Acts 14 - New Testament-et Akuzipigestun

Paul‑enkuk Barnabas‑enkuk Iconium‑emetellghak

¹ Iconium‑emi Paul‑enkuk Barnabas‑enkuk piiqelleghmegetun synagogue‑mun aglaqak. Tawani whateghlluwaaq akuzikak repall Jews‑elghutetlu, Gentile‑elghutetlu ugpeghtuutkat.

^2-3 Enkaam Iconium‑emetelqinaqak, tamaani tetugpenatek ungipaqikak Ataneghmeng. Paul‑enkuk Barnabas‑enkuk Atanghem allaaghlluwhaghtisteghllagaataqakek yugnun ipangutanga liigikesqelluku ungipaqegkaak Atanghem nangllegtallgha. Iwernga ugpeghyugumangilnguut Jews‑et Gentile‑enun seghletun sumeghtaghaatkestekiit ugpeqat.

⁴ Enkaam Iconium‑eghmiit malghughkegkat, ilangi ilatkat Jews‑enun, ilangi apostle‑enun.

⁵ Taagken ilangita Gentile‑etlu, Jews‑etlu maligulluteng igleghutistemeggnun amyuutkesukagket apostle‑ek, milughpagaataghhiinaqlu tuqusukagket.

⁶ Nagaqughyamek yugnun tawaten pinaqnilutek, qimakak Lycaonia‑m neghllagegkenun Lystra‑munllu, Derbe‑munllu, uvitegkenilngughnunllu nenun.

⁷ Enkaam tamaani ungipaqegkiik Pinilghiit Ungipat.

Lystra‑millu Derbe‑millu

⁸ Lystra‑minguq taawa yuuk itegii natelnguut allgenghhaghhaatmineng ima enkaam piyugigalnguq.

⁹ Aqumgaghmi tawani nagatkaa Paul akuzilghii. Paul‑em liigikegkaa yuuk ugpelghii Kiyaghneghmun naallghulleqniluni.

¹⁰ Enkaam qiivluku tawavek iglagtupiglluni pikaa, “Nekevngwaaghi itegaghpegun!” Aga yuuk nekefqaghlluni tamaani piyukaq.

¹¹ Yulghutet esghapagluku Paul‑em naallghutillgha araghaataatkat Lycaonia‑ghmiistun, “Yuguluteng kiyaghneghet takwiinkut!”

¹² Barnabas Zeus‑ngunikaat enkaam Paul Hermes‑ngunikaat kiyang akuzistengutanganeng.

¹³ Priest‑ngan Zeus‑emllu, yugetlu aghqerraaghyukagket Paul‑enkuk Barnabas‑enkuk. Enkaam priest‑a tagitkaq teghikusamengllu piitesiighaghmengllu Lystra‑m mingllutangan amigllaganun. (Temple‑a kiyaghnengllaqamun Zeus‑mun amigllagem tunganganilnguq).

¹⁴ Iwernga apostle‑ek Barnabas‑enkuk Paul‑enkuk liigiksamegneki sanaqutangi aatkatek piiguqiik. Taagken aqfaasnaq yugnun qungangiitkak araamaagmek,

¹⁵ “Ukughsi yugni, sangafsi tawaten pitsi? Whangkutungllu yuguukung elpesistungwaaq! Ungipaqiyaghtuugukung Pinilghiineng Ungipaneng elpesinun, tunullusi satngunghilngughneng maniguqaghpesineng qiivesqellusi unguvalghiimun Kiyaghneghmun. Ellngan ulimakaqii qilak, nuna, kellii, sangwaallu tamaghhaan taakunilnguq.

¹⁶ Sivunghani agani Kiyaghneghem qamaglluki ramket Jews‑ngunghilnguut piyukellghistun pistekaqii.

¹⁷ Iwernga tawateteghngaata paninang liisimakestekaaguq unguvaniluni pinitun pilleghmikun tamaghhaanun. Eslallugughtestaqaa nunivagseghat nagusqelluki. Ayumiqulleq kaspuglluku piitestaqii piisaghqat piitfigit kaanneghata neqelgusqellusi, quyangasqellusillu.”

¹⁸ Paul‑enkuk Barnabas‑enkuk tawaten akuzighngaayek taawa paninang Lystra‑ghmiit aghqerraaghnaqutkegkagket. Iwernga pegnem pisneghitkak.

¹⁹ Taagken ilangi Jews‑et Antioch‑mengllu Iconium‑emengllu kaatkat Lystra‑mun. Lystra‑ghmiinun naavguullukek ugumiitestekagket. Enkaam Jews‑etlu, Lystra‑ghmiitlu Paul milughpagaataghluku qamuqaat nem kelutanganun sumeghmeggni tuqumaniluku.

²⁰ Iwernga ugpeqat takulaghaasatni Paul nekevluni aglanqigtekaq nemun. Taagken unaamingani elkek Barnabas‑enkuk Derbe‑mun aglaqak.

Paul‑enkuk Barnabas‑enkuk Uteghnillghak Antioch‑mun Syria‑melngughmun

²¹ Paul‑enkuk Barnabas‑enkuk ungipaqikak Pinilghiineng Ungipaneng Derbe‑mi enkaam uglaq maligsaaghtengughtekaq. Taagken Lystra‑mun pinqigtekak, taagken Iconium‑emun, Antioch‑munllu pikak Pisidia‑melngughmun.

²² Takuughaqamegni tamaani apeghtuqiik ugpeqat ugpeqillghit wata iknaqughtesqelluki, kayemegkiiklu ugpellghit aghuliitesqelluki. Pikiik, “Uglapestaaq seghleliilleq atuqsaghqapestaaqaghput iteghyaghqaaghhnaluta Ataneghpagullghanun Kiyaghneghem.”

²³ Takuughaqamegnillu nakmiightuqak Elder‑kaghqameng igleghutesqelluki ugpeqat. Taagken yughaamaagmek fast‑ekak. Taam kingunganeng Ataneghmun ugpeqegkamegnun yughaatkegkiik Elder‑et aflengakesqelluki.

²⁴ Taagken Pisidia‑kun igleghakak Pamphylia‑mun.

²⁵ Tamaani Perga‑mi, Pamphylia‑melngughmi ungipaqikak Kiyaghneghem akuzitanganeng. Taaqsamek tesamavek Attalia‑mun pikak.

²⁶ Taagken Antioch‑mun angyaghpagkun aghulaqegkak. (Tamaani Antioch‑mi ugpeqat Paul‑enkuk Barnabas‑enkuk aghulaqellghillukek yughaatkegkaqegkegket. Aaputkaqegkegket Kiyaghneghmun kayusiitesqellukek ungipaqillghegkeni. Taananguuq qepghaqaq apeghiiqaak.)

²⁷ Kaasamek Antioch‑mun ugpeqat qerngughtekiik. Ungipaatkiik Kiyaghneghem apeghiillghaneng ellmetegnegun, aapqaaklu Kiyaghneghmun ugpeqilleghqalitellghi Gentile‑et.

²⁸ Tamaani muluughllakak ugpeqani.