EBRENƐ́N 6 - Ebrié New Testament 1996

¹ Tɛmɛ oló hɛ́nmɛn lo yé ábhwe ali néphan gbóngbo bhwe ayé, ló tɛmɛ lo yɔ́ ábhwe ali néphan alili échwɛ yí bhwe kálé. Ló léli salé thénthé nɔn lo bhá cu bhɔ́khwélé kranmán hɔ́n lée ɔ́n chán áyítɛ́ phromɛn phromɛn phɔ féne, ló ɔ́n mú Yankan mímí,

² ló léli sa thénthé nɔn lo bhá cu tɔ ábhwe ali ńduhɛ́nhá dɔndɔn phɔ bhwe, le ńmɔ́n obhó tré néphan tho, ákhúnɔn mɛn chánfe bhwetɔ́, le Yankan kwabhɔ́ ali áyíbɛn ábha tré godo.

³ Tɛmɛ olí júmán ló hɛ́nmɛn! Ló kasé Yankan dɛn, áyí lo énɛn lo tɛ́ lónɔn ali lókɔn.

^4-6 Néphan aphrɛ bha Yankan yéfí hrómɛn lókhɛ́n Yankan bho átho yí sé wo, lókhɛ́n agɛ Nánnánmi Créncré. Néphan khɛ́n aye Yankan bhwetɔ́ bhwábhwá lókɔn, khɛ́n wo nánnánmi hromɛn wo yɛn Yankan cí ebhá lí bhringbi, wo néphan khúnbrɛn lókɔn, kasé wo cu halé wo yíléletɛ́ hrómɛn, óle cu gɛ chɛ́ wo jrɛn wo yítɛ́ npɔhɔ́n, átɛsalé wo néphan khúnbrɛn lókɔn, wo cu wo ehɔ́n Yankan Mi chɛ́ há áyábhletre phɔ, ló wo cu wo echɛ́ angɛ hɛ́nmɛnphrui ápasá hɛ́nmɛn.

⁷ Ńdu lókɔn khɛ́n enɛ́n ákakhúnbrɛn hɛ́n áyíta tho, ló ńdu lókɔn khɛ́n eló áyíta hromɛn, kasé ńdu lókɔn echɛ́ ńyá sómí sé néphan aha ńyá lókɔn, átɛsalé áyíta lókɔn, áli áyíta bɛn Yankan bhɔ ndu.

⁸ Lókhɛ́n kasé áyíta lókɔn echɛ́ ńthó le ńbi phromɛn phromɛn lé mɛ́n tho, áyíta lókɔn óle gɛ bhó tɛ́ yíɛkɛ npɔhɔ́n, átɛsalé cíbɛn Yankan bha phiámɔ́n há mɛ́n tho, ló átɛn bha thɔn-ɛn khóliɛ́.

⁹ Mɛn hɔnsɛ́nhɔn kasé lo étɔ bhwe yábhɛ nɛn sé hɔ́n, áleli wɛ́-nwɛ́ mɛn, átɛsalé ɔ́n ni néphan bɛn lo bhu hɔ́n mímí. Lo yɛn salé hɔ́n si ɔ́n ya áyɔn, lónɔn ali salé Yankan swa hɔ́n.

¹⁰ Yankan li lephan apriman mɛ́n yítɛ́ hrómɛn, ló hɔ́n júmán ɔ́n ni se, le hɔ́n pɔ́ yí ɔ́n tɛ se hɔ́n mɔ́ndɔ́nman hromɛn, lókhɛ́n ɔ́n cu bháne hɔ́n etɛ́ lóyí yábhɛ brɛ sé hɔ́n jɔn krethiɛnmán, lóbhwe bha lé liɛli.

¹¹ Lo yí lo énɛn lónɔn ali salé lephan brɛ brɛ khúnbrɛn abha hɔ́n hrómɛn, wo tɛ́ khékhremɛn lí júmán odi lómɛ́n, ochɛ́sé áyí khɛ́n ɔ́n mo hɔ́n mwasrui tre lótho, cíbɛn ɔ́n gɛ lóyí.

¹² Lo le pɔ salé ɔ́n ní néphan bɛn enán wo júmánlí hrómɛn, lókhɛ́n áyɔn salé ɔ́n tɛ́ yí sa néphan abhu Yankan mímí lókhɛ́n anɔnthɛ́n elí júmán, ló áyí Yankan phrɛ tɔ lóbhwe tre wo lé, wo gɛ lóyí lókɔn.

Yankan yí atɔlé mɛ́n man tɛ́

¹³ Lóka Yankan tɔlé mɛ́n man tɛ́ yí sé Ábrahámɛn, ló ńmɔ́li mɛ́n phɔ tɔ salé lóyí lókɔn sáán mɛ́n man tɛ́. Lónian mɛn khɛ́n álepɛ lephan abanbrɛn Yankan, lókhɛ́n Yankan gɛ bhó mɛ́n lephan lókɔn hɛ́n tɔ bhwe, lóhɛ́nthé lóka Yankan ébhɔlí mɛ́n phɔ tɔ bhwe, ńmo mɛ́n bɛn nbrɛn hɛ́n tɔ bhwe.

¹⁴ Ló Yankan étɔlé: “Mɛn mɔli mɛn phɔ salé mɛn mán mɔ́ hɛ ndu, ló mán chɛ́ hɛ jímiɔn bha thúbhɔ.”

¹⁵ Ábrahámɛn li lephan anɔnthɛ́n, lóhɛ́nthé Yankan bhwe atɔ se, ńgɛ lóyí.

¹⁶ Lóka néphan ébhɔlí phɔ tɔ bhwe, wo bhó lephan abanbrɛn wo hɛ́n tɔ bhwe. Ló ábhwe lókɔn wo bhɔli wo phɔ tɔ, lótho nɔn wo ebhá ya janlí ábhwe khúnbrɛn sé wo.

¹⁷ Lóyábhɛ brɛ Yankan lɔ kasé lephan ébhɔlí mɛ́n phɔ tɔ bhwe, lóbhwe tho nɔn ánya. Lóhɛ́nthé néphan khɛ́n ebhá gɛ Yankan yí abho tre wo lé, Yankan kranman wo gbée salé ábhwe lókɔn mɛɛ́n tɔ, mɛ́n man nɛ́n hɔ́n jrɛn.

¹⁸ Yankan yí atɔlé mɛ́n man sé néphan, le Yankan bhwe abhɔli mɛ́n phɔ tɔ, ábhwe mɔn lókɔn, lóphɔ Yankan lé gɛ lítan. Ló thénthé lo khúnbrɛn lókɔn khɛ́n lo wa lo hrɔman mɛ́n yé salé ando lo kálé, tɛmɛ lo khɔnmán phɔ. Ló áyí khɛ́n lo bho lo mwasrui tre lótho, tɛmɛ lo hɔ́n pɛ kpɛ́ɛ́n.

¹⁹ Ló ńmwasrui lókɔn, átɛsa lo hɛ́nfan bhú. Áli mímí, ágɛlé kpɛ́ɛ́n, ló ádɛgɔn khóo lókɔn wo hɔn diphrisi tre Yankan-khúthé abha átho, ábhúrika lómánji, ló áka ási atɛ créncré abha Yankan-khúthé.

²⁰ Ló ási créncré lókɔn, Jezwi nɔn ali lephan aphrɛ ka lóne khɛ́n áse lo, ló lo hɛ́nthé nɔn ńka lóne. Ló mɛ́n nphaháwo bhrɔ́khó lókɔn ńni, áli áyíbɛn ábha tré lóne godo sa Mɛkhisedɛkhi si akhɔ li nphaháwo.