Huani 1 - Ese Ejja New Testament

Eyacuiñajjija Esohui Dejjapojji pomajje poeapoa

¹ Ebionei ojjaña aquianacuana oja panajjimahuajo maya Esohui bajjani enequitiiapoa. Oya Eyacuiñajjinijje enequitiipea-aiapoa. Oya Eyacuiñajji pea-aiya poani.

² Ebionei oya Esohui enequitiiapoa Eyacuiñajjinijje.

³ Eyacuiñajjiya onijje pea-aiya ojee ojjaña aquianacuana panacapoa. Chama'neinei aquianacuana jiquio meshijo oja pana pojjeama enequi.

⁴ Ohuaya Esohui bajjaniya ba'etiitiimeecaje'yo queahuisoneecuana Eyahuasijje. Oya ojjaña meshijo ba'ecacuana jeaja'apoquiajji poanitii.

⁵ Ohuaya dejjacuana, epona mimishicuana pea-ai quea-aaponee jayojja ba'eca jeaja'acani. Jiquio ecua eshequiya jeaja'acani jamaya ohuaya queaja'a pomeecani cuana. Oya queaja'atii nequipoquiani, quea-aapojo oya jjachimeequi'yoajja poani.

⁶ Majoya aje quijje Eyacuiñajjiya oe dejja huoojeacapoa ma bajjani ba'a: Juan.

⁷ Eyacuiñajjiya ebionei Juan huoojeacapoa queahuisocuana sohuihuohuiya ma ojjaña ba'ecacuana jeaja'apoquiajji poanijo. Jamajjeya Juanya esohui huohuicanequiapoa cuana ejjashahuabaqui'yojji ojo, ojjañacuana jeaja'apoquiajji poanijo.

⁸ Juan caca oe ojjañacuana jeaja'apoquiajji epojji pojjeama poa. Oya ca ehuoojea poa ojjañacuana jeaja'apoquiajji poanijo ehuohuijji.

⁹ Ojjaña ba'ecacuana jeaja'apoquiajji poani e'ejojonei jiquio meshiyasijje poeapoa.

¹⁰ Maya Esohui bajjani jiquio meshiyasijje nequihuapoa. Ojjaña jiquio meshijo ba'ecacuana, aquianacuana pea-ai Eyacuiñajjiya panacapoa onijjeya ojee. Jamatii oja pana dejjacuanaja oya bajjimanei poa oya Eyajje poe.

¹¹ Oya oja pana meshiyasijje poeapoa jamatii onijjejaajji judiocuaa oya cajaanei acapoa.

¹² Jamajjeya ojjaña ma o cajaa ajji pojjima'cuana ojjaña ma ojo jjashahuabaqui'yapoacuana huisotiiya ohuaya Eyacuiñajjija bacua pomeecapoa Jesosaa.

¹³ Eyacuiñajjija bacuacuana poani echiimeseja jeajo pojjeama enaeseja mejojo pojjeama. Ejeajjiya ebacua jeacapoquiani oja ejjashahuabaquijjijotii, Eyacuiñajjija bacuacuana jama pojjeama. Oja bacuacuana poani Eyacuiñajjija ejjashahuabaquijjijo, oja dejjaja eyamijo pojjeama.

¹⁴ Maya Esohui bajjani Dejjapojji epo yamijji poeapoa jiquio meshiyasijje esenijje nequiya so'o. Ecuaaya oya bapoa queaca'anee queasajajanee nequiani oya Eyacuiñajjija Bacuaejja oenei poanijjejojoya. Ojjaña meshijo ba'ecacuana ohuaya queajeanee acapoquiani. Esohui e'ejojonei ohuaya atiitiicapoquiani, siajje pojjeama.

¹⁵ Juanya ojo queaja'a huohuicanequiapoa cuana jama ba'a: —Jjeya poeyanaje oe dejja jiquiojo nequi. Ma yahuajo e miminaje ojo jama ba'a: “Oya queapameneenee, eya ca iña queapamepishana, ma ca oe e cuayajjimahuajo oya eanitiiapoajjejojo”— jama huohuimeya acanequiapoa cuana.

¹⁶ Ohuaya ese queabihui pomeejjicuana quiamajamajacapoquianitii oya queapameneeneeyajjejojoya, eseyatii queapame poanijo pojjeama.

¹⁷ Yahuajonei Eyacuiñajjiya oja esohui etehue quiacoocapoa oe dejja Moisés bajjani. Quijjenei Eyacuiñajjiya pea esohui eyacua acanaje. Ohuaya Jesosajo queapamenee acapoquiani cuana ojayanei ejjashahuabaquijjijo. Jesosa e'ejojoneitii poani, siajje po-ajjanei.

¹⁸ Eyacuiñajji Echii-ai ojjañacuiñajjicuanaja oya bajjimaneitii ecojjaja. Jamatii oja Bacuaejja oenei ecuaa bapoquiapoa. Oya Eyacuiñajji pea-aiya poani. Oya Echii-ainijje nequipoquianitii ojee queapamenee. Jesosaa eseya Eyacuiñajji Echii-ai huohuicani achajja shai oya nequipoquiani.

Juan ona iñajeanobiajji poaniya huohuicapoa cuana Jesosajo

¹⁹ Majoya aje quijje judío etii poanicuaa Jerusalén meshijo aniya pea judío dejja Eyacuiñajjija equi-aijo chacochacopoquiani poanicuana, o chacosahuajji poanicuana pea-ai huoojeacapoa Juan nequiyasijje o huohuiajjaa. Juanque poquimajje huohuiajjacapoa cuaa jama ba'a: —¿A'ya acuae mi so'o de?—

²⁰ Juanya queaja'anee saja-acapoa cuana jama ba'a: —Eya ca iña quio Eyacuiñajjija huoojea ojjaña nahue'yojji epojji pojjeama dejja, quio miquiaa ishoaqui pojjeama dejja.—

²¹ Majoya Juan huohuiajjacao'oyapoa cuaa oya jama ba'a: —Jamajjeya, ¿a'ya cuae mi so'o? ¿A'a pojja'a miya esohuihuohuijji ma yahuajonei emano'yo dejja Elías?— Juanya saja-acapoa cuana jama ba'a: —Chojja de, eya ca iña Elías dejja pojjeama.— Majoya oya huohuiajjacao'oyapoa cuaa jama ba'a: —E'e, yahuajonei Moisesya tehuecapoa pea dejja Eyacuiñajjija esohuihuohuijji quijje poeje. ¿A'a pojja'a miya ma esohuihuohuijji quijje poejeya?— Juanya oya saja-acapoa jama ba'a: —Chojja.—

²² Majoya judío dejja etii poanicuanaja huoojeacuaa Juan huohuiajjacao'oyapoa jama ba'a: —¿A'ya cuae mi so'o de, aeneinei acue mi so'o? ¡Ecuana pajjaja oe huohuicue! ¿Yajja judío etiicuana huohuiñaqui'yome ecuaa aje so'o oque poquio'oyamajje? Ohuaya ecuana huoojeacanaje mi baa, mi huohuiajjaneiya.—

²³ Jamajjeya Juanya saja-acapoa cuana jama ba'a: —Yahuajonei Eyacuiñajjija esohuihuohuijji Isaiasya tehuecapoa jama ba'a: “Quijje oe esohuihuohuijji poeje. Oya taaamajamajanequije se-ejjama' meshijo nequi jama ba'a: Emeshimesenei jjeyanei poeje. Jamajjeya oe apoa pocue ojo ejjashahuabaqui'yojji jiquio ecua ejeojji epijajinei queapojjenee chacocani cuaa pea poejji jama jayojja pocue o poejjijo.” Jamaya Isaiasya yahuajonei tehuecapoa ejo.—

^24-25 Majoya aje fariseocuanaja huoojea dejjacuaa Juan huohuiajjacao'oyapoa jama ba'a: —Miya jama poanaje miya Eyacuiñajjija huoojea ojjaña nahue'yojji epojji pojjeama. Miya jama poanaje ma yahuajo esohuihuohuijji emano'yo Elías pojjeama pea-ai. Quijje jiquio poeje esohuihuohuijji ecuaa ishoajjanaje pojjeama miya poanaje pea-ai. Jamajjeya, ¿yajjajo acuaeya oe miyaya iñajeanobiaña cuana enaojjohuasijje?—

²⁶ Ma dejjacuaa jama acajje Juanya oya saja-acapoa jama ba'a: —Eyaya iñajeanobiaña cuana enaojjohuasijje. Pea dejja ca jiquio meshijo miquiananijje nequi epoe jamatii miquianaja oya bajjimanei.

²⁷ Quijjepishana poeje maya queaca'aneenee. Eya ca iña quio ca'a-ama. Eya jjabaquiani queapame pojjeama ojo echacochacopoquijji oya queapameneeneejojoya.—

²⁸ Jamaya ponequiapoa Juan pueblo Betania meshijo nequi, Jordán cuei ojjemijijje nequi. Ma meshijoya Juanya iñajeanobiacanequiapoa cuana enaojjohuasijje.

Jesosa Eyacuiñajjija oveja jayojja

²⁹ Majoya pea pojjajo Juanya esohui huohuicaquijotii Jesosa oque poeapoa. Jesosa poeje bamajje Juanya huohuicapoa cuana ojo jama ba'a: —Bacue oe, oya Eyacuiñajjija huoojea oveja jayojja quijje quecuacaje'yo cuaa ojjaña meshijo ba'ecacuanaja mimishi cuijea'yojji.

³⁰ E'e, yahuajopishana huohuinaje quiana jiquio dejjajo jama ba'a: “Quijjepishana pea dejja queapameneenee poeje. E cuayajjimahuajo ca oya eanitiiapoa Eyacuiñajjinijje. Jamajjeya oya queaca'aneenee, eya ca iña ca'a-ama.”

³¹ Ecuea yahuajopishana bajjima pea-ai poanaje oya Eyacuiñajjija huoojea poani. Jjeya ca banaje oya. Jamajjeya Israelcuiñajjicuana enaojjohuasijje eyaya iñajeanobiaña ojaya Eyacuiñajjija huoojea o nahue'yojji ebajjijo.—

³² Juanya huohuipea-aicapoa cuana jama ba'a: —Eyaya Eyacuiñajjija Edojjoshahuapame ba'eoqueje huia' jayojja cuabesaoqueani banaje. Majoya obiajjetii aniñanaje.

³³ Yahuajo ecuea bajjima poanaje oya Eyacuiñajjija huoojea. Majoya obiajje Edojjoshahuapame ba'eoqueje bamajje eyaya shahuaba'yonaje Eyacuiñajjija esohui ma e huohuicanaje peacuana iñajeanobiajjijo enaojjohuasijje. Eyacuiñajjiya eya jama acanaje ba'a: “Edojjoshahuapame ba'eoqueje dejjaja eyamiyasijje miyaya baje. Comaya e'ejojonei ecue huoojea poani. Ohuaya Edojjoshahuapame nequinobiquimeecaje'yo dejjacuanaja eyamidojjohuasijje.” Jamaya eya acanaje.

³⁴ Eyaya e'ejojonei oya banaje epoe. Jamajjeya ojjaña miquiana e'ejojonei huohuiaña oya Eyacuiñajjija Bacuaejjanei poani.—

Jesosaa o shajja-ajjajji epojji dejjacuana iyaacapoa

³⁵ Majoya aje pea pojjajo Juan Jordán cueisahuajo nequio'oyapoa oya meshiyasijjetiiya beca o shajja-ajjajji poani dejjacuananijje.

³⁶ Jesosa jjayejjequije bamajje Juanya o shajja-ajjajji poani beca huohuicapoa ojo jama ba'a: —Bacue oya. Oya Eyacuiñajjija huoojea oveja jayojja quecuacaje'yo cuaa.—

³⁷ Majoya Juanja esohui Jesosajo shajja-ajjamajje ma beca o shajja-ajjajji poani dejjacuana Jesosanijje poquiapoa onijje po'yohua.

³⁸ Jesosaa Juan shajja-ajjajji poani beca dejja oquiquishijji poeje bajeamajje huohuiajjacapoa jama ba'a: —Epeejji, ¿a'ya acuaeya che saña?— Majoya aje ma beca dejjaa huohuiajjacapoa jama ba'a: —Esohuihuohuijji, ¿ache meshijo acuae mi ba'e so'o?—

³⁹ Jesosaa saja-acapoa jama ba'a: —Ocue poeajja enijje, bahuacue.— Jamajjeya Jesosanijje ma beca dejja poquiapoa o ba'eyasijje. Sinecuanei a las cuatro ma o ba'e meshi bacañaquiapoa cuaa. Jamajjeya ma sinecuatiiya Jesosanijje aniapoa.

⁴⁰ Oe ma poquinaje dejja Jesosa ba'eyasijje Andrés bajjani poa. Ohuaya Juanja esohui Jesosajo shajja-ajjacapoa. Andrés Simón Pedroja echahuamese poa.

⁴¹ Majoya aje mecajjeahuanei Andresya oja o'i Simón sa-ajjacapoa. Oya ba'yomajje huohuicañaquiapoa jama ba'a: —O'i, eyaya Eyacuiñajjija huoojea ojjaña nahue'yojji epojji banaje de.— (Griego esohuijo jama poanijje ba'a: Quito.)

⁴² Majoya aje quijjepishana Andresya oja o'i Simón Jesosa aniyasijje dojocapoa. Simón bamajje Jesosaa oya huohuicapoa jama ba'a: —Ecuea miya eba. Miya pea Juanja bacuaejja, Simón bajjani. Eyaya miquea bajjani jjeya jeatopeje'yo. Pea bajjani mi poaje'yo Cefas bajjani.— (Judío esohuijo jama poanijje ba'a: Pedro.)

Jesosaa Felipe, Natanael pea-ai iyaacapoa onijje epo'yojji

⁴³ Majoya aje pea pojjajo Jesosa jjashahuabaquiapoa epoquijji provincia Galilea meshiyasijje. Majo nequiya Jesosaa Felipe bacapoa. Oya jama poa onijje ba'a: —Enijje po'yocue.—

⁴⁴ Ma dejjacuana Felipe, Pedro, Andrés pea-ai pueblo Betsaida meshijo nequiapoa.

⁴⁵ Majoya aje quijje Felipeya oja epeejji Natanael bajjani sa-ajjaquicapoa. Oya ba'yomajje huohuicapoa jama ba'a: —Ecuaaya Eyacuiñajjija huoojea ojjaña nahue'yojji epojji banaje. Eyacuiñajjija esohuihuohuijji poacuaa yahuajoneinei esohui tehuecapoa ojo. Moisés pea-aiya esohui ojo tehuecapoa. Oya Jesosa bajjani, Joseja bacuaejja, Nazaretcuiñajji dejja.—

⁴⁶ Natanaelya oya huohuiajjacapoa ba'a: —De, ¿a'a acuae dejjacuana queapame Nazaret meshijo enequica so'o?— Felipeya oya saja-acapoa jama ba'a: —Ocue, poeajja enijje, ba-ajjahuasocue.—

⁴⁷ Jamajjeya Felipe, Natanael pea-ai poquiapoa Jesosa baa. Natanael jjanequichipiquiajo Jesosa mimiapoa onijje jama ba'a: —E'e Natanael, miya Israelcuiñajji dejja e'ejojonei poani. Miya caca siajje po-ajjanei.—

⁴⁸ Ohua jama huohuime acajje Natanaelya oya huohuiajjacapoa jama ba'a: —¿Yajjajo miyaya eya baña queapame poani?— Jesosaa oya saja-acapoa jama ba'a: —Felipeja miya iyaajjimahuajo miya higo acui yajjanajo ani eyaya miquea ejjashahuabaquijji queaja'a banaje.—

⁴⁹ Majoya Natanaelya oya huohuicapoa jama ba'a: —Esohuihuohuijji, e'ejojonei miya Eyacuiñajjija Bacuaejja oenei poani. Miya Israelcuiñajjicuanaja Emeshimesenei poani.—

⁵⁰ Jesosaa oya huohuicapoa jama ba'a: —¿A'a miya e'ejojonei ejo jjashahuabaqui'yani ecuea esohui mijo ma eyaya miya banaje higo acui yajjanajo ani shajja-ajjamajje? E'ejojonei miyaya quijje baje dejjaja ajjima'neineicuana Eyacuiñajjiya e queahuiso ameecaje.—

⁵¹ Jesosaa jama huohuime apea-aicapoa ba'a: —E'ejojonei eyaya quiana esohui huohuiaña. Miquiaa eyatahuatahua ejjaca'apejoqui nequi bajeasohuaje. Majoya Eyacuiñajjija angelcuana queahuiso jaaoquequiequi, jaasohuaquiequi pea-ai eya Dejjapojji epo nequiyasijje baje.—