EBRENƐ́N 4 - Ebrié New Testament 1996

¹ Yankan phrɛ tɔtre salé, lo bhá di ási khɛ́n mɛ́n mo áfíkhwá tre lo lé. Lóhɛ́nthé tɛmɛ ɔ́n hámwanhɛ́n, ló hɔ́n hrómɛn, olépɛ lephan brɛ khɛ́n áfíkhwá lókɔn Yankan tɔ lóbhwe tre, mɛ́n-ɛ annɛn ká lóhrómɛn.

² Átɛsalé Ábhwe Bhwábhwá lókɔn khɛ́n thénthé wo tɔ se lo ye ɔn, wo tɔ se néphan lócí abha ánánkhuthé. Wo ye ábhwe lókɔn, lókhɛ́n ále tɛ wo yíɛkɛ, átɛsalé wo le dɛn do ábhwe lókɔn mímíbhú hrómɛn.

³ Ló lo khɛ́n lo bhu ábhwe lókɔn mímí, lo bhá gɛ áfíkhwá lókɔn, lóhɛ́nthé nɔn Yankan étɔlé: “Ńthɛ́nyan hromɛn mɛn mɔli phɔ tɔ salé: Néphan lókɔn, wo bha lé di ákhúbhɛ́ si khɛ́n mɛn mo áfíkhwá tre wo lé!” Lóka Yankan étɔ ábhwe lókɔn, mɛ́n júmán khɛ́n ńmɔhɛ́n anní lóka antɛ́ áthéji, lójúmán lókɔn áphu.

⁴ Ló mímí nbrɛn Yankan hrɔ́ hrómɛn, ási bɛn wo étɔ ácí lókɔn ali ńcíbhí khwache bhwe, ló wo étɔlé: “Ńcíbhí khwache hromɛn, Yankan jran mɔ́n éfikhwá mɛ́n júmán khúnbrɛn ńni hromɛn.”

⁵ Ló Yankan hrɔ́ brɛ lókɔn hromɛn, wo étɔlé: “Néphan lókɔn, wo bha lé di ákhúbhɛ́ si mɛn mo áfíkhwá tre wo lé.”

⁶ Néphan khɛ́n aphrɛ ye Ábhwe Bhwábhwá lókɔn ɔn, wo le di ákhúbhɛ́ lókɔn, átɛsalé wo le bhu mímí. Lótɛ khɛ́n néphan fe bháne, Yankan se wo mɔ́nsi salé wo di ákhúbhɛ́ lókɔn.

⁷ Ló ábhwe lókɔn, élie lo salé Yankan cu tɛ ácí nánkhɛ bɛn óche “Ncɛ́n”. Godo cí, Yankan hrɔ́ brɛ lókɔn hromɛn, Davi phrɛ tɔ ábhwe lókɔn, lóka ántɔlé: “Ncɛ́n kasé ɔ́n ye Yankan tɔ́, ɔ́n ne khɔnmán thɛ́n.”

⁸ Kasé áfíkhwá lókɔn khɛ́n Yankan phrɛ tɔ lóbhwe tre, Jozwe yalí néphan ló lóhrómɛn, ka lómánji Yankan bha lé gɛ tɔ bhwe lú ácí nánkhɛ bɛn hɛ́n.

⁹ Lóyábhɛ brɛ, ápɛ áfíkhwá bɛn bháne se Yankan-gbemán, sa lósi yábhɛ brɛ khɛ́n, ńcíbhí khwache hromɛn Yankan nbrɛn jran mɔ́n éfikhwá.

¹⁰ Átɛsalé lephan kasé ɛgɛ áfíkhwá lókɔn khɛ́n Yankan phrɛ tɔ lóbhwe tre, hɛ lɔ áyɔn salé ɛyɔ́ hɛ júmán ká ló ɛfikhwá, sa lósi Yankan nbrɛn khɔ yɔ mɛ́n júmán ka ló ńfikhwa.

¹¹ Tɛmɛ lo tɛ́ khékhremɛn ló lo lɔ, lo ká áfíkhwá lókɔn hromɛn. Tɛmɛ lo tɛ́ khékhremɛn, ló ochɛ́sé lo hromɛn olépɛ lephan brɛ ogɛ Yankan ɔ́nmɔn swan, khɛ́n annɛn ká áfíkhwá lókɔn hromɛn, sa lósi néphan lókɔn lócí abha ánánkhuthé, khɔ gɛ Yankan ɔ́nmɔn swan, ló wo le ka áfíkhwá lókɔn hromɛn.

¹² Yankan bhwetɔ́ lókɔn, áli áyíbɛn abha mɛpɔ́, áli áyíbɛn apɛ sɛ́npɛ́. Áli áyíbɛn ephú brɛn khókhríyan mɛbhí mɔn ya. Ábhwetɔ́ lókɔn, áli áyíbɛn abha lephan nánmí hrómɛn. Áli khókhríyan bɛn éjan yí khúnbrɛn bhuri mɔn, lónɔn ébhuri lephan hɛ́nfan le lephan nánnánmi, khókhríyan lókɔn ájan yí ló thé, ádi lephan nchwe le lephan npiɔ ɔ́nmɔn phɔ. Yankan bhwetɔ́ lókɔn, lónɔn ebhɔ́ áyí khúnbrɛn abha lo thɛ́n hrómɛn kwa, lo thɛ́n yí apɔ le lo hɛ́nphe lo ebhú.

¹³ Yankan hɛ́nmɛn, álepɛ yí ahrɔman. Áyí khúnbrɛn Yankan tɛ, áli áyíbɛn aka ngbémɛn, áli áyíbɛn aphwan haphá tre mɛ́n hɛ́nmɛn, ló lo yí khúnbrɛn lo tɛ, mɛ́n nɔn lo bhá lɛ lómɛ́n se anyé.

Jezwi nɔn ali nphaháwo bhrɔ́khó

¹⁴ Mímíbhú lókɔn khɛ́n lo étɔ lóbhwe, tɛmɛ lo gɛlé ya lóhrómɛn. Lo pɛ nphaháwo bhrɔ́khó bɛn bháne, ńno kábrɛ kábrɛ ńdi Yankan hɛ́nmɛn: mɛ́n nɔn ńni Jezwi ali Yankan Mi.

¹⁵ Lo nphaháwo bhrɔ́khó lókɔn lo pɛ, ńyɛn salé lo li néphan bɛn enán. Ló áyí khúnbrɛn hrómɛn wo sui wu sa lo a, lókhɛ́n ńnɛn tɛ ne.

¹⁶ Mímíbhú hrómɛn, tɛmɛ lo tígbalí Yankan Bhringbi yákhru ali ási áphɔlíman bha. Lóne nɔn lo bhá gɛ lo ne yɔ́phɔ́ le áphɔlíman ali áyí ábha dɔnmán lo mɔ́n lóka lo emián.