FILÍPHU KHÚBHƐ́NƐ́N 3 - Ebrié New Testament 1996

Áyíyálitɛ́ khɛ́n áchɛ́ lephan priman Yankan hɛ́nmɛn

¹ Hɔnsɛ́nhɔn, thénthé tɛmɛ ɔ́n ní phɔhá, Hwánthe ɔ́nmɔn brɛ ɔ́n ní hɛ́nthé. Ábhwe khɛ́n lóhɛ́nthé mɛn phrɛ tɛ hrɔ́ thu hɔ́n, kasé mɛn cu mɛɛ́n tɔ lóbhwe lókɔn, ále tɛ́ mɛn yíɛkɛ, hɔ́n hɛ́nthé mɛɛ́n gɛ tɛ́ yábhɛ nɛn.

² Néphan etɛ́ yí phromɛn phromɛn, néphan ógɛ che ńgbamán, néphan étɔlé sáán ojan ńsɛ khɛn ɔn, néphan khúnbrɛn lókɔn, tɛmɛ ɔ́n há wo phɔ mwanhɛ́n.

³ Néphan khúnbrɛn lókɔn, léli wo, lókhɛ́n lo nɔn lo li ákhɛnján mímí wo étɔ lóbhwe, átɛsalé Yankan Nánnánmi nɔn lo bho lo elí júmán hɛ́nthé. Lo bho Jezwi-Krisi lo efúmɛ́n, lóhɛ́nthé lo le bho lo mwasrui tre néphanmiɔn yítɛ́ tho.

⁴ Lótɛ khɛ́n mɛɛ́n nbrɛn lɔ, mɛɛ́n gɛ mó mɛn mwasrui tré néphanmiɔn yítɛ́ tho. Khɛ́n kasé lephan bɛn ebhú salé mɛ́n lɔ, mɛ́n gɛ tɛ́ áyí yábhɛ lókɔn, ló mɛn-ɛ, mɛɛ́n gɛ tɛ́ bánbrɛn yábhɛ nɛn.

⁵ Lóka wo ho mɛn khɛ́n mɛn tɛ cído, lópán wo jan mɛn khɛn. Mɛn ni Izraɛ lephan, ló mɛn chan Bɛnjamɛn mándo hromɛn. Mɛn ni Ebre, ló Ebre lephan líhɛ nɔn aho mɛn. Kasé lo éya Jwifunɛ́n bidí yítɛ́ tho ɔn, ló-ɛ mɛn ni Fariziɛn lephan agɛlé ya,

⁶ Fariziɛnnɛ́n bidí yítɛ́ asi mɛn thɛ́n hrómɛn hɛ́nthé, áchɛ mɛn nri Yankan-gbemán gbre. Kasé ábidí jí hrómɛn nɔn okhɔ́ lí lephan apriman ɔn, ló-ɛ mɛn phɔ, álepɛ bhwe bhrií ógɛ tɔ.

⁷ Lócí, mɛn mu salé mɛn gɛ yíbɛn lóyí khúnbrɛn lókɔn hromɛn. Khɛ́n Krisi hɛ́nthé, lóyí lókɔn mɛn gɛ, thénthé ále cu li yíɛkɛ npɔhɔ́n.

⁸ Jezwi-Krisi ali mɛn Hwánthe yɛ́n oyɛ́n nɔn abanbrɛn áyí khúnbrɛn. Mɛ́n hɛ́nthé nɔn mɛn yɔ mɛn yí khúnbrɛn khwalé; lóyí khúnbrɛn lókɔn ájrɛn ńbie mɛn hɛ́nmɛn, ochɛ́sé mɛn wúsi khɔ́ gɛ Krisi,

⁹ ló mɛn le mɛ́n ɔ́nmɔn olí brɛ. Léli mɛn bidí mɛɛ́n ji hɛ́nthé nɔn achɛ mɛn priman Yankan hɛ́nmɛn, khɛ́n Krisi mɛn mu mímí hɛ́nthé. Yankan míbrɛ nɔn átɛ́ lephan priman mɛ́n hɛ́nmɛn. Ló lephan kasé ɛbhú mímí, hɛ nɔn Yankan tɛ́ hɛ priman mɛ́n hɛ́nmɛn.

¹⁰ Áyí tɛɛ mɛɛ́n nɛn nɔn ali salé mɛn yɛ́n Krisi, le ńsɛ́npɛ́ achɛ ńchan khúnɔn mɛn fe, mɛ́n yíkhúphɔ olí mɛn yíkhúphɔ, ló mɛ́n khú hrómɛn, mɛn tɛ́sa mɛ́n nbrɛn,

¹¹ ochɛ́sé mɛn lɔ, mɛn pɛ mwasrui salé, mán chán khúnɔn mɛn fe.

Ási owá lo di

¹² Mɛn nɛ́n gɛ tɔlé mɛn wa di lómɛ́n, saji mɛn nɛ́n gɛ tɔlé mɛn ni lephan apriman; lótɛ khɛ́n mɛn wá nó hɛ́nmɛn tɛɛ, ochɛ́sé mɛn wá lókɔn hromɛn mɛn gɛ yí, átɛsalé Jezwi-Krisi lɔ gɛ mɛn.

¹³ Hɔnsɛ́nhɔn, mɛn nɛ́n mú salé mɛn gɛ yí, khɛ́n mɛn yí brɛ khókhó mɛn tɛ́ nɔn ali salé áyí khúnbrɛn abha mɛn mánji ɔn, mɛn yɔ́ khwálé, ló mɛn tɛ́ khékhremɛn gɛ áyí abha mɛn hɛ́nmɛn.

¹⁴ Ló áyí Yankan khɔ Jezwi-Krisi phɔ éche lo bha bhó átho lóne ɔn, mɛn gɛ lóyí lókɔn.

¹⁵ Lo khúnbrɛn khɛ́n lo li néphan gbóngbo nánnánmi hromɛn ɔn, áyɔn salé lo pɛ hɛ́nphebhú brɛ. Khɛ́n kasé hɔ́n hrómɛn, néphan fe ebhú hɛ́nphe ká njɛ lɔ, Yankan nbrɛn bha lie hɔ́n lómɛ́si.

¹⁶ Lókhúnbrɛn hrómɛn, lo yí si lo khɔ tɛ bha kábrɛ kábrɛ adi ncɛ́n, tɛmɛ lo hɔ́n pɛ tɛ́ ɔ́nmɔn lo.

¹⁷ Hɔnsɛ́nhɔn, tɛmɛ ɔ́n tɛ́ mɛn yí yábhɛ mɛn tɛ. Lo tɛ yí tre se néphan ewú tɛ́, ló néphan énɛnsi khɔ́ lóyí lókɔn tho, ɔ́n wú wo, ló ɔ́n tɛ́ lóyábhɛ brɛ.

¹⁸ Mɛn phrɛ tɔ lóbhwe lókɔn se hɔ́n, ló thénthé lɔ, mɛn khɔ hɛ́ndu mɛn, mɛɛ́n tɔ lóbhwe sé hɔn npɔ sa: néphan búdúbúdú bha hɔ́n thethé etɛ́ yí sa néphan asa Krisi yábhletre mɛ a.

¹⁹ Áyí ábha chɛ́ wo liá, lónɔn wo ewá thúthá, ló wo ethɔ́n wo lábhɛ ali wo yankan. Áyí ali hɛ́ndɛ yí, lónɔn wo bho pɛ wo efúmɛ́n, ló áthéji yí phɔ mwanhɛ́n tɛɛ nɔn wo ébhu.

²⁰ Lo-ɛ lo khúbhɛ́ nɔn ali átho: ló lo chre lo ébo lo Hwánthe Jezwi-Krisi ali lo Dókáwo ochán tho bhá,

²¹ ló ánman tɛ́ lo théji nánmí lókɔn alepɛ sɛ́npɛ́ ojrɛn mɛ́n nguhá nánmí. Ńsɛ́npɛ́ áchɛ́ antɛ́ yí khúnbrɛn nɔn ánman mó tɛ́ áyí yábhɛ lókɔn.