RƆ́MƐN KHÚBHƐ́NƐ́N 12 - Ebrié New Testament 1996

Tɛmɛ ɔ́n mó hɔ́n nbrɛn sé Yankan júmán

¹ Mɛn hɔnsɛ́nhɔn, lónian mɛn khɛ́n Yankan wu lo nfɛkhu hɛ́nthé, mɛɛ́n kranmán hɔ́n khúnbrɛn salé, tɛmɛ ɔ́n hɔ́n hɔ́n nbrɛn sé Yankan, sa áyíbɛn abha npɔ́ khɛ́n obho ha npha se Yankan. Ló tɛmɛ ɔ́n ní áyíbɛn obho ká njɛ ha npha se Yankan júmán, lókhɛ́n élimán Yankan. Lósi yábhɛ ɔ́n ma khɔ́ la Yankan hɔ́n thɛ́n hrómɛn nɔn ali lókɔn.

² Ɔ́n ne tɛ́ yí sa áthéjinɛ́n si akhɔ etɛ́ yí, lókhɛ́n tɛmɛ Yankan obhó ábhweyɛ́n pɔ́pɔ́ jrɛn hɔ́n yítɛ́ khúnbrɛn. Lóyábhɛ nɔn ábha chɛ́ hɔ́n yɛ́n áyí Yankan pɔ: ali áyí ayɔn, ali áyí élimán Yankan, ali áyí lóphɔ chan.

³ Áyí lókɔn Yankan bho se mɛn áphɔlíman hromɛn ɔn, lóhɛ́nthé mɛɛ́n kranmán hɔ́n khúnbrɛn salé: ɔ́n ne bhú hɔ́n nbrɛn bánbrɛn hɔ́n lephan yábhɛ ɔ́n ni, lókhɛ́n tɛmɛ ɔ́n hɔ́n hɔ́n nbrɛn bháthé, ló hɔ́n brɛ brɛ khúnbrɛn, hɔ́n si ɔ́n khɔ hɔ́n ebhú hɔ́n nbrɛn osakhɔ́ Yankan mímíbhú ase hɔ́n hrómɛn.

⁴ Lo phɔ nánmí hrómɛn, ápɛ áyí búdúbúdú, lókhɛ́n lóyí khúnbrɛn lókɔn, wo brɛ brɛ júmán wo lí, áká njɛ.

⁵ Lóyábhɛ brɛ, lo khúnbrɛn lókɔn, lo li néphan lo thubhɔ, lótɛ khɛ́n lo jrɛn lephan míbrɛ bha Krisi phɔ, ló lo khúnbrɛn lo bhurɛhɛ́n bha sibrɛ sa lo phɔ nánmí yí khúnbrɛn si akhɔ bhurɛhɛ́n bha lo phɔ.

⁶ Lóyábhɛ brɛ, Yankan se lo brɛ brɛ khúnbrɛn yí dɔndɔn wɛ́-nwɛ́, ló áyɔn salé lo bhó lí júmán sé néphan khúnbrɛn. Kasé ábhweyɛ́n Yankan se lo, áli ábhweyɛ́n bɛn obhó tɔ Yankan bhwe, áyɔn salé lo tɔ Yankan bhwe mímíbhú hrómɛn.

⁷ Kasé ábhweyɛ́n Yankan se lo, áli júmánlí ékɛ, tɛmɛ lo bhó lí júmán sé néphan. Kasé áli áyílie ékɛ, tɛmɛ lo lie néphan yí.

⁸ Kasé áli ábhwe otɔ ha néphan, tɛmɛ lo tɔ bhwe ha néphan. Lephan kasé ɛbho hɛ yí ɛsé néphan, tɛmɛ ɛbhó sé wo ápɔ́ hrómɛn. Kasé ɛ́yalí néphan, tɛmɛ ɛyalí wo mwámwá. Kasé ɛdɔnmán gbremán mɔ́n, tɛmɛ ɛdɔnmán wo mɔ́n áphɔhá mɛn.

⁹ Áyɔn salé hɔ́n pɔ́ hrómɛn olépɛ ńkpakprá, ɔ́n ne bhó hɔ́n thɛ́n tré áyíléletɛ́ tho, khɛ́n tɛmɛ ɔ́n hɔ́n áyíbhwátɛ́ pɛ kpɛ́ɛ́n.

¹⁰ Tɛmɛ ɔ́n pɔ́ hɔ́n nbrɛn sa lephan le mɛ́n hɔnsɛ́n, ló hɔ́n hrómɛn, áyɔn salé lephan brɛ brɛ khúnbrɛn opɛ ájí sé néphan.

¹¹ Tɛmɛ ɔ́n ní júmán khékhremɛn ló áyí olé nanlí hɔ́n. Tɛmɛ ɔ́n mó hɔ́n thɛ́n khúnbrɛn lí júmán sé lo Hwánthe.

¹² Tɛmɛ hɔ́n mwasrui ɔ́n mo tre Yankan tho, osé hɔ́n áphɔhá, ló hɔ́n yíkhúphɔ hromɛn, tɛmɛ hɔ́n thɛ́n onɔ́n, ló ɔ́n na Yankan ákakhúnbrɛn.

¹³ Néphan ali hɔ́n hɔnsɛ́nhɔn khɛ́n abha ámián hrómɛn, tɛmɛ ɔ́n dɔnmán wo mɔ́n, ló ńthékhunɛ́n elɛ́ hɔ́n hwan, ɔ́n do wo mwámwá.

¹⁴ Néphan khɛ́n élri hɔ́n gbre, tɛmɛ ɔ́n mɔ́ wo ndu, ɔ́n mɔ́ wo ndu, ló ɔ́n ne phiámɔ́n sé wo.

¹⁵ Néphan khɛ́n elí phɔhá, tɛmɛ ɔ́n gɛ wo ɔ́nmɔn lí phɔhá, ló néphan khɛ́n ethɔ́n hɛ́ndu, tɛmɛ ɔ́n gɛ wo ɔ́nmɔn thɔ́n hɛ́ndu.

¹⁶ Tɛmɛ hɔ́n le néphan khúnbrɛn ɔ́nmɔn thethé onɔ́n, ló ɔ́n ne fúmɛ́n. Lókhɛ́n júmán bhri lókɔn wo se hɔ́n, tɛmɛ ɔ́n dɛn do, ló ɔ́n ne ya hɔ́n nbrɛn hrómɛn tɔlé ɔ́n ni bhweyɛ́nmán.

¹⁷ Kasé wo bho yíléle wo etɛ́ hɔ́n, ɔ́n ne saya bhó tɛ́ wo, lókhɛ́n tɛmɛ ɔ́n tɛ́ khékhremɛn ɔ́n tɛ́ áyí néphan khúnbrɛn ewú salé ayɔn.

¹⁸ Hɔ́n yítɛ́ hrómɛn, tɛmɛ ɔ́n tɛ́ khékhremɛn, ló ɔ́n gɛ néphan khúnbrɛn ɔ́nmɔn pɔlí phɔ.

¹⁹ Mɛn jɔn bhwá, néphan atɛ hɔ́n ne, ɔ́n ne bhó ne sɔ́n wo pɛn, lókhɛ́n tɛmɛ ɔ́n yɔ́ bhwe khúnbrɛn kalé sé Yankan thɛ́nyan ábha do, átɛsalé Yankan hrɔ́ hrómɛn lo Hwánthe ékranmán lo lée: “Mɛɛ́n nbrɛn nɔn mɛn mán mó wo ne sɔ́n wo pɛn, saji wo yíléle wo tɛ, mɛɛ́n nbrɛn nɔn mɛn mán wrɔ lókhúnbrɛn sé wo.”

²⁰ Lókhɛ́n Yankan hrɔ́ cu étɔlé: “Kasé áko ehɔ́n hɛ mɛsawo, tɛmɛ ɛse nɛn anní, kasé ńdukro ehɔ́n-ɛn, tɛmɛ ɛse ndu annán. Kasé ɛtɛ́ lóyábhɛ nɛn, lónɔn ɛbhá chɛ́ hɛ́ndɛ ká hɛ mɛsawo mɛ.”

²¹ Ɛle yɔ́ hɛ nbrɛn kálé sé áyíléle sɛ́npɛ́ obrɛn hɛ mɔ́n, lókhɛ́n tɛmɛ hɛ yíbhwátɛ́ hrómɛn, hɛ mɔ́n oká áyíléle tho.