RƆ́MƐN KHÚBHƐ́NƐ́N 13 - Ebrié New Testament 1996

Tɛmɛ oji ákhúbhɛ́-óthemánhɔn

¹ Tɛmɛ ɔ́n ji ákhúbhɛ́-óthemánhɔn, átɛsalé álepɛ ákhúbhɛ́-óthe bɛn khɛ́n Yankan le san, ló ákhúbhɛ́-óthemánhɔn lókɔn hɔ́n ewú, Yankan nbrɛn nɔn akhwɛn wo chre áyákhru tho.

² Lóhɛ́nthé kasé lephan ɛgɛ ákhúbhɛ́-óthemánhɔn ɔ́nmɔn ɛ́swan, Yankan mɔ́n yí atɛtre nɔn ɛgɛ ɔ́nmɔn ɛ́swan, ló lephan khɛ́n etɛ́ áyí yábhɛ lókɔn, ákwabhɔ́ nɔn ánnɛn sé mɛ́n nbrɛn.

³ Áli ábhwe mímí salé néphan etɛ́ yíbhwá, wo lé gɛ só ákhúbhɛ́-óthemánhɔn, lókhɛ́n néphan etɛ́ yíléle, wo nɔn wo só ákhúbhɛ́-óthemánhɔn. Kasé ɛle pɔ salé ɛsó ákhúbhɛ́-óthe, tɛmɛ ɛtɛ́ yíbhwá, ló ánman nri hɛ hwa,

⁴ átɛsalé ákhúbhɛ́-óthe li lephan bɛn elí júmán sé Yankan lóka anchɛ́ hɛ lée ɛtɛ́ áyíbhwá. Lókhɛ́n kasé ɛtɛ́ yíléle, tɛmɛ ɛsó ákhúbhɛ́-óthe! Átɛsalé ńpɛ sɛ́npɛ́ ángɛ tɛ́ yí dri hɛ phɔ: ákhúbhɛ́-óthemánhɔn lókɔn, wo li néphan elí júmán sé Yankan, átɛsalé Yankan thɛ́nyan édo sé néphan etɛ́ yíléle, wo nɔn wo do lójúmán pɛ wo elí.

⁵ Lóhɛ́nthé áyɔn sa ɔ́n ji ákhúbhɛ́-óthemánhɔn. Olelí Yankan thɛ́nyan ábha do sé hɔ́n hɛ́nthé, lókhɛ́n tɛmɛ olí ábhwe bɛn achan hɔ́n thɛ́n hrómɛn.

⁶ Lóhɛ́nthé áyɔn salé ɔ́n sɔ́n la-npho, átɛsalé néphan lókɔn édo la-npho ɔn, wo li néphan bɛn elí júmán sé Yankan lóka wo elí júmán obho ha wo mɔ́n mɛn.

⁷ Wo néphan khúnbrɛn lókɔn, ápɛn tɛɛ ɔ́n gɛ sɔ́n sé wo, tɛmɛ ɔ́n sɔ́n: kasé elí la-npho osɔ́n, tɛmɛ ɔ́n sɔ́n sé wo, kasé elí la-npho yábhɛ yábhɛ nankhɛ abháne ógɛ sɔ́n, tɛmɛ ɔ́n sɔ́n sé wo, kasé elí lephan jí le ńguhá obhó sé lephan, tɛmɛ ɔ́n mó ájí le ńguhá ɔ́nmɔn sé wo.

Ápɔ́ abha lo le lo jɔn ɔ́nmɔn thethé

⁸ Olépɛ lephan pɛn obhá hɔ́n tho, ápɛn ágɛ bhá hɔ́n tho nɔn olí ápɔ́ ɔ́n ma pɔ́ hɔ́n bɛn nbrɛn. Kasé lephan ɛpɔ hɛ jɔ, átɛsalé ɛji ábidí khúnbrɛn phu.

⁹ Ábidí étɔlé: “Ɛlé che hɛ jɔ mia, ɛle wɛ́n lephan, ɛlé si sído, lephan yí ole nɔ́n hɛ mɛ”, ábidí lókɔn, ló le ábidí nánkhɛ khúnbrɛn ɔ́nmɔn bhurɛhɛ́n ábidí míbrɛ hromɛn, lónɔn ali sa: “Tɛmɛ ɛpɔ́ hɛ jɔ sa hɛ nbrɛn.”

¹⁰ Lephan apɛ ápɔ́ bha mɛ́n thɛ́n hrómɛn, ánnɛn gɛ mó áyíléle tɛ́ mɛ́n jɔ. Ápɔ́ opɔ́ lephan ɔn, lónɔn ali ábidí ji.

Tɛmɛ lo hámwanhɛ́n chré bo Krisi cí ábha sáji bhá

¹¹ Ábhwe lókɔn, tɛmɛ ɔ́n há lóphɔ mwanhɛ́n, átɛsalé hɔ́n bɛn nbrɛn ɔ́n yɛn áka yábhɛ lo bha lóhrómɛn: thénthé ádi lóka áyɔn salé ɔ́n chán ná mɛn fe, átɛsalé Yankan cí ábha swa lo, lócí lókɔn ágbali phɔ brɛn lóka lo lili bhu mímí.

¹² Ákhakpɛɛ́ dubhlékhu bha phú, ló áyé elɛ́ bhá. Tɛmɛ lo yɔ́ dubhlékhu hromɛn yítɛ́ ká, ló lo bhó áyí lo bha bhó kútha áyéfí hrómɛn bhraya.

¹³ Tɛmɛ lo tɛ́ yí apriman sa néphan abha áyéfí hrómɛn, olépɛ áyí sáka sakatɛ́, ńdɛnán, ágbakhrelí, áyí phromɛn phromɛntɛ́, ágbo le ńmɛnɔ́n.

¹⁴ Tɛmɛ lo Hwánthe Jezwi-Krisi nbrɛn olí hɔ́n átha dúgba ɔ́n mó bhraya, ló áyí hɔ́n nánmí énɛn, ɔ́n ne bhó hɔ́n thɛ́n tré lótho.