इब्रि 3 - पवित्र पोल्लेयेसु मूसांकन्ना पेद्दोड 1 अदुनहाटीं, पवित्र विस्वासुल्कुनिटा! मुक्तिता पालिगाह्क आयालय पेन मीकुन केयता. येसुन पेन पेद्दा पेर्मल आनि प्रेरित आयालय लोहचीता इंचि मनम ओप्कुत्तोम, अय्ते ओना बारेमते मिमेट विचारम कीम्टु. 2 पेनदा पूरा कुटुंबमते मूसाल अन्नि कबाह्कुने विस्वासमलायक मत्तोर, अल्हेने येसुगुडा ओन निल्हाता पेनदाहाटीं विस्वासमलायक मत्तोर. 3-4 हरेक लोतुन दोहानोर बोरन्ना वरोर मनकल मनंतोर, गानि अन्निन तयार कीतोर मात्रम पेने आंदु. बल्हा अय्ते लोतुकन्ना लोन दोहानोंक एक्को कदर मनंता, अल्हेन येसुगुडा मूसांकन्ना एक्को कदरगल्लोड इंचि पोरोल तरकुत्तोर. 5 वायाना कालमते पेन बतल-बतल अय्ते वेहाना मंतानो, अवुना गवाइ लोकुल्कुंक वेहनाहाटीं मूसाल, पेनदा पूरा लोतोरगा वरोर विस्वासमलायक सेवक आसि मत्तोर. पेनदा लोकुल्कुना आरामता बारेमते 6 गानि पेनदा विस्वासमगल्ला मर्रि, किरिस्तु, पेनदा पूरा लोतोरा अदिकारि आसि मत्तोर. मनमगिंटा मना विस्वासम आनि आसेता बारेमते आकिरदाका इरगा गट्टिगा मत्ते, मनमगुडा पेनदा लोतोरम आसि मनंतोम. 7-8 अस्के पवित्र आत्मा दर्मसास्त्रमते इल्हा इंता: “मिमेट इय्याला पेनदा पोल्लें केंजानय्ते, पेन वेहतद मोमोट केंजोम इंचेके, इस्राएल लोकुल्क बय्लि जेगातगा पेनदा पट्टु हूळालय बल्हा मुजोरिं कीतुरो, अल्हा मिमेट मीवा मनसुकुने मुजोरिं कियमट. 9 अगा नल्पै वर्सनदाका नना कीता कबाह्कुन हूळसिगुडा, मीवा पेद्दाल्क परमेर्का कीसि नावा पट्टु हूळतुर. 10 अदुनहाटीं नना आ पीळिता लोकुल्कुनपोर्रो होंग पीसि, ‘ईरा मनसु बस्केळ्क नहागटाल तप्सोंचि लक्कु मनंता, ईर नावा हरदुन बस्केने एरपाट किया हिल्लुर,’ इंचि ओर्कुन इत्तन. 11 अदुनहाटीं नना होंगुने, ‘ओर्कुन आराम दोर्कना जेगाते बस्केने होळिया हिय्योन,’ इंचि ओट्टु तिंचि वेहतन.” इंचि इत्ता. 12 विस्वासुल्कुनिटा, जेगर्ता! जीवाते मंदना पेनदापोर्रोटा विस्वासमताल लक्कु कियागोट्टनसोंटा कराब, विस्वासम हिलुवा मनसु, मीलोप्पो बोरागेन मनानायो. 13 गानि पापम मीलोप्पो वासि मीवा मनसु मुजोरि कियाकोंटा मननाहाटीं, “इय्याला” इनना वेला मनानेंकेने दररोज वरोंक-वरोर दैरनेम हीसेक मंटु. 14 बारित्ते, सुरुवने मनम इर्ता बरोसातुन मना पिस्वरता आकिरदाका गट्टिगा पीसि मत्तेन, मनम किरिस्तुना पालिगाह्क आंतोम. 15 दीनकन्ना मुन्ने दर्मसास्त्रमते इल्हा वेहतद मंता: “मिमेट इय्याला पेनदा अल्किर केंजानय्ते, पेन वेहतद मोमोट केंजोम इंचेके, इस्राएल लोकुल्क बय्लि जेगातगा पेनदा पट्टु हूळालय बल्हा मुजोरिं कीतुरो, अल्हा मिमेट मीवा मनसुकुने मुजोरिं कियमट.” इंचि रासि मंता. 16 पेनदा पोल्ले केंजसिगुडा दाना विरोदमते ताकतोर बोर आंदुर? मूसानतोनि कलियसि इजिप्त देसेमताल पलाते अरता आ अंटोर लोकुल्के गदा! 17 नल्पै वर्सनदाका पेन बोरा पोर्रो होंग पीसि मत्ता? पापम कीसि बय्लि जेगाते बोरा पीनगुल्क अय्ते अर्सि मत्तांगो, ओरा पोर्रेन आयोना? 18 “ओर्कुन आराम दोर्कना जेगाते बस्केने होळिया हिय्योन,” इंचि पेन बोरा बारेमते ओट्टु तित्ता? दाना पोल्ले परकारम बोर अय्ते ताका हिल्लुरो, ओरा बारेमतेन गदा! 19 इल्हा ओर्कु विस्वासम हिलुवाहेंकेन, ओर आराम दोर्कना जेगाते होळिया पर्राहिल्लुर, इंचि मनाकु तेळियंता. |
© 2022, Wycliffe Bible Translators, Inc. All rights reserved.
Wycliffe Bible Translators, Inc.