MATHIE 7 - Ebrié New Testament 1996

Ɔ́n ne bhɔ́ néphan nánkhɛ kwa

¹ – Ɔ́n ne bhɔ́ néphan nánkhɛ kwa, ochɛ́sé Yankan lɔ ole bhɔ́ hɔ́n kwa.

² Átɛsalé hɔ́n si ɔ́n ma khɔ́ bhɔ́ néphan kwa ɔn, lóne nɔn Yankan lɔ bha khɔ́ bhɔ́ hɔ́n kwa, ló áyí ɔ́n mo pi yí se néphan ɔn, lónɔn Yankan lɔ bha bhó pí mɛ́n ékɛ sé hɔ́n.

³ Bítɛ khɛ́n ɛwú áyá phɛ́n abha hɛ hɔnsɛ́n mɛbhí hrómɛn, lókhɛ́n ɛ́le wú nkwágoyá abha hɛ nbrɛn mɛbhí hrómɛn ɛ?

⁴ Khɔ́ hɛ nɔn nkwágoyá bha hɛ mɛbhí hrómɛn o, ńthé kalósi ɛbhá gɛ khɔ́ kranmán hɛ hɔnsɛ́n lée: “Yɔ mɛn mó áyá phɛ́n abha hɛ mɛbhí hrómɛn yɛn e?”

⁵ Ńmɛ́n mɔ́nmɔnwo e, tɛmɛ ɛthwási hɔ́n nkwágoyá abha hɛ mɛbhí hrómɛn yɛn khɛ́n, lónɔn hɛ mɛbhí bha lɛ́, ló ɛ́bha wúsi khɔ́ bhó áyá phɛ́n abha hɛ hɔnsɛ́n mɛbhí hrómɛn yɛn.

⁶ Áyí atɛ créncré, ɔ́n ne khwɛ́n khwá ngbamán lé, khɛ́n wo kpá saya ti hɔ́n thwɛ. Ɔ́n ne khwɛ́n hɔ́n wábhɛ kúkhwá ngbróko hɛ́nmɛn, khɛ́n wo kpá chakhrɛ nthu.

Tɛmɛ ɔ́n sá yí, ɔ́n nɛn, ló ɔ́n há gbo

⁷ – Tɛmɛ ɔ́n sá yí, ló wo bhá sé hɔ́n, ɔ́n nɛn, ló ɔ́n ma gɛ, ɔ́n há gbo, ló wo bhá phwan hɔ́n si.

⁸ Átɛsalé lephan khɛ́n esá yí, ose. Mɛ́n ánnɛn, ángɛ. Ló lephan ehá gbo, mɛ́n lɔ óphwɛn si.

⁹ Wú hɔ́n hrómɛn, ápɛ lephan ábha bhó ábhú sé mɛ́n bhi kasé nkɛ sɛ kpánhɔn?

¹⁰ Wú ápɛ lephan ábha hɔ́n du sé mɛ́n bhi, kasé nkɛ sɛ cɔn?

¹¹ Hɔ́n lókɔn khɛ́n ɔ́n ni néphan phromɛn phromɛn, kasé ɔ́n yɛn áyí ayɔn ɔ́n khwɛ́n sé hɔ́n miɔn ɔn, ńthé kalósi akhɔ tɛ khɛ́n hɔ́n The abha tho mɛ́n, anman nɛ́n khwɛ́n áyí mwámwá sé néphan esɛ yí e?

¹² Áyí hɔ́n énɛn salé néphan nankhɛ otɛ́ sé hɔ́n ɔn, hɔ́n lɔ tɛmɛ ɔ́n tɛ́ lóyí yábhɛ brɛ sé wo. Lóyí Moyízi bidí le bhwetɔ́trémán hrɔ́ echɛ́ hɔ́n lée ɔ́n tɛ́ nɔn ali lókɔn.

Ákhúmɛ́n chɛ́chɛ́ bhri

¹³ – Ɔ́n sakhɔ́ ákhúmɛ́n chɛ́chɛ́ bhri ká khúthé! Átɛsalé ákhúmɛ́n phráa le ásitó phrákhó ɔ́nmɔn do lephan lo liá, lótɛ khɛ́n lóne nɔn néphan búdúbúdú sakhɔ́.

¹⁴ Khɛ́n ákhúmɛ́n bhri, le ásitó chróló ɔ́nmɔn do lephan ló ńmɛpɔ́bhá hrómɛn, ló néphan kpɛ́bɛn tɛɛ nɔn ágɛ khɔ́ lóne.

Áyá le mɛ́n mí ansó

¹⁵ – Ɔ́n há bhwetɔ́trémán kpakprámán mwanhɛ́n, wo khwɛ́n ngbankhran hrɔ́ sɔ́ bha gɛ hɔ́n. Khɛ́n wo hromɛn-ɛ, wo tɛsa ńphópho thɛnyanmán.

¹⁶ Wo yítɛ́ hrómɛn nɔn ɔ́n ma khɔ́ yɛ́n wo. Wú ógɛ bwan divɛn mí ńthó ya tho, lée nka ógɛ bwan fíge mí ńchrimɛ́ phɔ?

¹⁷ Áyá bhwá sómí bhwá, saji áyá phromɛn lɔ sómí phromɛn.

¹⁸ Áyá bhwá lé gɛ sómí phromɛn, ló saji áyá phromɛn lɔ lé gɛ sómí bhwá.

¹⁹ Áyá khúnbrɛn khɛ́n ále sómí bhwá ɔn, okɔ́ nkɛ há, ló ohɔ́n hátɛn.

²⁰ Lósi yábhɛ nɔn ɔ́n ma khɔ́ yɛ́n bhwetɔ́trémán kpakprámán, wo yítɛ́ hrómɛn.

Ɔ́n tɔ bhwe ló ɔ́n tɛ́ yí

²¹ – Néphan khɛ́n éche: “Hwánthe, Hwánthe ɔn,” léli wo khúnbrɛn nɔn wo bhá ló Átho Bhringbi khúbhɛ́, lókhɛ́n wo tɛɛ, wo etɛ́ mɛn Nthe abha tho thɛ́npɔ́ yí ɔn, wo nɔn wo bhá ló lóne.

²² Ákwabhɔ́ cí, néphan búdúbúdú bha kranmán mɛn lée: “Hwánthe, Hwánthe, nkɛé hɛ hɛ́n hrómɛn nɔn lo khɔ tɔ Yankan bhwe, nkɛé hɛ hɛ́n hrómɛn nɔn lo khɔ tranman nánnánmi phromɛn phromɛn, nkɛé hɛ hɛ́n hrómɛn nɔn lo khɔ tɛ hɛ́nmɛntányí búdúbúdú!”

²³ Lókhɛ́n mɛn mán kranmán wo gbée salé: “Ɔ́n féne mɛn hɛ́nmɛn, mɛn nɛn yɛn hɔ́n, hɔ́n lókɔn khɛ́n ɔ́n ni yíléletɛ́mán!”

Ńkhú mɔn phɔ bhwe wo tɔ

²⁴ – Lóhɛ́nthé, lephan aye mɛn bhwe mɛn tɔ, lókhɛ́n etɛ́ lóyí, lephan lókɔn, ńtɛsa bhweyɛ́nwo khɛ́n athan mɛ́n nkhú tre ábhú tho.

²⁵ Átho ndu khwalé, ńdubhɛ khúnbrɛn si, áphɛ́phrɛ khrákhrá le kranmɛn hali ńkhú lókɔn, khɛ́n ále halé bhrɔ́ɔ́, ábhú tho othan tre hɛ́nthé.

²⁶ Khɛ́n lephan tɛɛ aye mɛn bhwe mɛn tɔ, khɛ́n ale tɛ lóyí, lephan lókɔn, ńtɛsa gbwɛwo bɛn athan mɛ́n nkhú tre ńnánchɛ tho.

²⁷ Átho ndu khwalé, ńdubhɛ khúnbrɛn si, áphɛ́phrɛ khrákhrá le kranmɛn hali ńkhú lókɔn, lótɛ áca khwalé: ló lókhúnbrɛn lɔ phu hwáán.

Jezwi sɛ́npɛ́ srɛn áyí khúnbrɛn

²⁸ Lóka Jezwi tɔ bhwe lókɔnhɔn phu, mɛ́n si ńkhɔ ánnie yí, lóbhwe etán ápasá khúnbrɛn hɛ́nmɛn,

²⁹ átɛsalé mɛ́n, ánnɛn tɛ́sa bidíyɛ́nmán yí átɛ́. Lókhɛ́n mɛ́n, ánnie yí sɛ́npɛ́ mɛn.