Noca 2 - Ese Ejja New Testament

Jesosa cuayapoa

¹ Ma Juan cuayapoa shequiajajotii pea-aiya aje Roma emeshimese Augusto bajjaniya huohuicapoa ojjañacuana ache huiso ba'eca esicomee'yojji ojjaña meshiyasijje.

² Jiquio ebionei ache huiso ba'eca esicomeejji huohuicapoa Cirenio bajjani dejja Siria emeshimese nequijo.

³ Emeshimeseja esohuijo ojjañacuana poquicajji poa ma oja etiiquiana cuayacapoa meshiyasijje oja bajjani tehuemeeya.

⁴ Jamajojoya aje José provincia Galilea, pueblo Nazaret meshijo nequi poquiapoa provincia Judea, pueblo Belén meshiyasijje, ma yahuajonei emeshimese David cuayapoa meshiyasijjeya. Oya José Davidja osecua poa.

⁵ José cuamaya poquiapoa oja bajjani tehuemeeya oja mesena epona Marianijjetii. Oya oejjitii ani poquiapoa.

⁶ Majoya José, María pueblo Belén meshijotii ani María bacuaneeapoa.

⁷ Jamajjeya majotiiya oja bacua cojjasobo cuayapoa dejjasho'i. Mariaa oja bacua tapojo bebomajje huanacapoa ehuonecuanaja bobi iyajjijo equisisijotii. Oya majotii jaapoa pea equi María José cahuichichajji chama' poajojoya.

Ovejajaahuanajji poanicuana ma meshijo queachipinee aniapoa

⁸ Belén meshichipineijo ovejajaahuanajji poanicuana aniapoa. Oya majotiiya ovejacuana jaahuanapo-anichichapoa.

⁹ Majotii o anijoya aje oe Emeshimeseneija ángel jjaja'acuajiquiapoa. Ma ovejajaahuanajji aniapoapejjejotiiya jeaja'ameecapoa Emeshimesenei queasajajaneeya. Jamajjeya queametenee poa cuana.

¹⁰ Majotii nequiya aje ma angelya jama acapoa cuana ba'a: —¡A'a queamete pojji! Esohui queapamenee eyaya yenaje miquiana ojjaña meshijo ba'eca pea-ai queabihui pojji. Jiquio eya yenaje esohui queapame jama poani ba'a:

¹¹ Jjeya jiquio pojjajotii Davidja meshijo pueblo Belén meshijoya ojjaña nahue'yojji epojji cuayanaje. Oya Quito bajjani Emeshimesenei poani.

¹² Miquiaaya oya tapojo bebo ehuonecuanaja bobi iyajjijo jaa bamajje queaja'a poaje jiquio eya mi huohuiaña esohui e'ejojonei oya cuayanaje.—

¹³ Ohua esohui jama huohuime acajeahuajo pea angelcuana queahuisonee jjanequija'acuajiquicananapoa eyajotii nequi ojee ma ebionei angelnijjetii. Eyacuiñajji bihuiacapoa ángel queahuisoneecuaa ojee jama ba'a:

¹⁴ —Eyacuiñajji Eyajo nequi ejjabihuiaqui. Jiquio meshijo ba'eca Eyacuiñajji queabihuiya bacani, comacuanaya queapame caba'emeesahuacapoquiahua.—

¹⁵ Majoya aje angelcuana eyahuasijje ba'esohuaqui'yajo, ovejajaahuanajji poanicuana jama mimime ponequiapoa oya oopana ba'a: —Cua'a epoqui Belén meshiyasijje ojjaña jiquio eseya shajja-ajjanaje ebacua cuayanaje baa Emeshimeseneiya oja ángel huohuimeecanaje esohuijo.—

¹⁶ Jamajjeya cuamaya poquicuajiapoa cuana. Majotii ehuonejaajji poani equisisijotii jaa ebacua bacañaquiapoa ovejajaahuanajji poani dejjacuaa oja nae Marianijje, Josenijje pea-ai jaa.

¹⁷ Ebacua ecuaya jaa bahuamajje ovejajaahuanajji poanicuana huacuaya poqui'yapoa. Jamajjeya huohuicañaquiapoa cuaa queahuisocuana ojjaña ma o angelya huohuicanaje huisotii esohui ebacua cuayajo.

¹⁸ Ovejajaahuanajji poanicuanaja esohui shajja-ajjamajje jjabaneineiquiapoa majo ba'ecacuana oja esohuijo.

¹⁹ María ca jjashahuabaneiquianiapoa ma ohua shajja-ajjacanaje huisotii oja bacuajo ma ohua bacapoa pea-aijo.

²⁰ Ovejajaahuanajji poanicuaa poqui'yaniya oja ovejacuana nequiyasijje Eyacuiñajji bihuiacapoqui'yapoa ejeojjijje. Ojjaña ma angelya o huohuicanaje huisotii esohui ebacuajo oya jayojja Eyacuiñajjiya ajeyocanaje bacapoa cuaa.

Ebacua Jesosa dojocapoa Eyacuiñajjija equi-aiyasijje etii poani bameeya

²¹ Majoya aje ebacua ocho cahuime huiso ecuaya jaa Joseya, Mariaa cuiishasha jehuisejjameecapoa. Jesosa bajjani oya acapoa ma angelya María jjamejoquijjimahua ani huohuicapoa bajjaniya acapoa.

²² Majoya aje quijje ebacua cuayajo Mariaja epojja queaboejea epojji apoa Eyacuiñajjija equi-aiyasijje epoquio'oyajji poeapoa. Jamajjeya Mariaa, Joseya oja bacua dojocapoa Jerusalén meshiyasijje Eyacuiñajjija esohui Moisesja tehue ajeyohua. Oja bacua Emeshimesenei bameeya dojocapoa.

²³ Emeshimeseneija esohui etehue jaa jama poani ba'a: “Ojjaña ebacua dejjasho'i cojjasobo Emeshimeseneija epojji quiacajji ojo echacochacopoquijji.” Jamajojoya aje oya dojocapoa Emeshimesenei bameeya.

²⁴ Beca huia' ehuone ecuia'yo dojopea-aicapoa Emeshimesenei quiajji Eyacuiñajjija esohui Moisesja tehue jayojja. Oja esohui etehue jaa jama poani ba'a: “Ebacua cuayajo Emeshimesenei quiacajji beca huia' ecuia'yo. Beca tórtola bajjani, huia' jayojja, quiacajji huia' chamajo.”

²⁵ Ma shequiajajotii pea-aiya aje oe dejja ba'yapoa Jerusalén meshijo Simeón bajjani. Oya Eyacuiñajjija esohuijo jjashahuabaquipoquiapoa, jamajjeya queaja'anee oya ba'epoquiapoa. Acheshono Eyacuiñajjiya Israelcuiñajjicuana meshi quiacaje'yo, queabihuinee ba'emeesahuacaje o'oya cuana Simeonya eshe nequiya ma epojja ishoacapoquiapoa. Edojjoshahuapameya oya queaja'a jjashahuabameequicapoa majoya.

²⁶ Jamajjeya ohuaya Simeón queaja'a jjashahuabameequicapoa Quitojo Emeshimeseneija huoojea ojjaña nahue'yojji epojji ohuaya bacaje mano'yojjima nequiya.

²⁷ Joseya Mariaa oja bacua Jesosa dojocaje Eyacuiñajjija equi-aiyasijje Moisesja tehue aa ma pojjajotiiya Edojjoshahuapameya Simeón cuamaya poquimeepea-aicapoa.

²⁸ Jamajjeya majotii nequiya Simeonya ebacua añamajje Eyacuiñajji bihuiacapoa jama ba'a:

^29-30 —Emeshimesenei e'ejojonei miyaya miquea esohui ajeyo'yonaje, eyaya ojjaña nahue'yojji epojji banaje mano'yojjima nequiya. Jjeya eya etiinojinoji nequi meteama poani emano'yojji e nahue'yojji epojji eyaya oya ecuea ecojjaa banajejojoya.

³¹ Miyaya oya ojjañajaajjicuanaja queaja'a ebajji huoojeanaje o nahue'yojji epojji.

³² Jiquio ecua cuaquijijiya jeaja'acani jama pea-aiya ohuaya ojjañajaajji judío pojjeamacuanaya queaja'a jjashahuabaquimeecaje Eyacuiñajjijo. Oya Eyacuiñajjija babaca israelitacuananijje queaca'aneetii nequiani bacaje cuaa.— Jama bihuiameya acapoa Simeonya ebacuasho'i bamajje.

³³ Simeonya esohui jama huohuime acajje oja bacuajo oja nae, oja chii o tiimeejji poani jjabaneineiquianiapoa oja esohuijo.

³⁴ Majoya Simeonya José, María, oja bacua pea-ai esohui queapame Eyacuiñajjija o queapame pomeejjijo huohuicapoa. María pea esohui huohuipea-aicapoa jama ba'a: —Bacue, jiquio mique bacuaejjasho'i Eyacuiñajjija babaca queahuiso israelitacuana nahue'yojji. Pea israelitacuaa ca oya cajaa acaje jamajje ojaya enahuepea-ai'yojji pojjeama poaje ca comacuana. Eyacuiñajjiya oya queaca'anee nequimeecaje, jamatii queahuisocuaa oya cajaanei acaje.

³⁵ Onaja ejjashahuabaquijji queamimishi ohuaya ja'anei huohuicaje'yo ojjañaja ebajji. Majoya quijje onaa oya cajaanei acajo queayenoneenee mi poaje ojo. Jiquio ecua ejehuijjiya yacuacajje queanee poani jama pea-ai mi epojjiya queayenonee poaje.— Jama huohuimeya Simeonya oya acapoa oja bacuajo.

³⁶ Majotii pea-aiya aje aniapoa oe epona etiinojinoji ani Eyacuiñajjija esohuihuohuijji poani Fanuelja bacuase, Ana bajjani. Oya Aserja osecua poa. Oya ahuema' ani pojeahua jjahueaquiapoa. Ojahuenijje siete shequiajame huiso ba'epoquiapoa.

³⁷ Majoya ojahue mano'yajo oya eahuemano'yotii ani 84 shequiajame huiso poa. Eyacuiñajjija equi-aiquiquibopejjeneijo ba'epoquiapoa. Ojjaña pojjajo sinecua, mecajje pea-ai oya mimipoquiapoa Emeshimeseneinijje. Oya bobi ijjiapojjima' aniapoa queahuiso Eyacuiñajjinijje emimijji.

³⁸ Simeón Marianijje Josenijje mimianijotii Ana poeapoa o aniyasijje. Majotii aniya ohuaya Eyacuiñajji bihuiacapoa ebacuasho'i Jesosa bamajje. Majoya ojjaña Jerusalén meshijo ba'eca, joya Eyacuiñajjija huoojeajo jjaishoaquicanicuana o jjeshe'yojji epojjijo Anaa huohuiquicapoa.

Mariaa, Joseya Jesosa dojoca'yapoa pueblo Nazaret meshiyasijje

³⁹ Majoya aje José, María pea-ai Eyacuiñajjija esohui Moisesja tehuecuana apoa ajeyomajje Jerusalén meshijo ani, huacuaya poqui'yapoa provincia Galilea, pueblo Nazaret meshiyasijje ma o ebionei ba'yapoa meshiyasijjeya.

⁴⁰ Oja bacua queapamenee tiisohuaquiapoa, jjayamica'aquipoquiapoa. Oya queasapaja'anee tiisohuaquiapoa. Eyacuiñajjiya oya queapamenee acapoquiapoa.

Jesosa tii-aipishanajo dojocapoa Eyacuiñajjija equi-aiyasijje

⁴¹ Jesosaja chii, oja nae pea-ai ojjaña shequiajajo poquinequiapoa Jerusalén meshiyasijje fiesta a'yohua ma yahuajonei Eyacuiñajjiya oja etiiquianaja bacuacuana nahuecapoa Egipto meshijo ani shahuaba'yojji.

⁴² Jamajjeya quijje Jesosa 12 shequiajame huiso etii pomajje, oja chiinijje, oja naenijje pea-ai oya poquiapoa ma ecua ojjaña shequiaja poquinequiapoa jama fiesta a'yohua Jerusalén meshiyasijje.

⁴³ Majoya aje fiesta apoa poajo jjayejjequiajo, José María pea-ai Jerusalén meshijo ani poquiajja'yapoa oja equiyasijje. Jesosa ca majotii aniapoa so'o, poqui'yojjima poa onijje. Oja chiija, oja naeja bajjimanei poa oya majotii ani, onijje poepea-ai'yonaje poso acapoa.

^44-45 Jesosa peacuananijje quijjepishana poe'yani poso acapoa oja naeya, oja chii pea-aiya, jamajjeya oe pojjajo queahueshapishana epoquiajja'yohua ojaya oya ba'yojjima poa so'o ejeojjijje. Majoya quijjepishana oja huapa pojjeamacuanaque sa-ajja'yomajje oya chama', poe'yojjima baca'yapoa. Jamajjeya María, José huacuaya poquio'oyapoa Jerusalén meshiyasijje o sa-ajja'yohua.

⁴⁶ Majoya aje tres cahuime huiso epo o ba'yojjimatii poaequiequiya oya baca'yapoa Eyacuiñajjija equi-aiquiquibojo ani. Mosesja tehuehuohuijji poanicuanaja esohui saja-apoani, huohuiajjapoani pea-ai oya baca'yapoa.

⁴⁷ Ojjaña majo ejjachichaqui anica etiicuana Jesosaa queaja'anee saja-acani shajja-ajjamajje jjabaneineiquianiapoa oja esohuijo. Oya queasapaja'anee poani Eyacuiñajjija esohuijo bacapoa cuaa.

⁴⁸ Jesosaa majo anica etii poanicuana esohui queaja'a huohuicaqui bamajje, oja chii, oja nae jjabaneineiquinequiapoa ojo. Oja nae María jama poa onijje ba'a: —Ecue bacuaejja, ¿apiojji acuae mi jama poanaje ecuana huohuijjimajo? Ecuaa miya sa-ajjanei'yonaje queayenoneeya.—

⁴⁹ Ohua esohui ojo jama acajo Jesosaa jama saja-ame acapoa ba'a: —¿Apiojji eya miyaya sa-ajja'yonaje? ¿A'a miquianaja bajjima eya ecue Chiija equi-aijo anicajji?—

⁵⁰ Jesosaja esohui shajja-ajjacapoa queaquehua, yajja ohua acani poso jjabaquiapoa oja nae, oja chii.

⁵¹ Majoya aje Jesosa onijjetii poqui'yapoa Nazaret meshiyasijje. Oya majotiiya queapame ba'epoquiapoa. Ojjaña oja chiija, oja naeja esohuijo jjashajja-ajjaquipoquiapoa. Ma Jesosaa acanaje esohuiya María majotiiya jjashahuabaneiquianiapoa, pajea'yojjimatii acapoa.

⁵² Jesosa queapamenee tiisohuaquiapoa. Queasapaja'anee pea-ai tiipoquiapoa. Eyacuiñajjiya queabihuineeya oya bacapoquiapoa. Onijje ba'ecacuaa queabihuiya oya bacapoquiapoa.