RƆ́MƐN KHÚBHƐ́NƐ́N 14 - Ebrié New Testament 1996

Ɛle bhɔ́ hɛ hɔnsɛ́n kwa

¹ Lephan khɛ́n mɛ́n mímíbhú le thubhɔ, tɛmɛ ɔ́n do-e ká phɔ, ló ɔ́n ne fɛn mɛ́n phɔ bhwe sé néphan.

² Mɛn mán thwelí bhwe bɛn sé hɔ́n, lephan bɛn bha bhú salé mɛ́n gɛ ní nɛn yábhɛ yábhɛ khúnbrɛn, lókhɛ́n lephan mɛ́n mímíbhú le thubhɔ, mɛ́n-ɛ anmú salé ńnɛn wo bho ayranbi hɛn, lótɛ nɔn ali mɛ́n nɛn ángɛ ní.

³ Lephan khɛ́n ágɛ lí nɛn khúnbrɛn, áleyɔn sa anwú néphan éji yí, lókhɛ́n ansa wo mɛ. Lóyábhɛ brɛ, lephan khɛ́n éji yí lókhɛ́n mɛ́n-ɛ ńnɛn wo bho ayranbi hɛn lótɛ nɔn anní, mɛ́n lɔ annɛn wú néphan ágɛ lí nɛn khúnbrɛn lókhɛ́n anmɔ́ wo kwa, átɛsalé néphan lókɔn, Yankan dɛn do wo.

⁴ Ló hɛ lókɔn, bí lephan yábhɛ le hɛ, lókhɛ́n lephan nankhɛ júmánwo ado elí júmán, lókhɛ́n ɛ́bha bhɔ́ mɛ́n kwa? Kasé anní júmán yan lɔ, kasé anní júmán yɔ́n lɔ, áli mɛ́n hwánthe míbrɛ bhwe. Lókhɛ́n júmánwo lókɔn wo étɔ mɛ́n bhwe, mɛ́n júmán bha yɔ́n, átɛsalé lo Hwánthe pɛ sɛ́npɛ́ ágɛ chɛ́ mɛ́n júmán yɔ́n.

⁵ Néphan fe ebhú salé ápɛ ácí bɛn abanbrɛn ácí khúnbrɛn, saji dɔnbɛn ebhú salé ácí khúnbrɛn librɛ. Lókhɛ́n énɛn salé lephan brɛ, tɛmɛ ɛyɛ́n hɛ si ɛya.

⁶ Lephan khɛ́n ebhú salé ápɛ ácí bɛn abanbrɛn ácí khúnbrɛn, mɛ́n lɔ lo Hwánthe nɔn anmó nguhá se. Saji lephan khɛ́n ágɛ lí yí khúnbrɛn, mɛ́n lɔ lo Hwánthe nɔn anmó nguhá se, átɛsalé mɛ́n nɛn lókɔn anní, ńkhɔ lóhrómɛn anná Yankan nansi. Ló lephan khɛ́n éji yí, mɛ́n lɔ lo Hwánthe nɔn anmó nguhá se; átɛsalé mɛ́n yí lókɔn antɛ́ ńkhɔ lóhrómɛn anná Yankan nansi.

⁷ Lo khúnbrɛn hrómɛn, álepɛ lephan khɛ́n abha mɛpɔ́ se mɛ́n nbrɛn, saji álepɛ lephan khɛ́n ekhú sé mɛ́n nbrɛn.

⁸ Kasé lo bha mɛpɔ́, átɛsalé lo bha mɛpɔ́ se lo Hwánthe, ló kasé lo ekhú, átɛsalé lo ekhú sé lo Hwánthe. Ńmɛpɔ́bhá hrómɛn lɔ, ákhú hrómɛn lɔ, lo li lo Hwánthe mɔ́n mɛn néphan.

⁹ Átɛsalé Krisi khu, ló ńchan khúnɔn mɛn fe, ochɛ́sé néphan abha mɛpɔ́ le néphan akhu, wo hromɛn mɛ́n míbrɛ anní wo Hwánthe.

¹⁰ Ló hɛ, bítɛ khɛ́n ɛbhɔ́ hɛ hɔnsɛ́n kwa ɛ? Saji hɛ lókɔn lɔ, bítɛ khɛ́n ɛsa hɛ hɔnsɛ́n mɛ ɛ? Lo khúnbrɛn lo bhá ya Yankan hɛ́nmɛn, ló ánman mɔ́ lo kwa.

¹¹ Lóhɛ́nthé Yankan hrɔ́ étɔlé: “Mɛn lókɔn khɛ́n mɛn ni Hwánthe abha mɛpɔ́, mɛɛ́n kránman hɔ́n lée: lephan khúnbrɛn bha bhɔ́ ntráhɛ́nlé mɛn hɛ́nmɛn, ló wo bhá phwan mɛ́n tɔlé, mímí nbrɛn mɛn ni Yankan.”

¹² Lóhɛ́nthé lephan brɛ, hɛ yí ɛtɛ́, hɛ nbrɛn ɛ́bhá lɛ lóphɔ mɛ́n sé Yankan.

Ɛle chɛ́ hɛ hɔnsɛ́n ohálé ńne hromɛn

¹³ Lóhɛ́nthé tɛmɛ lo yɔ́ lo jɔn kwabhɔ́ kalé. Lókhɛ́n hɔ́n bhwetɔ́ ɔ́n ma ya lótho nɔn ali salé: ɔ́n ne tɛ́ yíbɛn khɛ́n okhrɛ hɔ́n hɔnsɛ́n nta, ochɛ́ anhálé ńne hromɛn.

¹⁴ Lo Hwánthe Jezwi bha mɛn phɔ, ló mɛn thɛ́n hrómɛn mɛn yɛn salé álepɛ yíbɛn abháne khɛ́n lóphɔ le chan. Lókhɛ́n lephan kasé ɛbhú salé ápɛ yíbɛn bháne lóphɔ le chan, áyí lókɔn áli yíbɛn lóphɔ le chan se hɛ míbrɛ.

¹⁵ Lókhɛ́n kasé hɛ nɛn lókɔn ɛlí, áli áyíléle bɛn se hɛ hɔnsɛ́n, hɛ yí lókɔn ɛtɛ́, ále chan ápɔ́ hrómɛn. Ɛle chɛ́sé hɛ nɛn lókɔn ɛlí, olɔ lephanmi lókɔn khɛ́n mɛ́n hɛ́nthé Krisi khu áyábhletre phɔ!

¹⁶ Áyí khɛ́n ɛwú salé ayɔn, ɛle chɛ́sé néphan otɔlé áleyɔn.

¹⁷ Átɛsalé Yankan Bhringbi khúbhɛ́ lókɔn khɛ́n wo étɔ lóbhwe, áleli ńnɛnlí le ńdɛnán ɔ́nmɔn bhwe, lókhɛ́n áli áyítɛ́ apriman, ńthɛ́nkhwálé, le áphɔhá khɛ́n Nánnánmi Créncré bhó sé lephan.

¹⁸ Lephan khɛ́n elí júmán yábhɛ lókɔn sé Krisi, ńni lephan bɛn etɛ́ Yankan yí apɔ, ló mɛ́n yí lókɔn antɛ́, áli yíbɛn élimán lephan khúnbrɛn.

¹⁹ Lóhɛ́nthé, tɛmɛ lo tɛ́ khékhremɛn tɛ́ áyí khúnbrɛn khɛ́n ali áyí asé lephan ńthɛ́nkhwálé le áphɔpɔ́li mímíbhú hrómɛn.

²⁰ Ńnɛn hɛ́nthé, ɛle lɔ Yankan mɔ́n yí atɛ. Ńnɛn khúnbrɛn tɛɛ olí lóphɔ chan, lókhɛ́n áleyɔn sa ɛlí nɛn bɛn ábha chɛ́ lephan lójɔ hálé ńne hromɛn.

²¹ Lóyí ayɔn sa ɛtɛ́ nɔn ali salé, ɛle tha nán, ɛle nán divɛn, ɛle tɛ́ yíbɛn khɛ́n ochɛ́ hɛ hɔnsɛ́n ohálé ńne hromɛn.

²² Hɛ mwanhɛ́n ɛbhú ábhwe lókɔn phɔ, tɛmɛ olí ábhwe bɛn abha hɛ le Yankan ɔ́nmɔn thethé. Áphɔhá gɛ lephan khɛ́n mɛ́n yí élimɛn antɛ́, lóhrómɛn mɛ́n thɛ́n bha lé lri gbre!

²³ Lókhɛ́n lephan kasé ɛlí nɛn, lókhɛ́n hɛ thɛ́n esókhú lóphɔ, kasé ɛthú njɛ lí lónɛn lókɔn, Yankan bha bhɔ́ hɛ kwa, átɛsalé hɛ yí ɛtɛ́, ále chan hɛ thɛ́n hrómɛn. Ló áyí khúnbrɛn lephan etɛ́, lókhɛ́n ále chan mɛ́n thɛ́n hrómɛn, áli ne se.