MATHIE 27 - Ebrié New Testament 1996

Wo hɔn Jezwi lo se Piláthi

¹ Ńjuju fítaan, nphahamán-óthemánhɔn le Jwifunɛ́n mrɔ́khómán khúnbrɛn ɔ́nmɔn bhúrɛhɛ́n, ló wo ésri Jezwi wɛ́n phɔ bhwe.

² Lóka wo gɛ nkɛ mɛ́ phu, ló wo hɔn nkɛ lo se Piláthi ali Rɔ́mɛn khúbhɛ́nɛ́n guvɛnɛ.

Judasi khú phɔ bhwe

³ Judasi khɛ́n aphɛ Jezwi li, lóka ńwu salé wo bhɔ nkɛ pɔn, lótɛ ńsa mɛ́n, ló fránkhi áphɛ́n le áwɔ́ khɛ́n ńdo, ńcu khwɛn man se nphahamán-óthemánhɔn le ńmrɔ́khómán,

⁴ ló ńkránman nkɔn sa: – Mɛn tɛ ne, átɛsalé mɛn hɔn lephan ale tɛ yíɛkɛ man se ákhú! Lókhɛ́n wo kranman nkɛ lée: – Wú lo bhwe bha lóhrómɛn? Hɛ míbrɛ nɔn ali hɛ bhwe o!

⁵ Judasi khwɛn jɛtɛn fɔkhwalé Yankan-khúthé, ńmo si no, ló ńhɔn ábhɛ́ di mɛ́n bhwa wɛn mɛ́n bɛn nbrɛn.

⁶ Nphahamán-óthemánhɔn khwɛn jɛtɛn ló wo étɔ sa: – Lo bidí le se mɔ́nsi salé lo khwɛ́n jɛtɛn yábhɛ lókɔn há Yankan-khúthé jɛtɛn láka hromɛn, lósi akhɔ tɛ ɔn, áli ńká jɛtɛn.

⁷ Lóka wo sri lóbhwe khɛ́n wo mɛ́n si, wo khwɛn lójɛtɛn lo phɛ npan-thánwo bithe, sa ási lókɔn olí matho si wo bhá bhó nthékhunɛ́n.

⁸ Lóhɛ́nthé achan lócí lókɔn abha di ncɛ́n, óche lóbithe lókɔn “ńká bithe”.

⁹ Ló bhwetɔ́tréwo Jeremi bhwe lókɔn atɔ, ásimɛ́n sa: “Wo khwɛn fránkhi áphɛn le áwɔ́ lókɔn (jɛtɛn khɛ́n Izraɛ khúbhɛ́nɛ́n khúnbrɛn mɛ́n si salé wo bhá sɔ́n nkɛ)

¹⁰ ló wo khwɛn phɛ npan-thánwo bithe, sa lósi Hwánthe khɔ tɔ lóbhwe se mɛn a.”

Piláthi ébhi Jezwi bhwe

¹¹ Wo hɔn Jezwi lo guvɛnɛ hɛ́nmɛn ló ánmi nkɛ sa: – Wú hɛ nɔn ɛli Jwifunɛ́n bhringbi? Ló Jezwi tɔ sa: – Lótɛ nɔn ɛtɔ o.

¹² Lókhɛ́n lómánji ka nphahamán-óthemánhɔn le mrɔ́khómán ephɛ́ bhwe há nkɛ tho, lóne ńnɛn tɔ bhwe brɛ nkalé.

¹³ Ló Piláthi kranman nkɛ sa: – Ábhwe khúnbrɛn lókɔn khɛ́n wo ephɛ́ há hɛ tho ɔn, wú ɛle yé?

¹⁴ Lókhɛ́n Jezwi le ka bhwetɔ́ khúnbrɛn lókɔn mɛ́n, áchɛ lóbhwe etán guvɛnɛ hɛ́nmɛn kábrɛ.

Wo bhɔ Jezwi pɔn sa wo bhá wɛ́n nkɛ

¹⁵ Ló ákakhúnbrɛn, kasé wo ebhá lí Phákhe ɔn, guvɛnɛ dimán khúthékáwo bɛn, ló ápasá lephan khɛ́n énɛn nɔn ándiman.

¹⁶ Lóka yábhɛ lókɔn ɔn, khúthékáwo khóo bɛn bháne óche Jezwi Barabási.

¹⁷ Ápasá bhurɛhɛ́n ya, ló Piláthi ébhi wo sa: – Lókhúthékáwo bɛn nɔn hɔ́n énɛn salé mɛn diman sé hɔ́n ɛ: Wú Jezwi óche Barabási lée nka Jezwi óche Mesi?

¹⁸ Khɛ́n Piláthi yɛn salé Jezwi nkɔn hɔn bha se ɔn, ńmɛsa mɛn nɔn nkɔn khɔ hɔn nkɛ.

¹⁹ Lóka Piláthi bha ákwabhɔ́ gɔn ntɔ́nyán, lónɔn mɛ́n bhia chɛ lephan bɛn bha ékranmán nkɛ salé: “Ɛle hɔ́n hɛ nbrɛn ká Jezwi lókɔn ale tɛ yíɛkɛ bhwetɔ́ hrómɛn bhrɔ́ɔ́, átɛsalé ncɛ́n mréci, ńnájú mɛn, mɛ́n hɛ́nthé áyí dri mɛn phɔ kpɛ́ɛ́n.”

²⁰ Ló nphahamán-óthemánhɔn le mrɔ́khómán ɔ́nmɔn ékhɔnmán ápasá phɔ salé nkɔn chɛ́ odimán Barabási, khɛ́n Jezwi-ɛ nɔn wo wɛ́n.

²¹ Guvɛnɛ cu bho bhwetɔ́, ló ánmi ápasá lée: – Néphan mɔn lókɔn hromɛn ɔn, lólephan bɛn nɔn hɔ́n énɛn salé mɛn diman sé hɔ́n ɛ? – Ló wo nkɛé! Lo énɛn salé ɛdimán Barabási.

²² – Ló Piláthi ébhi nkɔn sa, ńthé ébí nɔn hɔ́n énɛn salé mɛn tɛ́ Jezwi lókɔn óche Mesi ɛ? Ló wo khúnbrɛn wo nkɛé: – Tɛmɛ ɛchɛ nkɛ há áyábhletre phɔ!

²³ – Ló Piláthi cu bhi wo sa, ébí nbrɛn nɔn ńtɛ yan ɛ? Khɛ́n wo elúkhwɛ́ wo sɛ́npɛ́ khúnbrɛn mɛn sa: – Tɛmɛ ɛchɛ́ nkɛ há áyábhletre phɔ!

²⁴ Lóka Piláthi wu salé álepɛ ábhwe brɛ eyɔ́n se, khɛ́n ńkhwɛ́lu pán nɔn ethúbhɔ ɔn, lótɛ ńkhɔ ndu cho mɔ́n ápasá hɛ́nmɛn ló ńtɔ sa: – Lephan lókɔn, mɛn nɛn ma mɛ́n khú bhwetɔ́ hrómɛn! Lée hɔ́n míbrɛ nɔn ali hɔ́n bhwe!

²⁵ Ló ápasá khúnbrɛn étɔ sa: – Kasé ńkhu, tɛmɛ mɛ́n nká osa hɛ́n lo le lo miɔn ɔ́nmɔn tho!

²⁶ Piláthi diman Barabási se wo, ńchɛ wo bhra Jezwi mɛ́, ló ńhɔn nkɛ se wo lo chɛ ha yábhletre phɔ.

Ngbumán éha Jezwi lia

²⁷ Piláthi ngbumán hɔn Jezwi lo guvɛnɛ bháthó, ló wo ngbumán khúnbrɛn wo jekhali nkɛ.

²⁸ Wo bwan mɛ́n ntráliɛ́ yɛn, ló wo hɔn khókhóthu nannan bɛn sɔ nkɛ.

²⁹ Lómánji, wo gbɛ ńthó kpró bɛn bhu nkɛ hɛ́n, ló wo bho ńgochro bɛn ka mɛ́n liémɔn ngbɛthé. Wo jran bhɔlé nkɛ hɛ́nmɛn, wo éha nkɛ lia, ló wo étɔ sa: – Jwifunɛ́n bhringbi, lo ebhɔ́ hɛ yí!

³⁰ Wo éphu mísɛ́-ndu há nkɛ phɔ, ló wo bho ńgochro wo ébhra mɛ́n hɛ́nphe.

³¹ Lóka wo ha nkɛ lia phu, wo hɔn khókhóthu yɛn, wo cu khwɛn mɛ́n ntráliɛ́ sɔ-ɛ, ló wo hɔn nkɛ ɔ́nmɔn lo wo echɛ́ há áyábhletre phɔ.

Wo chɛ Jezwi ha yábhletre phɔ

³² Lóka wo chan khúbhɛ́ hrómɛn thandi wo élo, wo ywɛnli Sirɛnɛn khúbhɛ́ sɛ bɛn óche Simɔn, ngbumán si nkɛ ha, ló ńhɔn Jezwi yábhletre.

³³ Wo di ási óche Gɔgota, lóthé nɔn ali “Hɛ́nphe nchwe si”.

³⁴ Lóne nɔn wo hɔn áyí nɔ́nkpó bɛn khrɛ divɛn, ló wo hɔn se Jezwi lée annán; khɛ́n lóka ńdɔn mɛ́n, lópán ńnɛn cu nan npɔhɔ́n.

³⁵ Wo chɛ Jezwi ha áyábhletre phɔ, wo lwa mɛ́n ntráliɛ́, ló wo ti ngbamán, ochɛ́sé bhwetɔ́tréwo bhwe atɔ osímɛ́n sa: wo lwa mɛn ntráliɛ́, ló mɛn khókhóthu ɔn, wo ti ngbamán.

³⁶ Ló wo chethé lóne wo ébo nkɛ.

³⁷ Ló mɛ́n hɛ́nphe tho, wo lrɛ yíbɛn tre, ló áyí lókɔn wo lrɛ ɔn, élie lóyí achɛ khɛ́n wo bhɔ nkɛ pɔn: “Lephan lókɔn, mɛ́n nɔn ńni Jezwi ali Jwifunɛ́n bhringbi.”

³⁸ Wo chɛ khokhrohamán mɔn lɔ ha áyábhletre phɔ, bɛn ya Jezwi liémɔn si, lójɔ ya nkɛ mránkhu si.

³⁹ Néphan khɛ́n akhɔ lóne ehɛ́n éjiká hɛ́nphe, wo etá nkɛ,

⁴⁰ ló wo étɔ sa: – Nkɛé hɛ nɔn ɛ́tɔlé ɛ́bha ca Yankan-nkhú khwálé, ló ɛ́bha bhó ńcíbhí bhwaliá tɛɛ thán, kasé ɛli Yankan Mi, do hɛ nbrɛn ka, chan áyábhletre phɔ diathé a!

⁴¹ Lósi yábhɛ brɛ, nphahamán-óthemánhɔn, bidíyɛ́nmán le mrɔ́khómán ɔ́nmɔn lɔ khɔ éha nkɛ lia é, ló wo étɔ sa:

⁴² – Ńdo néphan nánkhɛ nkalé, wú ánnɛn gɛ do mɛ́n bɛn nbrɛn-ɛ ká! Nkɛé mɛ́n ńni Izraɛ khúbhɛ́nɛ́n bhringbi? Ńthé tɛmɛ anchán áyábhletre phɔ diathé, ló lo bhui mímí.

⁴³ Ńmo mɛ́n mwasrui tre Yankan tho ló ńtɔ sa: “Mɛn ni Yankan Mi.” Áyɔn! ńthé óbha wú kasé Yankan bha do-e ká!

⁴⁴ Ló khokhrohamán mɔn khɛ́n ochɛ ha yábhletre phɔ, wo lɔ lósi tɛɛ wo khɔ wo etá nkɛ é.

Jezwi khu

⁴⁵ Lóka ácí ya bháca, dubhlékhu do ákhúbhɛ́ hrómɛn si khúnbrɛn kábrɛ kábrɛ ádi ńjuka wáchɛn bhwaliá.

⁴⁶ Lóka ácí li ńjuka wáchɛn bhwaliá, Jezwi lukhwɛ́ khrákhrá bɛn sa: – Eli, Eli lama sabatani? (lóthé nɔn ali sa: “Mɛn Yankan, mɛn Yankan bítɛ khɛ́n ɛyɔ mɛn ka ɛ?”)

⁴⁷ Néphan fe khɛ́n abha lóne ye nkɛ tɔ́, ló wo elúkhwɛ́ tɔ sa: – Ɔ́ndi njɛlé a, ánche Eli!

⁴⁸ Lóyámɛ́n, wo hromɛn lephan bɛn wa lo bho mra sɔ divɛnkɔn hromɛn, ńmo gɛha áyá mɛ́n, ló ńhɔn tiatre Jezwi lé sa nkɛ nán.

⁴⁹ Lókhɛ́n dɔnbɛn étɔlé: – Ɔ́n khwaphɔlé se owú, kasé Eli bha do-e ká!

⁵⁰ Lótɛ Jezwi cu lukhwɛ́ khrákhrá bɛn npɔ, lópán ńkhu.

⁵¹ Lóka yábhɛ brɛ, ádɛgɔn khɛ́n wo bu tre Yankan-khúthé chantho nran ádi thé. Áyíta éjika, ló ńmóbhó énran,

⁵² álínɔn phwan, ló Yankan-gbemán búdúbúdú khɛ́n akhu ɔn, wo cu saji bha bha mɛpɔ́.

⁵³ Wo chan álínɔn hromɛn thandi, ló lóka Jezwi chan khúnɔn mɛn fe, wo lo Jeruzalɛ́mɛn ali ákhúbhɛ́ créncré, ló néphan búdúbúdú wú wo lóne.

⁵⁴ Rɔ́mɛn khúbhɛ́nɛ́n ngbumán-óthe bhrɔ́khó le ngbumán khɛ́n ébo Jezwi, lóka wo wu áyíta éjika le áyí khúnbrɛn lókɔn etɛ́, ákhwíthá ka wo hromɛn, ló wo étɔ sa: “Mímí nbrɛn, lephan lókɔn ńni Yankan Mi!”

⁵⁵ Ńmie búdúbúdú ya lóne, khɛ́n wo ya thwethwemɛn-áan wo ewú lóyí. Wo mie lókɔn, wo chan Galile-áan gɛ Jezwi thá, ló wo khwɛn nkɛ hɛ́nmɛn nɛn.

⁵⁶ Wo mie lókɔn ɔn, wo nɔn wo li Mari achan Madala khúbhɛ́, Mari ali Jakhi le Jozɛfu ɔ́nmɔn wo man le Zebede miɔn wo man.

Wo hɔn Jezwi ka álínɔn hromɛn

⁵⁷ Lóka ácí gu, lephan bɛn ali bhringbi óche Jozɛfu achan Arimate khúbhɛ́ bha. Sɛ lókɔn, mɛ́n lɔ ńni Jezwi yíchwɛmán hrómɛn lephan bɛn.

⁵⁸ Ńno Piláthi yé ansá mɔ́nsi ló anhɔ́n Jezwi nánmí, ló Piláthi se lóphɔ mɔ́nsi.

⁵⁹ Lóka ńhɔn Jezwi nánmí, ńmo kandanman pɔ́pɔ́ bɛn ju

⁶⁰ ló ńhɔn nkɛ no mo mɛ́n nbrɛn línɔn khɛ́n ńchɛ wo bɔn kalé abha ńmú hrómɛn. Ńhɔn ábhú khóo bɛn mrwɛn lómɛ́n, ló ńno.

⁶¹ Mari achan Madala khúbhɛ́ le Mari lójɔ ɔ́nmɔn ya lóne, ló wo chre álínɔn hɛ́nmɛn.

Ngbumán ébo álínɔn

⁶² Lóka ácí ci, ácí khɛ́n ogɛ áli ácí ócɔ saba tɛ́, nphahamán-óthemánhɔn le Fariziɛnnɛ́n ɔ́nmɔn, wo khúnbrɛn wo lo Piláthi yé

⁶³ wo ékranman nkɛ sa: – Hwánthe, édi lo mwanhɛ́n salé kpakpráwo lókɔn, mɛ́n ka ńma mɛpɔ́ ɔn, mɛ́n nkɛé: “Ńcíbhí bhwaliá tɛɛ, mɛ́n man chán khúnɔn mɛn fe.”

⁶⁴ Lóhɛ́nthé tɛmɛ ɛsé mɔ́nsi ló lo wúsi khɔ́ bo álínɔn kábrɛ kábrɛ odi ńcíbhí bhwaliá, ochɛ́sé mɛ́n yíchwɛmán olé bha hɔ́n mɛ́n nánmí sído, khɛ́n lómánji wo kranmán aféchwe lée: “Ńchan khúnɔn mɛn fe.” Átɛsalé ńkpakprá lókɔn wo bhá lí, ló-ɛ bha khɔnman brɛn ásithwá ékɛ.

⁶⁵ Ló Piláthi kranman nkɔn sa: – Hɔ́n lɔ ɔ́n pɛ ngbumán ábha gɛ bosi. Tɛmɛ ɔ́n no, ló hɔ́n si tɛɛ ɔ́n ma khɔ́ bo si khɛ́n ábha yɔ́n, tɛmɛ ɔ́n tɛ́.

⁶⁶ Ló wo lo. Lóka wo phu álínɔn mɛ́n si mwámwá, ló wo khwɛn ngbumán jekhali ya ébosi.