RƆ́MƐN KHÚBHƐ́NƐ́N 9 - Ebrié New Testament 1996

Yankan le aféchwe khɛ́n mɛ́n nbrɛn ńsan

¹ Ábhwe mímí nɔn mɛɛ́n tɔ, mɛn ni Krisi mɔ́n mɛn lephan, ló mɛn nɛ́n gɛ nítan. Nánnánmi Créncré abha mɛn thɛ́n hrómɛn, mɛ́n lɔ ánkranmán mɛn lée, mɛn bhwe mɛɛ́n tɔ áli ábhwe mímí:

² áphɔgbɔ́n abha mɛn thɛ́n hrómɛn ábanban, ló mɛn bhwephé mɛn gɛ, áli ábhwephé bɛn álephú.

³ Mɛn hɔnsɛ́nhɔn ali mɛn khúbhɛ́nɛ́n, wo hɛ́nthé mɛɛ́n nɛn salé Yankan muswe ogɛ mɛn, ló mɛn chán Krisi phɔ féne.

⁴ Wo néphan lókɔn, wo nɔn wo li Izraɛ khúbhɛ́nɛ́n: Yankan khwɛn wo jrɛn mɛ́n miɔn, ló wo bha mɛ́n nguhá hrómɛn. Yankan gɛ wo ɔ́nmɔn si akprɔbha, ńse wo mɛ́n bidí le yankanla, ló ńkránman nkɔn lée ápɛ yíbɛn bháne mɛ́n man sé nkɔn.

⁵ Néphan lókɔn wo nɔn wo li lo jisɛmánhɔn wo jímiɔn, ló ńnánmí hrómɛn, Krisi li wo khúbhɛ́ lephan. Ló tɛmɛ áhwalri ogɛ Krisi ali Yankan khɛ́n mɛ́n mɔ́n ka áyí khúnbrɛn tho godo. Amɛn.

⁶ Mɛn nɛn tɔlé Yankan bhwe atɔtre áfrókhwa, átɛsalé Izraɛ khúbhɛ́nɛ́n wo jimiɔn, léli wo khúnbrɛn nɔn wo li Izraɛ khúbhɛ́nɛ́n;

⁷ saji Ábrahámɛn jímiɔn, léli wo khúnbrɛn nɔn wo li mɛɛ́n nbrɛn mɛ́n miɔn, átɛsalé Yankan phrɛ kranman Ábrahámɛn lée: “Izakhi jímiɔn phɔ nɔn ɛ́bha khɔ́ pɛ hɛ mánji.”

⁸ Lóthé nɔn ali salé: ńmiɔ́ wo ho ńnánmí hrómɛn, wo le li Yankan miɔn. Lókhɛ́n ńmiɔ́ wo ho khɛ́n wo bhwetɔ́ chan Yankan bhwe aphrɛ tɔtre hrómɛn ɔn, wo nɔn wo li Ábrahámɛn jímiɔn.

⁹ Yankan bhwe atɔtre nɔn ali salé: “Lóka ácí bha sí mɛn mán sáji má, ló Sara bha hó sɛ.”

¹⁰ Lókhɛ́n ábhwe lókɔn áká phu. Átɛsalé Rebheka mɛ́n nsɛ mɔn ńho ɔn, lo jisɛ Izakhi míbrɛ nɔn ali wo the.

^11-12 Lókhɛ́n énɛn salé ńmiɔ́ mɔn lókɔn hromɛn, mɛ́n khɛ́n ńni lephan Yankan ebhá sán, lóbhwetɔ́ ochán Yankan nbrɛn bhwe aphrɛ tɔtre hrómɛn: lóhɛ́nthé nɔn Yankan kranman Rebheka lée: “Ńmiɔ́ lókɔn, jiphúwo bha pɛ sithwáwo.” Lóka Yankan tɔ bhwe lókɔn, wo ka ho ńmiɔ́ mɔn lókɔn, ló lóka lókɔn wo ka yɛn lósi okhɔ́ tɛ́ ńmwá le ńne. Lóhɛ́nthé Yankan néphan esán, lóbhwetɔ́ li ábhwe bɛn achan Yankan nbrɛn thɛ́n hrómɛn, khɛ́n áleli néphan nbrɛn júmánlí hrómɛn.

¹³ Lóhɛ́nthé Yankan hrɔ́ étɔlé: “Mɛn pɔ Jakɔ́phu, lókhɛ́n mɛn sa Esahu mɛ.”

¹⁴ Ló thénthé bí bhwe yábhɛ lo bhá tɔ? Wú ábhwe lókɔn élie lo salé Yankan li gɔngɔnsáwo? Léliló!

¹⁵ Lókhɛ́n Yankan phrɛ kranman Moyízi lée: “Mɛn, lephan kasé mɛn pɔ salé mɛn wú hɛ nfɛkhu, mɛn mán wú hɛ nfɛkhu, kasé mɛn pɔ salé hɛ bhwe okhú mɛn phɔ, hɛ bhwe bha khú mɛn phɔ.”

¹⁶ Lóhɛ́nthé ábhwe lókɔn ále chan lephan yí apɔ le lephan sɛ́npɛ́ hrómɛn, lókhɛ́n áchan Yankan nfɛkhuwú míbrɛ hromɛn.

¹⁷ Yankan hrɔ́ hrómɛn, Yankan ékranmán Faraɔn lée: “Ábhwe lókɔn hɛ́nthé nɔn mɛn san hɛ li bhringbi, ló hɛ phɔ nɔn mɛn sɛ́npɛ́ bha khɔ́ thándi, hɛ phɔ nɔn áthéjinɛ́n khúnbrɛn bha khɔ́ yɛ́n mɛn hɛ́n mɛn ni.”

¹⁸ Lóhɛ́nthé, lephan kasé Yankan pɔ, anwú hɛ nfɛkhu, saji lephan kasé Yankan pɔ, ansé hɛ ńthɛ́n khrákhrá.

Yankan thɛ́nyan le Yankan nfɛkhuwú

¹⁹ Néphan fe ebhá bhi mɛn lée: “Kasé áli lóyábhɛ nɛn, ló bítɛ khɛ́n Yankan cu étɔlé néphan etɛ́ yí yan ɛ? Ló kasé Yankan yí apɔ lée etɛ́, abɛn bha gɛ ɔ́nmɔn tali ɛ?”

²⁰ Hɛ lókɔn ɛli lephan wrɛ́, bí mɔ́nsi yábhɛ ɛgɛ khɛ́n ɛ́bha gɛ Yankan ɔ́nmɔn talí bhwe ɛ? Wú apan wo bho aji than, ángɛ kranmán lephan abho mɔ́n tɛ lée: “Bítɛ khɛ́n ɛtɛ mɛn yábhɛ nɛn ɛ?”

²¹ Lephan ethán apan, mɛ́n yí ńpɔ lónɔn anmó aji tɛ́: aji dɔnbrɛ ńbra tre, ángɛ mó lóphɛ́nta bɛn thán ábhwe okhwɛ́n áyí mímí há lóhrómɛn. Saji ángɛ mó lóphɛ́nta lójɔ thán apan bɛn wo bhó wa nbie.

²² Yankan si akhɔ́ tɛ́ yí nɔn ali lókɔn. Yankan énɛn ado thɛ́nyan sé néphan, ló anchɛ́ wo yɛ́n mɛ́n sɛ́npɛ́. Lótɛ khɛ́n néphan lókɔn echɛ́ thɛ́nyan hɔ́n-ɛn ɔn, wo li néphan bɛn ógɛ lɔ phú, lókhɛ́n wo khúnbrɛn lókɔn, mɛ́n thɛ́n nɔn wo phɔ.

²³ Saji Yankan énɛn obhó mɛ́n nguhá thándi sé néphan owú, ló ńguhá lókɔn, lónɔn ńchɛ lo ka lóhrómɛn, lo khúnbrɛn khɛ́n lo li néphan Yankan wu nfɛkhu, lo khúnbrɛn lókɔn khɛ́n lo li néphan Yankan phrɛ san tre njɛ salé cíbɛn lo ká mɛ́n nguhá hrómɛn.

²⁴ Lo nɔn lo li néphan Yankan che bha mɛ́n yé, lókhɛ́n áleli Jwifunɛ́n dɔnbrɛ hromɛn pán Yankan che néphan, wo khɛ́n wo le li Jwifunɛ́n, wo hromɛn lɔ Yankan che néphan.

²⁵ Lóhɛ́nthé Oze hrɔ́ hrómɛn Yankan étɔlé: “Aféchwe khɛ́n lócí aleli mɛn néphan, mɛn mán che wo mɛn néphan, ló ákhúbhɛ́nɛ́n khɛ́n lócí mɛn nɛn pɔ, mɛn mán tɔlé thénthé mɛn pɔ wo banban.

²⁶ Lósi brɛ khɛ́n néphan ya kranman wo lée: 'Hɔ́n lókɔn, ɔ́n ne li mɛn néphan', lóne brɛ nɔn wo bhá ya che wo Yankan abha mɛpɔ́, mɛ́n miɔn.”

²⁷ Ló Izraɛ khúbhɛ́nɛ́n hɛ́nthé Ezayi lukhwɛ́ kránmɛn, ló ántɔlé: “Kasé Izraɛ khúbhɛ́nɛ́n thubhɔ sa gwe mɛ́n nánchɛ lɔ, wo hromɛn néphan kpɛɛ́ ábha khá tre, wo nɔn Yankan bha swa wo.

²⁸ Átɛsalé Yankan bhwe atɔtre, ánman tɛ́ lóyí khúnbrɛn símɛ́n gbraa áthéji.”

²⁹ Lóhɛ́nthé Ezayi phrɛ tɔlé: “Kasé lo Hwánthe sɛ́npɛ́wo le bhu mwanhɛ́n kha lo jímiɔn kpɛ́bɛn tre lo lé, lo bhá tɛ́sa Sodɔmɛn khúbhɛ́nɛ́n, saji lo bhá tɛ́sa Gomɔ khúbhɛ́nɛ́n.”

Izraɛ khúbhɛ́nɛ́n le Ábhwe Bhwábhwá bhwetɔ́

³⁰ Ló bí bhwe yábhɛ lo bhá tɔ? Átɛsalé néphan aleli Jwifunɛ́n, lókhɛ́n ále dɛn nɛn lósi wo bhá khɔ́ lí néphan apriman Yankan hɛ́nmɛn, wo néphan lókɔn, wo mímíbhú hrómɛn Yankan tɛ wo priman,

³¹ lókhɛ́n Izraɛ khúbhɛ́nɛ́n aya énɛn ábidí bɛn ábha chɛ́ wo primán Yankan hɛ́nmɛn, wo-ɛ wo le gɛ ábidí yí énɛn.

³² Ló bítɛ khɛ́n átɛ nɛn ɛ? Átɛsalé wo yítɛ́ le khɔ Yankan mímíbhú hrómɛn, wo yítɛ́ sakhɔ wo júmánlí wrɛ́ hrómɛn. Ógɛ tɔlé wo nta dɔn “ábhú bɛn áchɛ́ lephan hálé”,

³³ lóhɛ́nthé Yankan hrɔ́ étɔlé: “Ɔ́n wu, mɛn hɔn ábhú bɛn tre Ziɔn khúbhɛ́, ló ábhú lókɔn ábha dɔn néphan nta, áli ábhú bɛn ábha chɛ́ wo hálé. Lókhɛ́n lephan kasé ɛbhu ábhú lókɔn mímí, ɛbha lé gɛ hɛ́nmɛnphrui.”