Mateo 16 - Ese Ejja New Testament

Judío etii poanicuaa Jesosa dejjaja ajjima'neinei ameesa-acapoa oja bajji

¹ Majoya aje quijje fariseo dejjacuana, saduceo dejjacuana pea-ai poquiapoa Jesosa bao'oyaa. A'a ohua dejjaja ajjima'neinei acaje ebajji huohuiajjaa poquipea-aiapoa. Jamajjeya Jesosa jama huohuiajjame acapoa cuaa ba'a: —Jjeya miyaya dejjaja ajjima'neinei acue miya e'ejojonei Eyacuiñajjija huoojeanei poani jjabaquimajje ecuanajaya ebajji queaja'a.—

² Jesosaa saja-acapoa cuana jama ba'a: —Bacue, sinecuanei eshequi oquequiani eyatahuatahua queahuo'o poanijo miquianaya jama poani ba'a: “Queapamenee mecahuajje epojja nequije.”

³ Mecajjeahuanei eyatahuatahua queahuo'o poanijo, quea-aapo nequianijo pea-ai miquianaya jama poani: “Jjeya ena poaje”. Miquiaaya queaja'a baña achajja mecahuajje epojja nequije eyatahuatahua bajeasohuamajje. ¿Yajjajje shai eyaya dejjaja ajjima'neinei aña bamajje jamatii queaquehuatii jjashahuabaquiani quiana yajja poanijje comaya?

⁴ Jjeya miquianaya dejjacuana jiquio eshe nequica queamimishica'a poani. Eyacuiñajji cajaa aña. Dejjaja ajjima'neinei quiaa eya huohuiajjaña ecuea eao'oyajji. ¡Chojja de! ecuea jama eajji pojjeama jjeya. Oe dejjaja ajjima'neinei aje quiana bameejji. Ma ecua yahuajonei Jonás acapoa oya jayojja pea-aiya eya acaje cuaa.— Jama huohuime amajjeya Jesosa poquiapoa.

Fariseocuanaja esohui pahui shejjeemeejji jayojja poani

⁵ Majoya aje Jesosa o shajja-ajjajji poanicuananijje pea-ai besapoquiapoa ojjemiji baeyasijje. O shajja-ajjajji poanicuaa pahui pajeacapoa edojojji eijjiapoquiajji.

⁶ Majoya Jesosaa jama huohuime acacuanapoa baejje besapoquijeya ba'a: —Jjajaahuananeineiquicue quiana oe fariseocuanaja pahui shejjeemeejjijo, saduceocuanaja pea-aijo.—

⁷ Jesosa jama poajo o shajja-ajjajji poanicuana mimimimiapoa oopana jama ba'a: —Pahui seja che yejjima poanaje, ¡de! Majoya Jesosa mimiani.— Jesosa pahuineijo mimiani poso acapoa cuaa.

⁸ Jesosaja ebatii poa ajeo mimimimiani oya oopana. Jamajjeya ohuaya jama acapoa cuana ba'a: —¿Yajjajje acuae quiana chama' pahui esejaya eijjiajji poani? Oepojjinei quiana jjashahuabaquiani ejo miquiana ba'emeesahuajjijo.

⁹ ¿A'a miquianajaya queaquehuatii poani acheca'anee eya poani? ¿A'a quiaa pajea'yonaje eya 5000 huisome dejjacuana bobianaje cinconei pahuijo? ¿Achehuiso eshaja-ai cuatajeameenaje majo anicaja ijjiajeyojjima poanaje pahuiya?

¹⁰ ¿A'a quiaa pajeapea-ai'yonaje ma 4000 huisome dejjacuana eya bobiapea-ainaje sietenei pahuijo? ¿Achehuiso eshaja-ai miquiaaya cuatajeameenaje majo anicaja ijjiajeyojjima poanaje pahuiya?

¹¹ ¿Yajjajje quiana e pahuineijo mimianijo miame mijjashahuabaquiani e jama poajo ba'a: “¡Jjajaahuananeineiquicue oe fariseocuanaja pahuishejjeemeejjijo, saduceocuanaja pea-aijo!”? Pahuineijo pojjeama eya miminaje.—

¹² Majoya o shajja-ajjajji poanicuaa queaja'a bacapoa Jesosa pahui shejjeemeeneijjijotii pojjeama mimiani. Jesosaa ca huohuicani fariseocuanaja esohui, saduceocuanaja pea-ai pahui shejjeemeejji jayojja poani ejjajaahuananeiquijjijo jjabaquiapoa.

Pedrohua Jesosa oya Eyacuiñajjija huoojea e'ejojonei poani huohuicapoa

¹³ Majoya aje Jesosa o shajja-ajjajji poanicuananijje poquiapoa Cesarea Filipo bajjani meshiyasijje. Ma meshijo aniñaquimajjeya ohuaya o shajja-ajjajji poanicuana huohuiajjacapoa jama ba'a: —¿Yajja shai poani cuana ejo, ae dejja shai eya Dejjapojji epo acani cuaa?—

¹⁴ Oya saja-acapoa cuaa jama ba'a: —Miya pa Juan ma ona iñajeanobiajji ponequinaje dejja, maya. Peacuana ca jama poani mijo ba'a: “Elías coma ma yahuajo esohuihuohuijji ponequiapoa dejjaya.” Peacuana ca jama poani mijo ba'a: “Eyacuiñajjija esohuihuohuijji ma yahuajonei nequiapoa jjeya eshequi'yo nequi pojja'a” jamaya poani cuana mijo.—

¹⁵ Majoya Jesosaa huohuiajjacapoa cuana jama ba'a: —Miquianaya ¿yajja poani? ¿a'ya eya?—

¹⁶ Simón Pedrohua oya queaja'a saja-acapoa jama ba'a: —Miya caca e'ejojonei Quito, Eyacuiñajjija huoojea ojjaña nahue'yojji epojji, Eyacuiñajji eshetii nequija Bacuaejja poani.—

¹⁷ Majoya Jesosaa Pedro jama acapoa ba'a: —Queabihuinee miya pocue, Simón, Jonasja bacuaejja. Dejjacuaa pojjeama eya Eyacuiñajjija huoojea poani miya bameesahuacanaje queaja'a. Ecue Chii Eyacuiñajjiya Eyajo nequiya ca miya queaja'a bameesahuacanaje a'ya eya poani.

¹⁸ Jamajjeya jiquio jjeya e mimije shajja-ajjaneicue. Eyaya miya aña Pedro. Ojjaña joya ejo jjashahuabaquije'yocuana eyaya queaca'a nequimeeje'yo jiquio ecua mei-aibiajje equi queaca'a aniani jama. Jamajjeya joya ejo ejjashahuabaqui'yocuana mano'yajo chama' o quea-ehuesha nequimee'yojji poaje.

¹⁹ Ecuea esohui llave jayojja enobiqui'yojji eyaya miya quiaje Eyacuiñajjiya ojjañacuana huoojeacapoquianitii meshi Eyahuasijje enobiqui'yojji. Cua miya ameejjima aña jiquio meshijo nequiya, Eyacuiñajjiya Eyajo nequiya bacaje jamaya queapame. Cua mi jjashahuabaquiani queapame eajji jiquio meshijotii nequi Eyacuiñajjiya Eyajo nequiya queapame bapea-aicaje— jamaya acapoa.

²⁰ Majoya Jesosaa o shajja-ajjajji poanicuana huohuicapoa peacuana che oema'nei oja huohuijjima yajjijo oya Jesosa Eyacuiñajjija huoojea ojjaña nahue'yojji poani.

Jesosaa huohuicapoa cuana quijje o mano'yojjijo

²¹ Ma epojjajotiiya aje Jesosaa huohuicoocapoa cuana yajja oya dejjacuaa acaje'yo quijje. Jama huohuicoome ohuaya acapoa cuana ba'a: —Eya poquije quijje Jerusalén meshiyasijje. Majo nequica judío etiicuaa eya queaneenee ameecaje'yo. Eyacuiñajjija equi-aijo chacochacopoquiani etiicuaa, Moisesja tehuehuohuijji poanicuaa pea-aiya eya queaneenee ameecaje'yo pea-ai. Jamatii eya tres cahuime huiso emano'yo jaa shequije'yo.—

²² Majoya aje Pedrohua Jesosa queahueshapishana dojoshiñamajje tecueapishanacapoa oya jama ba'a: —Jama sapo-ajjanei ecuana, Emeshimesenei. ¡A'a jama jjapomeequijji cuana miya!—

²³ Jesosaa oque jjanequijeapajjaquimajje Pedro huohuicapoa jama ba'a: —Pedro, queahuesha nequicue ejo. Miya ebionei eshahua Satanás bajjani jama enijje mimiani. Eyacuiñajjija ejjashahuabaquijji eya ameejjima asa-aña. Eyacuiñajji jama pojjeama jjashahuabaquime miya poani. Miya caca minijje dejjacuana jama pea-aiya jjashahuabaquime poani— jamaya acapoa.

²⁴ Majoya Jesosaa o shajja-ajjajji poanicuana huohuicapoa jama ba'a: —Joya e shajja-ajjajji posapoanicuana ojayanei eba'ejjijotii jjashahuabatiiquicapoquiajja. Jiquio ecua dejjaa acui ecuiata'apee abocani edojojji o quecuacaje'yohuasijje jama pea-aiya e shajja-ajjajji poani ba'epoquije, ejjanahuequi'yojji pojjeama poaje queacamajaneejo.

²⁵ Ojjaña joya ojayanei eba'ejjijo jjanahuequipoquianicuana ecuea echacojji eajji pojjeama poaje. Comacuanaja eba'ejji peajja bacaje Eyacuiñajjiya. Ojjaña joya jjanahuequiajja poanicuana ecuea echacojji yajjijo ca Eyacuiñajjiya comacuanajaya eba'ejji queapamenee bacaje.

²⁶ Joya ema'tii jayojjacuana ba'epoquiani quea-aquianahuisonee epojji, cua ohua sacanaje huisotii jjeshejji poanaje pea-ai. Majoya oya mano'yomajje ¿a'a queapame nequije'yo Cuaqui-aiyasijje? Chojja. ¿Ache sosehuisojo ohuaya jjeshecaje o ba'etiitiipoqui'yojji Eyahuasijje Eyacuiñajjinijje? Ache huisojopishana, jjesheca-ajja.

²⁷ Eya, Dejjapojji epo, Eyajo nequi ecue Chii jayojja queaca'aneetii queasajajanee nequi poeje o'oya quijje ecue Chiija angelcuananijje ojee. Majoya eyaya ojjañacuana huohuijeyoje'yo achajja ba'ecapoquinaje. Queahuisocuaa o queabihui pojjitii jjeshecaje'yo queapame o ba'epoquinaje sosejje. Peacuana ca quea-ehueshatii nequicaje'yo Cuaqui-aiyasijje oja mimishi sosejje.

²⁸ Eyaya e'ejojonei quiana huohuiaña. Becaa quiaa jiquiojo mano'yojjimaa eshe nequiya eya Dejjapojji epo Emeshimesenei queaca'aneetii poani poeje baje.—