3 John 1 - New Testament-et Akuzipigestun

¹ Ukut latat Elder‑meng pinguut Gaius‑mun ipapik piniqegkamnun.

² Piniqegkamni, liisimakaqa unguvasigken itagnaghtuq. Yughaatkaqamken itagniisqelluten sakun tamaghhaakun, yugunqegtesqellutenllu.

³ Quyapigtekaagunga ilangita ugpeqaalgutet kaalluteng ungipaasatnga ataasiighmetelleghpeneng ipapighqelleghmun, iiwleng elpesinun atuqnguniluku ipapighqelleq.

⁴ Quyapigtaqunga nagaqunemki avaqutaliitkanka atuqinguniluki ipapighqelleghmeng. Alla saam alngunak quyasigataanga tawaten.

John‑em Usuqegkanga Gaius

⁵ Piniqegkamni ilakumtaamni, piniipigtuq ataasiighmelluten qepghallghen Kiyaghneghmun aflengakelleghpegun ugpeqaalgutet talwa tamaakut nallukegkaghten.

⁶ Maani yughaghvigmi aapghaqaat piniqellghen. Kayusiitaghtiki nagneghutesqelluki igleghallghit. Kayusighillghen Kiyaghneghem piyukellghatun ayuqluku

⁷ qayughllak igleghanguut apalluqluku Christ‑a. Tuguklighingigatut ugpeqaanghilngughneng kayusilleghmeng

⁸ enkaam whangkuta ugpeqani kayusighyaghqaqaput tamaakut yuget. Tawaten pikumta qepghalgutkelleqiinkut apeghtughinguluteng ipapighqelleghmeng.

John‑em Aapqek Diotrephes‑enkuk Demetrius‑enkuk

⁹ Latakaayaghtunga ugpeqanun iwernga Diotrephes‑em umiilguyugneghem waakigatii liilightullghenka.

¹⁰ Elpesinun pikuma apeghlleqaqa saaqutanga. Seghletun akuzitkaqiinkut, iqlengiqutkaqiinkutlu. Tawatenginaq pingigatuq upughasugigatii ugpeqaalguteput kaanneghata. Upughatiyulghiit ineghtaqii, upughatinghatallu eflequghaqii ugpeqat qerngughutfigitneng.

¹¹ Piniqegkamni, seghletun pikayugestun pigpenang, yeghlegi pinitun pikayugestun piiqi. Kina alngunak pinitun pikayuk Kiyaghneghem pikaa; iwernga kitum alngunak seghletun pikayugem nallukaa Kiyaghneq.

¹² Tamaghhaghmi ugpeqam Demetrius pinighniiqaat yuuk. Ipapighqelluni kiyaghtaallghan ipapighqutkestaa. Taawa whangkutallu tawaten piighput, liisimakasi akuzilleput ipanguut.

John‑em Latangan Naangniitangi

¹³ Apeghyaghqaghllaguunga elpenun iwernga latatgun piyunghitanka.

¹⁴ Sunanguq qantaghaqun esghaghlaken enkaam aleghquullequkung gginasaghquullutung.

¹⁵ Kiyaghneghem nekeggmellgha elpenilli. Ilakumtaaghpek qamaglluteng sumeghmikaqaatenguq. Ungipaaquqaghnaketen qamaglluki ilakumtaaput sumeghmikaqapunꞌnguq.