Mateo 28 - Ese Ejja New Testament

Jesosa shequi'yapoa emano'yo jaa

¹ Majoya aje ejomishocajji sábado epojja jjayejjequiajo domingo epojja jjapojjaquianijo mecajjeahuanei María Magdalena, pea María pea-ai poquiapoa meijjani baa.

² Ma mecajjeahuaneitiiya o poquianijotii meshi janobajjimanei huehuahuehuapoa Emeshimeseneija ángel Eyajje nequioqueapoajojoya meijjani jaahuasijje. Ohuaya meijjani jaahuasijje nequiñaquimajje mei-ai enaba cuiaca'ajji'ya nequiashiñacapoa. Majoya ángel mei-aibiajjetii anioqueapoa.

³ Ángel queajeaja'anee aniapoa baasiyo jama. Oja yamijo ba'e oja daqui quea-osheneenee poa bo quea-oshenee jama.

⁴ Ma meijjanijaahuanajji poani soldadocuana ángel queajeaja'anee quea-oshenee ani bamajje queametenee ponanapoa. Cacacacamajje emano'yo jayojja jaabichajeaquinanapoa cuana meshiyasijje o yajjajo.

⁵ Majoya aje angelya ma beca epona jama huohuime acapoa ba'a: —¡A'a quiana oe queamete pojji! Ecuea eba Jesosaja eyami ba'yohua quiana poeyanaje, ma acui ecuiata'apeejo manomeeca'yonaje sa-ajja'yohua poeyanaje.

⁶ Oya ca chama'yo jjeya jiquiojo. Oya shequi'yonaje. Ma ecua ohuaya eshe nequiahuaa huohuicanaje, jamaya oya po'yonaje. Bahua'yocue quiaa jiquio huananobiacanaje meijjaniyasijje. Oya chama'yo jiquiojo.

⁷ Jjeyanei quiana oe poquicue o shajja-ajjajji poanajecuana huohuiñaqui'yohua. Jama quiaa oe añaqui'yocue ba'a: “Oya shequi'yonaje. Ebionei oya poquije provincia Galilea meshiyasijje miquianaya cuama poquijjimahuajo. Majo aniya quiaa oya baje'yo eshequi'yo nequi.” Jamaya oe añaqui'yocue quiaa o shajja-ajjajji poanajecuana.—

Jesosa eponacuanajo jjabameequi'yapoa

⁸ Ma angelya jama huohuime acajje eponacuana meijjanipejjejo ani cuajicuajipoqui'yapoa. Queamete, queabihui pea-ai cuajicuajipoqui'yapoa o shajja-ajjajji poanajecuana oja huohui esohui o huohuiñaqui'yohua.

⁹ Majoya eponacuana cuajicuajipoquianijotii Jesosa o ani cojjaneijo jjanequija'aqui'yapoa. Jesosa jama poa onijje ba'a: —Queabihui pocue quiana.— Oya eshequi'yo nequi bamajje eponacuaa queabihuiya oya bihuiacapoa oja ecuioshajjajo aniya. Jesosaja ejeojji mapapea-aicapoa cuaa bihuijo.

¹⁰ Majoya aje Jesosaa jama acapoa ba'a: —Eponacuana, a'a queamete pojji. Huohuiqui'yocue e shajja-ajjajji poanajecuana, ecue dohuecuanaya o huacuaya poquijjijo provincia Galilea meshiyasijje. Majo nequiya eya bacaje'yo cuaa.—

Soldadocuana siajje poa Jesosajo

¹¹ Majoya aje eponacuana poqui'yanijo beca soldadocuana, ma Jesosa jaa meijjanijaahuanajji ponequinaje poe'yapoa Jerusalén meshiyasijje. Eyacuiñajjija equi-aijo chacochacopoquiani etii poanicuana huohuicaña'yapoa ma ohua bacanequinaje huisotiijo meijjanipejjejo nequiya.

¹² Oja esohui shajja-ajjamajje poquiapoa cuana judío etii poanicuana huohuiya ma soldadocuaa huohuicaña'yonaje esohuiya. Majoya aje etiicuaa ojee oopana mimimimimajje bejjo queahuiso soldadocuana quiacapoa Jesosaja eyamijo siajje epojji sosejje.

¹³ Jama acapoa etii poanicuaa oya ba'a: —Jama esohui anishocue cuana ba'a: “Mecajje ecuana cahuianijo o shajja-ajjajji poanajecuaa pojja'a oja yami siica'yonaje poemajje.” Jama huohuime anishocue cuana.

¹⁴ Bacue, emeshimese Pilatohua oja yami chama' shajja-ajjacajo ecuaaya oya huohuije. Majoya ohuaya miquiana quecuamee'yojjima acaje ecuanaja esohuijo— jama huohuimeya acapoa etii poanicuaa.

¹⁵ Jamajjeya soldadocuaa oja quia bejjo jjeshecapoa esohui siajje yajji sosejje. Jjeyaneitii pea-aiya oya esohuiya oja siajjetii judiocuaa acapoquiani.

Jesosaa oja esohui oe-ejjenei huohuicapoa cuana

¹⁶ Majoya aje Jesosaja babaca 11 huisometiiya poquiapoa provincia Galilea meshiyasijje ma Jesosaa huohuicanaje eyiyo nequiyasijje epoquijji.

¹⁷ Jesosa majo nequi ba'yomajje oja babacacuaa oya bihuiacapoa oja cuioshajjajo nequiya. Jamatii becacuaa Jesosa e'ejojonei shequi'yonaje jjashahuabaquijjima bihuiacapoa.

¹⁸ Majoya aje Jesosaa o aniyasijje jjanequichipiquimajje jama huohuime acapoa cuana ba'a: —Eyacuiñajjiya eya Emeshimesenei enequipoquijjitii pomeecanaje ojjaña meshijo ba'ecacuana, ojjaña Eyajo nequicacuana pea-ai huoojeapoquiajjitii epojji.

¹⁹ Jamajjeya quiana oe poquicue ojjañajaajjicuana ojjaña meshijo ba'ecacuana sohuihuohuiya. Ojjaña joya ejo jjashahuabaquicaje'yocuana esohui huohuineineicue o ejo queaca'a ba'epoquijji. Enaojjohuasijje iñajeanobiapea-aicue cuana ecue Chiija bajjanijo, eya Ebacuaejjaja bajjanijo, Edojjoshahuapameja bajjanijo pea-ai.

²⁰ Huohuineicue cuana ecuea esohui, ojjaña jiquio eyaya quiana huohuipoquianaje huisotiiya, o majo jjashajja-ajjaquipoquijji pea-ai. Eya miquiananijjetii nequipoquije ojjaña pojjajo. Jiquio oe-ejjenei epojja oe epojjicuanajotiiya eya nequipoquijetii miquiananijje.—