EBRENƐ́N 9 - Ebrié New Testament 1996

Áthéji si okhɔ́ la Yankan le átho si okhɔ́ la Yankan

¹ Akprɔbha athwasi ńpɛ mɛ́n bidí élie néphan lósi okhɔ́ la Yankan, saji ńpɛ mɛ́n Yankan-nkhú bɛn bha théji, néphan la Yankan lóhrómɛn.

² Wo than ádɛgɔn-nkhú bɛn, lóphɛ́nta khɛ́n asa lo hɛ́nmɛn, lóne nɔn óche ási atɛ créncré. Lóne ápɛ khanniɛnyá tábrɛ le kpánhɔn khɛ́n okhwɛn ha npha se Yankan.

³ Ló ádɛgɔn-nkhú wo than, lóphɛ́nta khɛ́n asa bha mánji, lóne óche ási atɛ créncré brɛn ási khúnbrɛn.

⁴ Lóne áyí abha nɔn ali, ńcí nphaha túprán khɛ́n wo fɔ́n kprɛ́nkhuma lótho, akprɔbha láka wo bho ńcí mɛn tɛ, ló láka lókɔn, áyí abha lóhrómɛn lónɔn ali apan wo bho ńcí mɛn tɛ, khɛ́n ńnɛn óche mánɛn bha lóhrómɛn, Arɔn yágrɛ khɛ́n wo tɛ ńbi tre lótho, le ńmú phrá-nphrá mɔn khɛ́n wo lrɛ ábidí tre lótho.

⁵ Láka lókɔn, wo tɛ néphan ale nphrɛ́mɔn tre lótho; ló néphan lókɔn wo élie salé Yankan bháne, ló ási khɛ́n Yankan yɔ́ ne phɔ́ néphan, lóne wo phwan wo nphrɛ́mɔn do si khúnbrɛn. Lókhɛ́n thénthé áyí khúnbrɛn lókɔn, áleli lóka ógɛ tɔ lóbhwe símɛ́n.

⁶ Lóka wo tɛ áyí khúnbrɛn lókɔn phu, ńkhú lókɔn hromɛn, lóphɛ́nta khɛ́n asa lo hɛ́nmɛn, ácí khúnbrɛn nphahamán ká lóhrómɛn lí wo júmán.

⁷ Lókhɛ́n ńkhú lókɔn hromɛn, lóphɛ́nta khɛ́n asa bha mánji, nphaháwo bhrɔ́khó míbrɛ nɔn agɛ mɔ́nsi áká lóhrómɛn. Ló ápá brɛ hromɛn, anká lóne dɔnbrɛ. Ló áyí khɛ́n anmɔ́ ɔ́nmɔn nó lóne, lónɔn ali bran nká, ali áyí anmɔ́ no ha npha sé Yankan mɛ́n nbrɛn ne hɛ́nthé le ápasá ne hɛ́nthé, ápasá ne atɛ khɛ́n wo le yɛn sa wo tɛ ne.

⁸ Nánnánmi Créncré khɔ ábhwe khúnbrɛn lókɔn phɔ élie lo salé kasé ási atɛ créncré bháne ntɔ́nyán lókhɛ́n wo elí júmán lóhrómɛn, ási atɛ créncré brɛn ási khúnbrɛn, lókhúmɛ́n si lé gɛ phwan haphá kálé.

⁹ Ábhwe lókɔn áli yandran bhwe, ló yandran lókɔn étɔ thénthé khúbhɛ́ bhwe. Ló ábhwe lókɔn élie salé áyí khɛ́n okhwɛn wo éha npha sé Yankan, lóyí khúnbrɛn lókɔn wo etɛ́, áli yíbɛn kasé lephan ɛ́la Yankan, ále gɛ chó hɛ thɛ́n chán.

¹⁰ Átɛsalé wo lókɔn, wo yí khɛ́n wo khwɛn wo éla Yankan, lónɔn ali ńnɛn olí, ńdɛ onán, le wo yítɛ́ khɛ́n ali áphɔchó dɔndɔn. Lóyí khúnbrɛn áli ábidí bɛn lóyítɛ́ sakhɔ ńnánmí hrómɛn. Lóyí lókɔn áli áyíbɛn atre lóne kábrɛ kábrɛ ádi lóka Yankan tɛ yí pɔ́pɔ́ nánkhɛ thandi.

¹¹ Lókhɛ́n Krisi lókɔn ali nphaháwo bhrɔ́khó khɛ́n apɛ áyí khúnbrɛn abha krɛn théji, mɛ́n bhá anmán má, ńma phu. Ló ádɛgɔn-nkhú khɛ́n thénthé anní júmán lóhrómɛn, áli ńkhú bɛn aban, ayɔn brɛn ló abha áthéji. Ló ńkhú lókɔn, áleli néphan than. Lóthé nɔn ali salé ńkhú lókɔn, áleli yíbɛn abha krɛn théji.

¹² Lóka Krisi ka ási atɛ créncré brɛn ási khúnbrɛn, ńka lóne dɔnbrɛ pán áphu. Lóka lókɔn áyí ńmo no ha npha áleli ciɛ nká, áleli ndwa nká, lókhɛ́n mɛ́n bɛn nbrɛn nká nɔn ńmo ha npha. Ló mɛ́n swá lókɔn ńswa lo, áli yíbɛn ábha tré lóne godo.

¹³ Ló kasé wo ebhó ciɛ nká, ndwa sɛ nká, le ndwa bhie khɛ́n wo hatɛn akho liɛ lótɛnthu fɔn néphan phɔ, átɛsalé néphan lókɔn ábidí étɔlé wo phɔ le chan, ló wo ebhú salé áyí yábhɛ lókɔn wo etɛ́, lónɔn ebhá chɛ́ wo phɔ chán, saji wo ebhú salé áyí khúnbrɛn lókɔn wo etɛ́, lónɔn ebhá chó wo yíléle yɛn wo phɔ.

¹⁴ Ló kasé áli lóyábhɛ nɛn, Krisi nká li áyíbɛn apɛ sɛ́npɛ́ brɛn lóyí khúnbrɛn lókɔn. Átɛsalé Nánnánmi lókɔn abha mɛ́n phɔ, mɛ́n nɔn ńni Nánnánmi bɛn abha mɛpɔ́ godo, lónɔn achɛ ńgɛ hɔn mɛ́n bɛn nbrɛn se Yankan sa áyíbɛn lóphɔ chan khɛ́n obho ha npha se Yankan. Ló mɛ́n nká nɔn ebhá chó júmán phromɛn ále gɛ tɛ́ yíɛkɛ sé lephan bhwe yɛn lo thɛ́n hrómɛn, ochɛ́sé lo gɛ lí júmán sé Yankan abha mɛpɔ́.

¹⁵ Lóyí hɛ́nthé khɛ́n Krisi se lo akprɔbha pɔ́pɔ́ lókɔn nɔn ali salé, néphan khɛ́n Yankan che bha mɛ́n phɔ, wo gɛ ndubhɔ́ álephú ali áyíbɛn Yankan phrɛ tɔ lóbhwe tre néphan lé. Ló lóbhwe lókɔn, lónɔn ali áyí ágɛ tɛ́. Átɛsalé Krisi khu, ló mɛ́n khú nɔn aswa néphan yɛn wo neyítɛ́ hrómɛn, lóka wo bha akprɔbha athwasi bhwetɔ́ hrómɛn.

¹⁶ Kasé wo tɛ aja hrɔ́ bɛn tre, énɛn salé lephan atɛ áhrɔ́ lókɔn ankhú, lókhɛ́n ógɛ bhɔ́ lókwa.

¹⁷ Kasé lephan tɛ aja hrɔ́ tre lókhɛ́n ńma mɛpɔ́ ntɔ́nyán, áhrɔ́ lókɔn álepɛ thé. Lókhɛ́n lóka aja nthe khu, lónɔn ógɛ tɔ aja hrɔ́ bhwe.

¹⁸ Lóhɛ́nthé nɔn akprɔbha athwasi, lóbhwetɔ́ sakhɔ ńká hrómɛn.

¹⁹ Áyí Moyízi thwasi tɛ, lónɔn ali salé, ábhwe khúnbrɛn abha ábidí hrɔ́ hrómɛn, ńtɔ lóbhwe se ápasá ye. Lómánji ńjan Izɔphu yá cɛn bɛn, ló ńmo gbankhran yɔnmrɛ nannan thu lómɛ́n. Ló áyí lókɔn, lónɔn ńmo nrwɛn ábidí hrɔ́, ló ńcu mo nrwɛn ápasá khúnbrɛn phɔ, lóka ńdo ndwa nká le ciɛ nká ha yí mɛn, ló wo bho ndu khrɛ.

²⁰ Ló Moyízi étɔlé: “Áyí lókɔn, lónɔn ali ńká Yankan ya lótho si akprɔbha, akprɔbha khɛ́n ali ábidí Yankan énɛn salé ɔ́n ji.”

²¹ Lóyábhɛ brɛ, Moyízi bho nká nrwɛn ádɛgɔn-nkhú, ló ńcu mo nrwɛn áyí khúnbrɛn obhó lí júmán Yankan-khúthé.

²² Mímí nbrɛn ábidí étɔlé, ńká nɔn wo bho cho áyí khúnbrɛn phɔ chan, ló kasé khɛ́n ńká ekhwálé, lónɔn Yankan yɔ́ ne phɔ́ néphan.

Krisi hɔn mɛ́n nbrɛn ha npha, ló ńhɔn ńne yɛn lo tho

²³ Ló áyí khúnbrɛn lókɔn wo étɔ lóbhwe ali áthéji yí, áli áyíbɛn akhɔ átho yí abha lóne, ló énɛn salé wo chó lóphɔ chán sa átho yí. Lókhɛ́n áyí ali átho yí abha lóne, lólɔ ácu énɛn ńphaha yíbɛn ayɔn brɛn lókɔn.

²⁴ Átɛsalé ási atɛ créncré ali ńkhú bɛn néphan bho mɔ́n than, álepɛ cí Krisi ka lóne. Ńkhú lókɔn, khɔ́ pán ákhɔ ńkhú mímí abha átho. Lókhɛ́n átho bɛn nbrɛn nɔn ali ási Krisi lo, ló lóne nɔn lo hɛ́nthé ńthándi ya Yankan hɛ́nmɛn ántɔ bhwe do lo ká.

²⁵ Ási atɛ créncré brɛn ási khúnbrɛn, lónɔn ali ási bɛn Jwifunɛ́n nphaháwo bhrɔ́khó ló lóne dɔnbrɛ ápá hrómɛn. Ló áyí khɛ́n anmó ɔ́nmɔn nó lóne, lónɔn ali bran nká. Lókhɛ́n lóka Krisi lo átho, ńno lóne dɔnbrɛ lópán áphu, ló léli salé ánno hɔ́n mɛ́n nbrɛn ha npha ákakhúnbrɛn sa áyíbɛn atre anmán tɛ́ ncɛ́n le npi.

²⁶ Ló kasé áli lóyábhɛ nɛn, énɛn salé achan lóka Yankan tɛ áthéji, áyí ochán lóne khú Krisi phɔ kábrɛ kábrɛ odi ncɛ́n, lókhɛ́n léliló. Lóka áyí khúnbrɛn nɛnsi égbalí ácí aphuji, Krisi bha áthéji dɔnbrɛ lópán áphu. Ńma salé anhɔ́n mɛ́n nbrɛn ha npha, ló anhɔ́n ne yɛn néphan tho.

²⁷ Áyɔn salé lephan okhú dɔnbrɛ, lókhɛ́n lómánji Yankan obhɔ́-ɛ kwa.

²⁸ Lóyábhɛ brɛ, Krisi lɔ hɔn mɛ́n nbrɛn ha npha dɔnbrɛ, ochɛ́sé anhɔ́n néphan búdúbúdú ne yɛn. Ánman sáji má ndɔn mɔn hrómɛn, lókhɛ́n áleli ńne bhwetɔ́ hɛ́nthé, lókhɛ́n énɛn salé anman swa néphan achre ébo-e.