ukut Liilightuusat elpesinun atuqesugaput:

²⁹ Neghegpenasi neqmeng aghqutkegkameng kiyaghnengllaqanun, aawmeng, teghikusameng qemitkameng, nuqetutaqiteggullu sex‑kun seghleghqelleq. Maligtekufsiki taakut Liilightuusat taawa pinitun pillequsi. Tawatenginaq lataamsi.”

³⁰ Taagken taakut yuget aghulaqegkat Jerusalem‑emeng Antioch‑mun. Kaasameng qerngughlluki ugpeqat tuunegkiit latat.

³¹ Atightughluki latat elngaatall quyateghllakat qayughllak ilutughlleghhiit.

³² Judas‑enkuk Silas‑enkuk elkeklu uuknaliqistengulghiik, enkaam ungipaqiighaataghllakak ugpeqanun ugpellghit iknaqughtesqelluki.

³³ Tamaantelqinaghlutek aghulaqsukak. Enkaam ugpeqat aghulaqestekagket whaten pilukek, “Nekeggmellelgutek igleghalleghpetegni.” Taagken uteghniqak kayagtistemegnun Jerusalem‑emelngughnun.

³⁴ Iwernga Silas tamaansukaq.

³⁵ Taakuk Paul‑enkuk Barnabas‑enkuk Antioch‑metaaghaqak. Elkeklu maligullutek uglapiglleghhiinun ugpeqanun apeghtughikaklu ungipaqikaklu ungipaaneng Atanghem.

Pellghututellghak Paul‑enkuk Barnabas‑enkuk

³⁶ Tagtalmi Paul‑em pikaa Barnabas, “Takuughaqaaltegneki ungipaqivikegkapung Atanghem ungipaaneng, esghaghyaghtuultegneki natetulangi ugpeqaalgutepung.”

³⁷ Barnabas‑em kelqesukaa John Mark,

³⁸ iwernga Paul‑em kelqesugumangilkanga, qayughllak Pamphylia‑melluteng John Mark‑em unitkakek qepghaqaghteng taaqestegpenaan.

³⁹ Paul‑enkuk Barnabas‑enkuk aaghtiiraaghutkeghllagluku pelleghmun aghulaquutkak. Barnabas‑em kelqelluku Mark angyaghpagkun Cyprus‑mun pikaq.

⁴⁰ Enkaam Paul‑em aghulaqfagilgami nakmikegkaa Silas kelqennaluku. Taagken ugpeqat yughaatkellukek neghyukutkagket Ataneghmun aflengakesqellukek.

⁴¹ Igleghtekak Syria‑kunllu Cilicia‑kunllu iknaqughsaamiita ugpeqat ugpellghit.