Acts 13 - New Testament-et Akuzipigestun

Barnabas‑enkuk Saul‑enkuk Nakmikegkegket

¹ Antioch‑mi ugpeqam ilangi uuknaliqistenguftutlu apeghtughistenguftutlu. Taakunguftut Barnabas, Simeon, atilqelghii Niger‑meng, Lucius (Cyrene‑meng pi), Manaen (anglilgutanga umiilgem Herod‑em), Saul‑llu.

² Maniguusimaluki Ataneghmun, fast‑emalukillu, Agleghnalghiim Taghnegham pikii, “Aaftekek Barnabas‑enkuk Saul‑enkuk, qayughllak nakmikagka allaneng qepghaqameng qepghiisqellukek whangamnun.”

³ Taaqsameng fast‑elleghmengllu yughalleghmengllu saaflukek yughaatkellukek aghulaqestekagket.

Barnabas‑enkuk Paul‑enkuk Cyprus‑mi

^4-5 Barnabas‑enkuk Saul‑enkuk, Agleghnalghiim Taghnegham kayagsistek, Seleucia‑tkak kelqelluku John Mark kayutnguluku. Tamaaken angyaghpagkun qiighqamun Cyprus‑mun pikat. Kaasameng Salamis‑mun synagogue‑ngitni ungipaqikat akuzitanganeng Kiyaghneghem.

⁶ Salamis‑meng igleghakat inglunganun qiighqam Paphos‑mun kaatelleghmeggnun kenlanga. Tamaani nallaqaat yuuk alignalghii aatgha Bar‑Jesus, uuknaliqestesighwaaq, Jews‑a.

⁷ Qiighqam Governor‑ngan Sergius Paulus‑em ilakumtaagha. Sergius Paulus pillegllak. Aqfastekakek Barnabas‑enkuk Saul‑enkuk nagannaluki Kiyaghneghem akuzitangi.

⁸ Iwernga Bar‑Jesus‑em alignalghiim, ateghalgem Elymas‑meng, aaghtiiraaqakek governor‑a ugpeghnayukan. (Ateq Elymas, Greek‑stun whaten pisiilghii, alignalghii.)

⁹ Taagken Saul‑em, ateghaqelghiim Paul‑meng, imighngalghiim Agleghnalghiigneng Taghneghagneng, esghapagtughluku alignalghii

¹⁰ pikaa, “Uyuq Tughneghaam ighnegha! Ugumikan sangwaa qamaglluku pinilghii. Iqlengasagllaguutenllu seghletunllu pisteghllaguuten. Taaqnaqenghisikii iqlengiqusiqneghmeng Atanghem apeghtuusii?

¹¹ Whaa Atanghem aghyuughnaqaaten ayaastemmeng, enkaam esghaatelghaghtughnaanghituten aghneghem nighuganeng.” Tawaninginaq Elymas‑em iiskek mamleghqwaakak, enkaam tamaani eflughwaaghmeng ivaghikaq kitumun tasluqiisqelluni.

¹² Governor‑a ugpeqaq esghapagluku tawaten pilghii, saghiighayagutkaallu apeghtuusaq Ataneghmeng ayuqelghii.

Paul‑enkut Antioch‑ellghiit Pisidia‑melngughmun

¹³ Paul‑enkut igleghalgutkullghiit angyaghpagkun igleghtekat Paphos‑meng, Perga‑mun Pamphylia‑melngughmun. Tamaanlluki John Mark‑em unilluki Jerusalem‑emun uteghniqaq.

¹⁴ Taagken Paul‑enkut Perga‑meng, Antioch‑etkat Pisidia‑melngughmun. Sabbath‑ngughsagu synagogue‑ngitnun iteghluteng aqumegkat.

¹⁵ Igleghutistengi synagogue‑em, taaqsameng atightuneghmeng Liilightuusanengllu uuknaliqistetlu igaqegkiitneng, kevgaqutkiit Paul‑enkut whaten pisqelluki, “Ugpeqaalgutemnni, ungipalgukufsi iknaqsuugusighqameng ugpellemnnun, saaqetsi akuzitek.”

¹⁶ Taagken Paul nekevluni apaqumaghmi pikii, “Israel‑eghmiini, elpesillu Gentile‑eni maniguutkayugni Kiyaghneghmun, nagatengnga!

¹⁷ Whangkuta Israel‑eghmiini maniguqamta Kiyaghneghem nakmikegkaqii sivuneput, nulasteghllakaqiillu nunataawaqngata Egypt‑mi. Taakwaningani qepghaghtelaaghughtekat iwernga Kiyaghneghem aghtughyaghqaanghilleghllagmikun aghulaqutkaqii Egypt‑meng.

¹⁸ Kilgaanilluki qaatkutepagllanghiteghngaata ellminun paninang aflengakegkaqii ketwhell 40 ayumiqulleghni.

¹⁹ Taagken Kiyaghneghem naafqesamiki taakut maaghraghvinlek ramket Canaan‑melnguut nunaksaqangat piliitestekaqaa sivunemnnun pagitaqesqelluku.

²⁰ Entaqun 450‑nguut ayumiqullghet Kiyaghneghem nakmikellghaneng sivuneput kenlanga nuna piliitellghitnun. “Taam kingunganeng nanqigtistengestaataqaqii igleghutesqelluki kenlanga Samuel uuknaliqista igleghutistekaaghtellghitnun.

²¹ Taagken umiilengyuwaqngata Kiyaghneghem nakmikegkaqaa Saul umiilkesqelluku Kish‑em ighnegha, Benjamin‑em ramkenganeng pi. Umiilgukaaguq 40 ayumiqulleghni.

²² Kiyaghneghem umiilgunanightesamigu Saul, David umiileliitestekaa ellngitnun. Kiyaghneghem akuzitkegkaqaa whaten, ‘Jesse‑m ighnegha David umiilgughtesugaqa. Tawatelnguq yuuk piyukaqaqa, qayughllak piyaghqaqaa sangwaa alngunak piyukegkaqa.’

²³ “Taakwaningani David‑em kingunghakun Kiyaghneghem akeqilleghmitun allgeghtestekaqaa Yugulighista Israel‑eghmiinun. Taana yugulighista Jesus‑nguuq.

²⁴ Jesus‑em salin qepghaqani piinlillghilluku John ungipaqikaaguq Israel‑eghmiinun whaten, ‘Avuteghqellusi, seghleghqennanighlusi, paaptaayetek.’

²⁵ John‑em qepghaqani taaqsaghtungestaghluku pikaaguq, ‘Kinangunilunga piiqestengnga? Whangangunghituq utaqakaghsi. Kingumneng tagiyaghqaaguq aangeghllalghii, repall whanga pininghitunga singiinun itemtistengulunga.’

²⁶ “Ugpeqaalgutemni, Abraham‑em kingunghitni, Gentile‑enillu maniguutkayugni Kiyaghneghmun, taana ungipaa yugulillghem whangkunnun pinguuq!

²⁷ Jerusalem‑eghmiit igleghutistekullghiit nallukegkaqaat Jesus Yugulighistengutanga, qaywa Sabbath‑a tamaghhaan nagateghngaaghmegteki uuknaliqistet igaqegkiit. Naqam uuknaliqistet igaqegkiit apeghiiqaqiit agghitkaqngamegteggu Jesus tuqunnaluku.

²⁸ Taawa legan temngi apalliiteghngaan tuqutusighqameng Pilate‑mun tuqutesqegkaqaat.

²⁹ Legan Akuzitet Igaqegkat pinaqnillghistun pikaqaat. Taagken qaquurameng ateghlluku lliifqaqaat,

³⁰ iwernga Kiyaghneghem unguvaghtestekaqaa tuqulleghmeng.

³¹ Taam kingunganeng igleghalgutkegkiita Jesus‑em Galilee‑meng, Jerusalem‑emun esghaghaataqaqaat qafsinegyagni aghneghni. Ellnginguut ungipalghiit yumnnun esghaamaniluku Jesus unguvaluku.

³² “Whaten pikaagut, ‘Ungipaatamsi Pinilghiineng Ungipaneng Kiyaghneghem akequsaqegkaaneng sivunemnnun.

³³ Apeghiighumaa akequsani whangkunnun kingunghitnun, unguvaghtestelleghmikun Jesus tuqulleghmeng.’ Kiyaghneq pikaaguq whaten Psalm 2‑mi, ‘Elpek Ighneqamken, aghneghmi whani Ataliitaghpenga.’

³⁴ Kiyaghneghem unguvaghtestekaqaa Jesus tuqulleghmeng enkaangam allamengllu tuqunaanghituq aghyughyaghqaaluni. Enkaam Kiyaghneq pikaaguq, ‘Agleghnalghiit akequsaqegkanka David‑mun ipapestaaq quyastisiqelleqanka elpesinun.’

³⁵ Ilangani Psalms‑em Kiyaghneq pikaaguq, ‘Agleghnalghiin aghusnaanghitaqa lliveghmi.’

³⁶ “David‑em unguvalleghmini atuqegkaqaa Kiyaghneghem piyukellgha. Taagken qavaghyan qunguqaqaat sivunghan saaghwitgun, yugusii aghukaaguq lliveghmi.

³⁷ Iwernga taana Kiyaghneghem unguvaghtestekaa tuqulleghmeng aghumangituq.

³⁸ Ugpeqaalgutemni, elpesinun liitesqesugaqa Jesus‑kun yuget seghleghqellghit seghevutellengegkayuguut. Taanata ungipaqegkegka elpesinun.

³⁹ Qaatkutellghem Moses‑em Liilightuusiitgun kina alngunak itemunnaanghitaa seghleghqellghaneng, iwernga kitum alngunak ugpeqegkumigu Jesus, itemusaghqaaguq tamaghhaaneng seghleghqelleghmineng.

^40-41 Kiyaghneq pikaaguq uuknaliqistetgun whaten, ‘Nagatek elpesi aygughitalghiini. Saaqetsi saghiighayuglusi tuqutek, qayughllak unguvangulusi sallequnga iwernga ugpeqnaanghitaghsi talwa kitum ungipaateghngiisi.’ Kelengalusi, luuraq tawaten pinayukafsi.”

⁴² Paul‑enkuk Barnabas‑enkuk synagogue‑meng aanumalukek alla tagisqegkagket tuunglighhaani Sabbath‑em, wata ungipiqutesqelluteng.

⁴³ Aanleghaasameng Jews‑elghutetlu, Gentile‑elghutetlu maniguutkayuget Kiyaghneghmun Jews‑estun, maligutkat Paul‑enkugnun Barnabas‑enkugnun. Apostle‑ek kayemegkiik kiyaghtekestiisqelluki sighimakluku Kiyaghneghem nangllegtallgha.

⁴⁴ Tuunglighhaani Sabbath‑em qamagtevzighluteng Antioch‑eghmiit nagasaatkat Atanghem ungipaaneng.

⁴⁵ Jews‑et aqinakat esghaghyamegteki yulghuteghllaget enkaam Paul kipullginaqaat, seghleqegkaatlu.

⁴⁶ Iwernga Paul‑enkuk Barnabas‑enkuk tetugpenaki Jews‑et pikiik, “Kiyaghneghem ungipaa elpesinun sivukluni apeghyaghqaayaghtuq iwernga nagasugumangitusi. Kiyaghneghem ungipaa ighsakegkaqutegpesineng, palaqegkaategpesinengllu kenlengilngughmeng unguvallengelleghqaghpesineng, whaa Gentile‑enun ungipaqinaqukut Kiyaghneghem ungipaaneng.

⁴⁷ Tawaten piikut qayughllak Atanghem qelqaqiinkut whaten, ‘Nakmikegkaqamsi nighugulusi Gentile‑enun, aapghesqelluku yugulilleq nunataghhaanun tamaghhaanun.’”

⁴⁸ Gentile‑et nagaqughluki taakut akuzitet quyaghllakat, pikaalghiitlu, “Kiyaghneghem ungipaa piniipigtuq.” Tamaakut Kiyaghneghem nakmikegkii kenlengilngughmeng unguvallengesqelluki ugpeqikat ungipameng.

⁴⁹ Enkaam tamaani Antioch‑mi, uvitanganilngughnillu nunani Atanghem ungipaa mingitkaq.

⁵⁰ Iwernga Jews‑et takukiit Gentile‑et aghniit maniguutkayuget Kiyaghneghmun, igleghutistengillu Antioch‑em naavguunnalukek Paul‑enkuk Barnabas‑enkuk. Tamaaken apalluqluku amyuutkegkagket taakuk yugek, aghulaqestekagketlu nunameggneng.

⁵¹ Enkaam apostle‑ek itegatek pagulangiqiik kelgunnaluku peggniluki kipullginaalghiit Kiyaghneghem ungipaaneng. Taagken Iconium‑emun aghulaqegkak.

⁵² Iwernga tamaakut ugpeqat Antioch‑melnguut quyangaghllagetlu, imighngalghiitlu Agleghnalghiigneng Taghneghagneng.