RƆ́MƐN KHÚBHƐ́NƐ́N 2 - Ebrié New Testament 1996

Yankan bha bhɔ́ néphan khúnbrɛn kwa

¹ Hɛ lókɔn khɛ́n ɛbhɔ́ néphan kwa, kasé lephan khóo le hɛ lɔ, wo bha lé yɔ́ bhwe phɔ́ hɛ. Kasé ɛbhɔ́ néphan nankhɛ kwa, lókhɛ́n hɛ lɔ ɛtɛ́ wo yí yábhɛ brɛ wo etɛ́, átɛsalé ɛphrɛ bhɔ hɛ nbrɛn pɔn.

² Lo yɛn salé Yankan bhɔ́ kwa mímí sé néphan etɛ́ áyí yábhɛ lókɔn.

³ Mɛn hɔnsɛ́n, wú ɛbhú salé ɛ́bha chán Yankan kwabhɔ́ hromɛn féne, lóka ɛbhɔ́ néphan etɛ́ áyíléle kwa, lókhɛ́n hɛ nbrɛn lɔ ɛcu ɛtɛ́ lóyí yábhɛ brɛ?

⁴ Lókhɛ́n Yankan, mɛ́n yɔ́n ńyɔn se hɛ, ɛ́le ha lóphɔ bhwa, lónɔn ali mɛ́n thɛ́nnɔ́n, mɛ́n thɛ́nbhwá ńpɛ se hɛ. Tɛmɛ ɛyɛ́n salé kasé Yankan yɔn se hɛ, ánnɛn salé ɛjrɛn hɛ yítɛ́.

⁵ Lókhɛ́n ɛli lephan bɛn hɛ thɛ́n khɔnman, ɛle pɔ salé ɛjrɛn hɛ yítɛ́. Lóhɛ́nthé, ácí ábha lí Yankan thɛ́nyan cí, le Yankan kwabhɔ́ cí, wo bhá tɛ́ yí dri hɛ phɔ,

⁶ lócí lókɔn lephan brɛ, hɛ júmán si ɛkhɔ li, Yankan bha khɔ́ lóne sɔ́n hɛ pɛn.

⁷ Néphan khɛ́n etɛ́ khékhremɛn tɛ́ yíbhwá, lókhɛ́n énɛn nguhá, énɛn hɛ́nbhwá le ńmɛpɔ́bhá ábha tré godo, néphan lókɔn Yankan bha sé wo ńmɛpɔ́bhá álephú.

⁸ Lókhɛ́n Yankan bha do thɛ́nyan, ánman ní hɛ́nmɛnle sé néphan agɛ ɔ́nmɔn éswan, néphan ale dɛn ji ábhwe mímí, néphan elí gɔngɔnsá.

⁹ Lóka lókɔn ábha lí áyíkhúphɔ le ábhwephé ɔ́nmɔn sé néphan etɛ́ yíléle, wo hromɛn Jwifunɛ́n bha thwási, lómánji ábha sé néphan aleli Jwifunɛ́n.

¹⁰ Lókhɛ́n Yankan bha bhó nguhá, lephan jí, le ńthɛ́nkhwálé sé néphan khúnbrɛn etɛ́ yíbhwá, wo hromɛn Jwifunɛ́n bha thwási, lómánji ábha sé néphan aleli Jwifunɛ́n,

¹¹ átɛsalé Yankan le bhɔ́ ńmɛsó kwa.

¹² Néphan khúnbrɛn ale yɛn Moyízi bidí lókhɛ́n etɛ́ ne, wo bha lé khú Moyízi bidí hrómɛn, lókhɛ́n néphan ayɛn Moyízi bidí lókhɛ́n etɛ́ ne, wo lókɔn ábidí nɔn ábha bhɔ́ wo kwa.

¹³ Átɛsalé áleli ábidí wo ekán sé néphan yé, lónɔn ábha chɛ́ wo primán Yankan hɛ́nmɛn, lókhɛ́n kasé ábidí bhwe étɔ, wo etɛ́ lóyí, lónɔn wo bhá primán Yankan hɛ́nmɛn.

¹⁴ Kasé néphan aleli Jwifunɛ́n, lókhɛ́n ábidí bhwe étɔ wo etɛ́ lóyí, kasé wo le yɛn Moyízi bidí lɔ, wo bɛn nbrɛn wo pɛ ábidí bɛn bha wo thɛ́n hrómɛn.

¹⁵ Wo yítɛ́ élie salé ábidí bhwe étɔ, wo lrɛ ábha wo thɛ́n hrómɛn, átɛsalé ákáfe wo nánnánmi lɔ kranmán wo lée wo bhwe le yɔn, lókhɛ́n ákáfe ánkranmán wo lée wo bhwe yɔn.

¹⁶ Lócí lókɔn khɛ́n Yankan bha bhɔ́ kwa, lókhɛ́n ábhwe khúnbrɛn ahrɔman tre néphan thɛ́n hrómɛn, ánman khɔ́ Jezwi-Krisi phɔ mɔ́ lókwa, lócí lókɔn lóyí ebhá tɛ́ lónɔn ali lókɔn. Lóbhwe brɛ nɔn ali Ábhwe Bhwábhwá lókɔn mɛɛ́n tɔ sé hɔ́n yé.

Jwifunɛ́n le wo bidí

¹⁷ Lókhɛ́n hɛ lókɔn wo éche hɛ Jwifu lephan, ɛli lephan bɛn agɛlé ya ábidí tho, ló ɛfúmɛ́n lée ɛli Yankan lephan,

¹⁸ ɛyɛn lóyí Yankan énɛn sa ɛtɛ́, ábidí chɛ hɛ yɛn áyí ayɔn,

¹⁹ ló ɛbhú salé hɛ nɔn ɛli lephan éyalí mɛphumán, ɛbhú salé hɛ nɔn ɛli áyéfí se néphan abha dubhlékhu hromɛn,

²⁰ ɛbhú mímí salé ábidí lókɔn ɛgɛ hɛ́nthé, ɛyɛn bhwe khúnbrɛn phu, ló ɛyɛn ábhwe mímí khúnbrɛn phu.

²¹ Gbɛnɛn wu a! hɛ nɔn ɛ́lie néphan nankhɛ bhwe, ló bítɛ khɛ́n ɛ́le lie hɛ nbrɛn bhwe ɛ? Hɛ nkɛé olé si sído, lókhɛ́n ɛsaya ɛ́si sído.

²² Hɛ nkɛé olé che bhie, lókhɛ́n ɛsaya ɛ́che mie. Hɛ, ɛle pɔ ńmo, lókhɛ́n ɛká ńmo khúthé si sído.

²³ Ɛfúmɛ́n sé néphan yé lée ɛyɛn Yankan bidí, lókhɛ́n hɛ bidí ɛkhrɛ hɛ́nthé, ɛchɛ́ hɛ́ndɛ ká Yankan mɛ!

²⁴ Yankan hrɔ́ étɔlé: “Hɔ́n Jwifunɛ́n hɛ́nthé, néphan aleli Jwifunɛ́n étɔ bhwe phromɛn phromɛn sé Yankan.”

²⁵ Kasé ɛ́ji ábidí lókhɛ́n ɛjan khɛn, hɛ khɛn ɛjan ápɛ thé. Lókhɛ́n kasé ɛ́le ji ábidí, ɛtɛsa lephan ale jan khɛn.

²⁶ Ló lephan ale jan khɛn, kasé ánji Yankan bidí, wú Yankan bha lé dɛn do-e sa lephan wo jan khɛn?

²⁷ Lóyábhɛ brɛ, hɔ́n Jwifunɛ́n, mímí nbrɛn ɔ́n pɛ ábidí hrɔ́, saji wo jan hɔ́n khɛn lɔ, lókhɛ́n hɔ́n bidí hɔ́n ékhrɛ hɛ́nthé, cíbɛn néphan aleli Jwifunɛ́n bha bhɔ́ hɔ́n pɔn.

²⁸ Ló abɛn nɔn ali Jwifu lephan mímí wo jan khɛn? Áleli Jwifu lephan khɛ́n wo ewú ńnánmí mɛn, saji áleli Jwifu lephan khɛ́n wo jan khɛn ńnánmí mɛn.

²⁹ Átɛsalé Jwifu lephan olí, ábha ńthɛ́n hrómɛn, áleli ńnánmí hrómɛn, lónɔn ali lephan ajan khɛn mɛ́n thɛ́n hrómɛn. Lephan lókɔn mɛ́n nɔn ńni Jwifu lephan Yankan Nánnánmi hromɛn, ló áleli ábhwe wo lrɛ abha ábidí hrɔ́ hrómɛn. Lephan ali Jwifu lephan mímí, Yankan nɔn élri hwa, áleli lephanmi.