2 John 1 - New Testament-et Akuzipigestun

¹ Ukut latat Elder‑meng pinguut Kiyaghneghem nakmikegkaanun aghnamun, avaqutaanunllu ipapigmeng piniqegkamnun. Ellnginaanghitunga piniqistezi, qamagllutengllu liisimakelghiit ipapighqelleghmeng piniqiisi,

² qayughllak ipapighqelleq ilumnnilnguq. Taana ipapighqelleq ilumnnisaghqaaguq quunperugllak.

³ Kayusilleq, nangllegyulleq, nekeggmelleqlu whangkunnillequt kiyaghtengnguluta ipapighqelleghqunllu piniqelleghqunllu. Taakut Kiyaghneghmeng Atameng, Jesus Christ‑amengllu, Atam Ighneghaneng pinguut.

Ipapighqelleqlu Piniqelleqlu

⁴ Quyapigtekaagunga nagaqughluki ilangi avaqutaghten kiyaghtengnguniluki ipapighqelleghqun tawateghpigaq Atam qelellghatun whangkuta.

⁵ Aghnami, piimken piniqututelta. Taana nutaghaanghituq qelghuusaq latatkegkegka elpenun; qelghusaaguq ima piinlighyuggaalleghmeng.

⁶ Una piniqellghuuq, qaatkutelleq Kiyaghneghem qelghuusaanun. Qelghuusaq nagaquqaghsi piinlighyuwhaalleghmeng unanguuq: qamagllusi piniqullusi kiyaghtek.

Anguyakilghiit Christ‑ameng

⁷ Uglapiglleghhii puughtista nunami mingilluni ayuquq. Tamaakut yuget apeghnaanghitaat Jesus Christ‑a yuguluni allgeqaaniluku qayughllak ugpeqigataat. Tawatelnguq yuuk puughtistenguuqlu, anguyakilghiinguuqlu Christ‑ameng.

⁸ Enkaam kelengalusi, pegsaqunaan qepghaatkaghsi akileghtuusaghqaghsi qamaglluku allgeghsaghqaqaghsi.

⁹ Kitum alngunak qaasghuskumiki apeghtuusii Christ‑am Kiyaghneq ellnganinneghituq. Iwernga kitum alngunak atuqumanginaqumiki apeghtuusii Christ‑am, Atallu Ighneqlu ellnganituk.

¹⁰ Kitum alngunak apeghtughyaghtuqangisi atuqegpenaki Christ‑am apeghtuusii, aqelqangllaghpenaan nalighmeng quyakegpenaan,

¹¹ qayughllak kitum alngunak quyakegkumigu qepghalgusiqallghuughlleqaa seghleghmeng qepghaqaaneng.

Naangniitet

¹² Apeghyaghqaghllagughngaaghma elpesinun latatgun piyunghitanka. Iwernga sunanguq laalighfiklamsi, aleghquunnayaghtukut gginasaghquulluta, enkaam quyateghllagnayaghtukut.

¹³ Avaqutiita nakmikegkam aakaghpesi piniqiisinguq.