MATHIE 28 - Ebrié New Testament 1996

Jezwi chan khúnɔn mɛn fe

¹ Saba mánji, dimánsi njuju fítaan, Mari achan Madala khúbhɛ́ le lójɔ Mari ɔ́nmɔn bha ewú álínɔn hromɛn.

² Lóyámɛ́n wo wu áyíta éjika kranmɛn; ló Hwánthe-mranchɛ́wo bɛn chantho diathé bha hɔn ábhú yɛn álínɔn mɛ́n, ló ńchre lótho.

³ Mɛ́n hɛ́nmɛn tɛsa ágbánkhran tɛn, ló mɛ́n ntráliɛ́ phwa phúnphú sa ńdu prígbɔ.

⁴ Ákhwíthá khóo ka sibómán hrómɛn, wo éfa, ló wo jrɛn sa néphan akhu a.

⁵ Yankan-mranchɛ́wo bho bhwetɔ́, ló ánkranmán ńmie sa: – Ɔ́n ne sókhú. Mɛn yɛn salé hɔ́n énɛn Jezwi khɛ́n wo chɛ ha áyábhletre phɔ;

⁶ ńnɛn ma krɛn, ńchan khúnɔn mɛn fe, sa lósi ńkhɔ tɔ a.Ɔ́n ma wú lósi ńna.

⁷ Tɛmɛ ɔ́n wá lo kranmán mɛ́n yíchwɛmán gbraa salé: “Ńchan khúnɔn mɛn fe, ló thénthé ánman no bo hɔ́n Galile, lóne nɔn ɔ́n ma wui.” Ábhwe khɛ́n mɛɛ́n gɛ kranmán hɔ́n nɔn ali lókɔn.

⁸ Ló ákhúsó le áphɔhá khóo ɔ́nmɔn hrómɛn, ńmie chan álínɔn mɛ́n wa gbragbra lo élɛ lómɛ́n sé Jezwi yíchwɛmán oyé.

⁹ Lópán nɛn Jezwi, ńma ywɛnli wo ló ántɔ sa: – Mɛn mɔ́ hɔ́n yí! Lótɛ wo tigbali nkɛ, wo hɔn nkɛ nta pɛ, ló wo éla nkɛ.

¹⁰ Ló Jezwi kranman nkɔn sa: – Ɔ́n ne sókhú. Tɛmɛ ɔ́n no kranmán mɛn hɔnsɛ́nhɔn lée wo ló Galile: lóne nɔn wo bhá wú mɛn.

Sibómán bhwe atɔ

¹¹ Lóka ńmie bha sitó élo, lónɔn ngbumán khɛ́n abo línɔn, wo hromɛn néphan fe sáji bha khúbhɛ́ hrómɛn, ló áyí atɛ, wo élɛ lómɛ́n sé nphahamán-óthemánhɔn oyé.

¹² Lótɛ nphahamán-óthemánhɔn le mrɔ́khómán ɔ́nmɔn bhúrɛhɛ́n: lóka wo sri bhwe, khɛ́n wo khúnbrɛn wo mɛ́n si, wo se ngbumán jɛtɛn khóo,

¹³ ló wo kranman nkɔn sa: – Kasé wo ébhi hɔ́n, ɔ́n tɔlé ńmréci ka hɔ́n ébosi khɛ́n ńná ka hɔ́n, mɛ́n yíchwɛmán bha sído mɛn bha hɔn nkɛ nánmí yɛn.

¹⁴ Kasé guvɛnɛ ye lóbhwe, lo nbrɛn lo bhá hɔ́n nkɛ thɛ́n, ló lo bhá tɔ bhwe do hɔ́n ká.

¹⁵ Ngbumán lɔ do wo jɛtɛn, ló ábhwe si tɛɛ nkɔn khɔ tɔ se wo ɔn, lóyí nɔn wo tɛ. Ló ábhwe lókɔn, álehɛ́n pi Jwifunɛ́n thethé kábrɛ kábrɛ ádi ncɛ́n.

Jezwi lɛ mɛ́n yíchwɛmán mɛ

¹⁶ Lo yíchwɛmán áwɔ́-brɛ lo Galile abha ábhóbhó tho si Jezwi lie wo.

¹⁷ Lóka wo wu nkɛ, wo bhɔ ntráhɛ́nlé wo éla nkɛ, lókhɛ́n wo hromɛn néphan fe le bhú mímí.

¹⁸ Jezwi tigbali wo ló ánkranmán nkɔn sa: – Wo bho átho le áthé ɔ́nmɔn sɛ́npɛ́ khúnbrɛn ha mɛn mɔ́n mɛn.

¹⁹ Tɛmɛ ɔ́n nó áthéji si khúnbrɛn, ló ɔ́n chɛ́ néphan khúnbrɛn ojrɛn mɛn yíchwɛmán; ló ɔ́n há wo nduhɛ́n Nthe, Nmi le Nánnánmi Créncré ɔ́nmɔn hɛ́n hrómɛn,

²⁰ ló ábhwe khúnbrɛn khɛ́n mɛn tɔ se hɔ́n ye, ɔ́n nie wo, ló ɔ́n chɛ́ wo ji. Ló tɛmɛ ɔ́n yɛ́n salé: mɛn man má hɔ́n phɔ kábrɛ kábrɛ ábha di lóka áthéji bha bhɔ́.