Mateo 22 - Ese Ejja New Testament

Jesosaa huohuipea-aicapoa sohui ebameesahuajji fiesta ejjahuanaquijjijo

¹ Majoya aje Jesosaa pea esohui ebameesahuajjijo huohuipea-aicapoa cuana jama ba'a:

² —Eyacuiñajjiya ojjañacuana huoojeacapoquianitii meshi Eyahuasijje jiquiajjaya poani ba'a: Oe emeshimeseya oja bacuaejja jjahuanaquijjijo fiesta queaquemo bobi queahuisonee ojee eijjiaijjiajji acaje.

³ Jamajjeya ohuaya joya ojo chacochacoani dejjacuana huoojeacanaje oja iyaacuana huohuiya o epoejjijo. Jamatii oja iyaacuana poesapo-ajja poanaje.

⁴ Majoya emeshimeseya peacuana ma ojo chacochacoani pea-ai huoojeapea-aicanaje. Jama huohuime acanaje cuana oja huoojeajjimahua ba'a: “Ecue iyaacuana jama huohuiquime acue ba'a: Emeshimeseja dahuamee noe yami apoa. Oja macayahuesho'icuana esei oja cuiamee'yo apoa'ya ani miquianaja eijjiaquijji. Jamajjeya poquicue quiana bobi queahuiso ijjiaa. Jama huohuiquimeya acue cuana.” Jamaya emeshimese poanaje oja huohuiquijji.

⁵ Jamatii oja ebionei iyaacuana poesapo-ajjatii poanaje, oja huoojeacuanaja esohuijo jjashajja-ajjaquiajjatii poanaje. Oe poquinaje oja queyasijje chacohua. Pea ca aquiana quiaa bejjo sosejje poquinaje.

⁶ Pea oja iyaacuaa ca emeshimeseja huoojea ma ojo chacochacoani dejjacuana iñaca'ajeacanaje. Majoya cuianeinei'yomajje cuiahuejjajeaca'yonaje cuana.

⁷ Oja huoojeacuana chama'yo acanaje shajja-ajjamajje emeshimese queaquenenee poanaje. Jamajjeya ohuaya oja soldadocuana huoojeacanaje ma oja huoojeacuana cuianeinei'yojji epo dejjacuana quecuajeameejeyo'yohua, oja equicuana dahuajeameeya pea-ai.

⁸ Majoya emeshimeseya pea ojo chacochacoanicuana iyaacao'oyanaje ehuohuijji. Jama huohuime acanaje ba'a: “Ecue dahuamee noe yami apoa'ya, yanitii. Ma ebionei ecue iyaacuana queapame pojjeama poanaje epoejji.

⁹ Jamajje oe jjeyahuanei poquicue ejeojjiai jaahuasijje. Ojjaña cua miquiaaya majo anica baje huisotii iyaacue jiquiacua epoejji ecue bacuaejja jjahuanaquijejo bobi ijjiaa” jamaya acanaje.

¹⁰ Majoya ma ojo chacochacoanicuana poquinaje majo anicacuana iyaaa bobi ijjiajji. Queahuiso majo anica chichaquicanaje cuaa dejja queamimishicuana, dejja queapame pea-ai. Equi-ai ejjahuanaquijji bobi ijjiajji ojee cuiocanaje oja iyaa queahuisoneeya.

¹¹ —Majoya quijjepishana emeshimeseya oja iyaa anica equi-aiyasijje nobiquimajje bacañanaje oe dejja jamatii ani daqui queapame fiesta yajji oja huosho pojjima'.

¹² Emeshimeseya oya jama acanaje ba'a: “Epeejji, daqui queapame fiesta yajji miquea huoshojjima. ¿Apiojji acuae mi nobinaje jamatii?” Ojaya ca oya saja-ajjima poanaje.

¹³ Majoya emeshimeseya majo ani ojo chacochacoanicuana huohuicanaje jama ba'a: “Jiquio jamatii ani me jeyocue, jeojji jeyocue pea-ai. Quea-aaponee esecueyasijje oya jeacuayajea'yocue. Majo aniya oya queayenoneenee poaje'yo. Paneineije. Ese' ijjiayaicajetii pea-ai queaneeneejo” jamaya acanaje.—

¹⁴ Majoya aje Jesosaa jama huohuime apea-aicapoa ba'a: —Eyacuiñajjiya queahuisoneecuana iyaacani epoqui'yojji Eyahuasijje. Jamatii oepojji oja babaca poqui'yani cuamaya.—

Jesosaa huohuicapoa emeshimesecuanaja yajji bejjojo

¹⁵ Majoya aje Jesosaa esohui huohuijeyocajo fariseocuana poquiapoa. Poquimajje fariseocuana oopana mimianiapoa yajja Jesosa acajji oya esohui queaquehua ehuohuitaimeejji. Jesosa napameesa-acapoa cuaa ma esohuijoya.

¹⁶ Jamajjeya fariseocuaa pea onijje nequiani oja epeejji dejjacuana huoojeacapoa, emeshimese Herodesja epeejjicuananijje pea-ai ojee Jesosa aniyasijje a'a ohua esohui queaquehua huohuitaicaje baa. Jama huohuiquime acapoa cuaa Jesosa ba'a: —Esohuihuohuijji, ecuanaja eba miyaya e'ejojonei esohui aña, miya siajje po-ajja, peacuana minijje ejjapeequijjijo pojjeama huohuiaña cuana. Miyaya e'ejojonei Eyacuiñajjija esohui oenei huohuiaña.

¹⁷ Jamajjeya ¿yajja jjashahuabaquime miya poani? ¿A'a esejaya bejjo quiacapoquijji Roma emeshimese Cesarja yajji ma ohua tehuemeecanaje huisotii, a'a quiaca-ajja pojja'a? ¿Yajja miya poani?—

¹⁸ Jesosaja ebatii poa ojaya ejjashahuabaquijji o queaquehua huohuimeejjijo nisho. Jamajjeya ohuaya jama acapoa cuana ba'a: —Eyacuiñajjija epeejjinisho quiana jja coma, queapamenee poso jjabaquiani. ¿Apiojji miquiaaya eya esohui queaquehua huohuitaimeesa-aña?

¹⁹ Bameecue mo ache bejjo eso'dojjo acue quiaa emeshimeseja yajji quiapoquiaña— jamaya acapoa. Jamajjeya oe eso'dojjo yecapoa ebameejji.

²⁰ Jesosaa eso'dojjo jjeshemajje huohuiajjacapoa cuana jama ba'a: —Bacue jiquio eso'dojjo. Jiquio mijijje, ¿ajea ecojja ani? ¿Ajea bajjani etehue jaa?—

²¹ Saja-acapoa cuaa oya jama ba'a: —Roma emeshimeseja ecojja jiquio ani, ojaya bajjani etehue jaa pea-ai.— Jamajje Jesosaa huohuicapoa cuana jama ba'a: —Jamajojoya aje cua Roma emeshimeseya sacani oja tehuemee huisoajjatiiya eso'dojjo oya quiapoquiacue quiaa. Eyacuiñajji pea-aiya oe quiapoquiacue cua ohua mi quiameesa-acani huisotii.—

²² Jesosaa jama huohuime acani shajja-ajjamajje jjabaneineiquiapoa cuana ojo acheja'anee ohuaya esohui huohuicanijo. Majoya Jesosa jeacana'yapoa cuaa poqui'yomajje.

A'a dejjacuana joya emano'yo jaa shequicaje'yo quijje huohuicapoa Jesosaa

²³ Ma pojjajotiiya aje saduceocuana poquipea-aiapoa Jesosa baa. Saduceocuana jjashahuabaquipoquiapoatii dejjacuana mano'yomajje eshequi'yojjitii pojjeama poaje. Jamajjeya ma esohuijoya mimiapoa cuana Jesosanijje jama ba'a:

²⁴ —Esohuihuohuijji, yahuajonei Moisesya jama tehuecapoa ba'a: “Dejja cua bacuama'tii nequi mano'yajo oja chahuaa oja quijjojea ehuanase huanacaje'yo. Oja jeajo oja o'i bacuajji poaje. E'ejojonei oja o'ija jea jayojja ebacua bacaje cuaa” jama tehuemeya Moisesya yahuajonei acapoa.

²⁵ Bacue, ecuanaja meshijo siete huisome dejja nequiapoa o dohue pea-ai. Ma ebionei etii dejja edohuemese jjahuanaquiapoa. Jamatii bacuama' nequi oya mano'yapoa. Jamajjeya oja chahuaa o quiquishi'yojjiya oja huanase huanaca'yapoa.

²⁶ Oya jayojja pea-ai oja chahua bacuama'tii nequi manopea-ai'yapoa oya eponajotiiya. Ojjaña oja chahuacuana oya jayojjaya bacuama'tii nequi manocapoqui'yapoa oya eponajo jjahuanaqui nequi.

²⁷ Majoya aje oe-ejjenei ma epona manopea-ai'yonaje.

²⁸ Jamajjeya ecuaa miya huohuiajjaña, ¿ache oja dohueja ehuanase poaje ma epona shequi'yomajje? Ojjaña o dohue pea-ai siete huisomeya ma oe eponaya huanacapoqui'yapoa.—

²⁹ Jesosaa saja-acapoa cuana jama ba'a: —Miquianaya queaquehuanee jjashahuabaquiani dejjacuana, eponacuana pea-ai mano'yomajje shequi'yoajja epoaje poso aña. Eyacuiñajji queaca'aneetii nequipoquiani, oja esohui etehue pea-ai miquianajaya bajjima poani.

³⁰ Emano'yo jaa dejjacuana, eponacuana pea-ai shequi'yomajje ejjahuanabecaquio'oyajjitii, ejjahueabecaquio'oyajjitii pojjeama poaje'yo. Oya angelcuana jayojjaya shacuima'tii nequicaje'yo, ahuema'tii anicaje'yo.

³¹ Jiquio esohui emano'yo jaacuana shequimeecaje'yo, ¿a'a miquianajaya ajjima' ma Eyacuiñajjiya yahuajonei huohuicapoa esohuiya? Jama huohuime acapoa ba'a:

³² “Eya ca iña Eyacuiñajji ma Abrahamya, Isaacya, Jacobya pea-ai bihuiacapoquianitii Eyacuiñajjitiiya poani.” Israelcuanaja etiiquiana emano'yotii, chama'yotii poanijojjemo ohuaya jama huohuime ajjima' acaquiae. Jamajjeya esejaya ebatii oya Eyacuiñajji emano'yocuanaja pojjeama poani, oya caca eshe ba'ecacuanaja Eyacuiñajji nequi.—

³³ Jesosaa esohui jama huohuime acani shajja-ajjamajje queahuisocuana mimima'tii anica'yo jjabaneineiquiapoa oja esohuijo.

Eyacuiñajjija esohui ache queapamenee poani ebionei eapoquiajji huohuicapoa

³⁴ Majoya aje Jesosaa saduceo dejjacuana mimima'tii animeecanaje shajja-ajjamajje fariseo dejjacuana jjachichaquiapoa. Majoya Jesosa aniyasijje poquiapoa cuana.

^35-36 Oe fariseo ma peacuananijje poe Moisesja tehuehuohuijji pea-ai poanaje. Jesosa esohui queaquehua ehuohuitaimeejji nisho ohuaya jama huohuiajjame a-ajjacapoa oya ba'a: —Esohuihuohuijji, ¿ache Eyacuiñajjija esohui Moisesja tehue ebionei queapamenee poani ecuanaja eapoquiajjitii?—

³⁷ Jesosaa oya saja-acapoa jama ba'a: —Emeshimesenei, mique Eyacuiñajji poani, queajeaneetii apoquiacue ojjaña miquea equijijjijo, miquea ejjashahuabaquijjijo, mique eyamijo pea-ai queajeaneetii oya apoquiacue.

³⁸ Jiquio esohui ebionei queapamenee poani. Eyacuiñajjija esohui etehue jaa chama'nei pea oya jayojja jiquiajjaya poani.

³⁹ Ejaa pea Eyacuiñajjija esohui queapamenee poani beshahuanei oya jayojja pea-ai. Oya jama poani ba'a: Ojjaña mipejjejo ba'eca pea-ai queajeanee apoquiacue jiquio ecua miya queajeanee jjanahuebaquiani jama pea-aiya oya apoquiacue.

⁴⁰ Jiquio beca esohui jaa queapamenee pea-ai poani. Miquianaya jiquio beca etehue jaa esohui jayojja jama ba'epoquimajje ojjañatii Moisesja tehuecuana jayojja, maya yahuajonei esohuihuohuijji poaja tehue jayojja pea-ai ba'epoquije.—

Eyacuiñajjija huoojea ojjaña nahue'yojji epojji, ¿ajea osecua poaje?

^41-42 Fariseocuana majotii ejjachichaqui anicajo Jesosaa huohuiajjacapoa macuana jama ba'a: —¿Yajja jjashahuabaquime quiana poani Eyacuiñajjija huoojea ojjaña nahue'yojji epojjijo? ¿Ajea osecua oya poaje?— Oya jama poajo saja-acapoa cuaa ba'a: —Davidja osecua poaje oya.—

⁴³ Majoya Jesosaa jama acapoa ba'a: —Yahuajonei Edojjoshahuapameya David Eyacuiñajjija huoojeajo jama mimimeecapoa ba'a: “Miya ecue Emeshimesenei poani, e-emese.” Oya Davidja osecuanei poanijo, ¿yajjajo shai ohuaya oya jama esohui mimimeecapoa? Yahuajonei Davidya jama tehueme acapoa ba'a:

⁴⁴ “Emeshimesenei Eyacuiñajjiya jama huohuime acanaje ecue Emeshimesenei ba'a: Ecuea ebañeimijijjetii anioquecue. Quijje eyaya ojjaña mi cajaa ajji poanicuana, mi sapo-ajja poanicuana huoojeapoquiajji epojji pomeeje.”

⁴⁵ Emeshimese Davidya Eyacuiñajjija huoojea ojaya Emeshimesenei poani bacapoa. Ohua o jama bacajo, ¿achajjajo oja huoojea Davidja osecuanei pome?— jama huohuime acapoa Jesosaa.

⁴⁶ Jesosaa queaja'anee esohui jama huohuime acajje fariseo dejjacuana mimima'tii nequicapoa yajja saja-ame oya yajji. Jamajjeya fariseo dejjacuaa ma pojjajotiiya esohui o queaquehua huohuitaimeejji nisho apajeacapoa.