Noca 9 - Ese Ejja New Testament

Jesosaa oja babaca ona sohuihuohuiquijji poani 12 huisome dejjacuana huoojeacapoa ojjaña meshicuanahuasijje esohui huohuiya

¹ Majoya aje Jesosaa oja babaca ona sohuihuohuiquijji poani 12 huisome dejjacuana oque jjachichaquimeecapoa. Ohuaya huohuicapoa o queaca'a pojjijo, o queasohuipoja pojjijo pea-ai. Eshahuamasecuana dejjaja yamijo nequi oja huoojeacuayameequi'yojjijo, emano jaacuana jja-ajaquimee'yojjijo pea-ai huohuicapoa.

² Jamajjeya Jesosaa huoojeacapoa cuana queahuiso meshijo ba'ecacuanahuasijje esohui queapame Eyacuiñajjiya ojjaña huoojeacapoquianitiijo huohuiya, emano jaacacuana jja-ajameequi'yohua pea-ai.

³ Jama huohuime Jesosaa acapoa cuana huoojeajjimahua ba'a: —Jamatii oe poquicue aquianama'. Acui ejjaquecuaca'aquijji, bolsa aquiana biojji, pahui, bejjo, pea daqui-ao quijje ehuosho'yojji pea-ai a'a dojojji.

⁴ Miquianaya pea meshijo nequicaja equiyasijje nobiquimajje majotiiya aniñaquicue so'o onijjetii. Majotii aniya aje mi poquije peaja meshiyasijje. A'a peacuanaja equiyasijje anipoquijji.

⁵ Ma meshijo ba'ecacuaa quiana cajaa acajje, miquea esohui shajja-ajjasapo-ajjajjejojo, ¡a'a ma meshijotii nequijji! Poqui'yomajje meshipohui mique ejeojjijo ani cuia-iyajajeana'yocue macuiñajjicuana jjabaquijji oya shajjama'nei jayojja poanijo.— Jamaya Jesosaa huohuicapoa cuana.

⁶ Majoya aje Jesosaja esohui shajja-ajjajeyomajje oja babacacuana poquiapoa queahuiso meshiyasijje esohui queapame Eyacuiñajji ojjaña nahue'yojji poani huohuiya, emanocuana jaaca jja-ajameequi'yohua pea-ai.

Herodes jjashahuabaquiapoa ae dejja shai Jesosa

⁷ Galilea emeshimeseya Herodes bajjaniya shajja-ajjacapoa Jesosaa queahuiso dejjaja ajjima'neineicuana acapoquije. Queahuisocuana Jesosajo queapamenee mimipoquiani ohuaya shajja-ajjapea-aicapoa jama ba'a: —De, Juan ona iñajeanobiajji ponequinaje dejja emano'yo jaa shequi'yonaje.—

⁸ Peacuana ca jama poa Jesosajo ba'a: —¡Chojja de! Oya pojja'a ca Elías bajjani jjaja'aqui'yonaje ma yahuajonei Eyacuiñajjija esohuihuohuijji nequiapoaya.—Peacuana ca jama poa ojo ba'a: —Oya pojja'a ca ma yahuajo esohuihuohuijji nequiapoa mano'yoya shequi'yonaje.—Jama mimime poani cuana Jesosajo shajja-ajjamajje Herodes queamete jjashahuabaquianiapoa ojo.

⁹ Majoya emeshimese Herodesya jama acapoa ba'a: —Eyayaneiya Juan piqui jajasejjajeameequi'yonaje. Jamajjeya ¿ache dejja shai jiquio queaca'anee nequi? Eyaya esohui queahuisoneenee onaa huohuicani shajja-ajjaña ojo.— Jamajjeya Herodesya Jesosa basaneineiacapoa.

Jesosaa queahuisonee 5.000 huisome dejjacuana bobiacapoa oepojjinei bobijo

¹⁰ Majoya aje quijje Jesosaja babaca dejjacuana ona sohuihuohuiquinequijji poani peajaajjicuana sohuihuohuiya poqui huacuaya poe'yapoa. Jesosa huohuicaña'yapoa cuaa ojjaña ma Eyacuiñajjiya oya ameesahuacanaje huisotiijoya. Majoya Jesosaa oja babacacuana oopana 12 huisome onijjenei eanijji dojotepecapoa pueblo Betsaida meshiyasijje.

¹¹ Majoya Jesosa Betsaida meshiyasijje poquinaje shajja-ajjamajje queahuisoneeneecuaa oya equijje acapoa o ba'yohua. Jesosaa queahuisonee poecaje bamajje ja'acajjequiapoa cuana queapameya. Majoya ohuaya esohui huohuicapoa Eyacuiñajjiya ojjaña huoojeacapoquianitiijo, emanocuana jja-ajaquimeeca'yapoa pea-ai.

¹² Majoya aje sineajo oja babaca dejjacuaa 12 huisome Jesosaque jjanequichipiquimajje jama acapoa oya ba'a: —Sinia' aje. Jamajjeya jiquio anicacuana huoojea'yocue peaja meshicuanahuasijje bobi jjesheya oja bejjojo jomishocaa pea-ai. Chama' bobi jiquiojo se-ejjama' meshijo ona bobiajji.—

¹³ Jesosaa ca jama saja-ame acapoa cuana ba'a: —Chojja de, miquiaayatii oe bobiacue jiquio anicacuana.— Ohua jama acajje jama poa cuana ba'a: —Chama'neinei esejaya bobi jiquiojo ona bobiajji. Che caca oe cinco huisomenei pahui ani, dos nahuoosisi jaa, mahuisoneiya. ¿A'a acuae ecuaa quio huiso anicacuanaja ijjiajji bobi jjesheme?— jamaya poa Jesosanijje oja babaca dejjacuana.

¹⁴ Majo anica dejjacuana 5.000 huisome poa. Eponacuana, esho'iquiana pea-ai ca sicojjima poa. Jamatii Jesosaa oja babaca dejjacuana huohuicapoa jama ba'a: —Ojjañacuana anioquemeecue 50 huisome ejjachichaqui, pea 50 huisome ejjachichaqui, jamaya anioquemeecue cuana, mahuisoya.—

¹⁵ Jamajjeya Jesosaja esohui jayojjaya acapoa cuaa, anioquemeecapoa 50 huisome ejjachichaqui, pea 50 huisome ejjachichaqui, mahuisoneiya.

¹⁶ Majoya aje Jesosa cinco huisome pahui, beca nahuoosisi pea-ai jjeshemajje eyahuasijje jjabajeasohuaquiapoa Eyacuiñajjinijje emimijji. Eyacuiñajji bobijo bihuiamajje Jesosaa pahui mijicapoa oja babacacuanaja majo anicacuana quiapoquiajji. Nahuoo pea-ai quiacapoquiapoa cuaa ma eanioque anicaja eijjiajji.

¹⁷ Majoya ojjaña ma eanioque anicacuaa bobi ijjiacapoa, jejjecapoa. Majo ejjachichaqui anicacuaa ijjiajeyocajo oja babacacuaa onaja ijjiajeyojjima ani bobi chichaca'yapoa eshaja-aijo. Doce huisome eshaja-ai cuatajeameecapoa majo anicacuanaja ijjiajeyojjima poa pahuiya, nahuoohua.

Pedrohua Jesosa oya Eyacuiñajjija huoojea ojjaña nahue'yojji e'ejojonei poani huohuicapoa

¹⁸ Majoya aje oe epojjajo Jesosaa oenei Eyacuiñajjinijje mimimajje o shajja-ajjajji poanicuana majotii anipea-aiya ohuaya huohuiajjacapoa cuana jama ba'a: —¿Yajja shai poani cuana ejo, ae dejja shai eya poani acani cuaa?—

¹⁹ Oya saja-acapoa cuaa jama ba'a: —Miya pa Juan ma ona iñajeanobiajji ponequinaje dejja, maya. Peacuana ca jama poani mijo ba'a: “Elías coma ma yahuajo esohuihuohuijji ponequiapoa dejjaya.” Peacuana ca jama poani mijo ba'a: “Eyacuiñajjija esohuihuohuijji ma yahuajonei nequiapoa jjeya eshequi'yo nequi pojja'a”, jamaya poani cuana mijo— Jesosa huohuicapoa cuaa.

²⁰ Majoya Jesosaa huohuiajjacapoa cuana jama ba'a: —Miquianaya ¿yajja poani? ¿a'ya eya?— Simón Pedrohua oya queaja'a saja-acapoa jama ba'a: —Miya caca oe e'ejojonei Quito, Eyacuiñajjija huoojea ojjaña nahue'yojji epojji.—

Jesosaa huohuipea-aicapoa cuana quijje o mano'yojjijo

²¹ Majoya Jesosaa o shajja-ajjajji poanicuana huohuipea-aicapoa peacuana che oema'nei oja huohuijjima yajjijo oya Jesosa e'ejojonei Quito Eyacuiñajjija huoojea ojjaña nahue'yojji poani.

²² O shajja-ajjajji poanicuana huohuitiicapoa jama ba'a: —Eya Dejjapojji epo quijje queaneenee acaje'yo cuaa. Judío dejja etii poanicuaa eya cajaanei acaje. Moisesja tehuehuohuijji poani dejjacuaa, Eyacuiñajjija equi-aijo chacochacopoquiani etii poanicuaa pea-ai eya cajaanei acaje. Majoya quijje eya quecuameecaje'yo cuaa. Jamatii eya tres cahuime huiso emano'yo jaa shequije'yo.—

²³ Jesosaa huohuitiicapoa cuana jama ba'a: —Joya e shajja-ajjajji posapoanicuana ojayanei eba'ejjijotii jjashahuabatiiquicapoquiajja. Jiquio ecua dejjaa acui ecuiata'apee abocani edojojji o quecuacaje'yohuasijje jama pea-aiya e shajja-ajjajji poani ba'epoquije ojjaña pojjajo, ejjanahuequi'yojji pojjeama poaje queacamajaneejo.

²⁴ Ojjaña joya ojayanei eba'ejjijo jjanahuequipoquianicuana ecuea echacojji eajji pojjeama. Comacuanaja eba'ejji peajja bacaje Eyacuiñajjiya. Ojjaña joya jjanahuequiajja poanicuana ecuea echacojji yajjijo ca Eyacuiñajjiya comacuanajaya eba'ejji queapamenee bacaje.

²⁵ Joya ema'tii jayojjacuana ba'epoquiani quea-aquianahuisonee epojji, cua ohua sacani huisotii jjeshejji pea-ai. Majoya oya mano'yomajje, ¿a'a queapame nequije'yo Cuaqui-aiyasijje? Chojja.

²⁶ Joya ecuea epeejji queabicho poani ejo, ecuea esohuijo pea-ai, eya, Dejjapojji epo queabicho poaje ojo e quijje poeo'oyamajje. Eya Eyajo queaca'aneetii queasajajanee nequi, ecue Chii queaca'aneeja jeaja'amee poeje o'oya. Ecue Chiija ángel queapameneenee queaca'anee ejeaja'acuananijje ojee poeje o'oya.

²⁷ Eyaya e'ejojonei quiana huohuiaña. Becaa quiaa jiquiojo mano'yojjima eshe nequiya Eyacuiñajjiya ojjaña huoojeacapoquianitii baje.—

Jesosa queacojjajijinee poa, jjahuapacuajiquiapoa

²⁸ Majoya aje quijje ocho cahuime huiso jjayejjequiajo, Jesosaa Pedro, Santiago, Juan pea-ai eyiyo quea-ao nequiyasijje dojosohuaquicapoa onijjetii Eyacuiñajjinijje mimiya.

²⁹ Jesosa Eyacuiñajjinijje mimianitii oya pea cojja ponanapoa. Oya queacojjajijinee poa eshequi queajijineenee nequiani jama. Oja daqui quea-oshesiyoja'anee pea-ai ponanapoa.

³⁰ Majoya beca dejja ma yahuajonei Eyacuiñajjija esohuihuohuijji poa dejja: Moisés, Elías pea-ai jjanequija'aquiapoa Jesosanijje mimimimiani.

³¹ Majo o mimimimianijo Jesosanijje Moisés, Elías pea-ai queasajajanee poani pea-ai bacapoa Juanya, Pedrohua, Santiagohua pea-ai. Moisés, Elías pea-ai mimimimiapoa Jesosanijje o mano'yojjijo yajja oya acaje'yo cuaa Jerusalén meshijo nequi.

³² Pedro, Santiago, Juan pea-ai queacojjacahuinee poa, jamatii cahuijjima poa. Jesosaja eyami queasajajanee, Moisesja, Eliasja pea-ai bacanequiapoa.

³³ Majoya Jesosa Moisesnijje Eliasnijje mimimimipajea'yapoa. Moisés, Elías pea-ai jjeyanei poquije'yo bamajje Pedrohua Jesosa huohuiajjacapoa jama ba'a: —Emeshimesenei, queapame eseya jiquiojo ani. Miya sapoanijo ecuaa tres equisisicuana jjeya huanasohuaje. Oe miquea epojji, pea ca Moisesja, pea ca Elías anijji ecuaa jjeya huanasohuaje.— Jamatii Pedro mimijeanaje, jjashahuabaquijjima.

³⁴ Pedro onijje mimianijotii bo quea-oshesiyoneeya nequioqueñamajje Pedro, Santiago, Juan pea-ai queyacañapoa. Bohua queyacañajje oya queameteneenee poa.

³⁵ Shajja-ajjacapoa cuaa botejjee nequi oe mimije jama ba'a: —Jiquio ecue Bacuaejja, ecue babaca. Jamajjeya oya shajja-ajjaneicue.—

³⁶ Esohui jama mimije shajja-ajjajeahua Jesosa oenei nequi bacapoa cuaa. Chama'nei pea poa onijje nequi. Majoya aje quijje eyiyojo nequi jaaoquequi'yomajje Pedroja, Santiagoja, Juanja pea-ai peacuana huohuijjimatii poa ma ohua eyiyojo nequiya bacanaje huisotiijo.

Jesosaa oe dejjasho'i shahuamase yamima' pomeeca'yapoa

³⁷ Majoya aje pea pojjajo Jesosa eyiyojo nequi jaaoque'yajo queahuisoneeneecuana poecapoa o baa oque jjachichaquiya.

³⁸ Oe dejjaa onanijje poeya janobajjimanei Jesosa huohuiajjacapoa jama ba'a: —Esohuihuohuijji, jiquio ecue bacuaejja oenei bacue o jja-ajaquimee'yojji.

³⁹ Oe eshahuamaseya oja yamiyasijje nobiquimajje niñepoquimeecani, sasiameecani, huapameecani enabajje. Oya queanee pomeecani oja yamijo nequiya oya cuayaqui'yoajjajjejojo.

⁴⁰ Eyaya mi shajja-ajjajji poanicuana huohuiajjaneineinaje oja o shahuamase ecue bacuaejjaja yamijo nequi huoojeacuayamee'yojji nisho. Jamatii ojaya huoojeacuaya'yojjima poanaje cuanaja, enequitii.—

⁴¹ Majo nequiya Jesosaa huohuicapoa cuana jama ba'a: —Miquianaya jiquio eshe ba'ecacuana queamimishica'atii poani. Miquianaya ejo jjashahuabaqui'yoajjatii ba'epoquiani. Eya miquiananijje enequitiitiijji pojjeama jiquio meshijo.— Majoya Jesosaa ma dejja jama acapoa ba'a: —Jiquiacua jjeyahuanei mique bacuaejja jjequicue eque.—

⁴² Dejjasho'i Jesosaque jjanequichipiquiñajeahuajotii eshahuamaseya oya niñepoquimeecao'oyajje oya meshiyasijje jaabichajeaquiapoa. Majoya Jesosaa eshahuamase esho'ija eyamijo nequi tecueacajje oya cuayananaqui'yapoa oja esohuijo. Majoya Jesosaa dejjasho'i quea-aja'yo oja chii quiaca'yapoa sapa niñema'yo.

⁴³ Ojjaña majo nequicacuana jjabaneineiquicapoa Jesosajo Eyacuiñajji queaca'aneeneeya oya jama ameeca'yonaje bamajje. Majo anicacuana jjabaneineiquianijotii Jesosaa dejjasho'i shahuamase yamima'yo pomeecanajejo, ohuaya o shajja-ajjajji poanicuana huohuicao'oyapoa jama ba'a:

Jesosaa huohuicao'oyapoa cuana o mano'yojjijo

⁴⁴ —Jiquio esohui jjeya eyaya quiana huohuije, shajja-ajjaneineicue, a'a oe pajea'yojji. Eya Dejjapojji epo iñameecaje cuaa dejjacuanaja equecuamee'yojji.—

⁴⁵ Jamatii o shajja-ajjajji poanicuanaja queaquehuatii poa ma esohui yajja poanijje Eyacuiñajjija ojaya queaja'a pomeejjima poanajejojoya. Queamete poa cuana Jesosajo ojaya esohui yajja poanijje ehuohuiajjajji.

Jesosaa huohuicapoa ache dejja queaca'a ebionei etii nequije ebajji

⁴⁶ Majoya aje Jesosa shajja-ajjajji poanicuana ojee jjamimicuiajeanobiquicapoa ache queaca'a ebionei etii nequije ebajjijo.

⁴⁷ Jesosaa ojaya ejjashahuabaquijji queaquehua poani bamajje oe dejjasho'i iyaacapoa opejjeneimijijje enequijji.

⁴⁸ Majoya o shajja-ajjajji poanicuana huohuicapoa jama ba'a: —Ojjaña joya jiquio dejjasho'i queapame ja'ajjequijji poani ecuea bajjanijo, eya pea-ai queapame ja'acajjequiani. E queapame ja'ajjequijji poanicuaa e huoojeajji epo pea-ai queapame ja'acajjequiani. Joya miquiananijje ani oyaneitii queaca'a pojjeama jjabaquiani, comaya Eyacuiñajjiya queaca'a ebionei etii enequijji bacani.—

Ache Jesosaja epeejji poani huohuicapoa

⁴⁹ Majoya Juanya Jesosa huohuicapoa jama ba'a: —Esohuihuohuijji, ecuaaya pea dejja banaje, ohuaya miquea bajjanijo eshahuamasecuana huoojeacuayajeameeca'yani. Oya pea, esenijje nequiajja. Jamajjeya ecuaaya oya eshahuamase huoojeacuayajeamee'yojjima anaje.—

⁵⁰ Jesosaa ca oya huohuicapoa jama ba'a: —¡Chojja, a'a jama ameejjima ajji! Joya esejo jjaniñebaquiajja poanicuana comacuanaya ese chacosahuajji poani pea-ai.—

Jesosaa Santiago, Juan pea-ai tecueacapoa

⁵¹ Epojja Jesosa sohuaqui'yojji Eyahuasijje poechipiajo, oya jjashahuabaquiapoa epoquio'oyajjijo Jerusalén meshiyasijje. Jesosa pea jjashahuabaquime posapo-ajjanei poa Jerusalén meshiyasijje epoquijji.

⁵² Jamajjeya ebionei ohuaya huoojeacapoa dejjacuana Samaria meshiyasijje equi o cahuichichajji baa.

⁵³ Jamatii ma meshijo ba'eca Samariacuiñajjicuana Jesosa jjequinobiasapo-ajjaneipoa oya Jesosa Jerusalén meshiyasijje poquianijojoya.

⁵⁴ O shajja-ajjajji poani Juan, Santiago pea-ai Jesosa cajaa acaje bamajje jama acapoa ba'a: —Emeshimesenei, miya jama sapoanijo ecuaa Eyajo jaa cuaquijiji jeaoqueameeje jiquio dejja mi sapo-ajja poanicuana dahuajea'yojji.—

⁵⁵ Oya queaquehua jama mimiani shajja-ajjacapoa. Majoya Jesosaa oya bajeamajje tecueacapoa.

⁵⁶ Majoya pea meshiyasijje poquiapoa cuana.

Jesosanijje epo'yojji nisho queahuisocuana po-ajjacapoa

⁵⁷ Majoya aje oe dejjaa Jesosanijje ejeojjijje poquijeya oya huohuiajjacapoa jama ba'a: —Emeshimesenei, eya minijjetii nequipoquisapoani cua mi poquije meshicuanahuasijje ojeetii minijje epo'yojji.—

⁵⁸ Jesosaa oya saja-acapoa jama ba'a: —Bacue, ebiocuiñajji samaoja jjani o jaajji ejaa. Cuichojjicuanaja pea-ai eja yani. Jiquio eya Dejjapojji epoja caca oe ecuea chama' equi e jomishocapoquijji.—

⁵⁹ Majoya aje Jesosaa pea dejja huohuicapoa jama ba'a: —Enijjetii po'yocue.— Ohuaya ca Jesosa saja-acapoa jama ba'a: —Emeshimesenei, eya ebionei ecue chii mojeaa capoquisahua.—

⁶⁰ Jesosaa oya saja-acapoa jama ba'a: —Chojja, jjeyaneitii oe enijje po'yocue. Joya emano'yo jayojja poanicuaa comaaya emano'yocuana camojeaquicahua. Miña ca oe poquicue esohui Eyacuiñajjiya ojjaña huoojeacapoquianitii peacuana huohuiya.—

⁶¹ Pea dejjaa Jesosa huohuicapoa jama ba'a: —Jesosa eya minijjetii nequipoquije minijje epo'yojji. Jamatii eya ebionei capoquisahua ecue huapa pojjeamacuana huohuina'yohua.—

⁶² Jesosaa oya saja-acapoa jama ba'a: —Dejjaa oja pala dojocanaje chacohua. Majoya oya pea jjashahuabaquime poanaje, chacojjima acanaje. Jamaya queaquehua. Oya jayojja joya dejja Eyacuiñajjijo chacochacosapoani, majoya cajaa acani. Comaya queapame pojjeama Eyacuiñajjiya ojjaña huoojeacapoquianitiijo echacochacopoqui'yojji.—