2 Timothy 1 - New Testament-et Akuzipigestun

Paul‑em Tuungliit Latangi Timothy‑mun

¹ Ukut latat Paul‑meng pinguut apostle‑nganeng Christ Jesus‑em Kiyaghneghem piyukellghakun. Kayagtekaqaanga aapghesqelluku akequsaqegkaq unguvalleq Christ Jesus‑melnguq.

² Timothy‑mun piniqepigtekamnun ighnemnun. Kiyaghneghem Atam, Christ Jesus‑emllu Atanemta quyasliten, nangllekliten, nekeggmellelguslitenllu.

Iqamsiqayulleqlu Kayemelleqlu

³ Unugtuumaan, aghneghtuumaan yughallemkun iqamsiqayugvikaqaqa Kiyaghneq elpeneng. Qepghaataqaqa seghleghyullngunanga, katam sivunemtun.

⁴ Esghaghyupigtaqamken allameng, qayughllak neqamikaqa pellghututaqngamtung qiyakaalghiiten. Enkaam quyaghllagllequnga qerngughunneqigtekumtung.

⁵ Neqamikaqa ugpeqillepiigen. Taananguuq ataasiq ugpeqilleq nengyughpek Lois‑em, naagpeklu Eunice‑em atuqegkangak. Liisimakngwaaghaqa elpeklu atuqngwaan.

⁶ Tamaaken apalluqluku neqangughsugamken, atuqumanginaghhu tunusan Kiyaghneghmeng, tuunegkaqaa iigtighaqngamken.

⁷ Kiyaghneghem taghneghalitellghitiinkut alingyugnalghiimeng. Itupill Taghneghagkenka imiqaqiinkut aghtughyaghqaanghilleghmeng, piniqelleghmeng, nuqetelleghmengllu.

⁸ Kayngukegpenaan ungipaqigu Ataneghput, talwa kaynguyagutegpenanga anusimingllaghaagunga Christ‑a apalluqluku. Itupill aghtughyaghqaanghillghakun Kiyaghneghem ikfiqelgusighnga Pinilghiit Ungipat apalluqluki.

⁹ Kiyaghneghem yugulikaqiinkutlu nakmikegkaqiinkutlu pelungitesqelluta. Tawaten pikaaguq apalluqluki ellmi katam uspeqellenillu piniqillenillu, nakaan qepghalleghput apalluqluku. Piniqegkaqiinkut Christ Jesus‑kun sivutghulluku piinlilleghqaan nunam.

¹⁰ Iwernga whaa piniqelleni liitestaa whangkunnun tagillghakun Yugulighistemta Christ Jesus‑em. Christ‑am naafqegkaqaa tuqulleq, taagken Pinilghiitgun Ungipatgun liitestiinkut tuqungigalngughmeng unguvalleghmeng.

¹¹ Pinilghiit Ungipat apalluqluki Kiyaghneghem nakmikegkaqaanga ungipaqistengulunga, apostle‑ngulunga, apeghtughistengulungallu.

¹² Taakut apalluqluki ikfiqnguunga. Iwernga kaynguyunghitunga qayughllak liisimakaqa kinangutanga ugpeqegkaqa. Liisimakngwaaghaqa ellngan kelengaksaqlegwaa sangwaa neghyukutkaqa ellnganun kenlanga kingulighmun Aghneghmun.

¹³ Maligtiki apeghtuusapiget nagaquqaghten whangamneng. Usputaagut atughqaqaten. Apeghtuusaqiki ugpeqilleghqunllu piniqelleghqunllu allgeghtekaqaten Christ Jesus‑meng.

¹⁴ Kelengakigu ipapilleq neghyukutkaq elpenun. Kelengakigu kayutkellukek Agleghnalghiik Taghneghak kiyaghlleghhiik ilumnni.

¹⁵ Liisimakan qamagtevzighluteng ugpeqat Asia‑melnguut kayusighyugnaniimaatnga, talwa Phygelus‑enkuk Hermogenes‑enkuk.

¹⁶ Yughaatkengngwaanka Ataneghmun nangllegyagutesqelluki Onesiphorus‑em nengllugutangi, qayughllak uglaghngaan ilutughsaghaqaanga. Kaynguyagusimangitaallu anusimingllaghaamalqa.

¹⁷ Kaataqngami Rome‑emun ivanꞌghiighutkaqaanga kenlanga naalkelleghminun.

¹⁸ Ataneghmun yughaatkaqaqa Onesiphorus nangllegyagutesqelluku tawani Aghneghmi! Liisimakan kayutkeghllakaqaqa Ephesus‑mi.