1 John 1 - New Testament-et Akuzipigestun

Akuzin Unguvalleq

¹ Taana piinlighyuwhaalleghmeng ayuqelghii: nagaquqaghput, esghaqaghput whangkuta katam iyemnneng, esghapakaghput, saaftekaghput iiggemnneng, taananguuq Akuzin unguvalleq.

² Taana unguvalleq esghaghyaghqaaghtestaqngan esghaqaqaghput; enkaam whaa aapghaghputlu ungipaqaghputlu elpesinun taana kenlengilnguq unguvalleq Atamesalghii, esghaghtestekaq whangkunnun.

³ Aapghaghput elpesinun sangwaa esghaqaghputlu nagatkaghputlu ilatesqellusi whangkunnun, ilatngallemnnunllu Atamun, Ighneghanunllu Jesus Christ‑amun.

⁴ Latatkaput tamaakut quyalleghput iighwiisqelluku.

Kiyaghneq Nighuguuq

⁵ Una ungipaq nagaquqaghput Ighneghaneng Kiyaghneghem apeghnaqaghput elpesinun, Kiyaghneghnguq nighuguuq, mamlelleqraggiituq.

⁶ Iwernga ilatnganikumta ellnganun naqam paninang mamlegmi kiyaghtengnguluta, iqlengiqnguukut, atuqigataghputlu ipapighqelleq.

⁷ Iwernga nighugmi kiyaghtekumta ellngan nighugmetellghatun taawa ilatngaakut ilamnnun, aawanllu Jesus‑em, Kiyaghneghem Ighneghan, ukmangiiwiinkut tamaghhaaneng seghleghqellemnneng.

⁸ Seghleghqellghinnikumta puughtengnguukut whangkunneng katam, ipapighqellghitukutlu.

⁹ Iwernga aapqumteki seghleghqelleput Kiyaghneghmun, seghevusaghqaqiinkut seghleghqellemnneng, ukmangighyaghqaqiinkutlu tamaghhaaneng anaggutaghallemnneng qayughllak ataasiighmetuqlu elqughullunillu ayuqelghiinguuq.

¹⁰ Seghleghqigannikumta, Kiyaghneq iqlengiqestengughlleqaghput, akuzitangillu atuqngunghitaput.