Epesio 3 - Ese Ejja New Testament

Pablo judío pojjeamacuana sohuihuohuiquinequijji poa

¹ Eya Pablo dejjamasecuanaja jeanobia ani miquianaya judío pojjeamacuana esohui queapame Quitojo huohuijji poanijojoya.

² E'e, miquianajaya shahuabacajji poanaje Eyacuiñajjiya eya queapamenee acapoa ojayanei ejjashahuabaquijjijo ojo echacochacopoquijji. Miquianaya judío pojjeamacuana sohuihuohuiquinequiya epoquijji eya babacacapoa ohuaya.

³ Eyacuiñajjiya eya bameesahuacoocapoa ojaya ejjashahuabaquijji Quitojo ma yahuajo ojjañacuanaja bajjimanei esohui. Yahuajopishana quiana eyaya majoya oepojji tehuepishananaje ma oja ejjashahuabaquijjiya.

⁴ Jiquio eya tehueaña esohuicuana baneimajje miquiana jjashahuabaquije queaja'a ejo. Ecuea ebanei Eyacuiñajjija ejjashahuabaquijji Quitojo baje quiaa eya.

⁵ Yahuajonei eseja etiiquianacuanaja bajjimanei poa jiquio Eyacuiñajjija ejjashahuabaquijji Quitojo. Jamajjeya Eyacuiñajjiya oja Edojjoshahuapame huoojeacapoa oja babaca ona sohuihuohuiquinequijji poanicuana, pea oja esohuihuohuijji poanicuana pea-ai majo queaja'a ebameesahuajjiya.

⁶ Eyacuiñajjija ejjashahuabaquijji ma eseja etiiquianaja bajjima poa jama poani ba'a: Ojjaña judío pojjeamacuana joya Quitojo jjashahuabaquije'yo huisotiicuana Eyacuiñajjiya queapamenee apea-aicapoquije ojayanei ejjashahuabaquijjijo ma ecua ohuaya judiocuana acanaje jama pea-aiya. Ohuaya judío pojjeamacuana ojee animeecaje'yo judiocuananijje joya ojo ejjashahuabaqui'yocuananijje oe oja yami jayojja epojji oya jayojja jjashahuabaquime epo'yo. E'e Eyacuiñajjiya queapamenee acapoquije judío pojjeamacuana, judiocuana pea-ai joya ojo jjashahuabaquije'yo huisotiicuana ma ecua ohuaya esohui queapame acapoa Quitojo jama pea-aiya.

⁷ Eyacuiñajjiya eya babacacapoa ojo echacochacopoquijji ojayanei ejjashahuabaquijjijo, eyanei queapame ba'epoquianijo pojjeama. Eyacuiñajji queaca'aneetii poaniyajjejojo ohuaya eya jamaya pomeecapoa oja esohui queapame Quitojo huohuiquinequiya epoquijji.

⁸ Bacue, eyaya pea Jesosaja epeejjicuana queapamenee poani baña. Eya caca oe queapamepishana poani jjabaquiani joya ecua peacuana jama pojjeama. Jamatii Eyacuiñajjiya eya queapamenee acapoa ojayanei ejjashahuabaquijjijo. Judío pojjeamacuana sohuihuohuiquinequijji epojji eya nequimeecapoa. Jamajjeya eyaya judío pojjeamacuana sohuihuohuipoquiaña achepamenee Quito poani onaja queaja'a ebajji oepojji, jamatii yajja bajeyome yajji.

⁹ Jama epojjiya eya nequimeecapoa ohuaya judío pojjeamacuana queaja'a sohuihuohuipoquiajji epojji ma yahuajonei ojjañacuanaja bajjimanei poa esohui Eyacuiñajjija ejjashahuabaquijjicuana. Ojjaña aquianacuana panajjimahuajo Eyacuiñajjija ejjashahuabaquijjicuana huohuijji eya pomeecapoa.

¹⁰ Jamaya Eyacuiñajjiya oja ejjashahuabaquijjicuana yajja ohua quijje acaje bameecani cuana Jesosaja epeejjicuanajo. Jjeya ojjaña angelcuanaja, eyajo queaca'a nequica etii poanicuanaja pea-ai baneicajji achesapaja'aneetii Eyacuiñajji poani ojjañajo Jesosaja epeejjicuana ejjachichaquipoqui ani bamajje.

¹¹ Jamaya Eyacuiñajjiya ajeyocapoquiani ma yahuajoneitii ojaya ejjashahuabaquijji poa yajja Emeshimesenei Jesosa Quitohua acaje.

¹² Bacue, eseya ojjaña joya Jesosa Quitojo jjashahuabaqui'yonaje huisotiicuana Eyacuiñajjiya bacani ojaya'yo. Eseya jjeya Jesosa Quitohua jjanequichipimeequica'yonaje oque Eyacuiñajjinijje emimipoquijji meteama.

¹³ Jamajjeya eyaya quiana huohuineiaña a'a oe queayeno pojji ejo e onaa queacamajanee acani miquiana sohuihuohuijji shajja-ajjamajje. Eya jama acani shajja-ajjamajje miquianaya majoya queaca'a nequipoquije.

Quitohua eseya queajeaneetii acapoquiani

¹⁴ Jamajjeya eya ecuea ecuioshajjajo anioqueani Eyacuiñajji Jesosa Quitoja Chiinijje emimijji.

¹⁵ Ohuaya ojjaña meshijo ba'ecacuana, eyajo nequicacuana pea-ai eshe pomeecani.

¹⁶ Oya queaca'aneetii queapameneetii nequipoquiani. Jamajjeya eya mimipoquiani onijje oja Edojjoshahuapameja miquiana queaca'a epomeejjijo miquianaja eyamiquipajje.

¹⁷ Eya mimipea-aipoquiani onijje miquianaja ebaneijjijo Quito miquianaja eyamidojjojo nequipoquianitii miquiana ojo jjashahuabaqui'yajo. Achejeanee Eyacuiñajjiya quiana acapoquiani miquianaja ebaneijjijo eya mimipoquianitii. Jiquio ecua acui queasajjadoe meshiquipajo queaca'anee nequiani miquiana jama queaca'a epojjijo eya mimipea-aiani. Ojaya quiana queajeanee poani jjabaquimajje queaca'a tiipoquije.

¹⁸ E'e, eya mimipoquiani onijje miquianaja ojjaña Jesosaja epeejjicuanaja pea-ai ebaneijjijo achejeanee Quitohua quiana acapoquianitii. Miquianaja ebajeyojji pojjeama poaje achejeanee ohua quiana acapoquiani ojaya quiana queajeaneeneejojoya. Jamatiiya jjabaquicajji queahuiso ohua queajeanee acapoquianijo.

¹⁹ Jamaya eya mimipoquiani onijje miquianajaya ebaneijjijo achejeanee quiana ohuaya acapoquianitii jiquio ecua esenijje dejjacuaa peacuana queajeapishana acani jama pojjeama. Quitohua ca se ca oe queajeaneenee acapoquiani. Majoya quiana queaja'anee ba'epoquije Eyacuiñajjija ejjashahuabaquijji jayojja achejeanee ohua quiana acapoquiani jjabaquimajje.

²⁰ Jamajjeya seya oe Eyacuiñajji ejjabihuiatiiquipoqui. Oya queaca'anee nequipoquianitii. Jiquio eseya o huohuiajjaña oja quiajji ohuaya queahuisonee quiacaje, asahuacaje pea-ai ma eseya o huohuiajjanaje jama pojjeama. Jiquio eseja shahuabajjima poani huisotii se ohuaya quiacaje, asahuacaje pea-ai. Jamaya ohuaya eseya queaca'a pomeecapoquiani eseja eyamiquipajje.

²¹ Eseyaya Jesosa Quitoja epeejji ejjachichaqui aniya, ojjaña joya Quitoja po'yanicuaaya Eyacuiñajji ejjabihuiatiiquipoqui. Esejaya Eyacuiñajji ebihuiapajea-ajja'yojji pojjeamatii poaje. Jamaya capoahuatii.