Tito 2 - Ese Ejja New Testament

Esohui e'ejojonei huohuicapoquijji Eyacuiñajjija esohui jayojja eba'epoquijji

¹ Miyaya ca oe esohui e'ejojonei huohuipoquiacuetii joya ecua Eyacuiñajjija esohui poani jamaya.

² Jesosaja epeejji dejja etiipishana nequicuanaja oja yami nahuecapoquijji queamimishi epo poanijje. Oya queapame ba'epoquiani bacajji peacuanaja. Oya Eyacuiñajjija esohuijo queaja'a jjashahuabaquicapoquijji, ojaya peacuana queajea acapoquijji pea-ai. Onaa queacamajanee acajje esohuijo oya queaca'a nequicapoquijji jamatii etiipishana nequi.

³ Oya jayojja eponacuana pea-ai etiipishana ani queapame ba'ecapoquijji mimishiama. Ojaya peacuana niñebaca-ajja. Oya ehuoojjijo jjashahuabaquica-ajja. Epona etiipishanaja pea eponacuana niñesheacajji ache queapame ojaya acajji.

⁴ Epona etiipishanaja pea eponacuana esho'i iyetiinei huohuicapoquijji ojahue oja queajea apoquiajjijo, oja bacuacuana pea-ai.

⁵ Ojaya huohuipea-aicapoquijji pea eponacuana queaja'a ejjashahuabaquipoquijji esohuijo, oja yami pea dejja quiajjima yajjijo, oja equijo ba'ecuana jaahuanapoquiajji epojjijo, peacuana queapame apoquiajjijo, ojahueja esohuijo o ejjashajja-ajjaquipoquijjijo pea-ai ojaya huohuicapoquijji. Eponacuana jama anipoquiani bamajje Eyacuiñajjija esohui queapame poani bacaje cuaa. Eyacuiñajjija esohui peajja poani eajji pojjeama poaje cuanaja.

⁶ Dejjasho'icuana shacuima' nequi niñesheapoquiacue o queaja'a ba'epoquijjijo.

⁷ Tito, miya queaja'a ba'epoquicue ojjañacuananijje ona mi jayojja pea-ai eba'epoquijjijo. Beca jjashahuabaquime pojjeama nequiya sohuihuohuicue cuana, esohuijo jjahue'equianiya pojjeama.

⁸ Esohui e'ejojonei huohuipoquiacue cuana jamatii peacuaa miya siajjepoani poso acaje. Majoya mi siajje ajji poanicuana queabicho poaje mijo mi e'ejojonei poani bamajje. Majoya chama' poaje pea-ai esohui queaquehua esejo emimi'yojji ojaya.

⁹ Niñesheacue joya peajo chacochacoanicuana ejjeshe o chacomeejji poanija esohuijo queapame ejjashajja-ajjaquipoquijji. Queapame ojo chacochacocajji, o chacomeejji poani dejjanijje oya panajajica-ajja.

¹⁰ O chacomeejji poanija aquianacuana ojaya siica-ajja. E'ejojonei queapame ojaya chacocajji siipojjima'nei nequiya. Oya jama queapamenee peajo chacochacopoquiani bamajje queahuisocuaa Eyacuiñajjijo ejjanahuemeequi'yojji esohui queapamenee poani shajja-ajjasa-acaje.

¹¹ Eyacuiñajjiya eseya queapame acanaje ojayanei ejjashahuabaquijjijo. Ohua jama acanaje shajja-ajjamajje ojjañajaajjicuana ojo jjanahuemeequica'yojji.

¹² Eyacuiñajjiya eseya queapamenee acanitii jjabaquimajje esejaya mimishicuana cajaa aneica'yojji, dejja queamimishi poani jama ba'epea-aisapoca'yoajja. Eyacuiñajji esejo jama poani jjabaquimajje jiquio meshijo eseya queapame ba'epoquije, queaja'a jjashahuabaquipoquije. Eyacuiñajjijo ejjaquiaqui se ba'ecapoquijji. Jamaya eseya pocajji.

¹³ Eseya queabihui ba'e jjaishoaquipoquijetii acheshono Eyacuiñajji queaca'aneetii queasajajanee eseja Emeshimesenei Jesosa Quito pea-ai poeje o'oya. Yahuajonei ohuaya huohuicapoa esohui oya poeje o'oya. E'ejojonei oja esohui jayojja oya poeje o'oya.

¹⁴ Jesosa oyanei jjaquiaquiapoa emano'yojji esejo ese jjeshe'yojji epojji queamimishitii epo poanijje. Ojjaña eseja mimishicuana cuijea'yojji, ese ojaya'yo epojji pea-ai oya mano'yapoa. Majoya eseya queaja'a ba'esaneipoaje, queapame chacochacosapoaje ojo.

¹⁵ Jiquio esohui eya mi huohuiañaya huohuitiipoquiacue cuana queaja'a o ba'epoquijji. Miyaya Eyacuiñajjija nequimeeya queaca'a nequiya huohuipoquiacue cuana. Eyacuiñajjija esohuijo ejjashajja-ajjaquijji huohuicue cuana. Ojaya epeejji shajjama' jayojja po'yajo niñesheacue. A'a oe onajo miquea esohui bajjima jjapomeequijji.