RƆ́MƐN KHÚBHƐ́NƐ́N 15 - Ebrié New Testament 1996

Tɛmɛ ɔ́n pɔlí phɔ

¹ Lo khúnbrɛn khɛ́n lo mímíbhú gɛlé, néphan khɛ́n wo mímíbhú enán, áyɔn salé lo dɔnmán wo mɔ́n. Áleyɔn sa lo lú lo míbrɛ hɛ́nthé tɛ́ yí.

² Lókhɛ́n áyɔn salé lo lú lo jɔn lɔ hɛ́nthé tɛ́ yí, ló lo tɛ́ áyíbhwá sé wo, ochɛ́sé wo gɛlé ya mímíbhú hrómɛn.

³ Átɛsalé Krisi le lu mɛɛ́n nbrɛn hɛ́nthé tɛ yí. Lókhɛ́n sa lósi Yankan hrɔ́ khɔ étɔ a: “Ábhwe phromɛn phromɛn wo bhá tɔ sé hɔ́n, wo saya bho tɔ se mɛn.”

⁴ Áyí khúnbrɛn lócí wo lrɛ abha Yankan hrɔ́ hrómɛn, wo lrɛ tre salé wo bhó lie lo bhwe, ochɛ́sé ńthɛ́nnɔ́n le ńthɛ́nkhwálé lókɔn ali áyí Yankan hrɔ́ bho esé lo, lo khɔ́ lóphɔ bhó lo mwasrui tré Yankan tho.

⁵ Ló tɛmɛ Yankan apɛ thɛ́nnɔ́n le ńthɛ́nkhwálé, osé hɔ́n áphɔpɔ́li nánnánmi bhá hɔ́n nbrɛn thethé, ló hɔ́n yítɛ́ osakhɔ́ Jezwi-Krisi sitó,

⁶ ochɛ́sé hɔ́n khúnbrɛn ɔ́n mó átɔ́ míbrɛ lúkhwɛ́ lri Yankan hwa, Yankan lókɔn khɛ́n ali lo Hwánthe Jezwi-Krisi mɛ́n The.

Wo tɔ Ábhwe Bhwábhwá se lephan khúnbrɛn ye

⁷ Tɛmɛ ɔ́n do hɔ́n jɔn ńthɛ́nbhwá mɛn, sa lósi Krisi khɔ do hɔ́n, ló ochɛ́sé néphan okhɔ́ lóphɔ bhó ńguhá sé Yankan.

⁸ Lóhɛ́nthé mɛɛ́n kranmán hɔ́n salé Krisi elí júmán sé Jwifunɛ́n, ochɛ́sé néphan oyɛ́n salé Yankan li lephan alí mɛ́nbrɛ. Átɛsalé ábhwe ńphrɛ tɔ se lo jisɛmánhɔn, ńtɛ lóyí khúnbrɛn sé wo.

⁹ Saji Krisi bha áthéji salé anchɛ́ néphan aleli Jwifunɛ́n, obhó nguhá sé Yankan. Átɛsalé wo lɔ wo li néphan Yankan wu nfɛkhu, sa lósi Yankan hrɔ́ khɔ étɔ a: “Lóhɛ́nthé mɛn mán nri hɛ hwa néphan aleli Jwifunɛ́n hrómɛn, ló mɛn mán khó nánmɛ che hɛ.”

¹⁰ Ló Yankan hrɔ́ cu étɔ sa: “Néphan aleli Jwifunɛ́n, tɛmɛ ɔ́n gɛ Yankan hwannɛ́n ɔ́nmɔn lí phɔhá!”

¹¹ Saji Yankan hrɔ́ étɔ sa: “Néphan aleli Jwifunɛ́n, hɔ́n khúnbrɛn tɛmɛ ɔ́n nri Hwánthe hwa, ló tɛmɛ ákhúbhɛ́nɛ́n khúnbrɛn olri Hwánthe hwa!”

¹² Ló Ezayi cu étɔ sa: “Lephan bɛn óche Jese, mɛ́n jibhi bɛn bha thándi; ánman chánfe, ánman pɛ néphan aleli Jwifunɛ́n, ló wo bhá bhó wo mwasrui tré mɛ́n tho.”

¹³ Yankan apɛ mwasrui asé néphan, hɔ́n mímí ɔ́n mui hɛ́nthé, tɛmɛ ansé hɔ́n áphɔhá le ńthɛ́nkhwálé osí hɔ́n thɛ́n hrómɛn, ló Nánnánmi Créncré sɛ́npɛ́ hrómɛn, tɛmɛ ɔ́n mó hɔ́n mwasrui khúnbrɛn tré Yankan tho.

Ábhwe hɛ́nthé khɛ́n Phɔ́lu tɛ áhrɔ́ lókɔn

¹⁴ Mɛn hɔnsɛ́nhɔn, mɛɛ́n nbrɛn lɔ mɛn yɛn salé ɔ́n ni néphan bɛn ɔ́n pɛ ńthɛ́nbhwá, ló hɔ́n yí ɔ́n ma tɛ́, ɔ́n yɛn lókhúnbrɛn phu, saji ɔ́n ni néphan bɛn ɔ́n gɛ ha hɔ́n bɛn nbrɛn.

¹⁵ Lókhɛ́n áhrɔ́ lókɔn hromɛn, ásife mɛn tɔ bhwe mɛn nɛn so mɛ́nkhú, lókhɛ́n ábhwe lókɔn thénthé mɛn mán tɔ, áli ábhwe pán mɛn tɛ́ di hɔ́n mwanhɛ́n. Áphɔlíman lókɔn Yankan se mɛn,

¹⁶ lónɔn achɛ mɛn ni Jezwi-Krisi nɛnkhwɛ́nwo néphan aleli Jwifunɛ́n hrómɛn. Mɛn ní júmán sa yankanláwo lóka mɛɛ́n tɔ Yankan Bhwe Bhwábhwá lókɔn sé néphan yé, ochɛ́sé néphan aleli Jwifunɛ́n lɔ olí áyíbɛn obho ha npha se Yankan, Yankan dɛn do, ló wo lí áyíbhwá bɛn Nánnánmi Créncré bhó se Yankan.

¹⁷ Jezwi-Krisi phɔ mɛn ma hɛ́nthé, mɛn júmán mɛn ní sé Yankan, ágɛ lí áphɔhá sé mɛn.

¹⁸ Mɛn bhwe tɛɛ mɛɛ́n gɛ tɔ nɔn ali salé, Krisi khɔ mɛn phɔ chɛ néphan aleli Jwifunɛ́n éji Yankan: ńkhɔ mɛ́n bhwetɔ́ hrómɛn le mɛ́n júmánlí hrómɛn,

¹⁹ ńkhɔ hɛ́nmɛntányí le áphɔgóyí hrómɛn, ńkhɔ Yankan Nánnánmi sɛ́npɛ́ hrómɛn tɛ. Ló ási khúnbrɛn mɛn khali khɔ, achan Jeruzalɛ́mɛn le ákhúbhɛ́ khúnbrɛn agbali lóne, alo di Iliri gotho, mɛn tɔ Krisi Bhwe Bhwábhwá pi si khúnbrɛn.

²⁰ Ló mɛn bhwe mɛn hamwanhɛ́n tre nɔn ali salé, ási khúnbrɛn khɛ́n wo ka ye Krisi phɔ bhwe, mɛn nó lóne, ló mɛn tɔ Ábhwe Bhwábhwá lókɔn sé néphan khúnbrɛn oyé, ochɛ́sé mɛn nɛn ní lephan bɛn ásakhɔ́ néphan nánkhɛ nta tho lí júmán,

²¹ sa lósi Yankan hrɔ́ khɔ étɔ a: “Néphan aka ye Krisi phɔ bhwe, wo bhá wú nkɛ, ló néphan khɛ́n aka ye ábhwe lókɔn, wo bhá yé lóthé.”

Phɔ́lu énɛn oló Rɔ́mɛn khúbhɛ́

²² Ńmɔ́nsitú nɔn ale dɛn mɛn di hɔ́n ntakhú ahɛn kanɛn.

²³ Lókhɛ́n thénthé lósi adi, mɛn júmán phu krɛn gotho. Mɛn phrɛ tɔ hɔ́n wú bhwe ámɔn,

²⁴ lóhɛ́nthé mɛɛ́n nɛn salé lóka mɛn mán nó Ɛsiphayɛn gotho, mɛn wú hɔ́n lókhɛ́n mɛn no. Lókhɛ́n mɛɛ́n nɛn salé lóka mɛn mán nó Ɛsiphayɛn gotho, lónɔn mɛn mán sakhɔ́ hɔ́n yéne wú hɔ́n kábrɛ, ló ɔ́n ma dɔnmán mɛn mɔ́n lóka mɛn nó lóne. Lóka lókɔn mɛn mán gɛ hɔ́n ɔ́nmɔn chré kpɛ́bɛn lókhɛ́n man nó lóne.

²⁵ Lókhɛ́n thénthé mɛn nó Jeruzalɛ́mɛn. Mɛn mo mɔ́ndɔ́nman bhri bɛn mɛɛ́n no sé Yankan-gbemán abha lóne.

²⁶ Átɛsalé krethiɛnmán abha Masedwánɛn gotho le Grɛ́si khúbhɛ́nɛ́n gotho, wo thɛ́nbhwá hrómɛn, wo ébrɛn nɔn wo dɛn salé wo bhá bɔn yí lo sé gbremán abha Jeruzalɛ́mɛn krethiɛnmán hrómɛn.

²⁷ Ábhwe lókɔn áchan wo nbrɛn thɛ́n hrómɛn. Lókhɛ́n kasé lo ewú lóhrómɛn, wo lɔ áyɔn salé wo bhó wo mɔ́ndɔ́nman yí sé gbremán lókɔn. Átɛsalé Jwifunɛ́n, wo ndubhɔ́ wo gɛ nánnánmi hromɛn, wo phrɛ bho lwa se néphan aleli Jwifunɛ́n, lóhɛ́nthé áyɔn salé néphan aleli Jwifunɛ́n, wo lɔ wo ndubhɔ́ wo gɛ ńnánmí hrómɛn, wo bhó dɔnmán Jwifunɛ́n krethiɛnmán mɔ́n.

²⁸ Ábhwe lókɔn abha mɛn mɔ́n mɛn, lóka mán tɛ́ lóyí phú, lónɔn ali salé áyí khɛ́n wo ébɔn, lóka mɛn mo lójɛtɛn no se gbremán, lómánji man nó Ɛsiphayɛn gotho, ló lóka mɛn nó lóne, lónɔn mán sakhɔ́ hɔ́n yé wú hɔ́n.

²⁹ Mɛn yɛn salé lóka mɛn mán má hɔ́n yéne, Krisi ndubhɔ́ khɛ́n mɛn mán sranman, lókhúnbrɛn bha símɛ́n.

³⁰ Mɛn hɔnsɛ́nhɔn, mɛɛ́n na hɔ́n, lo Hwánthe Jezwi-Krisi hɛ́n hrómɛn le ápɔ́ achan Nánnánmi hromɛn, tɛmɛ ɔ́n ma ká mɛn phɔ ɔ́n na Yankan sé mɛn.

³¹ Tɛmɛ ɔ́n na Yankan sé mɛn, ochɛ́sé néphan abha Jude gotho khɛ́n alepɛ mímíbhú, wo mɔ́n olé galí mɛn, ló ńmɔ́ndɔ́nman lókɔn mɛn mo mɛɛ́n nó Jeruzalɛ́mɛn, krethiɛnmán abha lóne wo dɛn do lóyí lókɔn mwámwá.

³² Kasé Yankan dɛn, mɛn mán di hɔ́n ntakhú áphɔhá mɛn, ló mɛn mán chré hɔ́n yéne fikhwá kpɛ́bɛn.

³³ Tɛmɛ Yankan apɛ ńthɛ́nkhwálé ogɛ hɔ́n khúnbrɛn ɔ́nmɔn chré. Amɛn