Hecho 5 - Ese Ejja New Testament

Ananías, oja huanase Safira queamimishi poa

¹ Oe dejja Ananías bajjani nequiapoa. Ohuaya oja huanase Safiranijje oja meshi sejja pea quiacapoa bejjo sosejje.

² Majoya ohuaya oja huanasenijje mimimajje bejjo oja meshi sosejje ojjañatii quiajjima acapoa. Iyehuiso sejja pea ca ohuaya iyaquehuacapoa. Majoya ohuaya oja bejjo sejja pea jeaquicapoa Jesosaja babacacuana quiaa.

³ Majoya aje Pedrohua oya jama acapoa ba'a: —Ananías, ¿apiojji miya ebionei eshahua Satanás bajjanija esohuijo queaquehua jjapomeequinaje? Ohuaya miya siajje pomeecanaje Edojjoshahuapamejo. Miyaya bejjo quiajeyojjima anaje miquea meshi sosejje. Esejja miyaya bejjo iyaquehuanaje.

⁴ Jiquio meshi miquea quiajjimahua miqueaneitii poanaje. Majoya meshi quiamajje ma bejjo meshi sosejje miquea poanaje ojjañatii. ¿Apiojji acuae miya bejjo ojjañatii quianaje nisho poanaje meshi sosejje? ¡Minijje dejja oenei pojjeama miyaya siajje anaje, Eyacuiñajji pea-ai de!—

⁵ Majoya Ananías Pedrohua esohui jama oya acani shajja-ajjajeahua shemanocuajinana'yapoa. Jamajjeya ojjaña ma o manocuajije'yo shajja-ajjajji poanajecuana queametenee pocapoa.

⁶ Majoya aje dejja shacuima'cuana o emano'yo jaahuasijje poeapoa. Oja yami bebomajje dojocapoa cuaa mojeaa.

⁷ Majoya aje quijjepishana tres horas ojahue emanocuaji'yo jaajo oja huanase poepea-aiapoa. Ojaya bajjimatii poa ojahue shemanocuaji'yonaje.

⁸ Pedrohua oya huohuiajjacajjequi'yapoa jama ba'a: —Huohuicue mo, ¿a'a quiaa meshi quianaje ma miquiaa huohuinaje huisotii bejjo sosejje?— Ohuaya jama saja-ame acapoa ba'a: —E'e, ecuaa meshi quianaje ma ecuaa anaje huisotii bejjo sosejjeya— jama nishoya oya poa Pedronijje.

⁹ Pedrohua epona jama acapoa ba'a: —Miya mique ahuenijje jjashahuabaquinaje queaquehuanee bejjojo. ¿Apiojji Edojjoshahuapameja miquiana bajjima poso jjabaquinaje? Jjeyanei poeo'oyani cuana jiquio mique ahue mojeaquijji poanaje. Jamajjeya miya pea-ai jjeyahuanei dojocaje cuaa mojeaa.—

¹⁰ Ohua esohui jama acajeahuajo Safira shemanocuajinanapea-ai'yapoa. Oya jaabichananaquiapoa Pedro nequi cojjaneijotii. Majoya dejja shacuima'cuaa poeo'oyamajje oya chama'yotii jaa emano'yo bacañapoa. Jamajjeya oya dojopea-aicapoa cuaa ojahue jaapejjejotii mojeaa.

¹¹ Jamajojoya aje ojjaña Jesosaja epeejjicuana ma meshijo ba'e jjachichaquipoquianicuana queametenee poa. Ojjaña o manocuaji'yonaje shajja-ajjajji poanajecuana pea-ai queametenee pocapoa.

Dejjaja ajjima'neineicuana queahuiso acapoa cuaa

¹² Jesosaja babaca dejjacuaa dejjaja ajjima'neinei queahuiso acapoquiapoa judiocuana cojjaneijo nequiya. Jesosaja epeejjicuana Eyacuiñajjija equi-aichipinei Salomonja shajjaquibojo jjachichaquicapoquiapoa.

¹³ Peacuana ca, ma Jesosaja epeejji pojjeamacuanaya, jjacuiahuaquiajjapoa onijje queametejjejojoya. Jamatii Jesosaja epeejjicuana queapame poani bacapoquiapoa cuaa.

¹⁴ Jesosaja epeejjicuana oja nahue'yo queahuiso pocapoquiapoa. Dejjacuana, eponacuana pea-ai jjashahuabaquica'yapoa Jesosajo.

¹⁵ Jesosaja babaca dejjacuaa queahuiso dejjaja ajjima'neinei acapoquiapoa. Jamajjeya queahuisocuaa cua queamanonee jaaca huanacuayacapoa ejeojjiyasijje oja equipajaajjijotii Pedroja ebajji. Pedrohua jjayejjequijeya oja yajjanaa emano jaacuana queyacajje jja-ajaquinana'yapoa.

¹⁶ Majoya aje Jerusalén meshichipineijo ba'ecacuana queahuiso poecapoa. Emanocuana queahuiso, eshahuamase yamijji pea-ai yecapoa cuaa Jesosaja babacacuanaque. Macuanaya ojjañatii jja-ajameepea-aiquica'yapoa oja babaca dejjacuaa. Eshahuamase pea-ai oja yamijo nequi huoojeacuayajeameeca'yapoa cuaa.

Jesosaja babaca dejjacuana jeanobiameecapoa cuaa

¹⁷ Majoya aje queahuisocuana Jesosaja babacacuanaque poquiani bamajje Eyacuiñajjija equi-aijo chacochacopoquiani ebionei etii poani, peacuana saduceo bajjani dejjacuana pea-ai queaquene poa Jesosaja babacacuananijje. Jjaniñebaquiapoa cuana queahuiso Jesosaja babacacuanajo.

¹⁸ Jamajjeya ma dejja etiicuaa Jesosaja babaca dejjacuana iñaca'ameemajje jeanobiameequicapoa ejjajeanobiaquijji equiyasijje.

^19-20 Majoya aje ma mecajjetii oe Eyacuiñajjija angelya ejjajeanobiaquijjija equi esecuejjani ca'apejocañapoa. Jesosaja babacacuana jeacuaya'yomajje angelya jama huohuime acapoa macuana ba'a: —Poqui'yocue Eyacuiñajjija equi-aiquibohuasijje. Majo ejjachichaqui anicacuana huohuicue esohui eba'epoqui'yojji eyacua Jesosajo.—

²¹ Jamajjeya pea pojjajo mecajjeahuanei Jesosaja babaca dejjacuana poqui'yapoa Eyacuiñajjija equi-aiquibohuasijje angelja esohuijo. Majotii nequiya esohui huohuicapoa cuana. Ma pojjajotiiya aje Eyacuiñajjija equi-aijo chacochacopoquiani ebionei etii poani dejjaa ma onijje nequicacuaa pea-ai iyaacapoa judío etii poanicuana Junta Suprema bajjani ejjachichaquijji etii oopana Jesosaja babacacuananijje emimimimijji. Jjachichaquimajjeya etii poanicuaa huohuicapoa soldadocuana Jesosaja babaca dejjacuana jjequijji nisho ejjajeanobiaquijji equijo ani.

²² Jamatii etii poanicuanaja huoojea soldadocuaa Jesosaja babaca dejjacuana ejjajeanobiaquijji equijo chama' bacañaquiapoa. Jamatii poe'yomajje soldadocuana jama poña'yapoa oja etiicuananijje ba'a:

²³ —Ecuaa ejjajeanobiaquijji equi esecuejjani eca'atii nequi bañaquinaje. Esecuejjanijaahuanajji poani soldadocuana pea-ai enequitii bañaquinaje. Majoya esecuejjani ca'apejomajje chama' ecuaa bañaquinaje cuana, che oema'nei— jamaya poa soldadocuana ojo.

²⁴ Eyacuiñajjija equi-aijaahuanajji soldadocuanahuohuijji etii poani dejja pea Eyacuiñajjija equi-aijo chacochacopoquiani etiicuana pea-ai soldadocuana jama poñaje'yo shajja-ajjamajje mimimimianiapoa yajja acuae po'yonaje cuana.

²⁵ O jama mimime poequijotii oe dejja poecuajiapoa. Oya jama poñapoa ba'a: —Ma miquianaja jeanobiameeajja aninaje dejjacuana jjeyanei maya Eyacuiñajjija equi-aiquibojo nequi'yo ona sohuihuohui'yopoequi.—

²⁶ Majoya aje soldadohuohuijji poani dejja etii oja soldadocuananijje poquicuajiapoa o ba-ajja'yohua. Jesosaja babaca dejjacuana esohui huohuipoequi ba'yomajje cuiajjima acapoa queameteyajjejojoya majo anicacuaa meiya oya ejajahuejjajeaca poanijje.

²⁷ Majoya Jesosaja babaca dejjacuana jjequi'yomajje soldadocuaa nequimeecañaqui'yapoa etii oopana nequi cojjaneijo oja bao'oyajji. Eyacuiñajjija equi-aijo chacochacopoquiani ebionei etii poani dejjaa Jesosaja babacacuana jama acapoa ba'a:

²⁸ —Ecuaaya quiana ja'anei huohuineineinaje a'a esohui ma dejjajo huohuibeca'yojji cuana. ¿Yajja quiaa aña? Miquiaaya ojjaña Jerusalén meshijo ba'ecacuana huohuijeyopoquiaña ma esohuitiiya. Ecuanaja esohuijo ma dejjaya mano'yonaje acui ecuiata'apeejo miquiaaya huohuipea-aiaña cuana— jamaya acapoa.

²⁹ O jama poani shajja-ajjamajje Pedrohua saja-acapoa oya onijje Jesosaja babaca dejjacuananijjeya ba'a: —Dejjacuaa ecuana Eyacuiñajjija esohuijo jjashajja-ajjameequijjima a-ajjacanijo ecuaaya dejjaja esohui cajaa aje Eyacuiñajjija esohuijo ebionei ejjashajja-ajjaquijji.

³⁰ Eseja etiiquianaja Eyacuiñajjiya Jesosa shequimeeca'yonaje ma miquiaaya manomee'yonajeya acui ecuiata'apeejo.

³¹ Eyacuiñajjiya oya oja ebañeimijijje nequimeeca'yonaje Emeshimeseneitii epopoquijji ojjaña nahue'yojji epojji pea-ai. Jamaya oya ohuaya pomeecanaje ojjaña Israelja osecua judiocuana pea jjashahuabaquime epo'yojji Eyacuiñajjijo. Ojjaña oja mimishicuana chama'yo eameejjijo jamaya Eyacuiñajjiya oya ameecanaje.

³² Ecuanaya jiquio oya Jesosa Eyahuasijje poquije'yo bajji epo nequi. Edojjoshahuapameya ecuana huohuimeesahuacani esohui Jesosajo. Ojjaña joya Eyacuiñajjija esohuijo jjashajja-ajjaquijji poanicuana oja quia Edojjoshahuapame yamijji poani— jamaya Pedro poa.

³³ Pedro jama poani shajja-ajjamajje queaqueneneenee poa cuana oja esohuijo. Jamajojoya aje etii poanicuaa Jesosaja babaca dejjacuana manomee'yosa-acapoa.

³⁴ Majotii pea-aiya aje oe dejja etii poani nequiapoa ma pea etii poanicuananijje. Oya fariseo dejja Gamaliel bajjani poa. Oya Moisesja tehuecuana huohuipoquiajji queapame poa. Queahuisocuaa oya queaja'a ba'epoquiani bacapoa. Majoya ohuaya nequisohuamajje Jesosaja babaca dejjacuana huoojeacuayacapoa so'o esecueyasijje etii poanicuana oopananijje emimijji.

³⁵ Jama ohuaya acapoa cuana ba'a: —Israelja osecua judío dejjacuana, ¡a'a jiquio dejjacuana jamatii jajahuejjajeacuaji'yojji quiaa! Ebionei jjashahuabaneiquicue so'o quiana yajja acuae comacuanaya acajji.

³⁶ Shahuabacue quiaa yahuajo oe dejja Teudas bajjani queaca'a posapoa peanijje ejjaquecuaquijji nisho. Jamajjeya queahuisocuaa, 400 huisome dejjacuaa, oya equijje a-ajjacapoa. Teudas quecuajeaca'yajo ojjaña onijje poaequinequinaje dejjacuana jjajeaajajeaquicananapoa queahuesha. Jamajjeya poquiquehuajeacananapoa. Ojaya ejjashahuabaquijji peajja poa, ca'a-ama.

³⁷ Majoya quijje Roma dejjacuaa sicocaquijotii ebajji ache huisocuana ba'eca, pea dejja Judas bajjani Galileacuiñajji dejja queaca'a posapea-ai poanaje. Jamajjeya queahuiso onijje poaequinequinaje. Oya pea-ai quecuajeaca'yonaje Roma soldadocuaa. Majoya onijje poquicuana poquiquehuajeacanananaje. Jjeya chama'yo macuanaya.

³⁸ Jamajjeya jjeyanei shajja-ajjacue. Eyaya quiana queaja'a huohuije jiquio dejjacuanajo. ¡A'a oya jeanobiameejji! Capoqui'yahua. Jiquio esohui ohuaya huohuicani ojayaneijjemo Eyacuiñajjija huohuimeesahuajjimajjemo, quijjepishana chama'yo pea-ai pome.

³⁹ Jiquio esohui ohuaya acani Eyacuiñajjija e'ejojonei poanijo, ¡a'a oya chama'yotii asa-ajji! Jjabaneineiquicue quiana oe. ¡A'a Eyacuiñajji miquiaaya ejeabichajeaje poso ajji!— jama niñesheameya cuana acapoa Gamalielya.

⁴⁰ Jamajje etiicuana majo ani jjashajja-ajjaquiapoa oja esohuijo. Ohuaya Jesosaja babaca dejjacuana iyaameemajje edaasajje cuiasejjajeameecapoa cuana. Esohui Jesosajo huohuimeeo'oyajjimatii epojji nisho a-ajjacapoa cuana. Majoya huoojeaca'yapoa epoqui'yojji.

⁴¹ Jesosaja babaca dejjacuana judío etii poanicuanaja cojjaneijo nequi cuayaqui'yomajje queabihuinee poqui'yapoa Jesosaja bajjanijo oya queaneenee acanaje cuaa jjabaquimajje. Queabihui jjabaquiapoa cuana etiicuaa oya Jesosaja bajjanijo botiama acanajejjejojoya.

⁴² Ojjaña pojjajo Jesosaja babaca dejjacuaa esohui huohuicanequiapoa Jesosajo oya e'ejojonei Eyacuiñajjija huoojea poanaje. Eyacuiñajjija equi-aiquibojo nequiya, oja equicuanajo pea-ai esohui huohuicanequiapoa cuana.