EBRENƐ́N 5 - Ebrié New Testament 1996

¹ Lephan kasé ɛli nphaháwo bhrɔ́khó néphan nɔn ásán hɛ ló wo chɛ́ hɛ lí júmán sé Yankan wo hɛ́n hrómɛn, ló wo ne hɛ́nthé, ɛbhó nphaha le ápɔ́yí ɔ́nmɔn sé Yankan.

² Ló lephan lókɔn khɛ́n ali nphaháwo bhrɔ́khó, lónian mɛn khɛ́n mɛ́n nbrɛn lɔ ńni lephan bɛn enán áyí khúnbrɛn hrómɛn, lóyábhɛ nɛn, ángɛ ní lephan apɛ thɛ́nbhwá se néphan ale yɛn bhwe khɛ́n ékhrɛ phɔ.

³ Lónian mɛn khɛ́n nphaháwo bhrɔ́khó lókɔn mɛ́n nbrɛn lɔ ńni lephan enán, ló kasé énɛn salé anmó yí no ha npha ápasá ne hɛ́nthé, áyɔn salé anmó yí no ha npha mɛ́n nbrɛn ne hɛ́nthé lɔ.

⁴ Nphaháwo bhrɔ́khó lókɔn olí, áleli lephan nɔn ásán mɛɛ́n bɛn nbrɛn, Yankan nɔn áche lephan lónɔn ɛlí nphaháwo bhrɔ́khó, sa lósi Yankan khɔ che Arɔn ló ńni nphaháwo bhrɔ́khó.

⁵ Lóyábhɛ brɛ, Krisi le tɔlé mɛ́n mó nguhá sé mɛ́n nbrɛn, ló mɛ́n ní nphaháwo bhrɔ́khó, léliló. Lókhɛ́n Yankan nɔn akrɛnmɛn lée: “Hɛ nɔn ɛli mɛn Bhi, ló achan ncɛ́n élo, mɛn nɔn mɛn ni hɛ The.”

⁶ Ló cíbɛn Yankan phrɛ tɔlé: “Ɛ́bha lí nphaháwo ábha sé godo sa Mɛkhisedɛkhi si akhɔ li nphaháwo.”

⁷ Lóka khɛ́n Jezwi bha áthéji, mɛ́n lɔ anmɔ́ ntráhɛ́nlé na Yankan, annúkhwɛ́ mi Yankan bhwe, anthɔ́n hɛ́ndu che Yankan. Átɛsalé Yankan nɔn ali lephan ábha gɛ hɔ́n-ɛn yɛn ákhú hrómɛn. Lóka khɛ́n ńhɔn mɛ́n nbrɛn se Yankan ábhwejí hrómɛn, Yankan dɛn ye mɛ́n tɔ́.

⁸ Jezwi lókɔn wo étɔ mɛ́n bhwe, ńni Yankan Mi, lótɛ khɛ́n mɛ́n lɔ ńkhɔ áyíkhúphɔ khúnbrɛn hrómɛn ji Yankan bhwe.

⁹ Lóka Yankan tɛ ńpríman, néphan khúnbrɛn khɛ́n adɛn éji, mɛ́n míbrɛ nɔn ńni lephan esé wo mɛpɔ́bhá álephú.

¹⁰ Ló mɛ́n nɔn Yankan krɛnmɛn lée anní nphaháwo bhrɔ́khó sa Mɛkhisedɛkhi si akhɔ li nphaháwo.

Ɔ́n ne chán hɔ́n mímíbhú phɔ wá féne

¹¹ Ápɛ ábhwe búdúbúdú bháne lo énɛn lo tɔ sé hɔ́n yé. Lókhɛ́n lósi lo bhá khɔ́ lɛ lóthé sé hɔ́n yé, ákhɔ́nman se lo, átɛsalé ɔ́n ni néphan bɛn hɔ́n bhweyɛ́n cha.

¹² Ácí khɛ́n wo chan lie hɔ́n yí salé ɔ́n ní yíliemán ámɔn. Lótɛ khɛ́n Yankan bhwetɔ́ hrómɛn, ɔ́n cu hɔ́n énɛn lephan nankhɛ olie hɔ́n yí ali áyí ólie néphan alili échwɛ yí. Ńnɛn ali néphan gbóngbo nɛn alí, ɔ́n yɔ ló-ɛ ka, lókhɛ́n ɔ́n máne hɔ́n eyɛ́n yɛn ntɔ́nyán.

¹³ Lephan khɛ́n eyɛ́n yɛn ntɔ́nyán átɛsalé ńni yípɔ bhri, ńni lephan bɛn alepɛ ábhweyɛ́n, ánnɛn gɛ yɛ́n áyíbhwá le áyíléle.

¹⁴ Néphan khɛ́n atɛ nkhó phu, wo nɔn wo gɛ lí néphan gbóngbo nɛn alí, átɛsalé áyí khúnbrɛn hrómɛn, wo nɔn wo gɛ yɛ́n áyíbhwá le áyíléle.