2 Timothy 4 - New Testament-et Akuzipigestun

¹ Christ Jesus tagikumi igleghutinaluni Ataneghpagulleghmini, nanqiglleqii unguvalghiitlu tuqukatlu. Enkaam nagasimanghegkeni Kiyaghneghenkuk Christ Jesus‑enkuk, qelghamken

² ungipaqiki Pinilghiit Ungipat. Sagiqluten ungipaqiki yugnun nagasugughngaata nalighmeng nagasugunghiteghngaata. Nekeggmelluten apeghtughilleghpegun ugpeghtesnaqiki, ineghtiki anaggutellghitneng, kayemikillu.

³ Pilleghqaq taginguuq yuget nagasugnanighllequt ipapignun apeghtuusanun. Ivaghillequt piyukegkameggneng apeghtughistelghutneng nagatepigesnaghnaluki nagaqughyukegkaghhiinateng.

⁴ Nagasugnanighllequt ipapilleghmun, nagasugyagullequt temnginun ungipaghanun.

⁵ Iwernga elpek iiwleng nekeggmelluten, nagneghutigu sangwaa piyaghqan ikfiqngughngaaghpek, ungipaqikestaa Pinilghiineng Ungipaneng. Elpek qepghaghtekegkangaten Kiyaghneghem, apeghiighhu qamaglluku qepghaqaq elpenun pisqegkaa.

⁶ Whanga aghqutkesaghqaaghsimaanga Kiyaghneghmun, tuqulleghqaqa kaasaghtuumaaq.

⁷ Pilluwaamaaqa pinilghii pilluwalleq, apeghiighaqa kilgaaqulqa, ataasiighmesimanginaqaagunga Ataneghmun.

⁸ Enkaam taawa Kiyaghneghem utaqiitngwaa whangamnun qaghpanga elqughutngallghem. Atanghem elqughlluku nanqigtistem akileghtughlleqaanga Nanqigtillghem Aghneghani. Whanganginaagpenanga iwernga akileghtughlleqii qamaglluki tamaakut qelanelghiit tagilleghqaaneng.

Paul‑em Taaqniitngi

⁹ Pinaqellghaagken qamagllukek tagiragkiighi whangamnun.

¹⁰ Demas‑em piniqsaliisimaa nunam kiyaghtaallgha enkaam unisimaanga, aghulaqumaaq Thessalonica‑mun. Crescens Galatia‑simaaq enkaam Titus Dalmatia‑mun pimaaq.

¹¹ Luke‑nginaghhaq whangamnituq. Mark aqfaluku kelqennaken qayughllak kayutkepigtaqa qepghallemni.

¹² Tychicus Ephesus‑mun kayagsimaaqa.

¹³ Troas‑mellunga unitkaqagka qaasligka Carpus‑enkuni. Taginaqegkuvek tagitaghhnakegken. Tagitaghhnaketenllu iimgat iganka, kiyang taakut amiirameng ulimaaghet.

¹⁴ Alexander‑em siilumeng sangllaghtem elngaatall seghletun pikaqaanga. Atanghem aghyuughnaaghaa tawaten pillghaneng.

¹⁵ Elpeklu kelengakluku tawaten pinayukangaten qayughllak ungipaghput ugumikepigtaa.

¹⁶ Nanqigtistemun aglaasuwhaaghaqngatnga kitum alngunak mesighaasaghtullghitaanga, yeghlegi uniqaghaatkaqaatnga. Yughaatkaqanka Kiyaghneghmun akinaqefqiita pisqelluki tawaten pillghitneng.

¹⁷ Iwernga Ataneq whangamnitkaaguq. Iknaqusiqaqaangallu ungipaqesqelluki iinguniita Pinilghiit Ungipat qamaglluki Gentile‑et nagaqiisqelluki. Enkaam Kiyaghneghem yugulikaqaanga tuqutelleghqameng.

¹⁸ Atanghem yuguliyaghqaqaanga tamaghhaaneng seghleghem sughugallghaneng, enkaam paqnanangunaan aglaalleqaanga qilagmelngughmun Ataneghpagulleghminun. Ellnganun usuqilleq quunperugllak kenlengunaan. Amen.

¹⁹ Ungipaataghhnaketen Priscilla‑nkuk Aquila‑nkuk, Onesiphorus‑enkutlu nengllugutkullghiit suumqaqankanguq.

²⁰ Erastus unegtekaaguq Corinth‑mi; qinuyugutanganeng Trophimus unitkaqaqa Miletus‑mi.

²¹ Uksughvagilgan taginaqeghllagi. Eubulus‑enkut, Pudens‑enkut, Linus‑enkut, Claudia‑nkut, ilangitallu ugpeqaalgutet ungipaatesqiisi suumqaqiisinguq.

²² Ataneq taghneghaghpenilli, quyaslisillu.