Acts 11 - New Testament-et Akuzipigestun

Peter‑em Aapqangi Cornelius‑enkut Ugpeqanun Jerusalem‑emi

¹ Apostle‑etlu ugpeqatlu Judea‑melnguut nagaquqiit Gentile‑enunllu ugpequmaniluki Kiyaghneghem akuzitangi.

² Peter kaasan Jerusalem‑emun, Jews‑et ugpeqat circumcise‑eghiyukat Gentile‑et ugpeqiitneng seghlequuqaat Peter, pikaat,

³ “Sangan circumcise‑emangilnguut iteghvikluki nengitnun neghelgusighsiki?”

⁴ Liigikesqelluki Peter‑em esghaghwaalleghmineng kenlanga aapqaa sangwaa qamaglluku apeghiiqaq.

⁵ “Joppa‑mi yughaamalunga esghaghwaaqaagunga. Esghaghaqa qiipaghaghllagsugni estamatgun tekerqaakun ukigtekangat qilagmeng whangamnun.

⁶ Tawavek yuvghiighwaaghyaqegka imaqeftuq allaaghhiinaghneng teghikusaneng, reptile‑eneng, qawaagneng tengaakayugneng.

⁷ Taagken ma nagaqughaqa whaten pilghii, ‘Peter, makelluten tuqutiluten neghi!’

⁸ Iwernga kiimsighaqa, ‘Yeghlegillu Ataneq! Neghigatanka tamaakut ukmanginneghilnguut neqet iinghutkat.’

⁹ “Mem pilaataghaanga qilagmeng, ‘Kiyaghneghem ukmangiqaqii tamaakut, ukmanginneghinniluki sumeghtaghaatkesaghqaqenghitaten.’

¹⁰ Tawaten pikaaguq pingayuneng ketwhell. Taagken qamaglluteng taakut aga qilagmun mayuutaqutlu,

¹¹ whaa yuget pingayut kaatut tukumnun, kevgaaftut whangamnun Caesarea‑meng.

¹² Agleghnalghiim Taghnegham qaqilqafqaama maligtesqii. Ukutlu aghvinlek yuget ugpeqaalguteput maligutut Joppa‑meng Caesarea‑mun. Kaalluta Cornelius‑enkunun iteghaatukut.

¹³ Cornelius‑em aapghaa yaqulegmeng esghaatelleni nemini, yaqulgemnguq whaten pii, ‘Joppa‑mun aqfastigu yuuk aatqelghii Simon Peter‑meng.

¹⁴ Ungipaalleqiisi nengllugutkullghiini naten yugulillengelleghqameng.’

¹⁵ Enkaam akuziiqungallu Agleghnalghiim Taghnegham iitghii tawatengwaaq whangkunnun itelleghmitun Pentecost‑em Aghneghani.

¹⁶ Taagken neqangughaqa Atanghem pillgha whaten, ‘John paaptaayelaqaaguq meghqun, iwernga elpesi paaptaayellequsi Agleghnalghiignekun Taghneghagnekun.’

¹⁷ Enkaam Kiyaghneghem tuunumakaki Gentile‑et taagken ataasimeng tunusameng tuunegkamineng whangkunnun ugpeqaqngamteggu Ataneq Jesus Christ‑a, whanga kinanguzinga aghuliighhnaqsaghqaaluku Kiyaghneq tawaten pillghaneng Gentile‑enun?”

¹⁸ Tawaten Peter‑em piyisteng qallegnanighluteng, yeghlegi usuqegkaat Kiyaghneq. Pikat, “Taawa liigikaghput Kiyaghneghem talwa Gentile‑et pilleghqalisimakangi avuteghqesqelluki seghleghqellghitneng, unguvallengesqellukillu kenlengilngughmeng unguvalleghmeng!”

Ugpeqat Antioch‑melnguut

¹⁹ Stephen‑em tuqutellgha kenlekluku Jews‑et amyuutkegkiit ugpeqat, enkaam anakat Jerusalem‑emeng. Aghulaquutkat kenlanga Phoenicia‑mun, Cyprus‑mun, Antioch‑munllu. Igleghutkelluku ungipaqegkiit Pinilghiit Ungipat Jews‑nginaghhaghnun.

²⁰ Iwernga ilangi ugpeqat Cyprus‑mengllu Cyrene‑mengllu Antioch‑etkat, kaalluteng ungipaqegkaat Ataneq Jesus talwa Jews‑ngunghilngughnun.

²¹ Atanghem aghtughyaghqaanghillgha ellngitnitkaalghii, enkaam uglapestaaq yuuk ugpeghtuulluni qiivuutkaq Ataneghmun.

²² Ugpeqat Jerusalem‑emelnguut nagalluku Peter, Barnabas kayagtekaat Antioch‑mun.

^23-24 Kaasalghiimi uglaapiglleghhii yuuk ugpeghtuulluni ayuqeftuq, enkaam quyaghllakaq qayughllak liigikegkaa Kiyaghneghem piniqingalleghllaga yugnun. Barnabas pinilghiingulghii yuuk, imighngaghllaklu Agleghnalghiigneng Taghneghagneng, ugpeqillelegllaklu. Taagken allangughtefqiita ataasiighmetekestiisqegkii Ataneghmun. Wataqaaghaq ilangitallu yuget ugpeqegkaat Ataneq.

²⁵ Taagken Barnabas‑em Saul ivaghyaghtuqaa Tarsus‑mun.

²⁶ Naalkesamigu kelqegkaa Antioch‑mun. Ataasiq ayumiqulleq tamaantelleghmegni ilataqlutek ugpeqanun apeghtughikak yulghuteghllagnun. Tamaani Antioch‑mi ugpeqat atighyuwhaaqiit, “Christian‑et.”

²⁷ Tamaani ilangi uuknaliqistem Jerusalem‑emeng Antioch‑mun tagikat.

²⁸ Ataasiq Agabus‑nguftuq, nekevluni uuknaliqegkaq Taghneghagnekun neqangisagllagnaqniluku tamangani. Taawa neqangisagllakaq Claudius Umiilegpigaaluku.

²⁹ Ugpeqat ugpeqaalguteteng Judea‑melnguut kayusighyukiit pitutalmegestun.

³⁰ Enkaam qerngughtiluteng manimeng tuyughikat elder‑enun Jerusalem‑emelngughnun Barnabas‑enkugnekun Saul‑enkugnekun.