RƆ́MƐN KHÚBHƐ́NƐ́N 8 - Ebrié New Testament 1996

Lósi okhɔ́ tɛ́ yí Yankan Nánnánmi hromɛn

¹ Thénthé, néphan abha Jezwi-Krisi phɔ, wo bha lé cu bhɔ́ wo pɔn npɔhɔ́n.

² Átɛsalé Nánnánmi Créncré lókɔn khɛ́n akhɔ́ Jezwi-Krisi phɔ sé néphan mɛpɔ́bhá, mɛ́n bidí nɔn aswa mɛn yɛn ńne bidí le ákhú ɔ́nmɔn hrómɛn.

³ Áyí khɛ́n Moyízi bidí lé gɛ tɛ́ lephan nánmí enán hɛ́nthé, Yankan tɛ lókhúnbrɛn phu. Lónɔn ali sa: ńne lókɔn abha lephan phɔ, Yankan bhɔ lókwa phu lóka ńchɛ mɛ́n nbrɛn mɛ́n Bhi bha áthéji. Yankan Mi lókɔn, ńma áthéji nánmí hrómɛn sa lo ne nánmí yábhɛ lókɔn, lókhɛ́n lo nánmí lo le, áli ńne nánmí. Yankan Mi bha áthéji salé anhɔ́n ńne yɛn lo tho.

⁴ Áyí khúnbrɛn lókɔn Yankan tɛ, élie salé ábidí bhwe atɔtre, lóyí otɛ́ símɛ́n lo thɛ́n hrómɛn, lo khúnbrɛn lókɔn khɛ́n lo etɛ́ yí khɔ́ Nánnánmi hromɛn, lókhɛ́n lo lé cu tɛ́ yí khɔ́ ńnánmí hrómɛn.

⁵ Átɛsalé néphan khɛ́n etɛ́ yí khɔ́ ńnánmí hrómɛn, wo thɛ́n khúnbrɛn tre áyí ńnánmí énɛn tho, lókhɛ́n néphan etɛ́ yí khɔ́ Nánnánmi hromɛn, wo thɛ́n khúnbrɛn tre áyí Nánnánmi énɛn tho.

⁶ Kasé ɛbho hɛ thɛ́n tre áyí ńnánmí énɛn tho, lóyí ɛ́bha gɛ lóhrómɛn nɔn ali ákhú, lókhɛ́n kasé ɛbho hɛ thɛ́n tre áyí Nánnánmi énɛn tho, lóyí ɛ́bha gɛ lóhrómɛn nɔn ali ńmɛpɔ́bhá le ńthɛ́nkhwálé.

⁷ Lóhɛ́nthé néphan khɛ́n wo thɛ́n khúnbrɛn sa tre áyí wo nánmí énɛn tho, néphan lókɔn wo li Yankan mɛsamán, wo li néphan bɛn ále ji Yankan bidí, saji wo le pɛ sɛ́npɛ́ wo gɛ ji Yankan bidí.

⁸ Néphan khɛ́n éji wo nánmí bhwe étɔ sé wo, néphan lókɔn wo lé gɛ tɛ́ Yankan yí apɔ.

⁹ Lókhɛ́n hɔ́n, ɔ́n ne li néphan bɛn etɛ́ yí khɔ́ ńnánmí hrómɛn, lókhɛ́n ɔ́n ni néphan bɛn etɛ́ yí khɔ́ Nánnánmi hromɛn, átɛsalé Yankan Nánnánmi bha hɔ́n phɔ. Lephan kasé ɛle pɛ Krisi Nánnánmi, ɛle li Krisi lephan.

¹⁰ Kasé Krisi bha hɔ́n phɔ mímí nbrɛn, hɔ́n ne bha wɛ́n hɔ́n nánmí, lókhɛ́n Nánnánmi abha hɔ́n phɔ, mɛ́n nɔn ánman ní hɔ́n mɛpɔ́bhá, átɛsalé wo tɛ hɔ́n ni néphan apriman Yankan hɛ́nmɛn.

¹¹ Kasé mímí nbrɛn, Yankan lókɔn achɛ Jezwi chan khúnɔn mɛn fe, mɛ́n Nánnánmi bha hɔ́n phɔ, ló lephan lókɔn achɛ Krisi chan khúnɔn mɛn fe, mɛ́n Nánnánmi abha hɔ́n phɔ hɛ́nthé, ánman mó ńmɛpɔ́bhá sé hɔ́n nánmí lókɔn ali ńnánmí ábha khú cíbɛn.

¹² Lóhɛ́nthé mɛn hɔnsɛ́nhɔn, áyíbɛn bháne, lónɔn ayɔn sa lo tɛ́, lókhɛ́n áleli lo nánmí yí énɛn lónɔn lo bhá tɛ́.

¹³ Átɛsalé kasé ɛtɛ́ hɛ nánmí yí énɛn, lóyí ɛ́bha gɛ lóhrómɛn nɔn ali ákhú. Lókhɛ́n kasé Nánnánmi sɛ́npɛ́ hrómɛn, ɔ́n wɛn ńneyítɛ́ khúnbrɛn yɛn hɔ́n phɔ ɔn, ɔ́n ma bhá mɛpɔ́.

¹⁴ Néphan khɛ́n Yankan Nánnánmi bha wo phɔ éyalí wo, wo li Yankan miɔn.

¹⁵ Átɛsalé Nánnánmi lókɔn Yankan se hɔ́n, áleli nánnánmi bɛn ábha khwɛ́n hɔ́n jrɛn gangánmán, lókhɛ́n ábha chɛ́ hɔ́n sókhú, Nánnánmi lókɔn mɛ́n nɔn ánman chɛ́ hɔ́n ní Yankan miɔn, ló mɛ́n nɔn anchɛ́ lo lúkhwɛ́ che Yankan: “Mɛn Nthe!”

¹⁶ Yankan Nánnánmi nbrɛn elí ndalefɛ kranmán lo nánnánmi lée, lo li Yankan miɔn.

¹⁷ Kasé lo li Yankan miɔn, lo bhá gɛ ndubhɔ́ lókɔn Yankan bho tre mɛ́n hwannɛ́n lé, saji lo bhá cu gɛ áyí khɛ́n Yankan bho tre Krisi lé. Ló kasé ncɛ́n lo bha Krisi gbrelí hrómɛn, cíbɛn lo bha bhá mɛ́n nguhá hrómɛn.

Ńguhá khóo abha hɛ́nmɛn ebhá

¹⁸ Mɛn mú salé áyí lókɔn thénthé ekhú lo phɔ, ále priman ńguhá khóo lókɔn cíbɛn Yankan bha bhó thándi sé lo wú.

¹⁹ Áthéji pasá nbrɛn énɛn salé Yankan okhwɛ́n mɛ́n miɔn thándi sé néphan owú.

²⁰ Átɛsalé áthéji li áyí wrɛ́, lókhɛ́n mɛ́n yí wrɛ́ lókɔn ńni, ále chan mɛɛ́n nbrɛn yé, Yankan nɔn atɛ áyí yábhɛ lókɔn. Lótɛ khɛ́n ácu pɛ mwasrui se áthéji, lónɔn ali sa:

²¹ cíbɛn Yankan bha swa áthéji yɛn áyíléletɛ́ hrómɛn, ló áfíkhwá Yankan miɔn gɛ, mɛ́n lɔ, ánman ká lóhrómɛn.

²² Lo yɛn salé achan godo adi ncɛ́n, áyí ekhú áthéji phɔ ló ánpan kranmɛn sa bhie áhó etɛ́ a.

²³ Lókhɛ́n áleli áthéji míbrɛ áyí ekhúphɔ: lo khúnbrɛn khɛ́n lo gɛ Nánnánmi ali áyí Yankan phrɛ thwási bhó sé lephan, lo lɔ áyí ekhú lo phɔ, lo épan lo thɛ́n hrómɛn, ló lo chre lo ébo Yankan obha khwɛ́n lo jrɛn mɛ́n miɔn, ló answa lo yɛn áyíkhúphɔ hromɛn.

²⁴ Átɛsalé lóka lo pɛ mwasrui, lónɔn wo swa lo. Lókhɛ́n áyí lo bho lo mwasrui tre lótho, kasé lo ewú lóyí lókɔn, lóyábhɛ nɛn áleli ńmwasrui nɔn ali lókɔn: átɛsalé áyí khɛ́n atre wo ewú mɛbhí mɛn, áleli áyí ógɛ sruimwa.

²⁵ Lókhɛ́n kasé lo bho lo mwasrui tre áyí khɛ́n lo lé wú tho, lo bhá nɔ́nthɛ́n chré bo lóyí lókɔn.

²⁶ Lóyábhɛ brɛ, lo li néphan bɛn enán, lókhɛ́n Nánnánmi nbrɛn nɔn édɔnmán lo mɔ́n. Átɛsalé lo lé yɛ́n lósi yábhɛ okhɔ́ la Yankan, lókhɛ́n Nánnánmi nbrɛn nɔn éla Yankan sé lo, ántɔ bhwe ló ánpan kranmɛn, ló óle gɛ khɔ́ míthé mɛn tɔ lóbhwe yábhɛ ántɔ.

²⁷ Ló Yankan khɛ́n ewú ábhwe abha néphan thɛ́n hrómɛn, mɛ́n míbrɛ nɔn ńyɛn Nánnánmi yí yábhɛ énɛn, átɛsalé Nánnánmi éla Yankan sé néphan khúnbrɛn ali mɛ́n gbemán, ló ála yábhɛ lókɔn, áli ála bɛn élimán Yankan.

²⁸ Lo yɛn salé Yankan khɔ́ áyí khúnbrɛn hrómɛn tɛ́ yíbhwá sé néphan apɔ-ɛ, néphan khɛ́n mɛ́n nbrɛn ńche ma mɛ́n phɔ, sa mɛ́n bhwe lócí ńphrɛ tɔtre.

²⁹ Ló néphan khúnbrɛn khɛ́n Yankan phrɛ san tre, néphan lókɔn ńkhwɛn wo tre njɛ salé wo lɔ wo tɛ́ sa mɛ́n Bhi si akhɔ tɛ, ochɛ́sé néphan khúnbrɛn lókɔn khɛ́n étɔlé wo li hɔnsɛ́n, wo hromɛn, mɛ́n Bhi olí sithwáwo.

³⁰ Ló néphan khɛ́n Yankan san tre njɛ, Yankan nbrɛn nɔn ache wo bha, ló néphan khɛ́n ńche ma, mɛ́n nbrɛn nɔn ńtɛ wo li néphan apriman mɛ́n hɛ́nmɛn, ló néphan khɛ́n ńtɛ priman, mɛ́n nbrɛn nɔn ńkhwɛn nkɔn ha mɛ́n nguhá hrómɛn.

Yankan pɔ́ khóo apɔ néphan

³¹ Ló ábhwe khúnbrɛn lókɔn hromɛn, bí bhwe yábhɛ lo bhá tɔ? Kasé Yankan bha lo phɔ, abɛn bha gɛ lo ɔ́nmɔn swan?

³² Yankan lókɔn, mɛɛ́n nbrɛn mɛ́n Bhi le phephɔ, ńhɔn nkɛ ha npha se lo khúnbrɛn, ló kasé ńhɔn mɛ́n Bhi se lo, wú anman nɛ́n gɛ mó áyí nánkhɛ khúnbrɛn káne sé lo?

³³ Ló néphan Yankan san, abɛn nɔn ábha tɔlé wo tɛ yí yan? Álepɛ lephan ábha tɔ! Átɛsalé Yankan nbrɛn nɔn atɔlé wo le li pɔn.

³⁴ Ló abɛn nɔn ábha bhɔ́ wo pɔn? Álepɛ lephan ábha bhɔ́ wo pɔn. Átɛsalé Krisi nɔn ali lephan akhu, khɛ́n achan khúnɔn mɛn fe, ló aya Yankan liémɔn si éla Yankan sé lo.

³⁵ Abɛn bha gɛ khwɛ́n lo yɛn Krisi pɔ́ hrómɛn? Wú áyíkhúphɔ, wú ábhwephé, wú ágbrelí, wú áko, wú ámián, wú muswe, wú ákhú?

³⁶ Lóhɛ́nthé Yankan hrɔ́ étɔlé: “Hɛ hɛ́nthé, ácí khúnbrɛn lo bha ákhú hrómɛn, wo etɛ́ lo yí sa ńgbankhran wo khwɛn wo élo wɛ́n.”

³⁷ Lókhɛ́n léliló! Áyí khúnbrɛn lókɔn hromɛn, lephan apɔ lo, mɛ́n mɔ́ndɔ́nman hromɛn, lo mɔ́n dipha brɛn lephan khúnbrɛn.

³⁸ Mɛn mú mímí salé álepɛ yíbɛn ábha gɛ khwɛ́n lo yɛn Yankan pɔ́ hrómɛn: ákhú le ńmɛpɔ́bhá lɔ, Yankan-mranchɛ́mán lɔ, átho sɛ́npɛ́mán khúnbrɛn lɔ, áyí etɛ́ ncɛ́n le ló ábha tɛ́ npi lɔ,

³⁹ áyí khúnbrɛn abha átho le áyí khúnbrɛn abha áthéji krɛn, áyí khúnbrɛn Yankan tɛ, lóhrómɛn álepɛ áyíbɛn khɛ́n ábha gɛ khwɛ́n lo yɛn Yankan pɔ́ hrómɛn. Ló Yankan pɔ́ lókɔn, lo Hwánthe Jezwi-Krisi phɔ nɔn akhɔ thandi.