EBRENƐ́N 7 - Ebrié New Testament 1996

Mɛkhisedɛkhi ali bhringbi le nphaháwo

¹ Mɛkhisedɛkhi lókɔn wo étɔ mɛ́n bhwe, mɛ́n nɔn ńni bhringbi abha Salɛmɛn khúbhɛ́, ló mɛ́n nɔn ńni Yankan abha tho nphaháwo. Lóka Ábrahámɛn lo ekútha lóne gotho, lókhɛ́n mɛ́n mɔ́n ka ńmringbilímán bhwelí lókɔn tho, Mɛkhisedɛkhi lo ywɛnli Ábrahámɛn ásitó, ló ńmɔ nkɛ ndu.

² Ló áyí khúnbrɛn ńkhwɛn átha hromɛn, ńmúri ńdɔn áwɔ́, ló ńmo lóphɛ́nta bɛn se Mɛkhisedɛkhi. Ló Mɛkhisedɛkhi lókɔn mɛ́n hɛ́n ńni, lóthé nɔn ali “Bhringbi atɛ́ yí apriman”; ló mɛ́n nɔn ńni bhringbi Salɛmɛn khúbhɛ́, lóthé nɔn ali “Bhringbi apɛ thɛ́nkhwálé”.

³ Mɛkhisedɛkhi li lephan bɛn alepɛ mɛ́n the, alepɛ mɛ́n man, alepɛ mɛ́n jisɛ. Álepɛ ási bɛn khɛ́n wo étɔ mɛ́n hó le mɛ́n khú ɔ́nmɔn phɔ bhwe. Mɛ́n, ńtɛsa Yankan Mi. Ló mɛ́n nphaháwo ńni, ábha tré lóne godo.

⁴ Tɛmɛ ɔ́n yɛ́n salé Mɛkhisedɛkhi lókɔn ńni lephan khóo! Ló Ábrahámɛn ali lo jisɛ, áyí khúnbrɛn ńkhwɛn átha hromɛn, ńmúri ndɔn áwɔ́, ló ńmo lóphɛ́nta bɛn se Mɛkhisedɛkhi.

⁵ Ló Levi jímiɔn hromɛn, néphan khɛ́n ali nphahamán, ábidí se wo mɔ́nsi salé áyí khúnbrɛn khɛ́n Izraɛ khúbhɛ́nɛ́n khwɛn bha éha npha, wo bhuri ndɔn áwɔ́, ló wo bhó lóphɛ́nta bɛn. Lóthé nɔn ali salé néphan lókɔn khɛ́n akhwɛn áyí lókɔn bha éha npha, wo lɔ wo li ákhúbhɛ́nɛ́n ali Ábrahámɛn jímiɔn.

⁶ Mɛkhisedɛkhi le li lephan achan Levi mándo hromɛn, lókhɛ́n áyí Levi bho bha éha npha se, wo bhuri ńdɔn áwɔ́, ńmo lóphɛ́nta bɛn, ló ńmɔ Ábrahámɛn ndu. Ábrahámɛn lókɔn, mɛ́n nɔn Yankan phrɛ tɔ bhwe se.

⁷ Ló áli ábhwe mímí salé kasé ɛbhɔ́ lephan ndu, ɛbanbrɛn lephan khɛ́n ɛbhɔ́ ndu.

⁸ Levi jímiɔn khɛ́n wo khwɛn áyí ndɔn áwɔ́ phɛ́nta se, wo li néphan cíbɛn wo bhá khú. Lókhɛ́n Mɛkhisedɛkhi bhwetɔ́ hrómɛn, Yankan hrɔ́ étɔlé: lephan khɛ́n wo bho áyí lókɔn ha npha se, mɛ́n ńni lephan bɛn abha mɛpɔ́.

⁹ Ló ógɛ tɔlé lóka Ábrahámɛn bhuri mɛ́n yí ndɔn áwɔ́, lókhɛ́n ńmo lóphɛ́nta bɛn ha npha, Levi khɛ́n mɛ́n jímiɔn édo ńphaha yí wo bhuri ńdɔn áwɔ́, mɛ́n lɔ, mɛ́n mɔ́n bha Ábrahámɛn nphaha hromɛn.

¹⁰ Átɛsalé lóka Mɛkhisedɛkhi ywɛnli Ábrahámɛn, lóka lókɔn wo ka ho lephan óche Levi. Lókhɛ́n ógɛ tɔlé lóka lókɔn, ńma Ábrahámɛn ali mɛ́n jisɛ nánmí hrómɛn ntɔ́nyán.

¹¹ Levi hwannɛ́n, wo nphahamán wo li, wo phɔ nɔn Yankan khɔ bho ábidí se Izraɛ khúbhɛ́nɛ́n. Lókhɛ́n Levi nphahamán wo júmán wo li, kasé áli júmán bɛn ayɔn dianthé, ka abha lépɛ nphaháwo nankhɛ ábha chán Mɛkhisedɛkhi bhwetɔ́ hrómɛn thándi. Lókhɛ́n nphaháwo lókɔn wo étɔ mɛ́n bhwe, mɛ́n le Arɔn nphaháwo ɔ́nmɔn wo le li brɛ.

¹² Kasé wo jrɛn nphahamán júmán, áyɔn salé wo jrɛn ábidí lɔ.

¹³ Lo Hwánthe lókɔn khɛ́n wo lu mɛ́n hɛ́n tɔ bhwe, ńchan ágotho si nankhɛ. Ló mɛ́n gothonɛ́n hrómɛn, álepɛ lephan ali nphaháwo júmán ńphaha túprán tho.

¹⁴ Lephan khúnbrɛn yɛn salé lo Hwánthe khɛ́n wo étɔ mɛ́n bhwe, wo ho-e Juda mándo hromɛn. Ló ámándonɛ́n lókɔn, lóka Moyízi étɔ nphahamán bhwe, ńnɛn kan wo bhwe ka lóhrómɛn.

Nphaháwo nankhɛ khɛ́n atɛsa Mɛkhisedɛkhi

¹⁵ Ábhwe lókɔn thénthé áphwanka tho, lónɔn ali salé nphaháwo nankhɛ bɛn thandi, ló mɛ́n, ńni lephan bɛn atɛsa Mɛkhisedɛkhi.

¹⁶ Mɛ́n nphaháwo lókɔn ńni, ále chan néphan bidí hrómɛn, lókhɛ́n áchan ńmɛpɔ́bhá álephú sɛ́npɛ́ hrómɛn.

¹⁷ Ló Yankan hrɔ́ étɔlé; “Mɛkhisedɛkhi bidí hrómɛn, ɛ́bha lí nphaháwo ábha sé godo.”

¹⁸ Ló thénthé ábidí lɔ́lɔ́ bhwe phu, átɛsalé ábidí lɔ́lɔ́ enán, ló ále gɛ tɛ́ yíɛkɛ sé lephan.

¹⁹ Áli ábhwe mímí salé Moyízi bidí le tɛ́ yí yɔ́n dianthé, lókhɛ́n thénthé lo yɛn salé áyí lo bho lo mwasrui tre lótho, áli áyíbɛn ayɔn brɛn áyí khúnbrɛn, ló áyí lókɔn, lóphɔ nɔn lo bhá khɔ́ tígbalí Yankan.

²⁰ Lómánji, ápɛ ábhwe Yankan bhɔli phɔ tɔ. Lókhɛ́n lóka wo esán nphahamán nánkhɛ, álepɛ ábhwe Yankan bhɔli phɔ tɔ.

²¹ Lókhɛ́n lóka wo esán Jezwi lí nphaháwo, lóka lókɔn nɔn Yankan bhɔli phɔ tɔ bhwe, lóka ánkranmán Jezwi lée: “Lo Hwánthe bhɔli phɔ tɔ bhwe, ló ánman nɛ́n samɛ́n: ɛ́bha lí nphaháwo ábha sé godo.”

²² Akprɔbha pɔ́pɔ́ hɛ́nthé Jezwi hɔn mɛ́n nbrɛn ha wɔbha.

²³ Akprɔbha lɔ́lɔ́ le akprɔbha pɔ́pɔ́ ɔ́nmɔn hrómɛn, ácu pɛ ábhwe nankhɛ bɛn bháne: lónɔn ali salé ápɛ nphahamán nánkhɛ búdúbúdú bháne, lókhɛ́n wo khúnbrɛn wo khu, ló wo lé cu gɛ lí wo júmán ló hɛ́nmɛn.

²⁴ Lókhɛ́n Jezwi li lephan abha mɛpɔ́ ákakhúnbrɛn, ló mɛ́n nphaháwo júmán lókɔn anní, óle gɛ sa sé lephan nankhɛ.

²⁵ Lóhɛ́nthé néphan khɛ́n asakhɔ mɛ́n phɔ ebhá gɛ Yankan, ángɛ swa wo ncɛ́n le npi. Átɛsalé mɛ́n nɔn ńni lephan abha mɛpɔ́ godo, ló Yankan hɛ́nmɛn, mɛ́n nɔn ántɔ bhwe do néphan ká.

²⁶ Jezwi nɔn ali nphaháwo bhrɔ́khó lo énɛn. Ńni lephan bɛn atɛ créncré. Mɛ́n phɔ álepɛ ápɔnlí le ńne. Yankan hɔn-ɛn yɛn nemán hrómɛn. Yankan hɔn-ɛn jetho, ló ńsrɛn átho khúnbrɛn.

²⁷ Jezwi le tɛsa néphan lócí aphrɛ li nphahamán mrɔ́khómán. Mɛ́n ále nɛn salé ácí khúnbrɛn anmó nphaha nó Yankan hɛ́nmɛn, mɛ́n nbrɛn ne hɛ́nthé, lókhɛ́n lómánji ancu mó nphaha nó Yankan hɛ́nmɛn ápasá ne hɛ́nthé. Lóka khɛ́n ńhɔn mɛ́n nbrɛn se Yankan, ńha npha dɔnbrɛ lópán áphu, ló mɛ́n nphaha lókɔn áli yíbɛn atre lóne godo.

²⁸ Néphan khɛ́n Moyízi bidí san li nphahamán mrɔ́khómán, wo li néphan bɛn wo le yɔn dianthé. Lókhɛ́n Yankan bhwe abhɔli phɔ tɔ, ábidí thwasi khɛ́n áse ábhwe lókɔn. Ló ábhwe lókɔn, lóhrómɛn nɔn Yankan khɔ san mɛ́n Bhi li nphaháwo bhrɔ́khó, ali lephan ayɔn dianthé godo.