RƆ́MƐN KHÚBHƐ́NƐ́N 11 - Ebrié New Testament 1996

Izraɛ khúbhɛ́nɛ́n kpɛ́bɛn akha bháne

¹ Ńthé mɛɛ́n mi hɔ́n bhwe bɛn: Wú mímí nbrɛn Yankan yɔ mɛ́n féchwe kalé? Léliló! Mɛɛ́n nbrɛn lɔ mɛn ni Izraɛ khúbhɛ́ lephan, mɛn ni Ábrahámɛn njibhi, mɛn chan Bɛnjamɛn mándo hromɛn.

² Néphan ali mɛ́n hwannɛ́n khɛ́n ásithwá mɛ́n nbrɛn ńsan tre njɛ, néphan lókɔn Yankan le yɔ wo khwalé. Hɔ́n nbrɛn ɔ́n yɛn ábhwe Yankan hrɔ́ étɔ, lóka Eli lo ya Yankan hɛ́nmɛn ébhɔlíkɔn sé Izraɛ khúbhɛ́nɛ́n, khɛ́n ántɔlé:

³ “Hwánthe, wo wɛn hɛ bhwetɔ́trémán khúnbrɛn phu, wo ca hɛ nphaha túprán khúnbrɛn khwalé: ákha mɛn míbrɛ tɛɛ nɔn mɛn máne, ló wo énɛn mɛn wo wɛ́n.”

⁴ Ló bí bhwe Yankan tɔ se Eli? Yankan kranman Eli lée: “Mɛn san néphan akpɛn ákhwache tre njɛ, wo néphan lókɔn, wo nɔn wo le bhɔ ntráhɛ́nlé ńfan óche Baali hɛ́nmɛn.”

⁵ Lóyábhɛ brɛ, thénthé nbrɛn lɔ, ápɛ néphan kpɛ́bɛn Yankan san tre njɛ mɛ́n nfɛkhuwú hrómɛn.

⁶ Néphan lókɔn, ńfɛkhuwú hrómɛn nɔn Yankan khɔ san wo, khɛ́n áleli wo júmánlí hrómɛn. Kasé elí wo júmánlí hrómɛn, Yankan nfɛkhuwú lókɔn ále cu li ńfɛkhuwú npɔhɔ́n.

⁷ Ló ábhwe lókɔn thé li bí? Lóthé nɔn ali salé Izraɛ khúbhɛ́nɛ́n, wo yí wo énɛn wo le gɛ. Lókhɛ́n néphan Yankan san tre njɛ, wo nɔn wo gɛ lóyí lókɔn. Ló wo krɛnnɛ́n khúnbrɛn, wo li néphan bɛn wo le dɛn ye Yankan bhwe étɔ.

⁸ Lóhɛ́nthé Yankan hrɔ́ étɔlé: “Yankan ha wo dɔdɔlɔ́ phɔ, ló achan lócí abha di ncɛ́n, wo lé gɛ wú yí, saji wo lé gɛ yé bhwe.”

⁹ Ló Davi lɔ cu tɔ sa: “Tɛmɛ wo nɛn ojrɛn ńmɛ́ bɛn okhu tre, ló otú wo, tɛmɛ wo nɛn ojrɛn ńnɔn bɛn obɔn tre, wo ká lóhrómɛn, ló áyí odri wo phɔ.

¹⁰ Tɛmɛ wo mɛbhí ophu, ló wo le wú yí; tɛmɛ wo bhúlé ya lóne ákakhúnbrɛn.”

¹¹ Ńthé mɛɛ́n mi hɔ́n bhwe bɛn: Jwifunɛ́n lókɔn ahalé la, wú wo bha lé cu chánfe npɔhɔ́n? Léliló! Lókhɛ́n wo phɔ wo khrɛ hɛ́nthé nɔn achɛ Yankan swa néphan khúnbrɛn khɛ́n aleli Jwifunɛ́n, ochɛ́sé néphan lókɔn, wo yí onɔ́n Jwifunɛ́n mɛ.

¹² Jwifunɛ́n phɔ akhrɛ nɔn ado ńdubhɔ́ se áthéjinɛ́n khúnbrɛn, saji wo há wo halé, lólɔ, ádo ńdubhɔ́ se néphan aleli Jwifunɛ́n. Lóhɛ́nthé wo ndubhɔ́ lɔ bha thúbhɔ, lóka Yankan bha swa wo khúnbrɛn yɛn wo ne hrómɛn.

Yankan bha swa néphan aleli Jwifunɛ́n

¹³ Hɔ́n khúnbrɛn khɛ́n ɔ́n ne li Jwifunɛ́n, thénthé mɛn mán tɔ bhwe bɛn sé hɔ́n yé: mɛn ni Krisi-mranchɛ́wo bɛn wo chɛ olo tɔ bhwe sé néphan aleli Jwifunɛ́n oyé, lóhɛ́nthé mɛn júmán wo se mɛn, áli yíbɛn élimán mɛn,

¹⁴ ochɛ́sé mɛn yí lókɔn mɛn tɛ́, mɛn hɔnsɛ́nhɔn ali Jwifunɛ́n mɛnɔ́n othúbhɔ, ló wo hromɛn Yankan oswa néphan.

¹⁵ Kasé Yankan yɔ Jwifunɛ́n khwalé, lókhɛ́n ńkhɔ lóhrómɛn gɛ áthéjinɛ́n ɔ́nmɔn nrwɛn, bí bha tɛ́? Lóka ánman do Jwifunɛ́n khúnbrɛn, lóyí ábha tɛ́ nɔn ali salé néphan akhu, wo bha bhá mɛpɔ́.

¹⁶ Kasé wo jan kpánhɔn khu bhrií há npha se Yankan, élie salé kpánhɔn lókɔn ló nbrɛn lɔ áli Yankan ékɛ, ló kasé wo khwɛn áyá mɛ́lu ha npha se Yankan, áyá lókɔn lóncɛn khúnbrɛn abha lóphɔ, lólɔ áli Yankan ékɛ.

¹⁷ Izraɛ khúbhɛ́nɛ́n tɛsa olive yá wo ha, lókhɛ́n wo jan lóncɛn fe yɛn lóphɔ. Ló hɛ khɛ́n ɛleli Jwifu lephan, hɛ nɔn ɛli olive yá wo le ha, lókhɛ́n ló nbrɛn le tre bithe, ló wo khwɛn hɛ ncɛn thweli ha olive yá wo ha phɔ: ló thénthé hɛ lɔ, áyá lókɔn wo ha tre, lómɛ́lu nɔn égbɛ hɛ.

¹⁸ Lóhɛ́nthé, ɛle fúmɛ́n sé áyá ncɛn lókɔn wo jan yɛn. Kasé ɛfúmɛ́n, tɛmɛ odi hɛ mwanhɛ́n salé léli hɛ nɔn ɛhɔn áyá mɛ́lu pɛ, lókhɛ́n áyá mɛ́lu nɔn ahɔn hɛ pɛ.

¹⁹ Hɛ bhwe ɛbhá tɔ sé mɛn nɔn ali salé: “Wo jan áyá ncɛn yɛn, ló mɛn do wo si chre.”

²⁰ Lókhúnbrɛn lókɔn áyɔn, wo jan áyá ncɛn yɛn, mímíbhú áyá ncɛn le pɛ hɛ́nthé, ló hɛ, ɛdo si chre hɛ mímíbhú hrómɛn, khɛ́n áleyɔn sa ɛfúmɛ́n, énɛn salé ɛsókhú.

²¹ Ló kasé Yankan le yɔ bhwe phɔ Jwifunɛ́n lókɔn khɛ́n ali áyá ncɛn abha áyá wo ha phɔ, wú ɛbhú salé hɛ-ɛ ánman yɔ́phɔ́ hɛ?

²² Thénthé gbɛnɛn wu lósi Yankan khɔ bho mɛ́n thɛ́nbhwá le mɛ́n thɛ́nyan élie néphan: ánha thɛ́nyan sé néphan ahalé, lókhɛ́n hɛ-ɛ, ńyɔn se hɛ. Ló áyɔn salé ɛbhá mɛ́n pɔ́ hrómɛn, kasé ɛle bha mɛ́n pɔ́ hrómɛn, hɛ lɔ ánman jan hɛ yɛn sa áyá cɛn lókɔn wo jan yɛn.

²³ Lóyábhɛ brɛ, kasé Jwifunɛ́n yɔ wo bhwe wo gba khwá ka, wo lɔ, wo bhá khwɛ́n wo thweli tré lósi ásithwá wo tre. Átɛsalé Yankan pɛ sɛ́npɛ́ ángɛ tɛ́.

²⁴ Hɛ khɛ́n ɛleli Jwifu lephan, olive yá lókɔn wo le ha, lókhɛ́n ló nbrɛn le tre bithe ɔn, hɛ nɔn ɛli lóncɛn wo jan yɛn lóphɔ: ló wo khwɛn lo thweli ha olive yá wo ha phɔ, lókhɛ́n olive yá lókɔn wo ha, Jwifunɛ́n nɔn ali lóncɛn wo jan yɛn lóphɔ: lókhɛ́n áyá ncɛn lókɔn Yankan gɛ cu khwɛ́n thweli há áyá man phɔ tré.

Yankan bha swa Izraɛ khúbhɛ́nɛ́n khúnbrɛn

²⁵ Mɛn hɔnsɛ́nhɔn, ápɛ ábhwe mímí bɛn ahrɔman tre, mɛɛ́n nɛn salé ɔ́n yɛ́n, ochɛ́sé ɔ́n ne bhú salé ɔ́n yɛn bhwe khúnbrɛn phu: lóbhwe lókɔn nɔn ali salé, Izraɛ khúbhɛ́nɛ́n fe bha njɛkhɔ́nman hromɛn ntɔ́nyán, lókhɛ́n wo njɛ khɔ́nman lókɔn bha lé tré lóne ákakhúnbrɛn. Wo bha bhá wo thɛ́n khrákhrá hrómɛn ábha di lóka Yankan bha swa aféchwe nankhɛ khúnbrɛn.

²⁶ Ló thénthé nɛn lósi Yankan bha khɔ́ swa Izraɛ khúbhɛ́nɛ́n khúnbrɛn, sa lósi Yankan hrɔ́ khɔ étɔ a: “Adókáwo bha chán Ziɔn khúbhɛ́ bhá, ló ánman khwɛ́n Jakɔ́phu jímiɔn yɛn ńneyítɛ́ hrómɛn.

²⁷ Ló ábhwe lókɔn, lótho nɔn mɛn le wo ɔ́nmɔn óbha ya sí akprɔbha. Lóka mɛn mán chó wo ne yɛn.”

²⁸ Ábhwe Bhwábhwá lókɔn abha, kasé lo éya lóbhwetɔ́ tho, ógɛ tɔlé Jwifunɛ́n jrɛn Yankan mɛsamán, lókhɛ́n hɔ́n ɔ́n ne li Jwifunɛ́n, hɔ́n-ɛ áyɔn se hɔ́n. Lókhɛ́n Yankan sán asan Jwifunɛ́n, kasé lo éya lóbhwetɔ́ tho, ógɛ tɔlé wo jisɛmánhɔn hɛ́nthé Yankan pɔ wo.

²⁹ Lephan kasé Yankan san hɛ, lókhɛ́n ńmɔ hɛ ndu, ánnɛn cu hɔ́n lóbhwetɔ́ jrɛn.

³⁰ Lósi yábhɛ brɛ khɛ́n lócí hɔ́n lɔ ɔ́n ne ji Yankan lókhɛ́n thénthé ɔ́n gɛ Yankan nfɛkhuwú Jwifunɛ́n Yankan ale ji hɛ́nthé,

³¹ lóyábhɛ brɛ Jwifunɛ́n lɔ thénthé wo le ji Yankan, lókhɛ́n hɔ́n nfɛkhuwú lókɔn ɔ́n gɛ hɛ́nthé, wo lɔ wo bhá khɔ́ lóphɔ gɛ Yankan nfɛkhuwú.

³² Átɛsalé Yankan khwɛn néphan khúnbrɛn ha áphɔkhrɛ hromɛn, ochɛ́sé anwú nkɔn khúnbrɛn nfɛkhu.

Yankan li lephan khóo

³³ Yankan yɔn se néphan khúnbrɛn banban! Mɛ́n yíyɛ́n le mɛ́n bhweyɛ́n ɔ́nmɔn banbrɛn áyí khúnbrɛn! Abɛn nɔn ábha gɛ yɛ́n mɛ́n hɛ́nphe anmú? Abɛn bha gɛ yɛ́n mɛ́n yí antɛ́?

³⁴ Lóhɛ́nthé Yankan hrɔ́ étɔlé: “Abɛn yɛn Hwánthe hɛ́nphe ebhú? Abɛn bha yɛ́n bhwe sé Hwánthe?

³⁵ Ló abɛn phrɛ thwasi bho yíbɛn se Hwánthe, lókhɛ́n Hwánthe ebhá sɔn-ɛn lópɛn?”

³⁶ Átɛsalé áyí khúnbrɛn chan mɛ́n yé. Mɛ́n nɔn ńtɛ áyí khúnbrɛn, ló áyí khúnbrɛn li mɛ́n ékɛ. Tɛmɛ ńguhá ogɛ Yankan olí godo! Amɛn.