THITE 2 - Ebrié New Testament 1996

Áyí mímí ayɔn sa obhó lie néphan

¹ Lókhɛ́n hɛ, áyɔn salé ɛlie néphan áyí apriman.

² Ɛkranmán mrɔ́khómán lée wo bia ndɛ nán, wo ji wo bɛn nbrɛn, wo tɛ́ yí okhɔ́ ábhweyɛ́n hrómɛn, wo gɛlé ya mímíbhú le ápɔ́ ɔ́nmɔn hrómɛn, ló wo pɛ thɛ́nnɔ́n.

³ Lóyábhɛ brɛ, ɛ́kranmán ńmie gbóngbo lée, tɛmɛ wo tɛ́ yí okhɔ́ néphan khɛ́n wo yítɛ́ tɛ créncré. Áleyɔn salé wo lrɛ néphan bhwe, áleyɔn salé wo lí ńdɛ gangányá, lókhɛ́n áyɔn salé wo tɔ bhwe ha néphan,

⁴ lónɔn ábha chɛ́ miebhiɔ́ bha pɔ wo cahɔn, le wo miɔn.

⁵ Wo bhá tɛ́ yí khɔ́ ábhweyɛ́n hrómɛn, ló wo yítɛ́ bha priman. Wo bhá lí ábháthómánhɔn bhwá, wo bhá lí néphan apɛ thɛ́n bhwá khɛ́n éji wo cahɔn, lónɔn ábha chɛ́ néphan bha le tɔ bhwe phromɛn phromɛn sé Yankan bhwetɔ́.

⁶ Lóyábhɛ brɛ, tɛmɛ ɛha nsɛbhiɔ́ ló wo tɛ́ yí okhɔ́ ábhweyɛ́n hrómɛn.

⁷ Áyí khúnbrɛn hrómɛn, áyɔn salé hɛ nbrɛn lɔ ɛlí lephan bhwá hɛ yítɛ́ hrómɛn. Ló hɛ yílie hromɛn, tɛmɛ ɛtɛ́ áyí apriman le ló ayali.

⁸ Áyɔn salé hɛ míthé bhwetɔ́ opriman ochɛ́sé néphan olé jan hɛ mánji, ló hɛ mɛsamán, lóka wo bha lé gɛ ábhwe phromɛn phromɛn lo phɔ, hɛ́ndɛ bha ká wo mɛ.

⁹ Áyɔn salé néphan ali gangánmán, wo ji wo hwánthemánhɔn, ló áyí khúnbrɛn hrómɛn, wo tɛ́ yí opɔ́ nkɔn mɛ, áleyɔn salé wo gɛ nkɔn ɔ́nmɔn jan mɛ́n,

¹⁰ áleyɔn salé wo si nkɔn sído. Lókhɛ́n áyɔn salé ákakhúnbrɛn wo tɛ́ yí thɛ́n bhwá mɛn, ló wo lí mɛ́nbrɛ, lónɔn áyí wo élie Yankan ali lo Dókáwo hɛ́n hrómɛn, abha limán lephan khúnbrɛn.

¹¹ Átɛsalé áphɔlíman lókɔn khɛ́n Yankan bho thandi se néphan wu, lóphɔ nɔn wo khɔ swa áthéjinɛ́n khúnbrɛn.

¹² Áphɔlíman lókɔn, élie lo lée lo yɔ́ áyí phromɛn phromɛntɛ́ le áthéjinɛ́n thɛ́n yí apɔ ɔ́nmɔn ká, ló lo théji krɛn lo bha, lo tɛ́ yí okhɔ́ ábhweyɛ́n le áyítɛ́ apriman ɔ́nmɔn hrómɛn, lo yítɛ́ okhɔ́ néphan agɛlé ya Yankan phɔ.

¹³ Lóyábhɛ nɔn lo bhá chré bo ácí bhwábhwá lókɔn ali ńdubhɔ́ cí khɛ́n lo bho lo mwasrui tre lótho. Lócí lókɔn nɔn Yankan ali lephan khó bha bhó mɛ́n nguhá thándi, ló lo Hwánthe Jezwi-Krisi ali lo Dókáwo lɔ bha bhó mɛ́n nguhá thándi.

¹⁴ Lo Hwánthe Jezwi-Krisi hɔn mɛ́n nbrɛn sé lo, ló ńswa lo yɛn abhúrɛ yítɛ́ hrómɛn, ló ńchɛ lo li mɛ́n nbrɛn mɔ́n mɛn néphan áphɔ chan, khɛ́n wo thɛ́n sa tre áyíbhwátɛ́ tho.

¹⁵ Tɛmɛ ɛlie néphan ábhwe khúnbrɛn lókɔn mɛn tɔ, ló ɛbhó sɛ́npɛ́ mɛn tɔ bhwe ha néphan eyé hɛ bhwe. Tɛmɛ ɛgbrɛ wo, ló wo hromɛn olépɛ lephan brɛ obhú hɛ wɛ́-nwɛ́.