RƆ́MƐN KHÚBHƐ́NƐ́N 6 - Ebrié New Testament 1996

Ńne hɛ́nthé lo khu, khɛ́n Krisi hɛ́nthé lo bha mɛpɔ́

¹ Ló thénthé bí bhwe lo bhá tɔ? Wú lo bhá cu bhá ńneyítɛ́ hrómɛn ɔ́nmɔn lo, ochɛ́sé Yankan phɔlíman ase lo obhɔ́tho?

² Léliló! Lo khu chan ńne hrómɛn féne: ló kalósi lo bhá cu khɔ́ bhá ńne hrómɛn npɔ e?

³ Wú ɔ́n ne yɛn salé lo khúnbrɛn khɛ́n lo khɔ Jezwi-Krisi phɔ ha nduhɛ́n, mɛ́n khú hrómɛn nɔn lo khɔ ha nduhɛ́n?

⁴ Lóhɛ́nthé lo nduhɛ́nhá hrómɛn, lóka Krisi khu khɛ́n wo mrwɛn, átɛsa lo le mɛ́n ɔ́nmɔn nɔn okhu, ló wo mrwɛn lo le mɛ́n ɔ́nmɔn. Lóyábhɛ brɛ, sa lósi lo The khɔ bho mɛ́n nguhá chɛ Krisi chan khúnɔn mɛn fe ɔn, lo lɔ thénthé lo gɛ mɛpɔ́bhá pɔ́pɔ́.

⁵ Ló kasé lo bha Krisi phɔ, lókhɛ́n lo le mɛ́n ɔ́nmɔn okhu sa mɛ́n si ńkhɔ khu, lóyábhɛ brɛ lo bha bhá mɛ́n phɔ, ló lo le mɛ́n ɔ́nmɔn obha chán khúnɔn mɛn fe sa mɛ́n si ńkhɔ chan khúnɔn mɛn fe.

⁶ Tɛmɛ odi lo mwanhɛ́n salé: áyábhletre phɔ, wo wɛn lo phɔ nánmí lɔ́lɔ́ lókɔn le Krisi ɔ́nmɔn, ochɛ́sé lo nánmí lókɔn ali ńne nánmí olɔ, ló lo lé cu lí ńne gangánmán npɔhɔ́n.

⁷ Lephan kasé ɛkhu, átɛsalé wo swa hɛ yɛn ńne sɛ́npɛ́ hrómɛn.

⁸ Kasé lo le Krisi ɔ́nmɔn okhu, lo bhú mímí salé lo le mɛ́n ɔ́nmɔn obhá saji bhá mɛpɔ́.

⁹ Lo yɛn salé Krisi chan khúnɔn mɛn fe, ló anman nɛ́n cu khú npɔhɔ́n: ákhú lé cu pɛ sɛ́npɛ́ mɛ́n tho.

¹⁰ Krisi khu, ló ńne le cu pɛ sɛ́npɛ́ mɛ́n tho npɔhɔ́n, anman nɛ́n cu khú npɔhɔ́n. Ló thénthé mɛ́n mɛpɔ́bhá li Yankan ékɛ.

¹¹ Lóyábhɛ brɛ hɔ́n lɔ, tɛmɛ ɔ́n yɛ́n salé thénthé ɔ́n khu chan ńne hrómɛn féne, ló Jezwi-Krisi mɔ́ndɔ́nman hromɛn, hɔ́n mɛpɔ́bhá li Yankan ékɛ.

¹² Thénthé áleyɔn sa ńne opɛ hɔ́n nánmí ali ákhú nánmí, ló anchɛ́ hɔ́n tɛ́ áyí hɔ́n nánmí pɔ.

¹³ Saji ɔ́n ne bhó hɔ́n phɔ nánmí phɛ́nta fe lo ká ńne júmán hrómɛn, sa áyíbɛn obho pɛ wo ekútha sé áyíléletɛ́. Lókhɛ́n tɛmɛ ɔ́n mó hɔ́n nbrɛn sé Yankan sa néphan achan khúnɔn mɛn fe, khɛ́n thénthé abha mɛpɔ́. Tɛmɛ ɔ́n mó hɔ́n nbrɛn sé Yankan, ló ansakhɔ́ hɔ́n phɔ ní júmán sé áyíbhwá.

¹⁴ Thénthé áleyɔn sa ńne opɛ hɔ́n, átɛsalé ɔ́n ne cu bha ábidí hrómɛn, lókhɛ́n ɔ́n ma Yankan phɔlíman hromɛn.

Thénthé lo li áyíbhwátɛ́ gangánmán

¹⁵ Ló bí bhwe yábhɛ lo bhá tɔ? Kasé lo le cu bha ábidí hrómɛn npɔhɔ́n, lókhɛ́n thénthé lo bha Yankan phɔlíman hromɛn ɔn, wú lóhɛ́nthé lo bhá wú bibi tɛ́ ne? Léliló!

¹⁶ Wú ɔ́n ne yɛn salé kasé ɛhɔn hɛ brɛn jrɛn gangánwo se lephan, lókhɛ́n ɛ́ji mɛ́n bhwe, ɛli mɛ́n gangánwo? Lóyábhɛ brɛ, lephan kasé ɛ́ji ńne bidí, ńne lókɔn áli áyíbɛn áyalí lephan ló ákhú hrómɛn. Lókhɛ́n kasé ɛli lephan áji Yankan, ábhwejí lókɔn, mɛ́n lɔ anchɛ́ Yankan tɛ́ lephan priman mɛ́n hɛ́nmɛn.

¹⁷ Lókhɛ́n mɛn ná Yankan nansi: átɛsalé lócí ɔ́n ni ńne gangánmán, lókhɛ́n thénthé ábhwe mímí lókɔn wo tɔ lóphɔ bhwe se hɔ́n ye, mímí nbrɛn hɔ́n éji lóbhwe lókɔn hɔ́n thɛ́n khúnbrɛn hrómɛn.

¹⁸ Wo swa hɔ́n yɛn ńne hromɛn, ló thénthé ɔ́n jrɛn gangánmán se áyíbhwátɛ́.

¹⁹ Ló thénthé hɔ́n nánmí enán hɛ́nthé, mɛn mán thwelí bhwe bɛn sé hɔ́n: lócí ɔ́n mo hɔ́n nbrɛn se áyíléletɛ́ le ágbakhrelí, lókhɛ́n thénthé áyɔn salé ɔ́n mó hɔ́n nbrɛn sé áyíbhwátɛ́, ochɛ́sé hɔ́n yítɛ́ otɛ́ créncré.

²⁰ Lóka ɔ́n ni ńne gangánmán, ɔ́n ne bha áyíbhwátɛ́ hrómɛn.

²¹ Lókhɛ́n lóka ɔ́n ma áyí phromɛn phromɛn yábhɛ yábhɛtɛ́ hrómɛn, áyí yábhɛ lókɔn khɛ́n thénthé ali áyí etɛ́ hɔ́n hɛ́ndɛ, bí yábhɛ ɔ́n gɛ lóhrómɛn ɛ? Lóyí yábhɛ khúnbrɛn lókɔn áli áyí ádo khú sé lephan!

²² Lókhɛ́n thénthé wo swa hɔ́n yɛn ńne hromɛn ló wo chɛ hɔ́n ni Yankan júmánmán. Hɔ́n mwá ɔ́n gɛ lóhrómɛn nɔn ali salé, thénthé ɔ́n mó hɔ́n yítɛ́ khúnbrɛn sé Yankan, ló hɔ́n pɛnsɔ́n ɔ́n ma gɛ lómánji nɔn ali ńmɛpɔ́bhá álephú.

²³ Átɛsalé ńne pɛnsɔ́n nɔn ali ákhú, lókhɛ́n Yankan yí abho phɔ néphan wɛ́-nwɛ́ nɔn ali ńmɛpɔ́bhá álephú lo khɔ lo Hwánthe Jezwi-Krisi phɔ gɛ.