THITE 3 - Ebrié New Testament 1996

Krethiɛn si akhɔ́ tɛ́ yí

¹ Tɛmɛ ɛtɛ́ di hɛ hwannɛ́n mwanhɛ́n, ló wo yé mrɔ́khómán le athemánhɔn ɔ́nmɔn bhwe, wo ji nkɔn, ló wo bhra ya áyíbhwátɛ́ tho.

² Ɛkranmán wo, ló wo lé tɔ bhwe phromɛn sé néphan, lókhɛ́n áyɔn salé wo lí néphan bɛn apɛ thɛ́nkhwálé le áphɔpɔ́li, ló ákakhúnbrɛn tɛmɛ wo tɛ́ yí ńthɛ́nbhwá mɛn sé néphan khúnbrɛn.

³ Lo lɔ, lócí lo tɛsa néphan hɛ́nphe lɔ, lo lé ji bhwe, lo bha áphɔkhrɛ hromɛn. Áyíléletɛ́ do lo thɛ́n hrómɛn khúnbrɛn, ló áyí yábhɛ yábhɛ lo thɛ́n pɔ, lónɔn lo etɛ́. Lo bha abhúrɛ yítɛ́ le ńmɛnɔ́n yítɛ́ ɔ́nmɔn hrómɛn; ló lo sa lo bɛn nbrɛn mɛ.

⁴ Lókhɛ́n lóka Yankan ali lo Dókáwo bho mɛ́n thɛ́nkhwálé le mɛ́n pɔ́ ɔ́nmɔn thándi se néphan wu,

⁵ ló ńswa lo, lókhɛ́n áleli áyí bhwábhwá bɛn lo tɛ hɛ́nthé, khɛ́n mɛ́n nfɛkhuwú hrómɛn nɔn ńkhɔ swa lo. Ńmo ndu cho lo phɔ chan, ńswa lo, ló Nánnánmi Créncré khɔ lóhrómɛn chɛ wo ho lo pɔ́-npɔ́, ló lo gɛ ńmɛpɔ́bhá pɔ́pɔ́.

⁶ Yankan khɔ Jezwi-Krisi ali lo Dókáwo phɔ bho Nánnánmi Créncré sé lo áthúbhɔ,

⁷ ló Krisi phɔlíman lókɔn ase lo, lónɔn ábha chɛ́ lo lí néphan apriman Yankan hɛ́nmɛn, ló lo bhá gɛ mɛpɔ́bhá álephú, ńmɛpɔ́bhá lókɔn khɛ́n ali áyí lo bho lo mwasrui tre lótho.

⁸ Ábhwe lókɔn, áli ábhwe mímí. Mɛɛ́n nɛn salé ábhwe khúnbrɛn lókɔn mɛn tɔ, ɛya lótho khekhremɛn, ló néphan khɛ́n abhu Yankan mímí, wo hámwanhɛ́n tɛ́ áyí ayɔn. Áyí yábhɛ lókɔn, áli áyíbɛn ayɔn se néphan, ló ágɛ tɛ́ yíbhwá sé wo.

⁹ Ɛle yɔ́ hɛ nbrɛn kálé sé ábhwe táli phromɛn alepɛ thé, ábhwe ali hɛ jisɛmánhɔn hóthóbhɛ́ bhwe, le wo si wo chan bha, ɛle yɔ́ hɛ nbrɛn kálé sé ágbo, le ábhwetáli ali ábidí phɔ bhwe. Lóyí khúnbrɛn lókɔn, áli áyí wrɛ́, áli áyíbɛn ále tɛ́ yíɛkɛ sé lephan.

¹⁰ Lephan khɛ́n ehá gbo yé, ɛphrɛ krɛnmɛn lée anhámwanhɛ́n, ńdɔn mɔn hrómɛn, ɛcu krɛnmɛn lée anhámwanhɛ́n, lómánji ɛchán mɛ́n phɔ féne.

¹¹ Tɛmɛ ɛyɛ́n salé lephan yábhɛ lókɔn, ńyɔ ásitó mímí ka, ló mɛ́n ne ńtɛ, élie salé ńma áphɔkhrɛ hromɛn.

Áha bhwetɔ́ aphuji

¹² Atemasi le Thichikhi ɔ́nmɔn, lóka mɛn mán chɛ́ bɛn bha gɛ hɛ, tɛmɛ ɛtɛ́ khékhremɛn ɛbha ywɛnlí mɛn ákhúbhɛ́ óche Nikhopholísi, átɛsalé lóka ágba bha di, lóne nɔn mɛn mán chré.

¹³ Zenasi ali avoka le Apolɔ́su ɔ́nmɔn, wo júmán ali ákháli júmán, lóhrómɛn tɛmɛ ɛtɛ́ khékhremɛn dɔnmán wo mɔ́n, ló olépɛ yíɛkɛ omián wo.

¹⁴ Áyɔn salé néphan ali lo gbemán, wo bhó wo thɛ́n khúnbrɛn tré áyíbhwátɛ́ tho, ló néphan abha ámián hrómɛn, wo dɔnmán nkɔn mɔ́n. Áleyɔn sa wo chré wɛ́-nwɛ́, khɛ́n wo le tɛ́ yíɛkɛ.

¹⁵ Néphan khúnbrɛn abha mɛn phɔ ébhi hɛ. Lo ébhi néphan ali lo jɔn bhwá mímíbhú hrómɛn. Tɛmɛ Yankan phɔlíman obhá hɔ́n khúnbrɛn phɔ.