RƆ́MƐN KHÚBHƐ́NƐ́N 3 - Ebrié New Testament 1996

¹ Bí yábhɛ Jwifunɛ́n gɛ brɛn néphan nankhɛ? Ébí nɔn ákhɛnján gɛ tɛ́ sé lephan ɛ?

² Lókhɛ́n kasé lo ewú, áyí Jwifunɛ́n gɛ, ábanban. Ló athwasi, Yankan bho mɛ́n bhwetɔ́ ha Jwifunɛ́n mɔ́n mɛn.

³ Ló kalósi akhɔ tɛ khɛ́n wo hromɛn néphan fe yɔ Yankan ka e? Wú wo phɔ wo khrɛ, ágɛ chɛ́ Yankan lɔ khrɛ phɔ yábhɛ nɛn?

⁴ Léliló! Lókhɛ́n kasé néphan khúnbrɛn li kpakprámán lɔ, Yankan-ɛ li bhwe mɛ́nbrɛwo ákakhúnbrɛn, lóhɛ́nthé Yankan hrɔ́ étɔlé: “Tɛmɛ ɛlí mɛ́nbrɛ hɛ bhwetɔ́ hrómɛn, tɛmɛ hɛ bhwe olíhɛ́n lóka wo bhá bhɔ́ hɛ kwa.”

⁵ Lókhɛ́n kasé áyíléle lókɔn lo etɛ́ élie néphan salé Yankan-ɛ etɛ́ yí yɔ́n, wú lo bhá tɔlé ánkhrɛ phɔ? Ló kasé lo yíléletɛ́ hɛ́nthé Yankan etɛ́ yí dri lo phɔ, wú lo bhá tɔlé antɛ́ yí yan? (Mɛɛ́n tɔ bhwe sa áthéjinɛ́n si ákhɔ́ tɔ bhwe a.)

⁶ Léliló! Kasé Yankan li lephan ákhrɛ phɔ, kalósi ánman gɛ khɔ́ mɔ́ áthéjinɛ́n khúnbrɛn kwa e?

⁷ Ló kasé mɛn kpakprá mɛn ní, echɛ́ Yankan nguhá thándi sé néphan wú, bítɛ khɛ́n wo bhá tɔlé mɛn ni newo?

⁸ Wú ógɛ tɔlé: “Tɛmɛ olo tɛ́ ne, ló áyíbhwá ochán lóhrómɛn thándi?” Mímí néphan fe bháne étɔ bhwe phromɛn phromɛn sé mɛn, ló wo echí bhwe há mɛn tho lée, mɛn nɔn mɛɛ́n tɔ bhwe yábhɛ lókɔn. Néphan lókɔn, áyɔn salé obhɔ́ wo kwa!

Álepɛ lephan brɛ apriman

⁹ Wú lo Jwifunɛ́n, lo nɔn lo yɔn brɛn néphan nánkhɛ khúnbrɛn? Léliló! Mɛn phrɛ kranman hɔ́n lée, Jwifunɛ́n le néphan aleli Jwifunɛ́n lɔ, wo khúnbrɛn lókɔn wo bha ńne hromɛn.

¹⁰ Lóhɛ́nthé Yankan hrɔ́ étɔlé: “Álepɛ lephan apriman, álepɛ lephan míbrɛ apriman,

¹¹ álepɛ lephan brɛ eyɛ́n bhwe, álepɛ lephan brɛ énɛn Yankan.

¹² Wo chan Yankan phɔ wa féne, wo khúnbrɛn wo bha ábuliá hrómɛn. Álepɛ lephan etɛ́ yíbhwá, álepɛ lephan míbrɛ etɛ́ yíbhwá.

¹³ Wo mɛ́n tɛsa álínɔn ahaphá tre, wo bho wo lɛ́ pɛ wo ékhrɛ néphan, wo bhwetɔ́ echán wo míthé thándi áli áyíbɛn ágɛ wɛ́n lephan,

¹⁴ wo bho wo mɛ́n pɛ wo ephiámɔ́n sé néphan abhúrɛ mɛn ákakhúnbrɛn.

¹⁵ Wo, ále mɔ́n khɛ́n wo wɛ́n lephan,

¹⁶ wo si khúnbrɛn wo sakhɔ́, áyí khúnbrɛn lɔ phú, ló áphɔgbɔ́n tɛɛ nɔn néphan gɛ,

¹⁷ wo le yɛn ńthɛ́nkhwálé sitó.

¹⁸ Wo le só Yankan.”

¹⁹ Thénthé lo yɛn salé ábhwe khúnbrɛn abha ábidí hrómɛn, áli ábhwe wo tɔ se néphan abha ábidí hrómɛn, ochɛ́sé néphan olé gɛ tɔlé wo yí wo tɛ, wo le wu lóbrɛ. Ló ábhwe lókɔn élie salé Yankan bha bhɔ́ áthéjinɛ́n khúnbrɛn kwa.

²⁰ Átɛsalé áyí ábidí énɛn salé lo tɛ́, léli lónɔn ábha chɛ́ lephan brɛ lí lephan apriman Yankan hɛ́nmɛn. Lókhɛ́n áyí brɛ ábidí gɛ tɛ́ nɔn ali salé, anchɛ́ lephan yɛ́n mɛ́n ne ńtɛ.

Yankan tɛ lo priman mímíbhú hrómɛn

²¹ Lókhɛ́n thénthé, Yankan mɛ́n nbrɛn ńnie lo lósi yábhɛ ankhɔ́ tɛ́ néphan priman, lókhɛ́n áleli ábidí lo éji hɛ́nthé. Lóhɛ́nthé ábidí le bhwetɔ́trémán ɔ́nmɔn phrɛ tɔlé:

²² Yankan tɛ́ néphan priman Jezwi-Krisi wo bhu mímí hɛ́nthé. Néphan khúnbrɛn khɛ́n abhu Krisi mímí, Yankan tɛ wo priman, átɛsalé wo hromɛn álepɛ lephan brɛ aká njɛ:

²³ néphan khúnbrɛn tɛ ne, ló wo chan Yankan nguhá hrómɛn thandi.

²⁴ Lókhɛ́n Yankan khɔ mɛ́n phɔlíman hromɛn tɛ néphan priman wɛ́-nwɛ́ mɛ́n hɛ́nmɛn, ló Jezwi hɛ́n hrómɛn nɔn wo khɔ wo éswa wo.

^25-26 Yankan hɔn Jezwi ha npha, ochɛ́sé wo mímíbhú hrómɛn, néphan okhɔ́ mɛ́n khú phɔ gɛ wo ne yɔ́phɔ́. Ló nɛn lósi yábhɛ Yankan khɔ lie néphan salé mɛ́n ni lephan apriman o: lócí ńnɔn thɛ́n chre, ló ńnɛn mo mɛbhí tre néphan ne etɛ́ tho. Lókhɛ́n thénthé, néphan ne etɛ́, ńhɔn lóbhwe pɛ kpɛ́ɛ́n, ochɛ́sé néphan oyɛ́n salé ńni lephan apriman. Lósi ńkhɔ ánnie néphan salé ńni lephan apriman nɔn ali salé, kasé lephan ɛbhu Jezwi mímí, ánman tɛ́ hɛ priman.

²⁷ Wú áyɔn salé ofúmɛ́n? Áleyɔn sa ofúmɛ́n! Ló bí hɛ́nthé lo bhá fúmɛ́n ɛ? Wú lo bidí lo éji hɛ́nthé? Léliló, lókhɛ́n lo mímí lo ebhú hɛ́nthé.

²⁸ Lóhɛ́nthé lo gɛ tɔlé, mímíbhú míbrɛ hromɛn nɔn Yankan khɔ́ tɛ́ lephan priman, lókhɛ́n áleli néphan bidí éji hɛ́nthé.

²⁹ Wú Yankan li Jwifunɛ́n míbrɛ Yankan? Wú néphan aleli Jwifunɛ́n, wo-ɛ léli wo Yankan? Mímí nbrɛn, néphan aleli Jwifunɛ́n, wo lɔ ńni wo Yankan,

³⁰ Yankan míbrɛ nɔn abháne, ló mɛ́n míbrɛ nɔn ánman tɛ́ Jwifunɛ́n priman wo mímíbhú hrómɛn, saji néphan aleli Jwifunɛ́n lɔ, ánman tɛ́ wo priman wo mímíbhú hrómɛn.

³¹ Wú mímíbhú hɛ́nthé lo bhá tɔlé ábidí lé pɛ bhwe? Léliló! Lo bha le hɔ́n ábidí bhɔ́, lókhɛ́n lo bhá hɔ́n ábidí pɛ kpɛ́ɛ́n.