RƆ́MƐN KHÚBHƐ́NƐ́N 7 - Ebrié New Testament 1996

Áphɛ́n bhwetɔ́ lo bhá bhó thwelí bhwe tɔ

¹ Mɛn hɔnsɛ́nhɔn, wú ɔ́n ne yɛn salé lóka lephan bha mɛpɔ́, lónɔn ábidí pɛ sɛ́npɛ́ mɛ́n tho? Ló kasé mɛɛ́n tɔ ábidí phɔ bhwe, átɛsalé néphan khɛ́n eyé ábhwe mɛɛ́n tɔ, wo li néphan ayɛn bidí.

² Ábhwetɔ́ do bhwe bhá, bhie aphɛn sɛ, lóka ńma mɛ́n ca hwan, mɛ́n ca gɛ mɔ́nsi mɛ́n tho ákakhúnbrɛn, lókhɛ́n lóka mɛ́n ca khu, bhie lókɔn, mɛ́n ca le cu gɛ mɔ́nsi mɛ́n tho npɔhɔ́n.

³ Lókhɛ́n lóka mɛ́n ca bha mɛpɔ́ kasé annó sɛ nankhɛ phɔ, wo bhá tɔlé ánche sɛ, lókhɛ́n kasé mɛ́n ca khu, thénthé ńgɛ mɔ́nsi, ló kasé anphɛ́n sɛ nankhɛ, lókɔn áleli sɛ ánche.

⁴ Mɛn hɔnsɛ́nhɔn, hɔ́n lɔ lóyábhɛ brɛ, lóka ɔ́n ma Krisi phɔ, ɔ́n jrɛn mɛ́n phɔ nánmí, ló ɔ́n khɔ mɛ́n phɔ khu chan ábidí hrómɛn féne, ló thénthé ógɛ tɔlé ɔ́n gɛ mɔ́nsi ɔ́n no gɛ hɔ́n ca pɔ́pɔ́. Lephan lókɔn mɛ́n nɔn ńchan khúnɔn mɛn fe, ló ánman chɛ́ lo sómí bhwá sé Yankan.

⁵ Lóka lo etɛ́ yí khɔ́ ńnánmí hrómɛn, ábidí chɛ́ lo bhú hɛ́nphe phromɛn phromɛn, ló hɛ́nphebhú phromɛn lókɔn, áli yíbɛn elí júmán lo thɛ́n hrómɛn, ló ádo ákhú sé lo.

⁶ Lókhɛ́n thénthé lo le cu bha ábidí hrómɛn npɔhɔ́n, ákhú swa lo yɛn ákhúthéká hrómɛn, thénthé lo bhá bhó hɛ́nphebhú pɔ́pɔ́ lí júmán sé Yankan, lo bhá lí júmán Nánnánmi Créncré hrómɛn, áleli hɛ́nphebhú lɔ́lɔ́ hrómɛn, hɛ́nphebhú lɔ́lɔ́ lókɔn nɔn ali ábidí hrɔ́ wo lrɛ.

Ábidí nɔn áchɛ́ néphan tɛ́ ne

⁷ Ló thénthé bí bhwe yábhɛ lo bhá tɔ? Wú ábidí lɔ jrɛn ńne? Léliló! Lókhɛ́n ábidí phɔ nɔn mɛn khɔ yɛn áyí óche ńne. Mímí kasé ábidí le phrɛ tɔlé: “Hɛ jɔ yí ole nɔ́n hɛ mɛ, mɛn man nɛ́n gɛ yɛ́n lóyí ali ńmɛnɔ́n.”

⁸ Ábidí phɔ nɔn ńne khɔ bho hɛ́nphebhú yábhɛ yábhɛ ali ńmɛnɔ́n ka mɛn thɛ́n hrómɛn, ló kasé álepɛ ábidí, ńne tɛsa áyí akhu.

⁹ Lócí álepɛ ábidí lótɛ khɛ́n mɛn ma mɛpɔ́, lókhɛ́n lóka ábidí bha, ńne bho mɛ́n sɛ́npɛ́ thándi,

¹⁰ ló mɛn khu: lóhɛ́nthé, ábidí lókɔn khɛ́n ali áyí ágɛ sé lephan mɛpɔ́bhá, mɛn ékɛ ádo ákhú sé mɛn.

¹¹ Átɛsalé ábidí phɔ nɔn ńne khɔ gɛ si, ábidí phɔ nɔn ńne khɔ khrɛ mɛn, ló saji ábidí brɛ phɔ tɛɛ nɔn ńne khɔ wɛn mɛn.

¹² Lóhɛ́nthé ógɛ tɔlé ábidí li áyíbɛn atɛ créncré, ló ábhwe wo tɔlé ole tɛ́ yíléle, ábhwe lókɔn áli ábhwe bɛn atɛ créncré, apriman, ayɔn.

¹³ Wú lóthé nɔn ali salé áyí ayɔn, lónɔn ado ákhú sé mɛn? Léliló! Lókhɛ́n ńne nɔn asranman ábhwe khúnbrɛn lókɔn: áyíbhwá phɔ nɔn ńne khɔ do ákhú sé mɛn, ochɛ́sé néphan oyɛ́n ńne si yábhɛ akhɔ tɛ. Ábidí phɔ nɔn ńne khɔ bho mɛ́n sɛ́npɛ́ khúnbrɛn thándi se néphan wu.

Lephan ali khúthékáwo se ńne

¹⁴ Lo yɛn salé ábidí chan nánnánmi hromɛn, lókhɛ́n mɛn-ɛ mɛn ni nánmí wrɛ́, mɛn tɛsa gangánwo bɛn wo hɔn phɛli se ńne.

¹⁵ Mɛn nɛ́n yɛ́n mɛn yí yábhɛ mɛn tɛ́: mɛn nɛ́n tɛ́ áyí mɛn pɔ sa mɛn tɛ́, lókhɛ́n áyí mɛn nɛn pɔ sa mɛn tɛ́, lónɔn mɛn tɛ́.

¹⁶ Ló kasé mɛn tɛ́ áyí mɛn nɛn npɔ sa mɛn tɛ́, élie salé ábidí li áyíbɛn ayɔn.

¹⁷ Ló kasé áli lóyábhɛ nɛn, áleli mɛɛ́n nbrɛn nɔn mɛn tɛ́ áyí yábhɛ lókɔn, lókhɛ́n ńne abha mɛn phɔ, mɛ́n nɔn anchɛ́ mɛn tɛ́ áyí yábhɛ lókɔn.

¹⁸ Mɛn yɛn salé áyíbhwátɛ́ le bha mɛn thɛ́n hrómɛn, lóthé nɔn ali salé, mɛn nánmí enán hrómɛn. Átɛsalé áyíbhwátɛ́ élimán mɛn, lókhɛ́n mɛn nɛ́n gɛ tɛ́.

¹⁹ Ló áyíbhwá khɛ́n mɛɛ́n nɛn mɛn tɛ́, ló mɛn nɛ́n gɛ tɛ́, lókhɛ́n áyíléle mɛn nɛn pɔ sa mɛn tɛ́, ló-ɛ nɔn ali áyí mɛn tɛ́.

²⁰ Ló kasé mɛn tɛ́ áyí mɛn nɛn pɔ sa mɛn tɛ́, élie salé áleli mɛɛ́n nbrɛn nɔn mɛn tɛ́ lóyí lókɔn, lókhɛ́n ńne abha mɛn thɛ́n hrómɛn nɔn echɛ́ mɛn tɛ́ áyí yábhɛ lókɔn.

²¹ Áyíbɛn bha mɛn thɛ́n hrómɛn élri mɛn gbre, lónɔn ali sa: lóka mɛɛ́n nɛn mɛn tɛ́ áyíbhwá, áyíléle nɔn ali áyí áfiya mɛn hɛ́nmɛn mɛn tɛ́.

²² Mɛn thɛ́n hrómɛn, Yankan bidí bhwe élimán mɛn.

²³ Lókhɛ́n mɛn cu mɛn wú ábidí nánkhɛ bɛn bha mɛn nánmí hrómɛn elí júmán. Ábidí lókɔn áli áyíbɛn agɛ ábidí khɛ́n élimán mɛn ɔ́nmɔn éswan, ábidí nánkhɛ lókɔn, ńhɔn mɛn jrɛn khúthékáwo se ábidí achan ńne hrómɛn, ló ńne bidí lókɔn, mɛ́n nɔn ńma mɛn thɛ́n hrómɛn anní júmán.

²⁴ Muswe gɛ mɛn! Mɛn nánmí lókɔn, mɛ́n nɔn ńdo mɛn ka ákhú hrómɛn, ló abɛn nɔn ábha swa mɛn yɛn ńnánmí lókɔn hromɛn?

²⁵ Lo Hwánthe Jezwi-Krisi hɛ́n hrómɛn, mɛn ná Yankan nansi! Ló thénthé ábhwe abha lóhrómɛn nɔn ali sa, mɛn khɔ mɛn thɛ́n hrómɛn mɛn ní júmán sé Yankan bidí, lókhɛ́n mɛn nánmí hrómɛn-ɛ, mɛn ni gangánwo se ábidí achan ńne hromɛn.