Janata 3 - Ese Ejja New Testament

¿A'a ojjaña Moisesja tehuecuana jayojja ba'etiipoquisapoaje?

¹ Jesosaja epeejji provincia Galacia meshijo ba'eca, miquianaya sapadojjoma' jayojja po'yonaje. ¿Ache dejjaa shai quiana queaquehuanee jjashahuabameequica'yonaje? Ecuaa queaja'anee miquiana ani cojjaneijo nequiya huohuineineiajjanaje esohui Jesosa Quito acui ecuiata'apeejo mano'yapoa ojjaña esecuanajo.

² Jjeyanei quiaa jiquio oenei eya huohuiajjañajo saja-acue. ¿A'a Eyacuiñajjija Edojjoshahuapame nobiquinaje miquianaja eyamidojjohuasijje nequi'yohua ojjaña Moisesja tehuecuana jayojja ba'epoquianijo? ¿A'a oya nobiquinaje miquiana esohui queapame Quitojo jjashahuabaqui'yonaje epojjajotiiya? ¿Acheshono shai oya nobiquinaje?

³ Miquianaya sapadojjoma' jayojja po'yani. Ebionei quiana queaja'a jjashahuaba-ajjaquinaje Edojjoshahuapame miquiana queapame ba'emeesahuapoquiajji epojjijo. ¿A'a jjeya miquianayanei queaca'a jjabaquiani queapame eba'epoquijji? Jamaya queaquehuanee.

⁴ Eyacuiñajjiya quiana queapamenee acapoquiani miquiana queaja'a ba'epoquijji, ohuaya asahuacapoquiani. Jjeya ca quiana pea jjashahuabaquime po'yani Jesosajo. Jamatii quiana Eyacuiñajjiya queapame acapoquinaje jjeya queaquehua'yo jjashahuabaquiani.

⁵ Eyacuiñajjiya quiana oja Edojjoshahuapame quiacanaje. Dejjaja ajjima'neineicuana ohuaya ameecanaje pea-ai miquianajo. ¿Yajjajo shai ohuaya jama ameecanaje? ¿A'a ojjaña Eyacuiñajjija esohui Moisesja tehuecuana jayojja ba'epoquianijotii ohuaya quiana jamaya queapame acapoquinaje? Chojja, majo pojjeama. Ohuaya quiana ca jama queapame acapoquinaje jiquio miquianaya esohui queapame Quitojo jjashahuabaqui'yonajejojoya, mahuisojotiiya.

⁶ Bacue, yahuajonei Abraham jjashahuabaqui'yapoa Eyacuiñajjija esohuijo. Jamajojoya aje Eyacuiñajjiya oya bacapoa oja mimishima'yo.

⁷ Jamajjeya miquianajaya queaja'a bacajji ojjaña joya e'ejojonei Eyacuiñajjija esohuijo jjashahuabaqui'yani huisotiicuana Eyacuiñajjiya macuanaya bacani Abrahamja osecuanei poani.

⁸ Yahuajonei Eyacuiñajjija esohui tehuecapoa cuaa quijje Eyacuiñajjiya judío pojjeamacuana pea-ai oja mimishima'yo bacaje cua e'ejojonei ojo jjashahuabaquije'yo huisotiicuana. Jamajojoya aje Eyacuiñajjiya Abraham esohui queapame huohuicapoa jama ba'a: —Ojjaña meshijo ba'ecacuana eyaya queapamenee aje mijo.—

⁹ Oya Abraham e'ejojonei jjashahuabaqui'yapoa Eyacuiñajjija esohuijo, jamajojoya aje Eyacuiñajjiya oya queapamenee acapoquiapoa. Oya jayojja pea-ai ojjaña joya jjeya e'ejojonei oja esohuijo jjashahuabaqui'yanicuana Eyacuiñajjiya macuanaya queapamenee acapoquije pea-ai, Abraham jayojja.

¹⁰ Ojjaña joya Moisesja tehuecuana jayojja ba'etiipoquijji poanicuana oja mimishima'yo ebajji nisho Eyacuiñajjiya macuanaya huohuicaje queaneeneetii epo'yojji oja mimishijo. Eyacuiñajjija esohui etehue jaa jama poani ba'a: “Moisesja tehuecuana ojjañatii oya jayojjaya miba'etiipoquiajo Eyacuiñajjiya oya huohuicaje queaneeneetii epo'yojji oja mimishijo. Ojjañatii oja tehuecuana jayojjaya ba'etiicapoquijji. Che oema'nei esohui ajjima' aca-ajja.”

¹¹ Jamajjeya jiquio esohui queaja'anee poani chama'neinei dejja oja mimishima'yo Eyacuiñajjiya bacani oya Moisesja tehuecuana jayojja ba'epoquianijotii, majo pojjeama. Eyacuiñajjija esohui etehue jaa jama poani ba'a: “Ojjaña joya oja mimishima'yo Eyacuiñajjiya bacani huisotii oja esohuijo jjashahuabaqui'yanijojoya, macuanaya ba'etiitiipoquije'yo onijje Eyahuasijje.”

¹² Moisesja tehuecuana jayojja eba'etiipoquijji esohui ca Eyacuiñajjija esohuijo ejjashahuabaqui'yojji jama pojjeama poani, ¡pea de! Eyacuiñajjija esohui jama poani ba'a: “Joya ojjañatii Moisesja tehuecuana jayojja ba'etiipoquianicuana ma esohui etehuecuanajotii jjanahuemeequije'yo.”

¹³ Moisesja tehuecuana jama poani ba'a: “Ojjañatii oja tehuecuana jayojja miba'etiipoquiajo queaneeneetii pomeecaje'yo oja mimishijo” jamaya poani oja tehue. Moisesja tehuecuana jama pea-ai poani ba'a: “Joya acui ecuiata'apeejo mano'yanicuana comacuanaya queaneenee po'yani oja mimishijo.” Majoya Quitohua acui ecuiata'apeejo eseja mimishijo mano'yomajje eseya jjesheca'yonaje ese queaneeneetii epo'yo poanijje.

¹⁴ Jamaya Eyacuiñajjiya Jesosa Quito manomeeca'yapoa judío pojjeamacuana queapamenee ajji ma ecua Eyacuiñajjiya Abraham queapamenee acapoa jama. Jamajjeya Eyacuiñajjiya yahuajo esohui huohuicapoa ojjaña joya Jesosa Quitojo jjashahuabaqui'yanicuanaya ojaya Edojjoshahuapame yamijji poaje.

Moisesja tehuecuana ma Eyacuiñajjiya ebionei Abraham huohuicapoa esohui pajeapajeamee'yoajja

¹⁵ Ecue dohuecuana, jjo'icuana pea-ai Jesosaja epeejji, eyaya jiquio esohui ebameesahuajji huohuiaña miquianajaya queaja'a ebajji. Bacue, oe dejjaa huohuicanaje pea dejjaja echacojjijo bejjo sosejje. Ebionei ojee mimije ojaya oya jayojja echacojeyojjijo. Majoya papeni tehuecaje ache ojaya echacojji yajji. Oja tehue queapame bacajo ojaya bajjani tehuecaje echacomeejjiya. Jamajjeya oja esohui epajea'yojji pojjeama. Ma ohua huohuicanaje huisotii oja echacojji poaje, pea epo'yojji pojjeama.

¹⁶ Eyacuiñajjiya Abraham yahuajonei huohuicoocapoa oya queapamenee acaje. Oya esohuiya ohuaya Abraham huohuicao'oyapoa oe oja osecua queapamenee apea-aicaje. Ma Eyacuiñajjiya huohuicapoa esohui Abrahamja osecua queahuisocuana pojjeama queapamenee acaje. Jama oya poa ba'a: “Oenei miquea osecua epojji eyaya queapamenee aje.” Maya caca Quito poani.

¹⁷ Eyaya queaja'anee huohuiaña quiana, Eyacuiñajjiya oja esohui ma ebionei Abraham yahuajonei huohuicoocapoaya oja mimishima'yo bacaje oya oja quia esohuijo e'ejojonei jjashahuabaqui'yajo. Majoya quijjenei Eyacuiñajjiya pea oja quia esohui Moisés tehuemeecapoa 430 shequiaja huiso Abraham oja huohuicoo esohui equia nequijo. Jamajjeya ma ebionei Eyacuiñajjiya Abraham huohuicoocapoa esohui queaca'a, ojaya Eyacuiñajjija epajea'yojjitii pojjeama poaje. Ma quijje Eyacuiñajjiya Moisés tehuemeecapoa esohuiya ma oja ebionei esohui epajeamee'yojji pojjeamatii poaje.

¹⁸ Bacue, Eyacuiñajjiya eseya mimishima'yo bacani ese ojjaña Moisesja tehuecuana jayojja ba'epoquianijojjemo, ma yahuajonei Eyacuiñajjiya Abraham huohuicoocapoa esohui oja mimishima'yo ebajjijo peajja poquiae. Eyacuiñajjiya Abraham oja mimishima'yo bacapoa oya queapamenee amajje ojayanei ejjashahuabaquijjijo.

¹⁹ Moisesja tehuecuana caca ese nahue'yoajja, jamajjeya, ¿apiojji shai Moisesja tehuecuana bacapoquijji? Eyacuiñajjiya Moisés oja esohui etehuecuana quijje quiacapoa dejjacuana, eponacuana pea-ai queamimishi poani jjabaquijji, huohuijji pea-ai. Eyacuiñajjija angelcuaa Moisés tehuemeesahuacapoa Eyacuiñajjija esohui, ojayanei tehue pojjeama. Jamajjeya Eyacuiñajjiya oja esohui Moisés quiacapoa ojaya onijjejaajjicuana huohuipoquiajji. Majoya quijje oe Abrahamja osecua poeajo ecuana jjashahuabaquiapoa oya oenei ese nahue'yojji queaca'anee poaje. Maya Eyacuiñajjiya huohuicapoa queapamenee oya acaje.

²⁰ Eyacuiñajjineiya Abraham oja esohui huohuicapoa. Jamajjeya Abrahamya peaja huohuijo pojjeama oya bacapoa. Eyacuiñajjiya eseja bapoquiajji ca Moisés oja esohui tehuemeecapoa.

Moisesja tehuecuana, ¿apiojji dejjacuana quiacapoa?

²¹ ¿A'a Moisesja tehue esohuicuaa ma pea Eyacuiñajjija esohui ese jjashahuabaqui'yojji mimishima'yo oja bajji peajja pomeecani? ¡Chojja de! Moisesja tehuecuana ese mimishima'yo epomeejji poanijojjemo Eyacuiñajjiya eseya mimishima'yo bacame ese ojjañatii Moisesja tehuecuana jayojja ba'epoquianijotii. Chojja, majo pojjeama se bacani mimishima'yo.

²² Eyacuiñajjija esohui jama poani ba'a: Ojjañacuana queamimishihuisotii ba'epoquiani jamatii oya jama ba'esapo-ajja. Joya ecua dejja ejeanobia ani cuayaqui'yosapoani jamatii oyanei cuayaqui'yoajja jama pea-aiya poani ojjañacuana. Jamaya eseja mimishiya eseya nahuecani e-esemese poaniyajjejojoya. Eyacuiñajjiya huohuicapoa ojjaña joya Jesosa Quitojo jjashahuabaqui'yanicuana ohuaya bacaje oja mimishima'yo. Jamajjeya eseya ojo jjashahuabaqui'yomajje joya ecua dejja ejeanobia ani majoya cuayaqui'yani jama pea-ai se po'yani eseja mimishijo.

²³ Yahuajonei eseya Jesosajo jjashahuabaqui'yojjimahua ba'e Moisesja tehuecuana ese queamimishihuisojjitii huohuijji poa. Jiquio ecua dejja ejeanobia ani jaahuananeicani jamaya eseya oja tehuecuaa acapoquiapoa. Jamaya eseya ba'epoquiapoa ebionei ese nahue'yojji epojji poejjimahuajo.

²⁴ Jamajjeya Moisesja tehuecuana ese queamimishihuisojjitii huohuijji popoquiapoa Jesosa poejjimahuajo. Jiquio ecua esohuihuohuijji poanicuaa esho'iquiana queaja'a huohuicani jama pea-ai Moisesja tehuecuaa ebionei eseya acapoquinaje Quitojo ejjashahuabaqui'yojji. Majoya aje se Jesosa poeajo jjashahuabaqui'yapoa ojo Eyacuiñajjija eseya mimishima'yo ebajji.

²⁵ Jjeya ca se ca Jesosajo jjashahuabaquipoqui'yani. Jamajjeya aje oe Moisesja tehuecuana ese huohuipoquiajjitii popajea'yonaje.

²⁶ E'e, bacue, miquianaya Jesosa Quitojo jjashahuabaqui'yonajejojo Eyacuiñajjiya quiana oja bacua pomeecanaje.

²⁷ Jamajjeya ojo jjashahuabaqui'yajo Eyacuiñajjiya miquiana Quitonijje ojee nequi bacani ojaya'yo. Jamajjeya miquianaya queaja'a ba'epoquije'yo Quitojo. Ma ecua Quito queaja'atii ba'epoquiapoa jiquio meshijo nequi jama pea-aiya quiana ba'epoquije'yo eyacua.

²⁸ Jamajjeya ojjaña joya Jesosa Quitojo jjashahuabaqui'yonaje huisotiicuana Eyacuiñajjiya ojjaña oya jayojja pea-ai bacani ojaya'yo. Judiocuana, judío pojjeamacuana pea-ai, joya ejjeshe peajo chacochacoanicuana, joya oyanei chacochacoanicuana pea-ai Eyacuiñajjiya ojjaña oya jayojja pea-ai bacani ojaya'yo. Dejjacuana, eponacuana pea-ai Jesosaja epeejji poani Eyacuiñajjiya ojjaña bacani oya jayojja pea-ai Jesosa Quitonijje ojee nequijojoya.

²⁹ Jamajjeya quiana joya e'ejojonei Quitoja nahue'yo poanicuana Eyacuiñajjiya bacani Abrahamja osecuanei pea-ai poani mahuisotii cuanaya. Ojjaña ma Eyacuiñajjiya Abraham huohuicapoa oya quijje queapamenee acaje huisotii esohuicuana miquianajaya pea-ai poaje.