EBRENƐ́N 3 - Ebrié New Testament 1996

Jezwi banbrɛn Moyízi

¹ Lóhɛ́nthé hɔnsɛ́nhɔn krethiɛn, hɔ́n khɛ́n ɔ́n ni néphan Yankan che bha mɛ́n phɔ, tɛmɛ hɔ́n hɛ́nphebhú otré Jezwi míbrɛ tho, átɛsalé Jezwi nɔn Yankan chɛ bha áthéji, ló anní nphaháwo bhrɔ́khó lo mímíbhú júmán hrómɛn.

² Átɛsalé Jezwi nɔn ali lephan agɛlé ya Yankan phɔ, ló mɛ́n nɔn Yankan sɛn anní júmán yábhɛ lókɔn sa lósi “Moyízi khɔ gɛlé ya Yankan le mɛ́n bháthónɛ́n khúnbrɛn ɔ́nmɔn phɔ.”

³ Lephan khɛ́n athan nkhú, mɛ́n annéhɛ́n brɛn ńkhú nbrɛn wo than. Lóyábhɛ brɛ, áyɔn salé Jezwi oléhɛ́n brɛn Moyízi.

⁴ Ńkhú khúnbrɛn lókɔn lo ewú, ápɛ lephan tɛɛ athan, lóyábhɛ brɛ, Yankan nɔn atɛ áyí khúnbrɛn.

⁵ Lókhɛ́n Moyízi nɔn ali lephan agɛlé ya Yankan phɔ, lóka ńma Yankan bháthó anní júmán. Ló ábhwe khúnbrɛn khɛ́n Moyízi tɔ, áli ábhwe atre cíbɛn Yankan ebhá tɔ.

⁶ Lókhɛ́n Krisi li lephan bɛn agɛlé ya Yankan phɔ, átɛsalé mɛ́n nɔn ńni Yankan Mi khɛ́n Yankan bháthó khúnbrɛn bha mɛ́n mɔ́n mɛn. Ló mímí nbrɛn, lo nɔn lo li mɛ́n bháthónɛ́n, kasé lo ékhɔnmán phɔ, lókhɛ́n lo pɛ mímíbhú se áyí lo bho lo mwasrui tre lótho.

Áfíkhwá atre ébo Yankan-gbemán

⁷ Sa ló Nánnánmi Créncré étɔ a: “Ncɛ́n kasé ɔ́n ye Yankan tɔ́,

⁸ ɔ́n ne khɔnmán thɛ́n sa hɔ́n jisɛmánhɔn yí atɛ, lóka wo gɛ Yankan ɔ́nmɔn wo éswan, sa wo yí wo tɛ ánánkhuthé lócí lókɔn, lóka wo su Yankan wu.

⁹ Ló Yankan étɔlé, lóne hɔ́n jisɛmánhɔn gɛ mɛn ɔ́nmɔn swan, ló wo su mɛn wu, lótɛ khɛ́n ńpá ágrebhɛ wo li néphan bɛn wo phrɛ wu mɛn yí mɛn tɛ.

¹⁰ Lóhɛ́nthé mɛn do thɛ́nyan se aféchwe lókɔn ló mɛn kranman wo lée: ‘Ákakhúnbrɛn wo li aféchwe bɛn wo hɛ́nphebhú ékhrɛ, ló wo lé yɛ́n lóyí mɛɛ́n nɛn sa wo tɛ́ sé mɛn.’

¹¹ Ló mɛn thɛ́nyan hromɛn, mɛn mɔli phɔ ntɔ salé: Wo bha lé di ákhúbhɛ́ si khɛ́n mɛn mán sé wo áfíkhwá!”

¹² Hɔnsɛ́nhɔn, hɔ́n khúnbrɛn lókɔn khɛ́n ɔ́n mu mímí sa mɛn ɔn, tɛmɛ ɔ́n hámwanhɛ́n ya, ló hɔ́n hrómɛn, olépɛ lephan khɛ́n mɛ́n thɛ́n phromɛn ńpɛ hɛ́nthé, le mɛ́n mímíbhú ńnɛn pɛ hɛ́nthé, anchán Yankan abha mɛpɔ́ phɔ féne.

¹³ Lókhɛ́n hɔ́n hrómɛn, olépɛ lephan khɛ́n mɛ́n neyítɛ́ okhrɛ, lókhɛ́n ankhɔnmán thɛ́n chré. Ácí khúnbrɛn, tɛmɛ ɔ́n khɔnmán hɔ́n bɛn nbrɛn phɔ, ló Yankan hrɔ́ bhwe lókɔn atɔlé “Ncɛ́n”, ábhwe lókɔn lo lɔ áli lo bhwe.

¹⁴ Lo khúnbrɛn lókɔn, kasé lo mímíbhú lo pɛ ásithwá, lo bhá hɔ́n pɛ ábha di lómɛ́n, élie salé lo li Krisi mɛ́n néphan.

¹⁵ Lóhɛ́nthé Yankan hrɔ́ étɔlé: “Ncɛ́n kasé ɔ́n ye Yankan tɔ́, ɔ́n ne khɔnmán thɛ́n chré sa hɔ́n jisɛmánhɔn yí atɛ, lóka wo gɛ Yankan ɔ́nmɔn wo éswan.”

¹⁶ Ló bánnɛ́n nɔn aye Yankan tɔ́, lókhɛ́n agɛ Yankan ɔ́nmɔn éswan ɛ? Wo néphan lókɔn, wo nɔn wo li néphan khúnbrɛn khɛ́n Moyízi do chan Ejiphithi khúbhɛ́ thándi.

¹⁷ Saji bánnɛ́n nɔn Yankan do thɛ́nyan se ńpá ágrebhɛ ɛ? Yankan do thɛ́nyan se néphan atɛ ne, néphan áyí brɛn mɔ́n lókhɛ́n akhu ánánkhuthé.

¹⁸ Lóka Yankan bhɔli phɔ tɔlé: “Wo bha lé di ákhúbhɛ́ si khɛ́n mán sé wo áfíkhwá”, bánnɛ́n bhwe nɔn ántɔ ɛ? Néphan khɛ́n agɛ Yankan ɔ́nmɔn éswan ɔn, wo bhwe nɔn ántɔ.

¹⁹ Mímí nbrɛn aféchwe lókɔn, lo yɛn salé wo le di ákhúbhɛ́ lókɔn, átɛsalé wo le bhu Yankan mímí.