RƆ́MƐN KHÚBHƐ́NƐ́N 5 - Ebrié New Testament 1996

Yankan thɛ́nkhwálé asé néphan

¹ Lóka khɛ́n mímíbhú hɛ́nthé wo tɛ lo priman, lo Hwánthe Jezwi-Krisi hɛ́n hrómɛn, lo le Yankan ɔ́nmɔn thethé, ápɛ thɛ́nkhwálé.

² Jezwi-Krisi lókɔn mɛ́n nɔn lo mímíbhú hɛ́nthé, ńdo lo ka Yankan phɔlíman hromɛn, áphɔlíman lókɔn lóhrómɛn nɔn thénthé lo gɛlé ya. Ló áphɔhá hrómɛn lo bho lo mwasrui tre Yankan tho salé lo bhá ká mɛ́n nguhá hrómɛn.

³ Saji lo elí phɔhá lo yíkhúphɔ hromɛn, lo yɛn salé áyíkhúphɔ chɛ́ lephan tɛ́ khékhremɛn,

⁴ ló khekhremɛn yítɛ́, áchɛ́ lephan gɛlé ya ásúwú hrómɛn, ló ásúwú hrómɛn ógɛlé ya áli yíbɛn áchɛ́ lephan bhó mɛ́n mwasrui tré Yankan tho.

⁵ Lo mwasrui lókɔn lo bho tre Yankan tho, abha lé chɛ́ áphɔ gbɔn lo, átɛsalé Yankan khɔ Nánnánmi Créncré phɔ bho mɛ́n pɔ́ ka lo thɛ́n hrómɛn, ló Nánnánmi Créncré lókɔn áli áyíbɛn Yankan bho se lo.

⁶ Lóka khɛ́n lo le pɛ sɛ́npɛ́ lo tɛ́ yíɛkɛ, ácí Yankan nbrɛn bho tre lóka ási, Krisi bha khu se lo nemán.

⁷ Oka wu lephan ábha dɛn khú sé lephan apriman, lótɛ khɛ́n kasé áli lephan bɛn atɛ́ yíbhwá, mɛ́n hɛ́nthé ógɛ khú yábhɛ nɛn.

⁸ Lókhɛ́n Yankan lie lo salé mɛ́n pɔ lo banban: lóhɛ́nthé lóka lo bha lo ne hrómɛn ntɔ́nyán, Krisi bha khu se lo.

⁹ Thénthé wo khɔ mɛ́n khú hrómɛn tɛ lo priman Yankan hɛ́nmɛn, lóhɛ́nthé ánman swa lo yɛn Yankan thɛ́nyan hromɛn.

¹⁰ Lócí lo li Yankan mɛsamán, lókhɛ́n thénthé mɛ́n Bhi khú hrómɛn, ńgɛ lo ɔ́nmɔn nrwɛn. Lóhɛ́nthé, lóka lo le Yankan ɔ́nmɔn onrwɛn, Krisi bho mɛ́n mɛpɔ́bhá swa lo.

¹¹ Lómánji, lo cu lo elí phɔhá Yankan hɛ́n hrómɛn, lo Hwánthe Jezwi-Krisi mɔ́ndɔ́nman hromɛn. Ló Jezwi-Krisi lókɔn, mɛ́n nɔn ńchɛ lo gɛ Yankan ɔ́nmɔn nrwɛn.

Ádan le Krisi ɔ́nmɔn

¹² Lephan míbrɛ phɔ nɔn ńne khɔ ka áthéji, lephan lókɔn, mɛ́n nɔn ńni Ádan, ló mɛ́n ne nɔn ado ákhú bha. Lóbhwe asranman bha nɔn ali salé ńne tápi lephan khúnbrɛn phɔ, átɛsalé lephan khúnbrɛn tɛ ne.

¹³ Ńne phrɛ bha áthéji lókhɛ́n Yankan bho ábidí se Moyízi, ló ási alepɛ ábidí, lóne óle tɔ ńne bhwe khékhremɛn.

¹⁴ Achan Ádan cí tho alo di Moyízi cí tho, ákhú tápi lephan khúnbrɛn phɔ, lóhɛ́nthé néphan khɛ́n ale khrɛ ábidí sa Ádan si akhɔ khrɛ Yankan bidí, néphan lókɔn, wo lɔ ákhú gɛ wo. Ádan lókɔn, ógɛ tɔlé mɛ́n le lephan abha mánji ebhá ɔ́nmɔn wo li brɛ.

¹⁵ Lókhɛ́n néphan mɔn lókɔn, wo le li brɛ, átɛsalé Yankan phɔlíman abho se lo, ábanbrɛn Ádan yíléle atɛ. Áli mímí salé Ádan míbrɛ ne atɛ hɛ́nthé, néphan búdúbúdú ekhú, lókhɛ́n Yankan phɔlíman abho se néphan, ábanbrɛn Ádan yíléle atɛ, lóyábhɛ brɛ Yankan yí asakhɔ lephan míbrɛ phɔ bho se néphan búdúbúdú wɛ́-nwɛ́, áyí lókɔn ásakhɔ Jezwi-Krisi míbrɛ phɔlíman hromɛn.

¹⁶ Lóhɛ́nthé, Yankan yí abho se néphan, le lephan míbrɛ ne atɛ, lóyí mɔ́nmɔn lókɔn ále librɛ. Lephan míbrɛ ne atɛ, lónɔn ado Yankan kwabhɔ́ bha se lephan khúnbrɛn, lóhɛ́nthé wo bhɔ lephan khúnbrɛn pɔn, lókhɛ́n Yankan phɔlíman abho se néphan lóka wo tɛ ne áthúbhɔ, lónɔn ali wo ne Yankan yɔphɔ wo.

¹⁷ Lephan míbrɛ ne hɛ́nthé nɔn ákhú khɔ lephan míbrɛ phɔ do si khúnbrɛn. Lóyábhɛ brɛ, Krisi míbrɛ phɔ, áyí lo gɛ áthúbhɔ, lónɔn ali sa: néphan khúnbrɛn agɛ Yankan phɔlíman, le áyí Yankan bho se wo wɛ́-nwɛ́, lóka mɛ́n nbrɛn ńtɛ wo priman mɛ́n hɛ́nmɛn, wo néphan khúnbrɛn lókɔn wo lɔ, wo bhá khɔ́ lephan míbrɛ phɔ gɛ ńmɛpɔ́bhá. Ló wo néphan lókɔn, wo mɛpɔ́bhá hromɛn, Krisi nbrɛn bha bhó áyí khúnbrɛn há wo mɔ́n mɛn.

¹⁸ Lósi yábhɛ brɛ khɛ́n lephan míbrɛ ne atɛ áchɛ wo bhɔ néphan khúnbrɛn pɔn, lóyábhɛ brɛ Jezwi-Krisi lókɔn ali lephan míbrɛ, mɛ́n mwá ńtɛ, áswa néphan khúnbrɛn yɛn ákwabhɔ́ hrómɛn, ló áse wo mɛpɔ́bhá.

¹⁹ Lósi yábhɛ brɛ khɛ́n lephan míbrɛ bhwe ale ji hɛ́nthé, néphan búdúbúdú khɔ lóphɔ jrɛn nemán, lóyábhɛ brɛ, wo bhá khɔ́ lephan míbrɛ bhwejí hrómɛn tɛ́ néphan búdúbúdú primán Yankan hɛ́nmɛn.

²⁰ Yankan bho ábidí se néphan, ochɛ́sé wo tɛ́ ne othúbhɔ. Lókhɛ́n lóka néphan ne ethúbhɔ, Yankan phɔlíman lɔ cu ebhɔ́tho.

²¹ Lócí, ńne sɛ́npɛ́ srɛn néphan khúnbrɛn, ló ńne do wo ka ákhú hrómɛn, lókhɛ́n thénthé, Yankan phɔlíman nɔn abha néphan khúnbrɛn phɔ, ló áphɔlíman lókɔn átɛ wo priman Yankan hɛ́nmɛn, ló wo gɛ ńmɛpɔ́bhá álephú, lo Hwánthe Jezwi-Krisi hɛ́n hrómɛn.