EBRENƐ́N 8 - Ebrié New Testament 1996

Jezwi nɔn ali lo nphaháwo bhrɔ́khó

¹ Lo bhwe khúnbrɛn lo tɔ, lóthé nɔn ali salé átho lóne, lo pɛ nphaháwo bhrɔ́khó bɛn bháne achre Bhringbi yákhru tho. Ló áyákhru lókɔn, átre Yankan sɛ́npɛ́wo liémɔn si.

² Ló mɛ́n nɔn ńni lephan abha ási atɛ créncré elí júmán ali nphaháwo bhrɔ́khó júmán. Lóthé nɔn ali salé ádɛgɔn-nkhú khɛ́n ńma lóhrómɛn, lónɔn ali ádɛgɔn-nkhú mímí lo Hwánthe than, ló ádɛgɔn-nkhú lókɔn áleli lephanmi than.

³ Lephan kasé ɛlí nphaháwo bhrɔ́khó júmán, wo san hɛ salé ɛbhó ápɔ́yí le nphaha yí lo sé Yankan. Lóhɛ́nthé lephan khɛ́n ali lo nphaháwo bhrɔ́khó, mɛ́n lɔ áyɔn salé anmó yí no ha npha sé Yankan.

⁴ Ló mɛ́n lókɔn khɛ́n wo étɔ mɛ́n bhwe, kasé anmá áthéji, nphaháwo nwɛ́ lɔ ánnɛn gɛ ní. Átɛsalé Jwifunɛ́n bidí hrómɛn ápɛ nphahamán bháne, ló wo nɔn wo gɛ mɔ́nsi wo bhó yí ha npha sé Yankan.

⁵ Ló wo nphahamán júmán lókɔn wo elí, ló le átho ékɛ ɔ́nmɔn áleli brɛ. Wo júmán lókɔn wo elí, áli áthéji júmán, khɔ́ pán ákhɔ átho yí, ló áyí abha átho, lónánphɔ nɔn ali lókɔn wo ewú áthéji. Lóyábhɛ brɛ nɔn ali Moyízi bhwetɔ́. Lóka anmán thán akprɔbha pɔ́pɔ́ dɛgɔn-nkhú, Yankan krɛnmɛn lée: “Áyí lókɔn ɛbhá tɛ́, tɛmɛ ɛhámwanhɛ́n ɛtɛ́ okhɔ́ áyí khɛ́n mɛn hɔn nie hɛ wu ábhóbhó tho.”

⁶ Lókhɛ́n thénthé Jezwi nphaháwo júmán ali, áyɔn brɛn wo júmán wo li. Átɛsalé akprɔbha pɔ́pɔ́ lókɔn áyɔn brɛn áyí khúnbrɛn, átɛsalé áli áyíbɛn wo hɔn tre ábhwetɔ́ bhwábhwá tho, ló lótho nɔn Yankan ya bhɔli phɔ tɔlé néphan bha gɛ mwá.

⁷ Kasé akprɔbha athwasi hromɛn, álepɛ yíbɛn khɛ́n ayan, wo bha lé gɛ tɔlé wo nɛn akprɔbha nankhɛ.

⁸ Lókhɛ́n ápɛ áyí Yankan hwannɛ́n tɛ yan, lóhɛ́nthé Yankan tɔlé: “Ácí ebhá, ló lócí lókɔn, mɛn le Izraɛ féchwe le Juda féchwe ɔ́nmɔn óbha sí akprɔbha pɔ́pɔ́ bɛn ló ábhwe lókɔn, lo Hwánthe nɔn atɔ.

⁹ Ló akprɔbha pɔ́pɔ́ lókɔn, abha lé tɛ́sa akprɔbha khɛ́n mɛn le wo jisɛmánhɔn ɔ́nmɔn osi lócí lókɔn nɔn mɛn khwɛn wo ha mɛn mɔ́n mɛn ló mɛn khwɛn wo chan Ejiphithi khúbhɛ́ thándi. Wo le dɛn ji akprɔbha lókɔn, lóhɛ́nthé mɛn lɔ mɛn nɛn ha wo bhwa ló ábhwe lókɔn, lo Hwánthe nɔn atɔ.

¹⁰ Ló thénthé akprɔbha khɛ́n mɛn le Izraɛ khúbhɛ́nɛ́n ɔ́nmɔn lo ebhá sí, lónɔn ali lókɔn! Hwánthe étɔlé: ácí khɛ́n abha hɛ́nmɛn ebhá mɛn mán mó mɛn bidí ká wo nánnánmi hromɛn. Mɛn mán nrɛ mɛn bidí ká wo thɛ́n hrómɛn: mɛn mán ní wo Yankan ló wo bhá lí mɛn néphan.

¹¹ Ló wo hromɛn álepɛ lephan ábha lie mɛ́n jɔ bhwe saji álepɛ lephan ábha lie mɛ́n khúbhɛ́ lephan bhwe khɛ́n ábha tɔlé: ‘Tɛmɛ ɛyɛ́n Hwánthe.’ Átɛsalé wo khúnbrɛn wo bhá yɛ́n mɛn, achan wo khónkhó le wo chɛ́-nchɛ́.

¹² Mɛn mán yɔ́ wo ne phɔ́ wo, ló wo yíléletɛ́ bhwe bha lé cu di mɛn mwanhɛ́n.”

¹³ Lóka Yankan étɔ akprɔbha pɔ́pɔ́ bhwe, lóthé nɔn ali salé, ńchɛ akprɔbha athwasi ájrɛn akprɔbha lɔ́lɔ́. Ló áyí khúnbrɛn khɛ́n ali áyí lɔ́lɔ́ khɛ́n atɛsa ádɛgɔn bwɛn, lókhúnbrɛn lókɔn áli áyíbɛn ákhakpɛɛ́ ábha hɛ́n.