पेन हुपिस्ता पोल्लें 15 - पवित्र पोल्लेपेनदा होंगुने निंडता बंगारमता एडुं वाटिं 1 अस्के स्वर्गमते नना मरुंदि पेद्दा इचंत्रमता चिन्ह हूळतन. अद बतल इत्ते, एडुं दूतानगा, एडुं गंडाल्कु मत्तां. अव आकिरता गंडाल्कु आंदुं. अव आता पजा पेनदा होंग सल्लारंता. 2 बोर अय्ते आ जिवरासि, बोम्मा आनि दाना पोरोलता नंबरतोनि लडाइ कीसि गेल्सि मत्तुर, ओर अंटोर पेनदा टांबुरां पीसि आ समुद्रमता ओड्डुनपोर्रो नित्तिस मत्तद नना हूळतन 3 पेनदा सेवाकुड मूसाना पाटा आनि गोर्रे पोरिना पाटा पारसेके ओर इल्हा इनुंदुर, “ए अन्निटकन्ना एक्को सक्तिमंतुन आता मावा सामि पेनदुना, नीवा कबाह्क पेद्देय आनि इचंत्रमतव आंदुं, निमे बस्केळ्क मंदना राजान आंदिन, नीवा हर्रि नीतितद, आनि सत्तेमतद आंदु, 4 हे सामि सिराप निमेने पवित्र मंतिन, असोंटस्के नीकु वेरियाकोंटा, नीवा पोरोलता महिमा कियाकोंटा बोर मना पर्रांतोर? नीवा न्यायमतुन अंटोर हूळतुर, अदुनहाटीं दुनियाता अन्नि देसेल्कुना लोकुल्क निहगा वासि नीके मोळ्कानुर.” 5 अद आता पजा, गवाइता डेराता गुळितुन, स्वर्गमते कुल्ला कीसि मत्तद नना हूळतन. 6 आ गुळिताल एडुं दूतां एडुं गंडाल्कुन पीसि पलाते पेय्सतां, अव जगा-जगा तेल्लगा मेर्सना कपडिं केरसि मत्तां. अवुना सातिक बंगारमता पट्टां दोहाचि मत्तां. 7 अस्के आ नालुं जिवरासिनाल उंदि जिवरासि, अव एडुं दूतांक, बंगारमता एडुं वाटिं हिता. आ वाटिने युगा-युगाल्क जीवाते मंदना पेनदा होंग निंडिस मत्ता. 8 अस्के अद पूरा गुळि पेनदा महिमाता वेल्गुने आनि ताकतहेंदाल पोयातोनि निंडिस होत्ता. पजा आ एडुं दूताना अव एडुं गंडाल्कु पूरा मारनदाका अद गुळि लोप्पो बोरे नेंगा पर्राहिल्लुर. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.