RƆ́MƐN KHÚBHƐ́NƐ́N 4 - Ebrié New Testament 1996

Ábrahámɛn si akhɔ li júmán

¹ Ló Ábrahámɛn lókɔn ali lo jisɛ, bí bhwe lo bhá tɔ mɛ́n phɔ? Ló ali ńnánmí hrómɛn, bí yábhɛ nɔn ńgɛ?

² Kasé elí mɛ́n júmánlí hrómɛn nɔn ńkhɔ ni lephan apríman, ló-ɛ ángɛ fúmɛ́n, lókhɛ́n lómɛ́nfú yábhɛ lókɔn ále gɛ ló Yankan hɛ́nmɛn.

³ Ló Yankan hrɔ́ étɔlé: “Ábrahámɛn bhu Yankan mímí, ló mɛ́n mímíbhú hɛ́nthé Yankan dɛn do-e sa lephan apriman.”

⁴ Lephan khɛ́n elí júmán, ángɛ mɛ́n júmán pɛnsɔ́n, lókhɛ́n ápɛnsɔ́n lókɔn áleli áyíbɛn wo bho se wɛ́-nwɛ́, lókhɛ́n áli áyíbɛn ńni júmán gɛ.

⁵ Ló lephan kasé ɛ́le lí júmán, lókhɛ́n ɛbho hɛ mímíbhú tre Yankan tho, hɛ mímíbhú hɛ́nthé, Yankan bha do hɛ sa lephan apriman. Ló kasé ɛbhú Yankan mímí, Yankan nɔn áhɔ́n newo jrɛn lephan bhwá.

⁶ Davi bhwe atɔ lónɔn ali lókɔn: mɛ́n nkɛé lephan Yankan dɛn do sa lephan apriman, lephan lókɔn áphɔhá gɛ, lókhɛ́n áleli mɛ́n júmánlí hrómɛn:

⁷ “Áphɔhá gɛ néphan Yankan yɔ wo yíléletɛ́ phɔ́ wo, áphɔhá gɛ néphan Yankan yɔ wo ne phɔ́ wo!

⁸ Áphɔhá gɛ lephan khɛ́n Hwánthe bha lé bhó mɛbhí tré mɛ́n ne tho!”

⁹ Áphɔhá lókɔn Davi étɔ lóphɔ bhwe, wú áli áyíbɛn ali néphan ajan khɛn brɛ yí? Néphan ale jan khɛn wú wo-ɛ áleli wo yí? Lókhɛ́n Yankan hrɔ́ étɔlé: “Ábrahámɛn bhu Yankan mímí ló mɛ́n mímíbhú hɛ́nthé, Yankan dɛn do-e sa lephan apriman”.

¹⁰ Lóka yábhɛ bɛn nɔn Yankan tɛ Ábrahámɛn priman mɛ́n mímíbhú hɛ́nthé? Wú lóka Ábrahámɛn jan khɛn, lée nka lóka ńka jan khɛn? Lóka yábhɛ lókɔn Ábrahámɛn ka jan khɛn, wo ho-e, lókhɛ́n ńka jan khɛn.

¹¹ Áyí khúnbrɛn lókɔn átɛ bha hɛn, lómánji khɛ́n Ábrahámɛn jan khɛn: ló mɛ́n khɛn lókɔn ńjan khɛ́n atɛsa áyí obho trɛ nkɛ tre ɔn, áli yíbɛn élie salé mɛ́n mímíbhú hɛ́nthé nɔn Yankan dɛn do-e sa lephan apriman, lómánji khɛ́n ńjan khɛn. Lóhɛ́nthé, néphan khúnbrɛn khɛ́n ale jan khɛn, lókhɛ́n abhu Yankan mímí, Ábrahámɛn nɔn ali wo the. Ló wo lókɔn, Yankan dɛn do wo sa néphan apriman.

¹² Lóyábhɛ brɛ, néphan ajan khɛn lɔ, Ábrahámɛn nɔn ali wo the, lóthé nɔn ali salé néphan ajan khɛn, lókhɛ́n acu etɛ́ yí khɔ́ mímíbhú hrómɛn sa lo The Ábrahámɛn yí si akhɔ tɛ, lóka ńka jan khɛn.

Yankan bhwe atɔtre, mímíbhú hrómɛn nɔn okhɔ́ gɛ lóyí

¹³ Yankan tɔtre salé mɛ́n man mó áthéji sé Ábrahámɛn le nkɛ jímiɔn. Ábhwe lókɔn Yankan tɔ, léli Ábrahámɛn bidí éji hɛ́nthé, lókhɛ́n mɛ́n mímíbhú ńpɛ, lóhɛ́nthé Yankan dɛn do-e sa lephan apriman.

¹⁴ Ló kasé Yankan bhwe atɔtre, anmó lóyí khúnbrɛn sé agbemán dɔnbrɛ khɛ́n éji ábidí, kasé áli nɛn, néphan mímíbhú apɛ se Yankan, áli áyí wrɛ́, ló Yankan bhwe atɔtre lólɔ, áli áyí wrɛ́.

¹⁵ Ábidí nɔn áchɛ́ Yankan do thɛ́nyan sé néphan, ló ási khɛ́n alepɛ ábidí, lóne álepɛ ábidí khrɛ.

¹⁶ Lóhɛ́nthé, Yankan yí atɔ lóbhwe tre salé mɛ́n man sé lo ɔn, ásakhɔ mímíbhú hrómɛn, áchɛ́se áyí lókɔn áli áyíbɛn Yankan bho se lo wɛ́-nwɛ́, áli Ábrahámɛn jímiɔn khúnbrɛn wo yí, ló áleli néphan éji ábidí wo dɔnbrɛ pán áli wo yí, lókhɛ́n néphan khúnbrɛn ebhú mímí sa Ábrahámɛn si akhɔ bhu mímí, wo lɔ áli wo yí. Átɛsalé Ábrahámɛn nɔn ali lo khúnbrɛn lo the,

¹⁷ lóhɛ́nthé Yankan hrɔ́ étɔlé: “Mɛn chɛ hɛ li aféchwe búdúbúdú wo the.” Yankan lókɔn khɛ́n Ábrahámɛn bhu mímí, nkɛ hɛ́nmɛn ńni lo the. Ló Yankan lókɔn khɛ́n echɛ́ mɔngumán chán khúnɔn mɛn fe ɔn, mɛ́n nɔn ńni lephan atɛ áyí khúnbrɛn khɛ́n wo ka tɛ.

¹⁸ Ábrahámɛn bhu mímí, ló ńmo mɛ́n mwasrui tre Yankan tho, ńsrui Yankan mwa lóka yábhɛ khɛ́n óle gɛ srui Yankan mwa, “lóhɛ́nthé ńni aféchwe búdúbúdú wo the”, sa lósi Yankan khɔ tɔ lóbhwe tre se nkɛ salé: “Hɛ mándonɛ́n si ábha khɔ́ thúbhɔ é.”

¹⁹ Lóka lókɔn Ábrahámɛn gɛ ńpá ya brɛ, lótɛ khɛ́n mɛ́n mímíbhú khúnbrɛn gɛlé tre Yankan tho, lóka anmú mwanhɛ́n nó mɛ́n phɔ nánmí tho, anwú mɛɛ́n nbrɛn sa lephan akhu chre, saji lóka anmú mwanhɛ́n nó Sara ali mɛ́n bhia tho, Sara lókɔn lósi adi ánnɛn gɛ cu hó yípɔ.

²⁰ Lótɛ khɛ́n Ábrahámɛn mímíbhú gɛlé tre Yankan tho, ló Yankan bhwe atɔtre, mɛ́n thɛ́n le sa lótho, mɛ́n mímíbhú se sɛ́npɛ́ ló ánnri Yankan hwa.

²¹ Ábrahámɛn bhu mímí mɛ́n thɛ́n hrómɛn salé ábhwe Yankan tɔtre, Yankan bha tɛ́ lóyí khúnbrɛn símɛ́n.

²² Lóhɛ́nthé mímíbhú hrómɛn nɔn “Yankan dɛn do Ábrahámɛn sa lephan apriman”.

²³ Ábhwe lókɔn wo tɔlé “Yankan dɛn do Ábrahámɛn sa lephan apriman,” áleli Ábrahámɛn míbrɛ hɛ́nthé nɔn wo lrɛ ábhwe lókɔn,

²⁴ lókhɛ́n lo khúnbrɛn hɛ́nthé, lo khúnbrɛn khɛ́n énɛn salé Yankan odɛn do lo sa néphan apriman. Lóyábhɛ brɛ, ábhwe lókɔn áli mímí se lo khúnbrɛn lo bhu Yankan mímí. Yankan lókɔn mɛ́n nɔn ńchɛ lo Hwánthe Jezwi chan khúnɔn mɛn fe.

²⁵ Lo ne hɛ́nthé nɔn wo wɛn lo Hwánthe Jezwi, ló ńchan ákhúnɔn mɛn fe salé antɛ́ lo priman Yankan hɛ́nmɛn.