RƆ́MƐN KHÚBHƐ́NƐ́N 10 - Ebrié New Testament 1996

¹ Mɛn hɔnsɛ́nhɔn, mɛn yí mɛɛ́n nɛn mɛn thɛ́n khúnbrɛn hrómɛn le mɛn Yankan mɛɛ́n na nɔn ali salé, Yankan oswa Jwifunɛ́n.

² Wo hɛ́nthé, mɛɛ́n gɛ ní ndalefɛ salé wo li néphan bɛn wo bho wo thɛ́n tre Yankan yítɛ́ tho, lókhɛ́n wo Yankan yítɛ́ le khɔ ábhweyɛ́n hrómɛn.

³ Wo le yɛ́n lósi Yankan khɔ́ tɛ́ néphan priman mɛ́n hɛ́nmɛn, wo-ɛ, wo pɛ wo si wo khɔ́ tɛ́ wo brɛn primán Yankan hɛ́nmɛn, lókhɛ́n Yankan nbrɛn si akhɔ́ tɛ́ néphan priman mɛ́n hɛ́nmɛn ɔn, wo lé dɛn ya lóne.

⁴ Krisi nɔn ali Moyízi bidí lómɛ́n si aphu, lóhɛ́nthé lephan kasé ɛbhu mímí, Yankan bha tɛ́ hɛ priman mɛ́n hɛ́nmɛn.

Néphan khúnbrɛn abhu lo Hwánthe mímí, Yankan bha swa wo

⁵ Néphan khɛ́n Yankan tɛ priman wo bidí wo éji hɛ́nthé, nɛn lósi Moyízi khɔ lrɛ lóbhwetɔ́ tre o: “Kasé lephan ábidí bhwe étɔ ɛtɛ́ lóyí, ɛ́bha khɔ́ lóphɔ bhá mɛpɔ́.”

⁶ Lókhɛ́n néphan Yankan tɛ́ priman wo mímíbhú hrómɛn, lóphɔ bhwe wo phrɛ tɔ nɔn ali salé: “Ɛlé ya hɛ nbrɛn hrómɛn tɔlé: abɛn bha phá ló Yankan hwan?” (Lóthé nɔn ali salé: abɛn bha phá ló átho hɔ́n Krisi bhá áthéji).

⁷ Saji ɛlé tɔlé: “Abɛn bha gɛ ló áyíta hromɛn?” (lóthé nɔn ali salé: abɛn bha gɛ ló áyíta hromɛn hɔ́n Krisi chán mɔngumán thethé fe ɛ).

⁸ Lóhɛ́nthé Yankan hrɔ́ étɔlé: “Yankan bhwetɔ́ gbali hɛ phɔ, ábha hɛ míthé, ábha hɛ thɛ́n hrómɛn.” Ábhwetɔ́ lókɔn nɔn ali mímíbhú bhwe lókɔn lo étɔ sé néphan oyé.

⁹ Kasé ɛya néphan khúnbrɛn hɛ́nmɛn ɛ́tɔlé, Jezwi li lo Hwánthe, lókhɛ́n ɛcu bhu mímí hɛ thɛ́n hrómɛn salé Yankan chɛ Jezwi chan khúnɔn mɛn fe, hɛ lephan lókɔn Yankan bha swa hɛ.

¹⁰ Lo bhu mímí lo thɛ́n hrómɛn, lóhɛ́nthé Yankan tɛ lo priman mɛ́n hɛ́nmɛn. Lephan kasé ɛphwan mɛ́n tɔ hɛ mímíbhú phɔ bhwe se néphan ye, Yankan bha swa hɛ.

¹¹ Yankan hrɔ́ étɔlé: “Lephan kasé ɛbhu Jezwi lókɔn mímí, ɛbha lé gɛ hɛ́nmɛnphrui.”

¹² Lephan khúnbrɛn bhwe nɔn wo tɔ, átɛsalé Jwifunɛ́n lɔ le ká njɛ, lókhɛ́n néphan aleli Jwifunɛ́n lɔ ká njɛ: wo khúnbrɛn wo pɛ Hwánthe míbrɛ. Ló néphan khúnbrɛn elúkhwɛ́ che ánman mɔ́ wo ndu.

¹³ Lóhɛ́nthé Yankan hrɔ́ étɔlé: “Lephan kasé ɛlúkhwɛ́ che Hwánthe, ánman swa hɛ.”

¹⁴ Kalósi wo bhá khɔ́ lúkhwɛ́ che lephan lókɔn, kasé wo le bhui mímí? Kalósi wo bhá khɔ́ bhui mímí, kasé wo le tɔ mɛ́n phɔ bhwe se néphan ye? Kalósi wo bhá khɔ́ yé mɛ́n phɔ bhwe, kasé wo le tɔ ábhwe lókɔn thandi se néphan ye?

¹⁵ Kalósi wo bhá khɔ́ tɔ ábhwe lókɔn, kasé wo le chɛ néphan othándi lo tɔ bhwe? Lóhɛ́nthé Yankan hrɔ́ étɔlé: “Néphan lókɔn abho ábhwetɔ́ bhwábhwá ebhá, lóka lo ewú wo, élimán lo!”

¹⁶ Lókhɛ́n álepɛ lephan adɛn do Ábhwe Bhwábhwá lókɔn. Lóhɛ́nthé Ezayi phrɛ tɔlé: “Hwánthe, abɛn bhu lo bhwetɔ́ mímí ɛ?”

¹⁷ Lóhɛ́nthé mímíbhú chan ábhwe néphan eyé hrómɛn, ló ábhwe wo eyé, áchan Krisi bhwetɔ́ hrómɛn.

¹⁸ Lókhɛ́n mɛɛ́n nɛn mɛn mi hɔ́n bhwe bɛn: Wú mímí nbrɛn wo ka ye ábhwe lókɔn bhrɔ́ɔ́? Wo ye ábhwe lókɔn kábrɛ! Lóhɛ́nthé Yankan hrɔ́ étɔlé: “Wo tɔ́ dɛn pi áthéji khúnbrɛn, ló wo bhwetɔ́ lo ádi áthéji si atre mɛ́n lé.”

¹⁹ Mɛn mán cu mi hɔ́n bhwe bɛn: Wú mímí nbrɛn Izraɛ khúbhɛ́nɛ́n le ye ábhwe lókɔn? Ábhwe lókɔn phɔ, nɛn Moyízi bhwe aphrɛ tɔ o, mɛ́n nkɛé: “Ákhúbhɛ́nɛ́n ale yɛn Yankan, mɛn mán chɛ́ wo yí bha nɔ́n hɔ́n mɛ, ló aféchwe alepɛ ábhweyɛ́n, wo hɛ́nthé, mɛn mán chɛ́ thɛ́nyan hɔ́n hɔ́n.”

²⁰ Yankan hɛ́n hrómɛn, nɛn Ezayi bhwe atɔ. Yankan nkɛé: “Néphan lócí ale nɛn mɛn, thénthé wo li mɛn néphan. Ló néphan lócí ále lú mɛn hɛ́n, mɛn hɔn mɛɛ́n nbrɛn thándi se wo wu.”

²¹ Ló Izraɛ khúbhɛ́nɛ́n hɛ́nthé, Yankan étɔlé: “Achan ńjuju alo di njuka, mɛn phra mɔ́n ya mɛɛ́n bo ákhúbhɛ́nɛ́n ále ji bhwe, khɛ́n agɛ mɛn ɔ́nmɔn éswan.”