RƆ́MƐN KHÚBHƐ́NƐ́N 16 - Ebrié New Testament 1996

Phɔ́lu ébhi Yankan-gbemán abha Rɔ́mɛn khúbhɛ́

¹ Lephan lókɔn ebhá, mɛ́n hɛ́n li Fobe, ńni lo hɔnmia bɛn abha Sankhre Yankan-gbemán hrómɛn elí júmán, tɛmɛ ɔ́n do-e mwámwá.

² Lo Hwánthe hɛ́n hrómɛn, tɛmɛ ɔ́n do-e mwámwá sa Yankan-gbemán si ákhɔ́ tɛ́ yí, ló áyí khúnbrɛn ánmi hɔ́n, tɛmɛ ɔ́n tɛ́ se. Fobe lókɔn, mɛ́n nbrɛn lɔ ńni lephan aphrɛ dɔnman néphan búdúbúdú mɔ́n, mɛɛ́n nbrɛn lɔ, ńdɔnman mɛn mɔ́n.

³ Mɛɛ́n mi Prisila le Akhilási, néphan lókɔn, wo li néphan bɛn wo gɛ mɛn ɔ́nmɔn li júmán se Jezwi-Krisi.

⁴ Mɛn hɛ́nthé wo lo wo khú, ló léli mɛn míbrɛ pán mɛn ná wo nansi, lókhɛ́n Yankan-gbemán khúnbrɛn abha néphan aleli Jwifunɛ́n gotho, wo lɔ wo elá nkɔn nansi.

⁵ Mɛɛ́n mi ápasá khúnbrɛn khɛ́n ábhurɛhɛ́n wo bháthó. Mɛɛ́n mi mɛn jɔ Ephaenɛ́thi. Azi gotho, mɛ́n nɔn ńni lephan alili bhu Krisi mímí.

⁶ Mɛɛ́n mi Mari, ńni bhie bɛn ali júmán búdúbúdú se hɔ́n.

⁷ Mɛɛ́n mi Andronikusi le Juniasi ali lo khúbhɛ́nɛ́n. Néphan lókɔn, mɛn le wo ɔ́nmɔn, lócí wo grɛ ka lo khúthé. Wo li néphan bɛn Krisi-mranchɛ́mán khúnbrɛn yɛn, ló wo phrɛ bhu Krisi mímí khɛ́n áse mɛn.

⁸ Mɛɛ́n mi Anpliathusi, ali mɛn jɔ lo Hwánthe hɛ́n hrómɛn.

⁹ Mɛɛ́n mi Urbɛn ali lephan lo le mɛ́n ɔ́nmɔn lo elí júmán sé Krisi, le mɛn jɔ Istakhisi.

¹⁰ Mɛɛ́n mi Apelɛsi ali lephan bɛn abho mɛ́n mímíbhú khúnbrɛn tre Krisi tho. Mɛɛ́n mi Aristobulu hwannɛ́n.

¹¹ Mɛɛ́n mi Erodiɔn ali lo khúbhɛ́ lephan le krethiɛnmán ali lo hɔnsɛ́nhɔn abha Nasisi bháthó.

¹² Mɛɛ́n mi Trifɛnɛn le Trifozu ali néphan elí júmán sé lo Hwánthe. Mɛɛ́n mi mɛn jɔ Prɛsidi khɛ́n mɛ́n lɔ ali júmán búdúbúdú se lo Hwánthe.

¹³ Mɛɛ́n mi Rufusi ali lo Hwánthe júmánwo khóo bɛn, le mɛ́n man abho mɛn tɛsa mɛ́n bhi.

¹⁴ Mɛɛ́n mi Asɛnkrithi, Flegɔn, Ɛrmɛsi, Patrobasi, Ɛrmasi le krethiɛnmán khúnbrɛn abha wo phɔ.

¹⁵ Mɛɛ́n mi Flegɔn le Juli, mɛɛ́n mi Nere le mɛ́n hɔnmia, mɛɛ́n mi Olɛnpasi le Yankan-gbemán khúnbrɛn abha wo phɔ.

¹⁶ Tɛmɛ ɔ́n mɔ́ hɔ́n bɛn nbrɛn yí, ló ɔ́n dɔn mɛ́n áphɔpɔ́li hromɛn. Krisi-gbemán khúnbrɛn abha krɛn ébhi hɔ́n.

Ábhwetɔ́ aphuji

¹⁷ Mɛn hɔnsɛ́nhɔn, mɛɛ́n na hɔ́n, tɛmɛ ɔ́n hámwanhɛ́n néphan lókɔn phɔ; néphan lókɔn khɛ́n etɛ́ ágbo ká hɔ́n thethé, néphan lókɔn khɛ́n élɔ hɔ́n mímíbhú, wo khɛ́n ábhwe lókɔn lo lie hɔ́n, wo ekhɔ́ lómánji, néphan yábhɛ lókɔn, tɛmɛ ɔ́n chán wo phɔ féne.

¹⁸ Néphan yábhɛ lókɔn léli lo Hwánthe Krisi júmán wo elí, lókhɛ́n wo bɛn nbrɛn lábhɛ nɔn wo ethɔ́n! Wo bho wo mɛ́n bhwábhwá le wo bhwetɔ́ khóo pɛ wo ékhrɛ néphan ále wú bhwe brɛ.

¹⁹ Néphan khúnbrɛn yɛn salé ɔ́n gɛlé ya lo Hwánthe bhwetɔ́ tho, ló hɔ́n hɛ́nthé áphɔ ehá mɛn. Lókhɛ́n áyíbhwátɛ́ hrómɛn, mɛɛ́n nɛn salé ɔ́n pɛ ábhweyɛ́n, ló áyíléletɛ́ hrómɛn, tɛmɛ ɔ́n ní néphan bɛn hɔ́n phɔ ochán.

²⁰ Ákhakpɛɛ́, Yankan apɛ ńthɛ́nkhwálé, mɛ́n nbrɛn ánman nó hɔ́n ntathé hɔ́n Abhɔsɛ́mɔ́n sɛ́n wɛ́n. Tɛmɛ lo Hwánthe Jezwi osé hɔ́n áphɔlíman!

²¹ Thimote ébhi hɔ́n, ńni mɛn júmán hrómɛn lephan. Lukusi, Jasɔn le Sosipatɛ ali lo khúbhɛ́nɛ́n lɔ ébhi hɔ́n.

²² Mɛn Tɛtiúsi khɛ́n mɛn nrɛ áhrɔ́ lókɔn, mɛn lɔ mɛɛ́n mi hɔ́n lo Hwánthe hɛ́n hrómɛn.

²³ Gaúsi ébhi hɔ́n, mɛ́n hwan nɔn mɛn nɛ, ló mɛ́n bháthó nɔn ápasá bhurɛhɛ́n, Erasithi ébhi hɔ́n, ńni lephan atré ápasá jɛtɛn lé, saji lo hɔnsɛ́n Kathúsi lɔ ébhi hɔ́n. [

²⁴ Tɛmɛ lo Hwánthe Jezwi-Krisi phɔlíman obhá hɔ́n khúnbrɛn phɔ. Amɛn.]

Tɛmɛ obhó nguhá sé Yankan

²⁵ Tɛmɛ obhó nguhá sé Yankan. Yankan li lephan bɛn ágɛ chɛ́ hɔ́n gɛlé ya hɔ́n mímíbhú hrómɛn, lóbhwe nɔn ali Jezwi-Krisi phɔ Bhwe Bhwábhwá lókɔn mɛɛ́n tɔ sé hɔ́n yé ákakhúnbrɛn. Saji lóbhwe brɛ tɛɛ nɔn ali ábhwe lókɔn achan godo-áan hrɔ́man tre, lókhɛ́n Yankan hɔn phwan se mɛn wu.

²⁶ Lókhɛ́n thénthé ábhwe mímí lókɔn mɛɛ́n tɔ, bhwetɔ́trémán phrɛ hɔn phwan thandi, ló wo lrɛ ha hrɔ́ mɛn tre. Ábhwe mímí lókɔn, Yankan khɛ́n ali lephan atre godo, ńse mɔ́nsi salé wo tɔ lóbhwe sé aféchwe khúnbrɛn oyé, ochɛ́sé néphan khúnbrɛn obhú Yankan mímí, ló wo jí nkɛ.

²⁷ Tɛmɛ Jezwi-Krisi hɛ́n hrómɛn, ńguhá ogɛ Yankan ákakhúnbrɛn, mɛ́n míbrɛ nɔn ńni lephan ayɛn bhwe khúnbrɛn phu! Amɛn.